Mark i̱ Holisso 9 - Chahta Holisso Holitopa 1886

Chisʋs ʋt nʋnih chaha oiyʋt pakna ont hikia mʋt inlʋt toba, 1; 11 mikmʋt Elias ʋt ʋla he achi chatuk a̱, Chan Baptist ak osh mik mak atuk o̱ anoli; 14 mihmʋt hatak achʋfa hosh shilombish okpulo anukfohka kʋt ik haponaklo, micha anumpula he keyu ka aiena tuk o̱ hlakofichi; 30 mihmʋt ititaiyukhʋna a takalit illi tuk mʋt, anonti falamʋt tana hi ʋt atuklanchit anoli; 33 nan im ai ithʋna ʋhleha hʋt nafehna bʋnnʋt a̱sha ka, Chisʋs ʋt nan isht i̱ miha, 38 mihma kʋna hosh nan isht ahullo okpulo ya̱ ilap hohchifo ak o̱ isht kocha weli hoka ik ataklʋmo ka hi a̱ i̱ miha; 42 na yimmi im anukfila ik hochito puta yoshubli ka ai ʋlhpesa keyu ka miha.

¹ Mihmʋt, A̱hli mak o̱ hʋchim achi lishke, Ilʋppa hiohma̱ya ka kanimi kʋt ik illo hosh Chihowa apehlichika yʋt nan‐isht ai a̱hlika ya̱ ai it i̱shit ʋla na pisa chi̱ kʋt, a̱sha hoke im achi tok.

² Atuk osh yʋmmak atuk a̱ nitak hannali ma, Chisʋs ʋt Pita, micha Chemis, mikmʋt Chan aiena ka yʋmmak bano ho̱ pehlichi cha nʋnih chaha yo̱ pit oiya tok: mihmʋt inlʋt tobʋt itikba hikia tok.

³ Mihma im ilefoka yʋt shohmalali tohbit kʋnia kʋt, okti pushi ak o̱ chiyuhmi tok: yohmi hatuk o̱ nantʋnna tohbichi nana ak osh i̱ shahlichit tohbicha he keyu ki tok.

⁴ Mihma Elias, micha Moses itatuklo hosh ant i̱ haiaka tok: mihmʋt yʋmmak ash osh Chisʋs a̱ it im anumpulit okla tok.

⁵ Yohmi ma Pita yash ot anumpuli mʋt, Chisʋs ash o̱, Pi̱ shahli ma! ilʋppa e ma̱ya kʋt pim achukmʋshke: yohmi ka ʋlhtipo tuchina kak o̱ il ikbi na achʋfʋt chimmi hokma, anonti achʋfʋt Moses ak o̱ immi hokma, anonti achʋfa kʋt Elias ak o̱ immi hashke, im achi tok.

⁶ Yohmi ka okla nukshopa fehna hatuk o̱ nana a miha ik ithano ha tok.

⁷ Yohmi ma hoshonti hʋt ant im okhlilichi tok: mihma hoshonti anu̱kaka ya̱ auet anumpuli kʋt, Ilʋppak osh Sʋso a̱ holitopa mak oke, hʋsh i̱ haponaklashke, achi tok.

⁸ Mihma ashali̱ka filemoʋt okla hopo̱koyo kʋt, hatak inla nana kia ik peso; amba Chisʋs ash bano ho̱ ai it api̱ha tok.

⁹ Atuk o̱ nʋnih a̱sht okla akowʋt minti ma, nana ka okla pi̱sa tuk ʋt hatak nana kia ik im anolo mak o̱, Hatak Ushi ʋt illi tuk ʋt tani ha ya hi a̱, i̱ miha tok.

¹⁰ Atuk o̱ anumpa yʋmmak ash o̱ ilap illʋt okla ithanʋt, Illi tuk osh tani kʋt nanta hak oh chishba? ahnit ilap bi̱ka it im a ponaklot itʋnowa tok.

¹¹ Mihmʋt im a ponaklot, Na katihmi ho̱ na‐holissochi ʋhleha hʋt, Elias ak osh ti̱kba ʋla pulla he, okla achi cho? achi tok.

¹² Mihma afalaminchi mʋt, A̱hli, Elias ak osh ti̱kba ʋla cha, nan‐oklu̱ha ka ant falaminchit apoksiacha he; mikmʋt Hatak Ushi ʋt kaniohmit nana la̱wa ka isht ai ilbʋsha he, micha nan isht ik ahobo ka he aiena ka isht a holisso hatuk oke.

¹³ Yohmi kia, Isht a holisso tok mak oka Elias ʋt ʋla a̱hli ho mʋhli: yohmi na okla kanimihchi bʋnna kʋt yʋmmak ash o̱ im ai yʋmihchi tuk oke, hʋchim achi lishke, im achi tok.

¹⁴ Atuk osh nan im ai ithʋna ʋhleha aiasha ka ona mʋt, okla chinto fehna kʋt aiasha ma, anonti na‐holissochi ʋhleha hʋt yʋmmak ash o̱ nan im asilhhʋchit ma̱ya na ont pisa tok.

