Mark i̱ Holisso 11 - Chahta Holisso Holitopa 1886

Chisʋs ʋt issuba haksobish falaia himita om binili cha, Chelusalem ont chukowa, 1, 12 Fik ʋpi yo̱ nitak nana ik ano ka hi a̱, Chisʋs ʋt im apesa: 15 mihmʋt nan‐itatoba ʋhleha tempel anu̱kaka a̱sha tuk a̱ kocha pit tihleli. 27 Kanimi kʋt nan isht ai ʋlhpesa nana ho̱ isht ai yʋmohmi hatuk a̱ a ponaklo tuk kia, yʋmmak ash o̱ Chisʋs ʋt im a tʋblichi.

¹ Atuk osh Chelusalem bili̱ka Betfachi, micha Betani ita tuklo, Alif nʋnih fehna ho̱ ai ʋla ma, nan im ai ithʋna ʋhleha hash tuklochit tihleli tok.

² Mihmʋt, Iʋt tʋmahushi hʋchi chapaka auet talaia ka hʋsh onashke: yohmikmʋt yʋmma ont hʋsh chukowa mih makinli hosh, issuba himita hatak ʋt ik om binilo ki̱sha yʋt asinta na hʋsh pisa chi̱ hoke: yʋmma i̱ hotofit isht hʋsh lashke.

³ Yohmi ka hatak nana kia, Na katihmi ho̱ ilʋppa hʋsh yʋmihchi ho̱? hʋchim achi hokma, Chitokaka yak osh bʋnna hatuk oke, hʋsh achashke: yohmikma mih makinli ho̱ auet pila chi̱ hoke, im achi tok.

⁴ Mihma it iachi mʋt, hina tuklot ant ai it afama ho̱, issuba himita yʋt okhissa kocha ya̱ asinta na ont pisʋt okla cha, i hotofi tok.

⁵ Mihma yʋmma hiohmaya tuk ʋt kanimi kʋt, Nanta mak o̱ hʋsh katiohmi hosh issuba himita ya̱ hʋsh i̱ hotofi cho? im achi tok.

⁶ Mihma Chisʋs ʋt nan apesa tuk ash o̱ i̱ miha tok: mihma peh ik ilhkolí okla im ahni tok.

⁷ Mihma issuba himita yash o̱ Chisʋs a̱ isht im ʋla cha, im anchi puta ka om pʋlli na yʋmmak ash osh o̱ minili tok.

⁸ Mihma hina ya̱ im anchi puta ka pʋlli kʋt laua ma, anonti kanimi kʋt iti naksish o̱ ʋmot hina ya̱ pʋlli tok.

⁹ Mihma tikba ilhkoli, micha pit iakaiya aiena tuk ʋt, chitoli hosh, Hosanna, Chitokaka i̱ hohchifo il ai eshi hosh minti kʋt holitopa mak oke.

¹⁰ Pi̱ki Lewi apehlichi ʋt Chitokaka i̱ hohchifo il ai eshi hosh aya kʋt, holitopashke; shutik tʋbokaka fehna, Hosanna ai ahanchashke, achi tok.

¹¹ Mihma Chisʋs ʋt Chelusalem a̱ ont chukowʋt, tempel a̱ ont chukowa tok: micha nana puta kash filemoʋt pisʋt in taha, mihma opiʋt taha aiena hatuk o̱, auah‐tuklo kash o̱ pehlichi cha, pit kohchʋt Betani a̱ ia tok.

¹² Atuk osh ont onna ho, Betani a̱ a̱sht okla minti na, yʋmmak ash osh hohchʋfo tok.

¹³ Micha fik ʋpi ʋt hishi a̱sha hosh, mishema ka hikia ho̱ pit pisa tok; mihmʋt yʋmma nana kia ahayuchi li yoba hinla ká, ahni cha, ona tok; atuk osh ona mʋt, fik ʋt a nuna ik ai ono ki̱sha hatuk o̱, nana kia iksho ho̱, amba hishi ak bano na ont pisa tok.

¹⁴ Mihmʋt Chisʋs ʋt anumpuli mʋt, Himak a pilla ma hatak nana kia ʋni isht ik chi ai ʋpo ho̱ biliashke. Mihma nan im ai ithʋna ʋhleha hʋt haklo tok.

¹⁵ Atuk osh Chelusalem a̱ okla ai ʋla tok: mihma Chisʋs ʋt tempel a pit chukowa mʋt, tempel anu̱kaka ya̱ nana a kanchi, micha a chumpa aienʋt ma̱ya tuk ash kocha pit yuhli mʋt, anonti tʋli holisso a bohlit itatoba ai‐impa, micha pʋchi ʋlhpoba kanchi ʋhleha im ai om‐binili aiena tuk ash halʋllit filemohlit kinahlichi tok.

¹⁶ Mihmʋt hatak nana kia ai ʋlbeha ya̱ tempel a̱ isht hlopulla hi a̱ ik im ahno ki tok.

