Nan Apesa 15 - Chahta Holisso Holitopa 1886

¹ Yohmi tuk kia yakohmi tok, nitak i̱ himmak foka ma onush ʋmo yo̱, Samson ʋt issi kosoma ushi ishi cha, tekchi ya̱ i̱ nowʋt ona tok; micha, Aboha ya̱ chukowʋt, sa tekchi ya̱ iba chukowa lashke, achi tok. Yohmi kia i̱ki ʋt ik chukowá, ik im ahno ki tok.

² Mihma i̱ki ʋt, Ish shitilemʋt ʋmohmi ahni li kʋt a̱hli tuk; yʋmohmi hatuk osh ish ai itapeha ya̱ ima li tuk: nakfish ʋt aiokli kʋt i̱ shahli keyu̱? atobbichit yʋmmak o̱ ish ishashke, chim asilhha lishke, achi tok.

³ Mihma Samson ʋt yʋmma isht anumpuli mʋt, Himak a̱ nan ik im achukmo ka ak yʋmihchi hoh kia, anumpa onʋtola keyu kʋt Filistin ʋhleha ha̱ i̱ shahli la chi̱ hoke, achi tok.

⁴ Mihma Samson ʋt iʋt, chula tahlepa tuchina ho̱ hokli cha, hasimbish bi̱ka ititikelichi cha, hasimbish tuklo ka itintakla pʋla ha̱ takalichi tok.

⁵ Micha pʋla ha̱ luak lapalichi cha, Filistin ʋhleha im onush hiki̱a ka, pit tihleli na onush talakchi, micha hiki̱a aiena, micha pa̱ki ahollokchi, micha alif aiena ka hukmit tahli tok.

⁶ Yʋmohmi ma Filistin ʋhleha hʋt, Kʋta hosh yakohmichi cho? achi tok. Mihma afalamichit, Samson Timnait iyup ak oke, tekchi yatuk a̱ im ishi cha, ai itapeha ya̱ ima kak o̱ yʋmihchi hoke, achi tok. Mihma Filistin ʋhleha hʋt ʋlʋt yʋmma, micha i̱ki aiena ka luak ishit hukmi tok.

⁷ Mihma Samson ʋt, Ilʋppak okʋno hʋsh yʋmihchi ak inli kia, hʋchishno ya̱ il aiokha la chi̱ hoke, micha i̱ himmakma issa la chi̱ hoke, im achi tok.

⁸ Mihmʋt lauachit ʋbi na iyubi achoshuli, micha iyubi aiena kʋt iti onʋtola tok. Mihmʋt Etam tʋli chiluk ona cha, ai ʋtta tok.

⁹ Yʋmohmi ma Filistin ʋhleha hʋt iʋt, Chutah ya̱ a binachi cha, Lehi ak o̱ pataiyʋt a̱ya tok.

¹⁰ Mihma Chutah hatak ʋhleha hʋt, Nanta katiohmi ho̱ pitibit hʋsh la cho? achi tok. Mihma afalamichi mʋt, Samson ak o̱ e takchi cha, nana pi kaniohmichi tuk a̱ ilap ma e yʋmihcha chi̱ hosh e la hoke, achi tok.

¹¹ Yʋmohmi ma Chutah hatak tahlepa sipokni tuchina hosh Etam tʋli paknaka ona cha, Samson a̱, Filistin okla hʋt pi̱ shahli ya̱ chik ithano ke tuk oh cho? ilʋppʋt nanta ho̱ ish pi yʋmihchi cho? im achi tok. Mihma, okla si yʋmihchi tuk mak o̱ yʋmihchi li tuk oke, im achi tok.

¹² Mihma, E chi takchi cha, Filistin okla ibbak e fohka chi̱ hosh e la hoke, im achi tok. Mihma Samson ʋt, Anumpa kʋllo il onochit hʋs sʋba he keyu kʋt hʋs sa̱ mihashke, im achi tok.

¹³ Mihma im anumpulit, Keyú, amba kʋllochit e chi takchi cha, yʋmma ibbak a̱ e chi fohka chi̱ hoke; amba e chiba he keyu kʋt a̱hli hoke, achi tok. Mihmʋt aseta himona tuklo ho̱ tʋli ya̱ ont ishit takchi cha, ai isht ʋla tok.

¹⁴ Atuk o̱ Lehi ya̱ ʋla ma, Filistin ʋhleha hʋt i̱ shakapa tuk: mihma Chihowa imi Shilombish ʋt onʋtola fehna ma, aseta ishit talakchi kash osh nuchi yosh luak o̱ ishit lua tuk chohmi tok: mihma ibbak ishit talakchi tuk ʋt mokohli tok.

¹⁵ Mihma issuba haksobish falaia nutakfa foni himona yo̱ ahayuchi cha, ibbak a̱ pit weli cha, ishi mʋt, hatak tahlepa sipokni achʋfa ho̱ isht ʋbi tok.

¹⁶ Mihma Samson ʋt, Issuba haksobish falaia nutakfa foni yo̱ itʋnahahchi ʋt itontʋlhkʋchi ka, issuba haksobish falaia nutakfa ya̱ hatak tahlepa sipokni achʋfa ho̱ isht ʋbi lishke, achi tok.

¹⁷ Atuk osh yakohmi tok, anumpulit issa mʋt, nutakfa foni ya̱ kanchi cha, yʋmma Lamalh‐lehi hochifo tok.

¹⁸ Mihmʋt itukshila fehna mʋt, Chihowa ya̱ i̱ pa̱ha̱yʋt, A hlakofi chinto ilʋppa chin tishu ha̱ ibbak ish fohkishke: mihma himak a̱ itukshila hosh sʋlli cha, hakshup ik tapo ibbak fohka la chi̱ cho? achi tok.

¹⁹ Yohmi kia Chitokaka yʋt nutakfa kulukbi ya̱ pahlʋlli na oka yʋt kohcha tok: mihma ishko mʋt, im ilhfiopak ʋt anonti i̱ falama cha, nipi okcha tok. Yʋmohmi ho̱ yʋmma hochifot Enhakkoli achi tok o̱, himak nitak a̱ Lehi ya̱ talaia hoke.

²⁰ Micha Filistin okla i̱ nitak a̱ afʋmmi pokoli tuklo ho̱ yʋmmak ash osh Islael a̱ nan im apesa tok.