Nan Apesa 12 - Chahta Holisso Holitopa 1886

¹ Yʋmohmi ma Eflaim hatak ʋhleha hʋt iti hoyot itʋnaha cha, falʋmmi pilla iʋt, Chefhlah ya̱, Nanta katiohmi ho̱ Ammon in chipota ha̱ itibit ia hosh hlopullit ish a̱ya hokak osh, chi awant il ia chi̱ ka chik pi hoyo tuk o̱? chin chuka ya̱ e chi a hukmicha chi̱ hoke, im achi tok.

² Mihma Chefhlah ʋt, Ʋno, micha ʋm okla hʋt Ammon in chipota ha̱ il itin tanampi fehna, mihma hʋchi̱ pa̱ya li ka, ibbak a̱ a kohchit is sa hlakofichi tuk keyu hoke.

³ Mihma hʋs sa hlakofichi keyu ho̱ pisa li mʋt, ʋm ilhfiopak a̱ sʋbbak fohkit ieshit, hlopullit Ammon in chipota ha̱ itibi li ma, Chihowa yʋt sʋbbak a̱ fohki tuk oke: yʋmohmi ka nanta katiohmi ho̱ himak nitak a̱ hʋs sʋtiba chi̱ hosh hʋs sʋm ʋla cho? im achi tok.

⁴ Mihmʋt Chefhlah ʋt Kileat hatak moma ka hoyot itʋnahli cha, Eflaim a̱ itibi tok: mihma Kileat hatak ʋhleha hʋt Eflaim a̱ issot kanchi tok: Kileatait hʋchia hʋt Eflaim i̱ filʋmmit tihlaya hʋchia hosh Eflaimait ʋhleha, micha Manassait ʋhleha aiena ka itintakla hʋsh ai asha hoke, achi kak atok.

⁵ Mihma Kileatait ʋhleha hʋt Chatan okhina akocha wiha Eflaimait ʋhleha itikba ai ishi tok: atuk o̱ Eflaimait ʋhleha hʋt yʋmmʋt hlakofi tuk ʋt, Ak kohchá, achikma, Kileat hatak ʋhleha hash osh, Eflaimait chia hoh cho? im achi tok. Mihma, Keyú, achikma,

⁶ Yohmi hokma, Himak a̱ Shibbolelh achí, im achi tok: mihma ai ʋlhpiesa ka miha he keyu hatuk osh Sibbolelh achi beka tok. Yohmikma ishi cha, Chatan okhina akocha taloha ka ai ʋbi beka tok. Mihma nitak yʋmma Eflaim hatak ʋhleha hʋt tahlepa sipokni pokoli ushta akucha tuklo hosh illit akakoha tok.

⁷ Mihma Chefhlah ʋt afʋmmi hannali ho̱ Islael a̱ nan im apesa tok: mihmʋt Chefhlah Kileatait ʋt illi cha, Kileat tʋmaha holihta puta achʋfa ka a hollopi tok.

⁸ Mihma yʋmma iakaiya kʋt Belh‐lehem ai ʋtta Ibsam ʋt Islael a̱ nan im apesa tok.

⁹ Micha yʋmmʋt ushi ʋt pokoli tuchina cha, ushetik ʋt pokoli tuchina tok: ushetik ʋhleha ha̱ tʋmaha inla pila mʋt, tʋmaha inla ohoyo pokoli tuchina ho̱ ushi ʋhleha ha̱ ai i̱ hoyo tok: micha afʋmmi untuklo ho̱ Islael a̱ nan im apesa tok.

¹⁰ Yohmi ma Ibsam ʋt illi cha, Belh‐lehem ak o̱ a hollopi tok.

¹¹ Mihma yʋmma iakaiya kʋt Elon Sebulonait osh Islael a̱ nan im apesa cha, afʋmmi pokoli ho̱ Islael a̱ nan im apesa tok.

¹² Mihmʋt Elon Sebulonait ʋt illi cha, Aichalon Sebulun i̱ yakni talaia kak o̱ a hollopi tok.

¹³ Mihma yʋmma iakaiya kʋt, Hillel ushi Abton Pilahlonait osh Islael a̱ nan im apesa tok.

¹⁴ Mihmʋt yʋmmʋt ushi ʋt pokoli ushta, micha ibaiyi hʋt pokoli tuchina aiena hosh issuba haksobish falaia ushi pokoli untuklo ho̱ on chieya tok atok: micha yʋmmʋt afʋmmi untuchina ho̱ Islael a̱ nan im apesa tok.

¹⁵ Mihmʋt Hillel ushi Abton Pilahlonait ʋt illi cha, Pilahlon Eflaim i̱ yakni Amalekait nʋnih hak o̱ a hollopi tok.