Nan Apesa 16 - Chahta Holisso Holitopa 1886

¹ Atuk osh Samson ʋt Kasa ya̱ ona cha, yʋmma ohoyo haui pisa cha, iba chukowa tok.

² Atuk o̱ Kasait ʋhleha ha̱ im anolit, Samson ʋt ilʋppa ʋlʋshke, achi tok. Mihma afulloblit holihta okhissa im aiehchit aiasha na ninak achʋfa tok: mihmʋt, Onnahinli onnʋt tahak mak o̱ e bashke, achi mʋt, nuktaiyalʋt ai asha na onna tok.

³ Mihma Samson ʋt itonla na ninak iklʋna tuk osh ninak iklʋna ma wakaya cha, holihta okhissa isht okshilita, micha iti hieli tuklo, micha iti okhowata aiena ka ishi cha, isht iabanali cha, isht iʋt, nʋnih Heblon itikba hikia ka paknaka isht ona tok.

⁴ Atuk osh yakohmi tok, i̱ himmakma Solek okfa ohoyo yʋmma hohchifo kʋt Telilah ya̱ anushkunna tok.

⁵ Mihma Filistin okla i̱ hochitoka ʋhleha hʋt im ʋla cha, Ish haksichi cha, isht im ai i̱ hlampko chito kʋt kanima yak o̱ itola ka, micha kaniohmi kak osh il imaiya hinla aiena ka ish im akostininchi na e takchi cha, il ilbʋshalashke; mikma e moyuma kʋt tʋli hʋta tushahli tahlepa auah achʋfa ho̱ e chimashke, im achi tok.

⁶ Mihma Telilah ʋt, Samson a̱, Isht chim i̱ hlampko chinto kʋt kanima yak o̱ itoyula hokma, micha nana ho̱ isht chi talakchi na chilbʋshala hinlakma is sʋm anolashke, chim asilhha lishke, im achi tok.

⁷ Mihma Samson ʋt fuli okcha̱ki untuklo shileli tok keyu ho̱ ishit sa takchi hokma, sa kotʋt, hatak inla kak inli chohmi la hinla hoke, im achi tok.

⁸ Mihma Filistin okla i̱ hochitoka yʋt fuli okcha̱ki untuklo shileli tok keyu ho̱ isht im ona na ishit takchi tok.

⁹ (Atuk o̱ hatak ʋt im aiehchi kʋt aboha anu̱kaka apehʋt a̱sha tok.) Mihma, Filistin ʋhleha hʋt chishishke; Samson ma! achi tok. Mihma fuli okcha̱ki tʋptuli kʋt nuchi ponola hosh luak haleli cha, tʋptua ka chohmichi tok. Yohmi ho̱ a hlampko ka ik akostinincho tok.

¹⁰ Mihma Telilah ʋt Samson a̱, Yakeh! peh is sa̱ yimmichi cha, is sa̱ holabishke; himakʋno nana ho̱ ishit chi talakcha hinla ka is sʋm anolashke, chim asilhha lishke, im achi tok.

¹¹ Mihma, Aseta himona nana ishit talakchi tok keyu ho̱ kʋllochit ishit sa takchi hokma, sa kotʋt, hatak inla kak inli chohmi la hinla hoke, im achi tok.

¹² Yohmi ma Telilah ʋt aseta himona ishi cha, ishit takchi mʋt, Filistin ʋhleha hʋt chishishke, Samson ma! im achi tok. (Mihma im aiehchi ʋt aboha anu̱kaka a̱sha tok.) Mihma ponola nana chohmichit shakba ishit talakchi tuk ʋt tʋblit kanchi tok.

¹³ Mihma Telilah ʋt Samson a̱, Himak a̱ ant ʋhli is sa̱ yimmichit is sa̱ holabi bekʋshke, nana ho̱ ishit chi talakcha hinla kʋt ʋm anolí, im achi tok. Mihma, Sa noshkobo pa̱shi tʋnna untuklo ka ponola ʋpi ish a tʋnʋchi hokmʋno, im achi tok.

¹⁴ Mihma chofak ash isht a nʋhlichit kʋllochi mʋt, Filistin ʋhleha hʋt chishishke, Samson ma! im achi tok. Mihma nusit itonla tuk ʋt nana atʋnna iti okhowata chofak ash, micha ponola ʋpi aiena ka i̱shit ia tok.

¹⁵ Mihma, Katiohmi kak osh, Chi̱ hullo li, ish acha hinla? chi chu̱kʋsh ʋt sʋbafo̱ka keyu kʋt, im achi tok. Ilʋppʋt ont isht atuchina mak o̱ is sa̱ yimmichi cha, chim i̱ hlampko chito ʋt ai itola ka chik sʋm anoloshke, im achi tok.

¹⁶ Atuk o̱ yakohmi tok, onna hosh onnakma im anumpa ha̱ isht im achibʋt atu̱shpalechi fehna tok; yohmi ho̱ imi shilombish ʋt im okpulot illa̱ he chiyuhmi tok:

¹⁷ Yohmi na chu̱kʋsh nana anukfohka tuk ʋt moma im anolit, Nutakhish ishit sha̱fi ʋt sa noshkobo ha̱ onʋtoyula tok keyu chatuk oke: hʋshki im oshʋto fohka li moma hosh Chitokaka i̱ Nasalait sia hatok okʋt: sa sha̱fa hokma, im i̱ hlampko ʋt a̱ kʋnia cha, sa kotʋt, hatak inla kak inli chohmi la hinla hoke, im achi tok.

