Nan Apesa 10 - Chahta Holisso Holitopa 1886

¹ Yʋmohmi ma Abimilech a̱ iakaiyʋt Islael a̱ apela chi̱ kʋt Toto ushi, Puah ushi yosh Tola Issaka hatak osh hikia tok: micha Shami Eflaim nʋnih ak o̱ ʋtta tok.

² Micha Islael a̱ afʋmmi pokoli tuklo akucha tuchina ho̱ nana im apesa mʋt, illi cha, Shami yak o̱ a hollopi tok.

³ Mihma iakaiya kʋt Chai Kileat hatak osh hikia cha, Islael a̱ afʋmmi pokoli tuklo akucha tuklo ho̱ nana im apesa tok.

⁴ Mihma yʋmmʋt ushi ʋt pokoli tuchina hosh issuba haksobish falaia ushi ʋt i̱ pokoli tuchina om binohli; micha tʋmaha holihta yʋt pokoli tuchina himak nitak a̱ Hafolh Chai hohchifo hosh Kileat yakni talaia yʋmmak osh im aiasha tok.

⁵ Mihma Chai ʋt illi cha, Kamon ak o̱ a hollopi tok.

⁶ Mihma Islael im ʋlla ʋhleha hʋt Chihowa itikba ya̱ nana ik achukmo ka yʋmohmit Baalim, micha Ashtalolh, micha Silia i̱ naholbʋt toba puta, micha Siton i̱ naholbʋt toba puta, micha Moab i̱ naholbʋt toba puta, micha Ammon in chipota i̱ naholbʋt toba puta, micha Filistin ʋhleha i̱ naholbʋt toba puta aiena kak o̱ aiokpʋchi cha, Chihowa ya̱ issa cha, ik im antio tok.

⁷ Mihma Chihowa im ai i̱ nukkilli ʋt libbit Islael a̱ i̱ sanali cha, kanchit Filistin okla ibbak a̱ fohki mʋt, Ammon in chipota aiena ka ibbak a̱ fohki tok.

⁸ Mihma afʋmmi yʋmma Islael im ʋlla ʋhleha ha̱ afʋmmi auah untuchina ho̱ apistikelit ilbʋshali tok, Islael im ʋlla ʋhleha moma Chatan mish tʋnnʋp Amolait ʋhleha i̱ yakni Kileat aiasha kak atok.

⁹ Micha Ammon in chipota hʋt Chatan a̱ ʋbanʋblit Chutah, micha Benchamin, micha Eflaim in chuka achʋfa ya̱ itibi tok: yʋmohmi ho̱ Islael ʋt ilbʋsha fehna tok.

¹⁰ Mihma Islael im ʋlla ʋhleha hʋt Chihowa ya̱ i̱ pa̱ha̱yʋt, Pin Chitokaka ya̱ il issa cha, Baalim a̱ il aiokpʋchi kak osh pi yoshuhumba tuk oke, achi tok.

¹¹ Mihma Chihowa yʋt Islael im ʋlla ʋhleha ha̱, Ʋno ak osh Echip okla, micha Amolait ʋhleha, micha Ammon in chipota, micha Filistin ʋhleha aiena ka a hʋchi hlakofichi li tok keyu̱?

¹² Sitonian ʋhleha ak kia, micha Amalekait ʋhleha, micha Maonait ʋhleha aiena kʋt hʋch ilbʋshali tok; mihma hʋs sa̱ pa̱ha̱ya ma, ibbak a̱ ai i̱ mokofit hʋchi hlakofichi li tok oke.

¹³ Yohmi kia hʋs sa kanchi cha, okla inla i̱ naholbʋt toba puta ka hʋsh aiokpahanchi tuk oke: yʋmohmi ka himakma hʋchi hlakofichi la he keyu hoke.

¹⁴ Oh ia cha, naholbʋt toba ʋhleha hʋsh ahni tuk ak osh hʋsh i̱ pa̱ha̱yashke.

¹⁵ Mihma Islael im ʋlla ʋhleha hʋt Chihowa ya̱, Pi yoshuhumba tuk oke: nana ho̱ ʋlhpesa ish ahnikmʋt, ish pi̱ yʋmihchashke; peh himak nitak a̱ ish pi hlakofichashke, e chim asilhhʋshke, im achi tok.

¹⁶ Mihmʋt okla inla i̱ naholbʋt toba puta kʋt im ai itintakla aiasha ka kanchi cha, Chihowa yak o̱ im antia tok: mihma Islael ʋt ilbʋsha kak o̱ imi shilombish ʋt nukha̱klo tok.

¹⁷ Mihma Ammon in chipota ʋhleha hʋt itʋnahʋt, Kileat ak o̱ abinachi tok. Mihma Islael im ʋlla ʋhleha hʋt itihoyot itʋnaha cha, Mispeh yak o̱ abinachi tok.

¹⁸ Mihma Kileat okla, micha pehlichi ʋhleha aiena kʋt, Hatak kʋta hosh Ammon in chipota ha̱ itibit ishit wakaya chi̱ cho? kʋna hosh yohmikmʋt, Kileat okla moma ka i̱ noshkoboka ya chi̱ hoke, im achi tok.