Nan Apesa 11 - Chahta Holisso Holitopa 1886

¹ Yohmi ma Chefhlah Kileat hatak hlampko chilita nukwia iksho hosh ohoyo haui ushi atok; mihma Kileat ʋt Chefhlah ya̱ tobachi tok.

² Mihma Kileat tekchi ʋt ushi ʋhleha im eshi tok; atuk osh tekchi ushi ʋhleha hʋt hofantit taha mʋt, Chefhlah ya̱ kocha pit tobli cha, Pi̱ki in chuka achʋfa ya̱ ish ahalaia he keyu, ohoyo inla ushi chia hokʋt, im achi tok.

³ Yʋmohmi ma Chefhlah ʋt itibapishi ʋhleha ha̱ i̱ maleli cha, Tob yakni ak o̱ ont ai ʋtta tok: mihma hatak makali puta kʋt Chefhlah ya̱ im itʋnaha cha, awant kohchʋt ia tok.

⁴ Atuk o̱ nitak inla ma yakohmi tok, Ammon in chipota hʋt Islael a̱ in tanampi tok.

⁵ Atuk ash o̱ Ammon in chipota hʋt Islael a̱ in tanampi ma, Kileat hatak asʋnonchi ʋhleha hʋt Chefhlah ya̱ Tob yakni ya̱ ont ai isht ʋla chi̱ hosh ia tok:

⁶ Micha Chefhlah ya̱, Ish minti cha, pi̱ kʋpitʋni ish toba na Ammon in chipota ha̱ il itibashke, im achi tok.

⁷ Mihma Chefhlah ʋt hatak asʋnonchi ʋhleha hash, Hʋs sa̱ nukkilli cha, a̱ki in chuka ya̱ kocha pit hʋs san tobli tok keyu̱? micha nanta katiohmi ho̱ hʋch ilbʋsha mʋto himak a̱ hʋs sʋm ʋla cho? im achi tok.

⁸ Yʋmohmi ma Kileat hatak asʋnonchi ʋhleha hash osh Chefhlah ya̱, Yʋmohmi kak o̱ pi awant ish ia cha, Ammon in chipota ha̱ ish itibi cha, pi noshkoboka tobʋt Kileat okla moma ish i̱ shahla chi̱ ho̱, himak a̱ anonti filemʋt e chi pihi̱sʋshke, im achi tok.

⁹ Mihma Chefhlah ʋt Kileat hatak asʋnonchi ʋhleha hash, Ammon in chipota ha̱ itibi la chi̱ ka an chuka hʋs sʋsht ona tuk o̱, Chihowa hʋt yʋmma ʋma hokma, hʋchi noshkoboka sia ha chi̱ cho? im achi tok.

¹⁰ Mihma Kileat hatak asʋnonchi ʋhleha hash ot, Chihowa ak osh pim atokolashke, chim anumpa ha̱ ke yʋmohmokma, im achi tok.

¹¹ Mihma Chefhlah ʋt Kileat hatak asʋnonchi ʋhleha awant ia ma, okla hʋt i̱ noshkoboka, micha kʋpitʋni ikbi tok: mihma Chefhlah ʋt Mispeh ya̱ ilap im anumpa moma Chihowa itikba ya̱ ai anumpuli tok.

¹² Mihma Chefhlah ʋt Ammon in chipota i̱ mi̱ko ya̱ anumpa shali ʋhleha i̱ pila mʋt, Nanta isht hʋs si ahalaia hosh a̱ yakni satibit ish la cho? achi tok.

¹³ Mihma Ammon in chipota i̱ mi̱ko ʋt Chefhlah im anumpa shali ʋhleha ha̱ afalamichit, Islael ʋt Echip a̱ kohchʋt a̱ya kʋt, a̱ yakni ya̱ ʋm ai ishi tok, Anon a̱ ʋttʋt iʋt Chabbok, micha Chatan ona ai ʋhli ka yʋmohmi tok: yʋmohmi ka himak a̱ it i̱ kanʋt yakni yʋmma puta ka anonti hʋsh falʋmmichashke, im achi tok.

¹⁴ Mihma Chefhlah ʋt anonti anumpa shali ʋhleha ha̱ Ammon in chipota i̱ mi̱ko ya̱ i̱ pila tok.

¹⁵ Micha, Ilʋppak o̱ Chefhlah ʋt achishke, Islael ʋt Moab a̱ yakni im ishi tok keyu, Ammon in chipota ha̱ yakni ak kia im ishi tok keyu hoke.

