Mark i̱ Holisso 3 - Chahta Holisso Holitopa 1886

Chisʋs ʋt hatak ibbak shila hlakofichi, mihma yʋmmak o̱ Falisi ʋhleha hʋt ʋbi bʋnna hatuk o̱ Chisʋs ʋt kochʋt kʋnia, 1; 10 mihma okla laua apehʋt ilhkoli na lauachit hlakofichi. 13 Mihmʋt anumpeshi auah tuklo ho̱ atokoli. 20 Chisʋs a i̱ kanomi ʋhleha hʋt tasimbo ho̱ im ahoba, 22 mihma Falisi ʋhleha hʋt Chisʋs a̱ ik ahobalot anumpuli; yohmi ma yʋmma okla miha ka a̱hli keyu ka atokolit im anoli. 31 Kʋna hosh Chihowa nana aiahni puta ka yʋmohmi hokʋt Chisʋs a̱ i̱ kanomi fehna mak oke.

¹ Atuk osh anonti sinakak a̱ ont chukowa ma, yʋmma hatak ʋt ibbak shilʋt illi yosh a̱sha tok.

² Mihma nitak‐hullo nitak a̱ hlakofichikmá, nanakmá, nan‐ʋlhpisa onocha hi ʋt ahnit okla apesahanchi tok.

³ Mihma hatak ibbak shilʋt illi yash o̱ Iklʋnnaka ya̱ wakayʋt a hikiá, im achi tok.

⁴ Mihmʋt, Nitak‐hullo nitak a̱ nan achukma ho̱ yʋmohmi, keyukmʋt achukma keyu ho̱ yohmi kak okmá; ilhfiopak okchalinchi, keyukmʋt ʋbi kak okmá, nanta kak osh ai ʋlhpesa cho? im achi tok. Yohmi kia nan ik acho hosh ma̱ya tok.

⁵ Mihma okla chu̱kʋsh kʋllo ka isht nukha̱klot, ik im ʋlhpiesot filemʋt pisa mʋt, hatak ash o̱, Chisemochí, im achi tok. Mihma chisemochi tok; yohmi ma ibbak ash osh falamʋt hlakofit in tʋnnʋp ak inli ho̱ chohmi tok.

⁶ Mihma Falisi ʋhleha hʋt kocha wiha mʋt, ashali̱ka Helotian ʋhleha aiena kʋt yʋmmak ash ʋba hi ʋt isht it im anumpulit ma̱ya tok.

⁷ Yohmi kia Chisʋs ash ot nan im ai ithʋna ʋhleha hash pehlichi cha, filʋmmit okhʋta ia tok: mihma Kalili, micha Chutea aiena minti,

⁸ Micha Chelusalem minti, anonti Itumea, micha Chatan mish‐tʋnnʋp minti, micha Taia, micha Saiton a fullota minti aiena okla chinto kʋt nan aiya̱ka fehna ka yʋmihchi ho̱ okla haklo mʋt, iakaiyʋt okla chinto fehnʋt im ai ona tok.

⁹ Mihma okla laua hokʋt ik atehlefo ka̱ chi̱ kak o̱, peni ʋt im ʋlhtaha chi̱ kʋt, nan im ai ithʋna ʋhleha ha̱ i̱ miha tok.

¹⁰ Lauachit hlakofichi hatuk; yohmi hatuk oka, nan i̱ palummit aiasha atuk ʋt momʋt yʋmmak ash haleli bʋnnʋt okla a hʋhlihinchi tok.

¹¹ Mihma shilombish okpulo puta kʋt yʋmmak ash pisa mʋt, itikba aka hlipkʋchi mʋt, tahpahanlʋt, Chishno ak osh Chihowa Ushi chia mak oke, achi tok.

¹² Mihma yʋmmak ash ot ilap a ik otʋnincho ka chi̱ ka, yʋmma kʋllochit im apesa tok.

¹³ Mihmʋt nʋnih chaha yo̱ ont oiya cha, kʋna ho̱ ilap aiahni hosh hoyo na, okla im ai ona tok.

^14-15 Mihma tohno na yʋmmʋt ilapa apehʋt a̱ya cha, ʋbanumpa isht ahanta he; micha abeka puta hlakofichit, nan‐isht‐ahullo okpulo kocha wela he aiena kʋt, ai im ʋlhpesa chi̱ ka auah tuklo ho̱ atokoli tok.