¹⁸ Mihma chu̱kʋsh nana anukfoyuka hatuk ʋt moma im anoli na Telilah ʋt pisa mʋt, Filistin okla i̱ hochitoka ʋhleha ha̱ i̱ howʋt hoyo cha, Himonna ilʋppa hʋsh lashke, chu̱kʋsh nana anukfoyuka kʋt moma ʋm anoli hoka, achi tok. Yʋmohmi ma Filistin okla i̱ hochitoka ʋhleha hʋt tʋli holisso ya̱ ibbak isht i̱shit im ʋla tok.

¹⁹ Mihma iyi̱kʋlaha paknaka a nusichi tok; mihmʋt hatak o̱ hoyo cha, noshkobo pa̱shi tʋnna untuklo kash sha̱fichechi tok: micha hotopalit isht ia ma, im i̱ hlampko ʋt i̱ kʋnia tok.

²⁰ Mihma, Filistin ʋhleha hʋt chishishke, Samson ma! achi tok. Mihma nusi tuk ʋt okcha mʋt, Tikba yohmi li beka tuk ʋt chohmi lish, kohchʋt ile tahtoli lashke, achi tok. Micha Chihowa yʋt issʋt ia tuk a̱ ik ithano tok.

²¹ Amba Filistin ʋhleha hʋt ishi cha, nishkin a̱ fotohlit kocha wehli mʋt, Kasa ya̱ isht ona cha, asonak lakna ibbak a̱ abehlit takchi tok; mihma aboha kʋllo ya̱ afotohli tok.

²² Yʋmohmi kia noshkobo pa̱shi ʋt sha̱fa hayʋt anonti offot isht ia tok.

²³ Yʋmohmi ma Filistin okla i̱ hochitoka ʋhleha hʋt nan ʋbit isht aiokpʋchi chinto ho̱ i̱ naholbʋt toba Takon a̱ im issʋt na yukpʋt ai asha chi̱ hosh iti hoyot itʋnaha tok: mihmʋt, Pi̱ naholbʋt toba yak osh Samson pin tʋnʋp a̱ pibbak a̱ fohki tuk oke, okla achi hatuk okʋt,

²⁴ Mihmʋt okla pisa mʋt, i̱ naholbʋt toba ya̱ ahninchit isht anumpuli tok: Pi̱ naholbʋt toba yak osh pin tʋnʋp, micha pi̱ yakni okpʋni, la̱wa ka pibi tuk a̱ pibbak a̱ fohki tuk oke, okla achi hatuk okʋt.

²⁵ Atuk o̱ yakohmi tok, okla chu̱kʋsh yukpa mʋt, Samson a̱ ho hoyo na pim itukhlakafʋt pi yukpʋchashke, achi tok. Mihma Samson a̱ aboha kʋllo kohchit hoyo tok: mihma im itukhlakafʋt yukpʋchi tok: mihma toni̱k tuklo ho̱ ititakla hilechi tok.

²⁶ Mihma Samson ʋt ʋlla ibbak halʋlli tuk a̱, Ʋlhpesa is sʋm ahni na toni̱k chuka ʋt onʋtoyula ka potoli lish, ataya lashke, im achi tok.

²⁷ Chuka yoka hatak, micha ohoyo aiena kʋt alotowa tok: mihma Filistin okla i̱ hochitoka moma kʋt yʋmma a̱sha tok: mikma hatak, micha ohoyo tahlepa sipokni tuchina foka hosh Samson ʋt im itukhlakafʋt yukpʋchi ka pisa kʋt, aboha ishit holmo paknaka aiasha tok.

²⁸ Mihma Samson ʋt Chihowa ya̱ i̱ pa̱ya cha, Chihowa Chitokaka ma! is sʋthaiyanashke, chim asilhha lishke, micha is sa hlampkochashke, chim asilhha lishke, yohmi na himonna ilʋppak bano ho̱ sa nishkin tuklo tuk a̱ Filistin ʋhleha ha̱ il aiokha lashke, Chitokaka ma! achi tok.

²⁹ Mihmʋt Samson ʋt toni̱k tuklo iklʋna hieli chuka yʋt on talaiʋt ʋba takali tuk a̱ ibbak isht impakimma achʋfa ka isht ishi mʋt, achʋfa ya̱ ibbak ʋlhfʋbekimma isht ishi tok.

³⁰ Mihmʋt Samson ʋt, Filistin ʋhleha ha̱ awant sʋllashke, achi tok. Mihmʋt alushummit il akachunolechi tok: mihma chuka ʋt hochitoka ʋhleha, micha okla moma aiena anu̱ka a̱sha tuk a̱ o̱ kinafa tok. Yohmi ho̱ ambit illi na illi kak osh laua kʋt okcha̱ya mʋt, ʋbi tuk ak kia i̱ shahli tok.

³¹ Mihma itibapishi ʋhleha hʋt, micha i̱ki in chuka moma kʋt ona cha, ishit i̱ki Manoah im ahollopi Solah, micha Eshtaol itintakla yak o̱ isht onʋt a hohpi tok. Mihma Islael a̱ afʋmmi pokoli tuklo ho̱ nan im apesa tok.