¹⁵ Mihma okla hʋt yʋmmak ash o̱ pisa mʋt, mih makinli ho̱ okla nukhlakancha fehnʋt, yihlepʋt im ai onʋt, okla aiokpʋchi tok.

¹⁶ Mihma na‐holissochi ʋhleha hash o̱ i̱ ponaklot, Nanta mak o̱ hʋsh it im asilhhʋchi hatuk o̱ cho? achi tok.

¹⁷ Yohmi ma okla laua yash osh achʋfʋt afalaminchi mʋt, Nan‐ithʋnanchi ma! sʋso hʋt na‐shilombish ik anumpulo yo̱ il ai eshi hatuk o̱ ishit chim ʋla lishke.

¹⁸ Yohmi ka kanima yo̱ ai ilhkolichikmʋt, haiochichechi chatuk: mikma itukpokpokit noti ahampʋt, chunnʋt taha chatuk; yohmi ho̱ na chim ai ithʋna ʋhleha ha̱ yʋmma kohcha chi̱ ka im anoli li tuk ak o̱, okla kohcha he keyu ke tuk oka, achi tok.

¹⁹ Mihma afalaminchi mʋt, Na yimma he keyu isht‐ai unchululi hʋchia ma! hʋchi ta̱kla ahanta li̱ katiohmi foka chi̱ cho? nana ka isht ak hʋchi ahno ho̱ katiohmi foka chi̱ cho? Isht hʋs sʋm ʋlashke, achi tok.

²⁰ Mihma yʋmmak ash o̱ okla isht im ona tok: mihma yʋmmak ash pisa ma, na‐shilombish ash osh mih mak‐inli ho̱ haiochichechi tok; mihma aka itula cha, shalali mʋt itukpokpoki tok.

²¹ Mihma i̱ki ash o̱ i̱ panaklot, Katiohmi foka kash o̱ ilʋppʋt ai yakohmi tok o̱? achi ma, Ʋlla tomba mak a tok.

²² Yohmi ka ʋbi bʋnna kʋt luak, mikmʋt oka aiena ka it a kanchi beka tuk oke: yohmi kia nana ho̱ ish kanimihcha hinlakmʋt, ish pi̱ nukka̱klo cha, ish pi apelashke, achi tok.

²³ Mihma Chisʋs ash osh chi yimma hinla hok ma, na‐yimmi hokʋno nan oklu̱ha kʋt ai i̱ yʋmohma hinla hoke, im achi tok.

²⁴ Mihma ʋlla ya̱ i̱ki yash ot mih makinli no̱ nishkin okchi mihinti hosh chitolit, Chitokaka ma! sai yimmishke; nan‐isht ik a sai yimmo ya̱ is sʋm apelʋchashke, achi tok.

²⁵ Mihma okla hʋt yihlepʋt ant ai itahoba ka, Chisʋs ʋt pisa mʋt, na‐shilombish okpulo ash o̱ im alʋmmit, Na shilombish ik anumpulo, mikmʋt ik haponaklo aiena chia hʋt ilʋppa ish a kohcha cha, mikmʋt himmakma chik chukowo ka he mak o̱ chim apesa lishke, im achi tok.

²⁶ Mihma na‐shilombish ash osh tahpʋlʋt, yʋmmak ash o̱ haiochichechi fehna cha, a kohcha tok: mihma yʋmmak ash ot illi yo̱ chohmi tok: yohmi hatuk o̱, Illishke, achi kʋt laua tok.

²⁷ Yokmi kia Chisʋs ash osh ibbak a halʋlli cha, tanichi ma; yʋmmak ash ot wakaya tok.

²⁸ Atuk o̱ aboha ont chukowa ma, nan im ai ithʋna ʋhleha hash ot ilap banot im a ponaklot, Na katihmi ho̱ pishno ʋto yʋmma e kohcha he keyu ke tuk oh cho? achi tok.

²⁹ Mihma, Ilʋppa chohmi kʋt nana ho̱ isht kohcha hi ʋt iksho, amba ʋba pit anumpuli, micha na‐hullochi aiena hok mak bano hoke.

³⁰ Mihma yʋmmak ash a̱sht okla ilhkoli mʋt, Kalili a̱ okla hlopulli tok: mihma hatak nana kia akostinincha hi oka, ik ahno ki tok.

³¹ Yohmi kʋt nan im ai ithʋna ʋhleha ha̱ nan im abʋchi kʋt, Hatak Ushi ʋt hatak puta ibbak a̱ fohka hoka, okla ʋba chi̱ hoke: atukma illi ha ya tuk ʋt, nitak ont atuchinakma tana hi oke, im achi tok.

³² Yohmi kia anumpa yʋmma okla ik akostinincho; yohmi mʋt i̱ ponaklo nukshopa tok.

³³ Atuk o̱ yʋmmak ash ot Kapenaʋm a̱ ʋla tok: mihmʋt aboha anu̱ka a̱sha hosh i̱ ponaklot, Takla ya̱ hʋchishno bi̱ka isht hʋsh it im anumpuli kash osh nanta mak atuk o̱? achi tok.

