Mark i̱ Holisso 15 - Chahta Holisso Holitopa 1886

Chisʋs a̱ okla takchi cha, Pailat ibbak fohki, 1; 15 na‐holitompa isht a̱sha ʋhleha hʋt Pailat a̱ anukfohkechi na Balabas ak o̱ i̱ hotofi cha Chisʋs okʋno ititaiyukhʋna ahonʋhlʋt illa chi̱ ho̱ im issa: 17 mihma tʋshka chipota ʋhleha hʋt yʋmmak ash o̱ kʋti tʋnna yo̱ iachukolichi cha, isso: 20 mihmʋt ititaiyukhʋna ahonʋhla chi̱ mak o̱ ilauet ia. 21 Chisʋs a̱ Kolkohla ya̱ okla isht ona mʋt, hatak hu̱kopa tuklo itin takla yo̱ a tak alichit ititaiyukhʋna ahonʋhlichi; 29 mihma na‐holitompa isht a̱sha ʋhleha, micha okla puta kʋt ishit yopula: 33 hʋshi ʋt okhlilit kʋnia ma, Chisʋs ʋt Chihowa ha̱ pit in tahpahanlʋt illi. 38 Nantʋnna holitompa tempel anu̱kaka takali tuk ʋt it a hlilafa; Sintulion ʋt, Chisʋs ʋt Chihowa ushi pulla tuk achi; Chisʋs ʋt ititaiyukhʋna a takali ka, ohoyo kanimi kʋt pisa. 42 Chosef ʋt Chisʋs haknip ititaiyukhuna takali tuk a̱ ishit akʋchi cha, sepʋlka himona ilap i̱ hikia tuk ʋt fohki.

¹ Atuk o̱ onnahinli makinli ho̱ na‐holitompa isht a̱sha pehlichi hash osh hochitoka ʋhleha, micha na‐holissochi okla, mikmʋt nan‐apesa ʋhleha moma aiena ho̱ nana ai it im apesʋt ma̱ya cha, Chisʋs a̱ takchi mʋt, isht iʋt, Pailat ibbak a̱ ont fohki tok.

² Mihma Pailat ash ot i̱ ponaklot, Chishno ak osh Chu okla ha̱ i̱ mi̱ko chia mak oh cho? achi tok. Mihma Chisʋs ʋt, Ʋlhpesa ho̱ ish mihʋshke, im achi tok.

³ Mihma na‐holitompa isht asha pehlichi ʋhleha hʋt yʋmmak ash o̱ nana ilaiyuka laua ho̱ isht onochi tok: yohmi kia nanasi kia ilapʋt afalaminchit ik miho ki tok.

⁴ Mihma Pailat ash osh anonti i̱ ponaklot, Nana chik acho há cha? yakeh! nana ka isht a chi atokoli ka laua fehnʋshke, achi tok.

⁵ Yohmi kia Chisʋs ash ot nana ik acho moma tok. Yohmi hatuk o̱ Pailat ash osh, okokko! aiahni tok.

⁶ Mihma ʋbanʋblit ont ia impa a̱sha ka ilap mak osh, kanima yo̱ okla ahnikma, yukʋt talakchi atuk a̱ achʋfalit im i̱ hotofi chatuk a tok.

⁷ Mihma achʋfa hosh, Balabas hohchifo kʋt nan‐ʋlhpisa ya̱ itibai i̱ sanalit aha̱shwa cha, nan‐ʋlhpisa i̱ sanali kʋt hatak ʋbi tuk ʋt ai it apehʋt talakchi hosh itonla tok.

⁸ Atuk o̱ okla laua yash ot chitolit tahpʋlʋt, nana ka ai i̱ yʋmihchi bilia yatuk ʋt yʋmihcha chi̱ ka̱ okla im ahni tok.

⁹ Yohmi kia Pailat ash osh afalaminchi mʋt, Chu okla i̱ Mi̱ko ak o̱ hʋchim i̱ hotofi la chi̱ ka hʋsh ahni cho? im achi tok.

¹⁰ Yʋmmak okʋno na‐holitompa isht a̱sha pehlichi ʋhleha hʋt i̱ nukkilli kak osh ishit ibbak fohki tuk a̱ ithana hatuk okʋt.

¹¹ Yohmi kia na‐holitompa isht a̱sha pehlichi ʋhleha hash ot Balabas ak o̱ im i̱ hotofi pulla chi̱ ka okla ha̱ isht a nukfohkichi tok.

