Nan Apesa 1 - Chahta Holisso Holitopa 1886

¹ Yʋmohmi ma Choshua ʋt illi haya̱ yakohmi tok, Islael im ʋlla ʋhleha hʋt Chihowa ya̱ i̱ ponaklot, Kʋta hosh Kenanait ʋhleha ha̱ ti̱kba itiba chi̱ hosh pim ia chi̱ cho? achi tok.

² Mihma Chihowa hʋt, Chutah yak osh ia chi̱ hoke: yakeh! yakni yash yʋmma ibbak a̱ fohki lishke, achi tok.

³ Mihma Chutah ʋt itibapishi Simeon a̱, Si awant nashoelit ishi li tok yakni ya̱ ish ona na Kenanait ʋhleha ha̱ ont il itibashke; atukma ʋno ak kia chi awant nashoelit ish ishi tok yakni ya̱ ona la chi ke, im achi tok. Mihma Simeon ʋt awant ia tok.

⁴ Mihma Chutah ʋt ia ma, Chihowa hʋt Kenanait ʋhleha, micha Pelissait ʋhleha aiena ka ibbak a̱ fohki tok: yohmi na Besek a̱ hatak tahlepa sipokni pokoli ho̱ ai ʋbi tok.

⁵ Micha Besek a̱ Atoni‐besek o̱ ai ahayuchi cha itibi tok; micha Kenanait ʋhleha, micha Pelissait ʋhleha aiena ka ʋbi tok.

⁶ Yohmi kia Atoni‐besek ʋt maleli tok; mihma iakaiyʋt hlioli tuk osh hokli cha, ibbak‐ishki, micha iyishki aiena ka tʋptuli tok.

⁷ Mihma Atoni‐besek ʋt, Mi̱ko pokoli untuklo hosh ibbak‐ishki, micha iyishki aiena kʋt tʋptua na im ilhpak a̱ ʋm ai impa nutaka a hoyot ʋpa beka tok; nana a kaniohmi li tok mak o̱, Chitokaka hʋt si atobbichishke, achi tok. Mihma Chelusalem a̱ isht ona na yʋmmak o̱ ai illi tok.

⁸ Mihma Chutah im ʋlla ʋhleha hʋt Chelusalem a̱ itibi cha, ishit, bʋshpo falaia halupa isht issot kanchi cha, tʋmaha holihta ya̱ hukmi tuk atok.

⁹ Atuk osh i̱ himmak o̱ Chutah im ʋlla ʋhleha hʋt Kenanait ʋhleha nʋnih foka aiasha, micha oka mahli pilla ai asha, micha okfa ai asha aiena ka itiba chi̱ hosh ilhkoli tok.

¹⁰ Mihmʋt Chutah ʋt Kenanait ʋhleha Heblon ai asha ka itiba chi̱ hosh ilhkoli tok; (Heblon ʋt Kichalh‐aba hohchifo hatok:) mihmʋt Sheshai, micha Ahinam, micha Talmai aiena ka ʋbi tok.

¹¹ Mihmʋt yʋmma ʋttʋt Tebi okla aiasha ka ont itibi tok: Tebi ʋt ti̱kba ka Kichalh‐sefe hohchifo beka tok.

¹² Mihma Kaleb ʋt, Kʋna hosh Kichalh‐sefe ya̱ issot kanchi cha, ishikma, sʋsotek Achsah ʋt tekchi yachi̱ ho̱ ima la chi̱ hoke, achi tok.

¹³ Mihma Kaleb nakfish Kenas ushi Olhniel ak osh ishi tok: mihma tekchi yachi̱ ho̱ Achsah ya̱ ima tok.

¹⁴ Atuk o̱ yakohmi tok, im ona mʋt, i̱ki ya̱ osapa im asilhha chi̱ ho̱ atohnochi tok: atuk osh issuba haksobish falaia om binili tuk ʋt akowa tok; mihma Kaleb ʋt, Nanta ho̱ ish ahni cho? im achi tok.

¹⁵ Mihma, Nan isht yukpali ya̱ is sʋmashke; oka mahli yakni ya̱ is sʋma tuk okʋt, oka kʋli taloha ak kia is sʋmashke, im achi tok. Mihma Kaleb ʋt nʋnih kʋli taloha kak o̱ ima mʋt, micha okfa kʋli taloha kak o̱ ima tok.

¹⁶ Mihma Moses ipochi Kenait in chipota hʋt pam iti tʋmaha holihta ya̱ kohchʋt iʋt, Chutah im ʋlla ʋhleha ha̱ awant iʋt yakni haiaka, yʋmmʋt Alat im oka mahli imma yo̱ ona cha, okla takla ai asha tok.

¹⁷ Mihma Chutah ʋt itibapishi Simeon a̱ awant ia cha, Kenanait ʋhleha Sefalh ai asha ka ʋbit tahli cha, okpʋnit ʋmohmichi tok. Mihma tʋmaha holihta yʋmmʋt Homah hohchifo tok.

¹⁸ Mihma Chutah ʋt Kasa, micha yakni afullota, micha Askelon, micha yakni afullota, micha Eklon, micha yakni afullota aiena ka ishi tok.