³⁴ Yohmi kia lumʋt okla ma̱ya tok: yohmi kʋt takla ya̱, Kʋta hak osh moma i̱ shahli ahanta chishba? ahnit ilap bi̱ka okla isht it im anumpuli tuk a tok.

³⁵ Mihma binili mʋt, auahtuklo kash o̱ hoyo cha, Hatak nana hosh moma i̱ shahli bʋnna hokmʋt, mihi yosh moma ka ik lauwokmʋt, anonti moma in tishu a hi oke, im achi tok.

³⁶ Mihmʋt ʋlla yo̱ halʋlli cha, itintakla binilichi tok: atuk osh ishit sholi mʋt,

³⁷ Kʋna hosh sa hohchifo pulla hatuk mak o̱ ʋlla ilʋppa chohmi achʋfona ka holitoblikmʋt, ʋno ak o̱ sa holitobli hoke: mikma kʋna hosh ʋno a̱ sa holitoblik mʋt, ʋno ak o̱ sa holitobli ho̱ keyu, amba auet sa kanchi tok ak oke, im achi tok.

³⁸ Mihma Chan ʋt afalaminchi mʋt, Nan ithʋnanchi ma! achʋfa hosh chishno chi hohchifo ha̱ nan‐isht ahullo okpulo puta isht kocha weli hosh anta ho̱ e pisa ka, ik pibafohkoshke: yohmi ma il im alʋmmi kano, ik pibafohko hoka, achi tok.

³⁹ Yohmi kia Chisʋs ash osh, Hʋch ik im alammo kashke: hatak ʋt sa hohchifo pulla hatuk mak o̱ na fehna ka isht ai yʋmihchi hokʋt ʋno a̱ yʋmmak fokalechit na sa mihacha hi ʋt iksho hoka.

⁴⁰ Mikma kʋna hosh hʋpishno a̱ hʋp i̱ sanali keyu hokʋto, hʋp‐ibai achʋfa hoke.

⁴¹ Klaist a̱ immi hʋchia hoka, kʋna kia oka kapʋssa isht‐ishko achʋfa ka hʋsh ishka chi̱ ho̱, ʋno sa hohchifo pulla hatuk mak o̱ hʋch ipeta hokmʋt, isht ʋlhtoba ka i̱ hlakofa he keyu, a̱hli mak o̱ hʋch im achi lishke.

⁴² Micha kʋna hosh a̱ yimmi ʋhleha chipunta ilʋppa achʋfona ma ibetʋblichi hokmʋt, ilapa ak o̱ tanchi botoli tʋli ak osh ikunla ya̱ a takanli ho̱ okhʋta ha̱ oka kʋnia hokmak osh, im ʋlhpesa he tuk mak a hi oke.

⁴³ Yohmi ka chibbak ʋt chi ibetʋblichi hokma, chanlit ish hokofashke: imomokpulo yosh ai‐okcha̱ya ya̱ ont ish chukowa hok mak osh, chim ʋlhpesa kʋt chibbak ʋt tu̱klo hosh aiokpuloka, luak ʋt nitak nana moshola he keyu mak o̱, chi itʋtula hi atuk a̱ chim i̱ shahli hoke.

⁴⁴ Yʋmmak oka i̱ shushi yʋt illi keyukma, anonti luak mʋt nitak nana mosholi keyu hoke.

⁴⁵ Mikmʋt chiyi yʋt chi ibetʋblichi hokma, chanlit ish hokofashke: imomokpulo yosh ai‐okcha̱ya ya̱ ont ish chukowa hok mak osh chim ʋlhpesa kʋt, chiyi yʋt tu̱klo hosh ai‐okpuloka, luak ʋt nitak nana moshola he keyu mak o̱ chi itʋtula hi atuk a̱ chim i̱ shahli hoke.

⁴⁶ Yʋmmak oka i̱ shu̱shi yʋt illi keyukma, anonti luak ʋt nitak nana mosholi keyu hoke.

⁴⁷ Mikmʋt chi nishkin ʋt chi ibetʋblichi hokma, kohchit ish kanchashke: nishkin achʋfa yosh Chihowa apehlichika ya̱ ont ish chukowa hok mak osh chim ʋlhpesa kʋt, chi nishkin ʋt tu̱klo hosh aiokpuloka luak a̱ chi itʋtula hi a̱ chim i̱ shahli hoke.

⁴⁸ Yʋmmak oka i̱ shu̱shi yʋt illi keyukma, luak ʋt nitak nana mosholi keyu hoke.

⁴⁹ Mikma moma kʋt luak o̱ isht ai yʋmmi bano kʋt, ʋba isht aiokpʋchi ʋt hʋpi isht ai yʋmma hi a̱ ohma hi oka.

⁵⁰ Hʋpi ʋt achukma; yohmi kia hʋpi ʋt homi kʋt i̱ kʋnia hokma, nanta hak o̱ isht hʋsh homincha hinla cho? Hʋpi a̱ hʋchishno inli il anit hʋsh ieshikmʋt, hʋchishno bi̱ka ma hʋsh it i̱ nanaiya achukmashke, achi tok.