¹⁶ Amba Islael ʋt Echip a̱ kohchʋt yakni haiaka nowʋt a̱ya mʋt, Okhʋta hʋmma hlopullit Katesh a̱ ʋla tok.

¹⁷ Yohmi mʋt Islael ʋt Etom i̱ mi̱ko ya̱ anumpa shali ʋhleha ha̱ i̱ pila mʋt, Chi̱ yakni ya̱ hlopulli lashke, chim asilhha lishke, achi tok: yohmi kia Etom i̱ mi̱ko ʋt i̱ haponakla he keyu tok. Micha Moab i̱ mi̱ko ma yʋmmak inli chohmi ho̱ i̱ pila tok; yohmi kia ʋlhpesa ahna he keyu tok. Mihma Islael ʋt Katesh ak o̱ aiasha tok.

¹⁸ Yʋmohmi mʋt yakni haiaka hlopullit iʋt Etom yakni, micha Moab yakni aiena ka apakfopa cha, Moab i̱ hʋshi a kochaka imma yo̱ minti hosh Anon mish tʋnnʋp a̱ abinachi tok; yohmi kʋt Moab ai ʋhli fullota ka ont chukowa tok keyu: Anon yʋmmak okʋt Moab yakni ai ʋhli atuk oka.

¹⁹ Mihma Islael ʋt Sihon Amolait okla i̱ mi̱ko, yʋmmʋt Heshbon i̱ mi̱ko anumpa shali ʋhleha ha̱ i̱ pila tok; micha Islael ʋt, Chi̱ yakni ya̱ hlopullit pi̱ yakni ya̱ il onashke, e chim asilhhʋshke, im achi tok.

²⁰ Yohmi kia Sihon ʋt Islael a̱ ik i̱ yimmo hosh i̱ yakni ya̱ ik hlopullí, ik ahno tok: amba Sihon ʋt im okla moma ka hoyot itʋnahli cha, Chahas a̱ abinachi cha, Islael a̱ itibi tok.

²¹ Mihma Islael Chihowa in Chitokaka yʋt, Sihon, micha im okla moyuma ka Islael ibbak a̱ fohki na okla issot kanchi tok: yohmi ho̱ Islael ʋt yakni yʋmma okla Amolait ʋhleha i̱ yakni moma ka ishit a binili tok.

²² Micha Amolait ʋhleha i̱ yakni Anon ʋttʋt ia kʋt Chabbok ont ai ʋhli, micha yakni haiaka ʋttʋt ia kʋt Chatan ont ai ʋhli aiena ka okla ishit abinili tok.

²³ Yʋmohmi ka himak a̱ Islael Chihowa in Chitokaka ak osh Amolait ʋhleha yakni ya̱ im ishit im okla Islael a̱ i̱ kanʋllichi tok a̱, chishno ʋt ish isha he ʋlhpesa cho?

²⁴ Chi̱ naholbʋt toba Chemosh ʋt chima tuk ak o̱ ish iesha he ʋlhpesa keyu̱? Yʋmohmi ka kʋna ho̱ Chihowa pin Chitokaka yʋt pi tikba a tihlelit kocha wehlikma yʋmmak oka il iesha chi̱ hoke.

^25-26 Yohmi ka himak a̱ chishno ʋt Sippo ushi Balak Moab i̱ mi̱ko ya̱ i̱ shahli nanta chia hoh cho? Islael ʋt Heshbon, micha in tʋmahushi puta, micha Aloe, micha in tʋmahushi puta, micha tʋmaha holihta moma, yʋmmʋt Anon afullota ka talohʋt a̱ya ka afʋmmi tahlepa tuchina ho̱ aiasha ka, Balak ʋt himonna kia Islael a̱ itibit, keyukmʋt himonna kia in tanampi tok o̱? yʋmohmi ka nanta katiohmi ho̱ yʋmma ititakla ka falʋmminchit hʋch ik esho chatuk oh cho?

²⁷ Yʋmohmi hoka chi̱ sai yoshuba tuk keyu hoke, amba is san tanampi kʋt chishno ak osh ai ʋlhpiesa keyu ka is si yʋmihchi hoke: Chihowa Nanapesa yak osh himak nitak a̱ Islael im ʋlla ʋhleha, micha Ammon in chipota ʋhleha aiena ka ilʋppa fehna ka nan im apesa yashke, im achi tok.

²⁸ Yohmi kia Ammon in chipota i̱ mi̱ko ʋt Chefhlah ʋt anumpa i̱ pila tuk a̱ i̱ haponakla he keyu tok.

