Nan Apesa 14 - Chahta Holisso Holitopa 1886

¹ Mihma Samson ʋt Timnalh a̱ ona cha, Filistin okla ushetik ʋhleha ha̱ ai achʋfa ohoyo ho̱ Timnalh a̱ a pi̱sa tok.

² Atuk osh falamʋt ʋla mʋt, i̱ki, micha ishki itatuklo ka im anoli mʋt, Filistin okla ushetik ʋhleha ha̱ ai achʋfa ohoyo ho̱ Timnalh a̱ a pi̱sa li tuk: yʋmohmi hoka himak a̱ sa tekchi yachi̱ ho̱ ishit hʋs sʋmashke, achi tok.

³ Yʋmohmi ma i̱ki, micha ishki itatuklo kʋt, Chitibapishi ʋhleha, keyukmʋt ʋm okla moma ka ushetik ʋhleha ha̱ ohoyo hʋt iksho nanta ho̱, iʋt hakshup ik tapo Filistin okla ha̱ ohoyo ish ai isha chi̱ cho? im achi tok. Mihma Samson ʋt i̱ki ya̱, Isht is sʋmashke, ahninchi li fehna hoka, im achi tok.

⁴ Yohmi kia Chihowa yak atuk mak o̱ Filistin ʋhleha ha̱ nan isht mihʋt i̱ sanali anukfilli ka i̱ki, micha ishki itatuklo kʋt ik akostinincho tok; nitak yʋmmak oka Filistin okla hʋt Islael a̱ i̱ shahli tok.

⁵ Yʋmohmi ma Samson, micha i̱ki, micha ishki aiena kʋt Timnalh a̱ iʋt ona tok, micha Timnalh pa̱ki ahollokchi ya̱ ona tok: mihma yakeh! koi chito himita yʋt kilihi̱hʋt afama tok.

⁶ Mihma Chihowa imi Shilombish ʋt onʋtola fehna ma, issi kosoma ushi yokmá yʋmihcha he tuk ʋt chohmichit hlilʋffi tok, yohmi kʋt ibbak a̱ nana fo̱ka tok keyu: yohmi kia nana kaniohmichi tuk ʋt i̱ki, micha ishki itatuklo ka im anoli tok keyu hoke.

⁷ Mihma ia cha, ohoyo hash ont it im anumpuli tok: mihmʋt Samson ʋt ahninchi fehna tok.

⁸ Atuk osh nitak inla ma ohoyo hash isha chi̱ hosh ia tuk osh koi chito illi yash pisa chi̱ hosh fullota tok; micha yakeh! foishki, micha foi bila aiena kʋt koi chito illi yash anu̱kaka ya̱ aiasha tok.

⁹ Mihma ibbak isht ishi cha, ahampʋt ia tuk osh, i̱ki micha ishki itatuklo ai a̱shwa ka ona mʋt, ima na ʋpʋt okla tok: yohmi kia foi bila ya̱ koi chito illi yash anu̱kaka ya̱ ai ishi tuk ʋt ik im anolo tok.

¹⁰ Yohmi ma i̱ki ʋt ohoyo ai ʋtta ka ona tok: mihma Samson ʋt ipetʋchi ikbi tok: hatak himithoa yʋmmak o̱ yohmi beka tok oka.

¹¹ Atuk o̱ yakohmi tok, okla pisa mʋt, itapeha chi̱ ka it i̱ kana pokoli tuchina ho̱ okla isht ʋla tok.

¹² Mihma Samson ʋt Inta! himak a̱ nana it im ithana hʋchin takalichi lashke: hʋsh yʋmohma hinlakmʋt, nitak untuklo ipetʋchi itintakla ka hʋsh ithana cha, hʋs sʋm anoli pullakma, ilefoka lumbo pokoli tuchina, micha nafohka fohka pokoli tuchina ho̱ hʋch ima lashke:

¹³ Amba hʋs sʋm anola he keyukmʋt, hʋchishno ak osh ilefoka lumbo pokoli tuchina, micha nafohka fohka pokoli tuchina ho̱ hʋs sʋmashke, im achi tok. Mihma, Nan it im ithana ya̱ ish takalichikma, e haklashke, im achi tok.

¹⁴ Mihma yʋmmak ash osh, Nan ʋpa ya̱ ilhpak osh a kohcha tuk, micha kʋllo ya̱ na champuli yosh akohcha tuk oke, im achi tok. Mihma nitak tuchina ka nan it im ithana ya̱ otʋninchit anola he keyu tok.

¹⁵ Atuk osh nitak ont isht untuklo ma Samson tekchi ya̱, Chi̱ hatak a̱ ish haksichi na pim anolashke, keyukma chishno, micha chi̱ki in chuka achʋfa ya̱ luak isht e chi hukma chi̱ hoke: nana il ieshi tuk a̱ hʋsh pim ai isha chi̱ kʋt hʋsh pi hoyo tuk o̱? yʋmmak keyu̱? im achi tok.

¹⁶ Mihma Samson tekchi ash osh ya̱yʋt, Is sa̱ nukkilli kak bano cha, is sa̱ hullo keyu hoke: ʋm okla in chipota ha̱ nan it im ithana ish in takalichi ho kak osh chik sʋm anoloshke, achi tok. Mihma, Yakeh! a̱ki, micha hʋshki okmá, ak im anolo kʋt, chishno ya̱ chim anoli la hinla̱? im achi tok.

¹⁷ Mihma nitak untuklo ipetʋchi isht a̱sha itintakla ka yaha̱ya tok: atuk o̱ yakohmi tok, nitak ont isht untuklo ma anumpulichi fehna hatuk o̱ im anoli tok: mihma im okla in chipota ha̱ nan it im ithana ya̱ im anoli tok.

¹⁸ Mihma nitak ont isht untuklo kʋt hʋshi ʋt ik okatulo ki̱sha ho̱ tʋmaha holihta hatak ʋhleha hʋt, Nanta hak osh champuli kʋt foi bila ya̱ i̱ shahli cho? micha nanta hak osh kʋllo kʋt koi chito ya̱ i̱ shahli cho? im achi tok. Mihma, A̱ wak‐tek himita ishit hʋsh patʋffi keyu tuk mʋt, a̱ nan it im ithana ya̱ hʋsh ithana he tuk keyu, im achi tok.

¹⁹ Mihma Chihowa imi Shilombish ʋt onʋtola ma, iʋt Ashkelon a̱ hatak pokoli tuchina ho̱ ʋbi cha, wehpulit, nan it im ithana yash ithanʋt okla hʋt otʋninchi tuk a̱ nafohka fohka kanohmi ka ima tok. Micha chu̱kʋsh libbi mʋt, i̱ki in chuka ia tok.

²⁰ Amba Samson tekchi ano ai itapeha yʋmma i̱ kana chohmichi kash o̱ ima tok.