¹⁶ Mihmʋt Saimon atuk a̱ Pita hochifo tok.

¹⁷ Mihmʋt Sebete Ushi Chemis itibapishi Chan itatuklo, yʋmmak ash o̱ Boaneches hochifo, yʋmmʋt Hiloha ushi, achi hoke.

¹⁸ Mikma Antilu, mikmʋt Fillip, micha Bahlolomu, mikmʋt Mahlu, micha Tamas, micha Alfeʋs ushi Chemis, mikmʋt Tateʋs, micha Kenan hatak Saimon aiena,

¹⁹ Mikmʋt yʋmmak ash ishit inla im issa tok Chutas Iskaliot ʋt aiena tok: mihma chuka chukowa tok.

²⁰ Mihma okla laua yash osh anonti ant ai itahoba na ilhpak ak kia okla ʋpa he keyu ka chohmi tok.

²¹ Yohmi ma i̱ kanomi ʋhleha hʋt haklo mʋt, Tasimbo hoke, achi cha, hokla chi̱ hosh okla ilhkoli tok.

²² Atuk o̱ na‐holissochi ʋhleha Chelusalem minti tuk ash osh, Beelsebʋb ak o̱ il ai i̱shi hosh, nan‐isht‐ahullo okpulo puta ka isht kocha weli hoke, achi tok.

²³ Yʋmmak ash o̱ hoyo mʋt, nan‐isht‐ʋlhpisa ho̱ anumpulit, Katiohmi kak osh Setan ʋt Setan a̱ kohcha hinla cho?

²⁴ Micha apehlichika achʋfa kʋt it a kashapʋt ilap ash inli it im i sanali hokmʋt, apehlichi achʋfa yʋmmak atuk ʋt talaia he keyu hoke.

²⁵ Mihma chuka achʋfa ʋt it a kashapʋt ilap ash inli it im i̱ sanal kmʋt, chuka achʋfa yʋmmʋt talaia he keyushke.

²⁶ Mikma Setan ʋt ilapo inlit it a sanalit ahanta cha, it a kashapa hokmʋt, kʋllot hikia he keyu, amba ont iksho ka he bano hoke.

²⁷ Hatak nana ak osh hatak hlampko in chuka ya̱ ont chukowa cha, im ilayak puta ka wehpula he keyu: ʋmmona hak o̱ hatak hlampko yak o̱ takchi ho̱ keyukmʋt; amba yʋmmak okmʋto in chuka ya̱ wehpula hinla hoke.

²⁸ A̱hli pulla ho̱ hʋchim achi lishke. Hatak puta nan im ai ashʋchika yʋt oklu̱ha, micha kaniohmit Chihowa ik ahobalot anumpuli a puta kʋt i̱ kashofa hi oke.

²⁹ Amba kʋna hosh Shilombish Holitopa yak o̱ ik ahobalot anumpuli hokʋto nitak nana i̱ kashofa he iksho, amba issikkopʋt bilia mak osh im ʋlhpisa hi oke, im achi tok.

³⁰ Yʋmmʋt nan‐isht‐ahullo okpulo yo̱ il ai ishi hoke, okla achi ha tok oka.

³¹ Yohmi ma itibapishi ʋhleha, micha ishki aiena kʋt ai ʋla cha, kocha ya̱ ont hiohmayʋt, inla atohnot yʋmmak ash pit hoyo tok.

³² Mihma okla laua ʋt a fuloblit binohma̱ya̱ tok; yʋmmak ash osh, Yakeh! chishki micha chitibapishi ʋhleha aiena kʋt kocha hiohma̱ya hosh chi hoyoshke, im achi tok.

³³ Mihma afalaminchit, Hʋshki micha itibapishi li ʋhleha aiena kak osh kʋta hoh cho? achi tok.

³⁴ Mihmʋt filemʋt i̱ bili̱kasi binohma̱ya kash pisa mʋt, Hʋshki micha itibapishi li ʋhleha aiena ka ho pesá.

³⁵ Kʋna hosh Chihowa nana aiahni ka yʋmohmi hokmʋt, yʋmmak osh sʋtibapishi, micha an tek, mikmʋt hʋshki aiena mak oke, achi tok.