²⁹ Yʋmohmi ma Chihowa imi Shilombish ʋt Chefhlah ya̱ onʋtola na Kileat, micha Manasseh ya̱ hlopullit, micha Mispeh Kileat a talaia ya̱ hlopulli cha, Mispeh Kileat a talaia ya̱ ʋttʋt ia mʋt, hlopullit Ammon in chipota ha̱ im ona tok.

³⁰ Mihma Chefhlah ʋt ilap im anukfila hosh Chihowa nan im issa he ahnit anumpa il onochit, Ammon in chipota ha̱ sʋbbak a̱ fohkit is sʋma kʋt a̱hlikma,

³¹ Yʋmohmikma yakohma he, Ammon in chipota i̱ yakni ya̱ si achukma̱kʋt falamʋt ʋla likmʋt, nana hosh an chuka okhissa ya̱ kohchʋt si afama chi̱ hosh mintikmʋt, Chihowa immi pulla chi̱ hoke, mikma Chihowa ya̱ im issʋt hukmit isht aiokpʋchi la hi oke, achi tok.

³² Yʋmohmi hosh Chefhla ʋt Ammon in chipota ha̱ itiba chi̱ hosh hlopullit im ona tok: mihma Chihowa yʋt ibbak a̱ fohki tok.

³³ Mihmʋt issot kanchi kʋt Aloe ya̱ ʋttʋt isht ia kʋt Minnilh ish ona ka ont ʋhlichit, tʋmaha holihta pokoli tuklo ho̱ issot kanchi hosh pa̱ki ahollokchi yakni patali ya̱ ont ʋhlichi na illi kʋt laua fehna tok. Yakohmi hosh Ammon in chipota hʋt Islael im ʋlla ʋhleha ha̱ i̱ nutaka tok.

³⁴ Mihma Chefhlah ʋt in chuka Mispeh ya̱ a talaia ka ona tok; mihma yakeh! ushetik ʋt timblel ieshit, hihi̱hlʋt kohchʋt afama chi̱ hosh minti tok; yʋmmʋt im ʋlla yʋmmak bieka hatok; inla yʋt ushi, peh ushetik nana kia iksho tok.

³⁵ Atuk o̱ yakohmi tok, pisa mʋt, im anchi ya̱ ita hlilʋffi cha, Ikikkeh! sʋso tek ma! akanlosi is sʋsht onʋshke, sa nukha̱klochi ya̱ ish ibai achʋfa hoke: sʋtih ha̱ wakʋmmit Chihowa ya̱ im anumpuli li tuk osh, falama la he keyu hokʋt, achi tok.

³⁶ Mihma, A̱ki ma! chiteh wakʋmmit Chihowa ish anumpuli tuk okmʋt, nana hosh chitih ha̱ a kohcha tuk mʋt is si yʋmihchashke; Chihowa yʋt chin tʋnʋp Ammon in chipota pulla ka chim il aiokha tuk oka, im achi tok.

³⁷ Mihmʋt i̱ki ya̱, Ilʋppak osh a̱ yʋmohmashke: Hʋshi tuklo ho̱ ik antá is sʋm ahnashke; yohmi ho̱ nʋnih chaha oiyʋt, micha akowʋt itafullokahanchit hatak ak halelo kʋt isht ile ya̱yʋt a̱ya lashke, ʋno, micha ohoyo sa bi̱ka iti̱ kana li aiena kʋt, im achi tok.

³⁸ Mihma, Iá, im achi tok. Mihmʋt hʋshi tuklo ho̱ kanima pila tok: mihma ohoyo bi̱ka iti̱ kana aiena kʋt ia cha nʋnih chaha paknaka yak o̱ hatak ik halelo kʋt isht ile ya̱yʋt a̱ya tok.

³⁹ Atuk o̱ yakohmi tok, hʋshi tuklo kʋt ont taha ma, falamʋt i̱ki ya̱ im ona na yʋmmʋt ilap im anukfila hosh Chihowa nan im issa he ahnit anumpa il onochi tuk mak osh yʋmihchi tok: mihma hatak a̱ ik ithano tok.

⁴⁰ Atuk o̱ Islael a̱ ai yʋmohmi ʋt, Islael ushetik ʋhleha hʋt afʋmmikma iʋt, Kileatait Chefhlah ushetik a̱ afʋmmi achʋfakma nitak ushta ho̱ ishit ya̱haya tok.