¹² Mihma anonti Pailat ash ot afalaminchi mʋt, Yohmi ka Chu okla i̱ Mi̱ko hʋsh achi yʋmmak amo nanta ho̱ katimichi la he ak o̱ hʋsh ahni cho? achi tok.

¹³ Mihma atuklanchit chitoli hosh, Ititaiyukhʋna ak o̱ ahonʋhlʋchí, achi tok.

¹⁴ Yohmi ma Pailat ash ot, Nanta katiohmi ho̱ nan ik achukmo nanta mak o̱ yʋmohmi tuk oh cho? im achi tok. Mihma yʋmmak o̱ okla isht i̱ shahlichi fehnʋt tahpʋlʋt, Ititaiyukhʋna ak o̱ ahonʋhlichí, achi tok.

¹⁵ Yohmi ma Pailat ash ot okla ha̱ yukpali bʋnna kʋt, Balabas ak o̱ im i̱ hotofi tok: micha Chisʋs ash o̱ fʋmmi mʋt, ititaiyukhʋna ahonʋhlʋt illa chi̱ mak o̱, yʋmmak ash o̱ ishit okla hash ibbak fohki tok:

¹⁶ Mihma tʋshka chipota ʋhleha hash ot yʋmmak ash o̱ halʋllit isht iʋt nan ai apesa Pletoliʋm hohchifo ho̱ isht ona tok: mihmʋt a̱ya achʋfa tuk ash o̱ momint hoyot itʋnali tok.

¹⁷ Mihmʋt na‐fohka hummakbi ho̱ ishit fokʋchi mʋt, kʋti tʋnnʋt iachuka ikbi cha, iachukolichi tok.

¹⁸ Mihmʋt aiokpʋchit, Chu okla i̱ Mi̱ko ma! na chi yukpashke, achi tok.

¹⁹ Mihmʋt noshkobo ha̱ ku̱shak ishit isso mʋt, on tuftuʋt, anonti hʋchikbihlepʋt hikia cha, aiokpʋchi aiena tok.

²⁰ Mihmʋt yʋmmak ash o̱ okla ishit yopula hayosh na‐fohka hummakbi ash o̱ i̱ shu̱fi cha, ilap i̱ na‐fohka yash inli ho̱ okla fohkʋchi mʋt, ititaiyukhʋna ahonʋhlicha chi̱ mak o̱ kocha isht ia tok.

²¹ Mihma Saimon Silinian hatak Aleksanta, micha Lufʋs aiena i̱ki ʋt yakni kocha ʋttʋt minti hosh a̱ya ma, im ititaiyukhʋna ya̱ shola chi̱ ka okla atohnochi tok.

²² Mihma yʋmmak ash o̱ yakni Kolkohla, yʋmmʋt toshowakma, Noshkobo foni aiasha achi ho̱ okla isht ona tok.

²³ Mihmʋt ishka chi̱ ka oka‐pa̱ki osh mʋh it‐ibʋlhto ho̱ okla ipeta tok; yohmi kia ik ishko ki tok.

²⁴ Mihmʋt yʋmmak ash o̱ okla ititaiyukhʋna ahonʋhlichi mʋt, hatak achʋfa kʋt kaniohmi aiyuka isha chi̱ kʋt nan isht a shoelit ma̱yʋt, i̱ na‐fohka yash okla it i̱ hopela tok.

²⁵ Yohmi kʋt hʋshi kanʋlli ʋlhpisa ont atuchina ho̱ ititaiyukhʋna ya̱ okla ahonʋhlichi tok

²⁶ Mihma anumpa isht ai onʋtula hatuk holisso kʋt paknaka ya̱ CHU OKLA I̱ MI̱KO YOKE, achi hosh a holisso tok.

²⁷ Micha hu̱kopa tuklo ho̱ achʋfʋt ibbak ishtimpakimma takali ma, anonti achʋfʋt im ʋlhfʋbekimma takali ho̱ it aieninchit ititaiyukhʋna ahonʋhlichi tok.

²⁸ Mihma holisso holitopa yʋt achi kʋt, Micha nan‐ʋlhpisa kobʋffi ʋhleha ho̱ iba holhtiena tok achi hatuk ʋt ont aia̱hli tok oke.

²⁹ Mihma itʋnowʋt a̱ya mʋt, yʋmmak ash o̱ ik ahobalot pit i̱ yuchunuklit, Tempel a̱ okpʋni cha anonti nitak tuchinakma ikbi chia hash osh,

³⁰ Chishno ak inli kak osh ile okchalinchit ititaiyukhʋna ya̱ auet akowá, im achi beka tok.

