Nan Apesa 13 - Chahta Holisso Holitopa 1886

¹ Yʋmohmi ma Islael im ʋlla ʋhleha hʋt anonti nana ik achukmo ka Chihowa itikba a yʋmohmi tok: mihma Chihowa yʋt afʋmmi pokoli ushta ho̱ Filistin okla ha̱ ibbak fohki tok.

² Mihma Tan ai in chuka achʋfa Solah hatak achʋfa hosh ahanta hosh hohchifo kʋt Manoah atok; mikma yʋmma tekchi ʋt ʋlla ik im iksho yatuk osh ik esho tok.

³ Mihma ohoyo hash Chihowa im enchil ʋt i̱ haiaka cha, Yakeh! ʋlla ik im iksho chia yatuk osh chik eshoshke: yohmi kia ʋlla ish shali cha, ʋlla nakni yo ish esha chi̱ hoke,

⁴ Yʋmohmi ka himak a̱ ahah! ish ahni cha, oka pa̱ki, micha nan ishko kʋllo nana kia chik ishko kashke, micha nana ik kashofo nana kia chik po kashke, chim asilhha lishke.

⁵ Yakeh! ʋlla ish shali cha, ʋlla nakni yo̱ ish esha chi̱ hoka: mikma nutakhish ishit sha̱fi nana kia noshkobo ha̱ onʋtoyula he keyu hoke: ʋlla yʋmmʋt im oshʋto fo̱ka moma hosh Chitokaka i̱ Nasalait ya chi̱ hoke: micha Islael a̱ Filistin okla ibbak a̱ a hlakofichit isht ia chi̱ hoke, im achi tok.

⁶ Yʋmohmi ma ohoyo hash osh i̱ hatak a̱ ont im anolit, Chitokaka a minti hosh hatak ʋt ʋm ʋla kʋt i̱ nashuka yʋt Chitokaka im enchil nashuka chiyuhmi, holitopa fehna tuk: yohmi kia a minti tuk a̱ ak i̱ ponaklo, hohchifo hak kia ik sʋm anolo tuk oke.

⁷ Yohmi kia, Yakeh! ʋlla ish shali cha, ʋlla nakni yo̱ ish esha chi̱ hoke; yohmi ka himak a̱ oka pa̱ki, micha nan ishko kʋllo nana kia chik ishko kashke, micha nana ik kashofo nana kia chik po kashke: ʋlla yʋmmʋt im oshʋto fo̱ka moma hosh Chitokaka i̱ Nasalait osh a̱yʋt illa hi oke, ʋm achi tuk oke, achi tok.

⁸ Yʋmohmi ma Manoah ʋt Chihowa ya̱ im asilhhʋt, An Chitokaka ma! Chitokaka a minti hatak et ish pila tuk ʋt anonti pim ʋla cha, ʋlla ʋtta chi̱ ka e kaniohmicha chi̱ ka pim abʋchashke, achi tok.

⁹ Mihma Chitokaka yʋt Manoah ʋt anumpuli ka i̱ haponaklo tok; atuk o̱ anonti ohoyo hash osh osapa binili ma, Chitokaka im enchel ʋt im ona tok: yohmi kia i̱ hatak Manoah ʋto iksho tok.

¹⁰ Mihma ohoyo hash osh tu̱shpʋt iʋt malelit, i̱ hatak a̱ ont im anoli cha, Yakeh! hatak ʋt nitak inla kash ʋm ʋla kash osh a̱ haiakʋshke, im achi tok.

¹¹ Mihma Manoah ʋt wakaya mʋt, tekchi ya̱ awant ia cha, hatak ash im ona cha, Hatak chishno ak osh ohoyo ha̱ im anumpuli tuk chia hoh cho? im achi ma, Mih sia hoke, achi tok.

¹² Mihma Manoah ʋt, Yohmi ka himak a̱ chim anumpa hʋt ont ai a̱hlashke. Katiohmi hosh ʋlla nana il im apesa chi̱ cho? micha nanta ho̱ il i̱ katiohmicha chi̱ cho? achi tok.

¹³ Mihma Chihowa im enchel ʋt Manoah ya̱, Nana moma ohoyo ha̱ im achi li tuk a̱ ithaiyanashke.

¹⁴ Pa̱ki ʋpi nana atoba imma ka ʋpa he keyu, oka pa̱ki, micha nan ishko kʋllo nana kia ik ishko kashke, micha nana ik kashofo nana kia ik po kashke: nana moma im apesa li tuk a̱ ithaiyanashke, im achi tok.

¹⁵ Mihma Manoah ʋt Chihowa im enchel a̱, Chi ataklʋmmit issi kosoma ushi ya̱ e chim atahli hayashke, chim asilhha lishke, im achi tok.

¹⁶ Mihma Chihowa im enchel ʋt Manoah ya̱, Chik si ataklʋmmi hoh kia, chi̱ pʋska ya̱ ʋpa la he keyu: yohmi ka nahukmit isht aiokpʋchi ish im issa hokmʋt, Chihowa hak o̱ isht ish aiokpʋchashke, im achi tok. Chihowa im enchel oka, Manoah ʋt ik ithano hatuk oka.

¹⁷ Mihma Manoah ʋt Chihowa im enchel a̱, Chi hohchifo hʋt nanta hoh cho? yohmi tukma nana ish achi tuk puta kʋt ont ai a̱hlikma, e chi holitoblashke, im achi tok.

¹⁸ Mihma Chihowa im enchel ʋt, Nanta katiohmi ho̱ sa hohchifo ha̱ ish a ponaklo cho? na fehna yoka, im achi tok.

¹⁹ Yʋmohmi ma Manoah ʋt issi kosoma ushi, micha nan il impa isht aiokpʋchi aiena ka ishi cha, tʋli ai onochit Chihowa im issa tok: mihma enchel ash osh nana a fehna ka yʋmihchi na Manoah, micha tekchi itatuklo kʋt pisʋt hieli tok.

²⁰ Yakohmi tok oka, luak ʋt libbit alta takalit ʋba pilla ma̱ya ma, Chihowa im enchel ʋt ʋba iʋt alta luak libbi ka itibafoyukʋt ia tok; mihma Manoah, micha tekchi ʋt pisa tok, mihmʋt nashuka ya̱ aka ishit hlipkʋchi tok.

²¹ Yohmi kia Chihowa im enchel ʋt i̱ himmakma Manoah, micha tekchi itatuklo ka ik i̱ haiako tok. Yohmi ma Chihowa im enchel atuk a̱ Manoah ʋt ithana tok.

²² Mihma Manoah ʋt tekchi ya̱, Pilli pulla chi̱ hoke, Chitokaka ya̱ e pisa hokʋt, im achi tok.

²³ Yohmi kia tekchi ʋt, Chihowa yʋt pilla he ak o̱ ʋlhpesa ahni hokmʋt, nahukmit isht aiokpʋchi, micha nan il impa isht aiokpʋchi aiena ka pibbak a̱ ai ishit pim aiokpʋcha he tuk keyu; micha nana ilʋppa puta ka pi̱ haiakʋcha he tuk keyu, micha himak ak kia nana ilʋppa puta ka pim anola he tuk keyu, im achi tok.

²⁴ Atuk o̱ ohoyo hash osh ʋlla eshi cha, hohchifo ha̱ Samson hochifo tok. Mihma ʋlla yʋt hofantit isht ia ma, Chihowa yʋt yukpali tok.

²⁵ Mihma yʋmmʋt Solah, micha Eshtaol ititakla Tan binah ha̱ ahanta ma, nitak kanimikma Chihowa imi Shilombish ʋt ilhkolichit isht ia beka tok.