¹⁷ Mihmʋt nan im abʋchit, Ʋm aboha ya̱ oklushi moma kʋt ʋba pit ai anumpuli chuka hochifa hi oke, achi hosh holisso ho̱ keyu̱? yohmi kia hʋchishno yokʋto na hu̱kopa ʋhleha in chuka yo̱ ish ikbishke, achi tok.

¹⁸ Mihma na‐holissochi ʋhleha, micha na‐holitompa isht a̱sha pehlichi ʋhleha aiena kʋt haklo mʋt, okla ak osh momʋt, yʋmmʋt nan isht im abʋchi ka ai im anukhlakancha hatuk o̱ i̱ komunta mʋt, kanimihchit ʋbi ka ahni tok.

¹⁹ Atuk o̱ opiʋt taha ma, tʋmaha hash a kohchʋt ia tok.

²⁰ Atuk o̱ onnahinli ma, fik ʋpi ash ot ak‐isht‐ʋla pit ʋhlit bʋshit kʋnia tuk o̱ pit pi̱sʋt ont ilhkoli tok.

²¹ Mihma Pita ʋt pit anukfilli mʋt, Yakeh! a̱ shahli ma! fik ik ano ka hi o̱ ish im apesa kash bʋshit kʋniʋshke, im achi tok.

²² Mihma Chisʋs ʋt afalaminchi mʋt, Chihowa ak o̱ hʋsh i̱ yimmashke.

²³ A̱hli pulla ho̱ hʋchim achi lishke, Kʋna kia nʋnih chaha ilʋppa, Kanʋllit, okhʋta hak o̱ pit ish okʋtulashke; im achi cha, chu̱kʋsh mʋt anuktuklochi ik im iksho, amba nana ho̱ miha tuk ʋt ont aia̱hla hi a̱ yimmi hokmʋt, im aia̱hla hi oke.

²⁴ Yohmi hoka ʋba pit hʋsh anumpulikmʋt, hʋsh asilhha kʋt hʋsh isha hi ʋt hʋchi yimmashke, yohmik mak osh hʋchim aia̱hla hi oke.

²⁵ Micha ʋba pit anumpulit hʋsh hikiakmʋt, nana a hʋchi̱ kaniohmi tuk a̱shakma, hʋsh i̱ kashofashke: yohmi na hʋchishno na hʋchim aiashʋchika puta ka I̱ki ʋba binili kʋt hʋchi̱ kashofi makinlashke.

²⁶ Amba hʋsh i̱ kashofi keyu hokmʋno, hʋch I̱ki ʋba binili kʋt hʋchishno a̱ na hʋchim aiashʋchika puta ka hʋchi̱ kashofa he keyu akinli hoke, im achi tok.

²⁷ Atuk o̱ anonti Chelusalem a̱ okla ai ʋla tok: mihma yʋmmak ash ot tempel anu̱kaka ya̱ nowʋt hikiki̱a ma, na‐holitompa isht‐a̱sha pehlichi ʋhleha, micha na‐holissochi ʋhleha, mikmʋt hatak hochitoka ʋhleha aiena kʋt im ai ʋla tok.

²⁸ Mihmʋt, Nan isht ai ʋlhpesa mak o̱ ilʋppa puta ka ish yakohmichi cho? micha ilʋppa puta ka ish yakomichi ka nan isht ai ʋlhpesa ka kʋta hosh chim apesa tok oh cho? im achi tok.

²⁹ Mihma Chisʋs ʋt afalaminchi mʋt, Ʋno ak kia nana achʋfa ka hʋchi̱ ponaklo likma, hʋs sʋm anolashke; yohmikma, ʋno ʋt nan‐isht‐ai‐ʋlhpesa kaniohmi ho̱ ilʋppa puta ka isht ai yakohmichi li hatuk ʋt hʋchim anoli lashke.

³⁰ Chan i̱ baptismo ʋt ʋba yakni a minti hokmá, keyukmʋt hatak akinli hokmá, nanta tuk oh cho? oh ʋm anolí, im achi tok.

³¹ Mihma ilap bi̱ka it im anumpohonlit, Ʋba yak a tok: il achi hokma, Yohmik mak o̱ katiohmi ho̱ hʋch ik i̱ yimmo tuk oh cho? acha hinla.

³² Amba, Hatak ak a tok; il achi hokma, achi mʋt, okla moma kʋt Chan a̱ hopaii fehna hoke, ahni hatuk o̱, okla hak o̱ i̱ nukshopa tok.

³³ Mihmʋt afalaminchi mʋt, Chisʋs ash o̱, Il anola he keyushke, im achi tok. Mihma Chisʋs ʋt afalaminchi mʋt, Ʋno ʋt nan isht ai ʋlhpesa kaniohmi ho̱ ilʋppa puta ka isht ai yakohmichi li tuk ʋt ak hʋchim anoloshke, achi tok.