¹⁹ Mihma Chihowa hʋt Chutah ya̱ ibafoyuka tok; mihma nʋnih foka okla ha̱ tihlelit kocha wehli cha, a binili tok; yohmi kia okfa aiasha kʋto tʋli iti chanʋlli im a̱sha hatuk o̱, tihlelit kocha wehla he keyu ki tok.

²⁰ Mihma Moses ʋt achi tok mak o̱ Heblon a̱ Kaleb ak o̱ okla ima tok; yohmi na Anak ushi tuchina ka yʋmma a tihlelit kocha wehli tok.

²¹ Mihma Benchamin im ʋlla ʋhleha hʋt Chebusait ʋhleha Chelusalem ai asha ka tihlelit ik kocha wehlo ki tok: amba Chebusait ʋhleha hʋt Benchamin im ʋlla ʋhleha ha̱ apehʋt Chelusalem ai asha tok osh himak nitak a̱ moma hoke.

²² Mihma Chosef in chuka achʋfa yʋmmak kia Behlel a̱ itiba chi̱ hosh ia tok: mihma Chihowa hʋt ibafoyuka tok.

²³ Mihma Chosef in chuka achʋfa yʋt Behlel a̱ pisa chi̱ ho̱ pila tok. Mihma tʋmaha holihta yʋmmʋt tikba ka Lus hohchifo tok.

²⁴ Na pisʋt a̱ya ʋhleha hash osh hatak ʋt tʋmaha holihta yash kohchʋt minti na pisa tok; mihmʋt, Tʋmaha holihta achukowa ya̱ pim anolí, e chim asilhhʋshke, mikma e chi̱ nukha̱kla chi̱ hoke, im achi tok.

²⁵ Atuk o̱ tʋmaha holihta achukowa ya̱ pisachi ma, tʋmaha holihta ya̱ bʋshpo falaia halupa isht issot kanchi tok: amba hatak ash, micha in chuka achʋfa yano hlakofichi tok.

²⁶ Mihma hatak ash osh Hittait ʋhleha i̱ yakni yo̱ ona cha, tʋmaha holihta ya̱ ikbi mʋt, Lus hochifo tok o̱; yʋmmak osh himak a̱ hohchifo moma hoke.

²⁷ Manasseh ak kia Belhshean okla ai asha, micha tʋmaha puta afullota aiena okla ai asha, micha Taanach okla ai asha, micha tʋmaha puta afullota aiena okla ai asha, micha To okla ai asha, micha tʋmaha puta afullota aiena okla ai asha, micha Ibleam okla ai asha, micha tʋmaha puta afullota okla ai asha, micha Mekitto okla ai asha, micha tʋmaha puta afullota aiena okla ai asha aiena ka tihlelit kocha wehli keyu ak inli tok; amba Kenanait ʋhleha hʋt yakni ya̱ ai asha pulla kak o̱ ahni tok.

²⁸ Atuk o̱ yakohmi tok, Islael ʋt kʋllot taha mʋt, Kenanait ʋhleha ha̱ noshkobo atobbichi cha, tihlelit kocha wehlit ik ʋmohmicho ki tok.

²⁹ Eflaim ak kia Kenanait ʋhleha hʋt Kese aiasha ka tihlelit ik kocha wehlo ki tok; amba Kenanait ʋhleha hʋt takla Kese okla ai asha tok.

³⁰ Sebulun ak kia Kitlon okla ai asha, micha Nahalol okla ai asha aiena ka tihlelit kocha wehli tok keyu; amba Kenanait ʋhleha hʋt takla ai ashʋt, noshkobo atobbi toba tok.

³¹ Asha ak kia Akcho okla ai asha, micha Siton okla ai asha, micha Ahlab okla ai asha, micha Achsib okla ai asha, micha Helbah okla ai asha, micha Afik okla ai asha, micha Lehob okla ai asha aiena ka tihlelit kocha wehli keyu ak inli tok.

³² Amba Ashalait ʋhleha hʋt Kenanait ʋhleha yakni ai asha kak o̱ kocha wehli tok keyu hatuk osh, takla ai asha tok.

³³ Naftali ak kia Belh‐shemesh okla ai asha, micha Belh‐analh okla ai asha aiena ka tihlelit kocha wehli tok keyu; amba Kenanait ʋhleha, okla yakni yash aiasha kak o̱ takla ahanta tok; yohmi kia Belh‐shemesh okla aiasha, micha Belh‐analh okla aiasha aiena kʋt noshkobo atobbi toba tok.

³⁴ Mihma Amolait ʋhleha hʋt Tan im ʋlla ʋhleha ha̱ tihleli na nʋnih foka ont ai asha tok: akowʋt okfa ha̱ ant ik ai ashá, im ahni keyu hatuk okʋt:

³⁵ Micha Amolait ʋhleha hʋt Aichalon Heles nʋnih talaia, micha Shaalbim ita tuklo kak o̱ ai asha pulla kak o̱ ahni tok; yohmi kia Chosef in chuka achʋfa ibbak ʋt imaiya tok, yohmi na noshkobo atobbi toba tok.

³⁶ Mihma Amolait ʋhleha im ai ʋhli hʋt ai oiyʋt ia Aklabbim, tʋli ʋba ma̱ya kak atok oke.