³¹ Mihma na‐holitompa isht a̱sha pehlichi ʋhleha, micha na‐holissochi ʋhleha aiena hash kia ishit yopula akinlit, Inla yokʋno okchalinchi hatuk o kak osh, ilap inli hokʋto ile okchalincha he keyushke.

³² E pisa cha pi yimma chi̱ ka, himonasi ak o̱ Islael i̱ mi̱ko Klaist ʋt ititaiyukhʋna ya̱ ʋttʋt auet ik akowá, it im achit ma̱ya tok. Mihma apehʋt ititaiyukhʋna ahonʋhla kash kia yʋmmak ash o̱ na‐mihachi tok.

³³ Atuk o̱ hʋshi kanʋlli ʋlhpisa isht hannali kʋt ai ona ma, okhlili hʋt yakni mominchit takali na hʋshi kanʋlli ʋlhpisa ont isht chakkali ka ona tok.

³⁴ Mihma hʋshi kanʋlli ʋlhpisa ont isht chakkalik fehna, Chisʋs ash ot chitoli hosh tahpʋlʋt, Eloi, Eloi, lama sabakhlani, yʋmmʋt toshowa kʋt, An Chihowa ma! an Chihowa ma! nanta katiohmi ho̱ is sa kanchi cho? achi hoke.

³⁵ Mihma bili̱ka hiokma̱ya tuk ʋt kanimi kʋt haklo mʋt, Yakeh! Elias ak o̱ i̱ howʋshke, achi tok.

³⁶ Mihma achʋfʋt malelit iʋt na‐shatʋmmi o̱ wineka ont alotoli cha, ku̱shak o̱ takalichit ishka chi̱ ka pit ima mʋt, Ik a̱shá, Elias ʋt ʋla cha ant ishit akʋchikmá nana chi̱ hokmá, keho pisá, achi tok.

³⁷ Mihma Chisʋs ash osh chitoli hosh anumpuli mʋt, fiopa issa tok.

³⁸ Mihma nantʋnna tempel anu̱kaka takali kash ot paknaka ai it a hlilafʋt ia mʋt, aka ont taha cha tuklo tok.

³⁹ Mihma Sintulion ʋt im a chapaka hikia tuk ʋt, yʋmmʋt chitolit makachi cha, fiopa issa na pisa mʋt, Hatak ilʋppʋt Chihowa Ushi yatuk o̱ pulla mʋhlishke, achi tok.

⁴⁰ Mihma ohoyo aiena hosh mishema ho̱ pi̱sʋt hiohma̱ya ma, Meli Maktalene, micha Chemis iskitini, mikmʋt Choses aiena ishki Meli, mikmʋt Salome aiena kak osh ta̱kla hinli tok.

⁴¹ Yohmi kʋt Kalili a̱ anta ma, ohoyo ilʋppak osh apehʋt a̱yʋt, nan isht im a̱shwa tok: mihma apehʋt a̱yʋt Chelusalem a̱ ai ʋla tuk ʋt ohoyo inla yʋt laua hosh pit ai oklu̱ha tok.

⁴² Atuk o̱ ont opiʋt taha ma, nana il ai atahli nitak, yʋmmʋt nitak hullo ʋt onnʋt a̱sha ho̱,

⁴³ Chosef Alimahlea ʋtta, nan‐apesa holitompa hosh, yʋmmak kia Chihowa apehlichika hoho̱yo hosh anta hatuk osh, nukwa̱ya ikshot Pailat ash o̱ ont iba chukowa cha, Chisʋs haknip a̱ im asilhha tok.

⁴⁴ Mihma Pailat ash ot mihi ash takla illi hotuma, ahni kʋt nukhlakancha tok, micha Sintulion a̱ hoyo mʋt, illi tuk a̱ ahchibakmá, nana tuk a̱, i̱ ponaklo tok.

⁴⁵ Micha sintulion a̱ isht ai akostininchi mʋt, haknip ash Chosef a̱ im issa tok.

⁴⁶ Mihma yʋmmak ash ot linen lapushki yo̱ chumpa mʋt, yʋmmak ash ishit akʋchi cha, linen a̱ a bonulli cha, sepʋlka tʋli yosh kulʋt toba ho̱ ont bohli cha, tʋli yo̱ tonolichit sepʋlka okhissa yash pit o̱ bohli tok.

⁴⁷ Mihma Meli Maktalene, micha Meli Choses ishki ita tuklo kʋt yʋmmak ash a bohli ka pi̱sʋt okla tok.