Mark i̱ Holisso 1 - Chahta Holisso Holitopa 1886

Chan Baptist ʋt ʋbanumpa isht anumpohonli 1; 9 Chan ʋt Chisʋs a̱ baptismochi; 12 atuk o̱ yʋmmak atuk a̱ i̱ himmak ma Setan ʋt Chisʋs ash o̱ imomaka pisa. 14 Chisʋs ʋt Kalili a̱ ʋbanumpa isht anumpohonli; 16 mihmʋt Saimon, micha Antilu, mikmʋt Chemis, micha Chan aiena ka nan im aiithʋna toba chi̱ ka i̱ miha. 23 Nitak hullo ya̱ Chisʋs ʋt nan ithʋnanchi, micha shilombish okpulo kohchichi aiena mʋt; 29 Pita tekchi ishki, 32 micha hatak abeka inla yʋt laua ho̱ hlakofichi; 35 Chisʋs ʋt ʋba pit anumpula chi̱ hosh onnʋt ik taho ki̱sha ho̱ tani; 39 atuk osh i̱ himmakma Kalili ʋbanumpa isht ai anumpuli, 40 leplosi ʋbi yo̱ hlakofichi.

¹ Chisʋs Klaist Chihowa Ushi im ʋbanumpa ai ishtia ʋmmona kʋt,

² Yakeh! ʋm anumpeshi ya̱ chi tikba chʋffichi li hoka mihi yosh chi̱ hina ya̱ tikbanli apoksiacha hi oke.

³ Achʋfa hosh yakni haiaka ya̱ a pa̱ha̱ya kʋt, Chitokaka ata̱ya hi a̱ apoksiachit i̱ hina puta ka oh apissʋlichí, ahanchishke, achit hopaii ʋhleha i̱ holisso ha̱ a holisso tok ak o̱ ai itilaui tok.

⁴ Chan ʋt yakni haiaka ya̱ a baptismohonchi mʋhli tok: mihmʋt ai ashʋchika puta ka isht a kashofa chi̱ ka, ile kostininchit baptisma hi a̱ isht anumpohonli tok.

⁵ Yohmi ma Chutea yakni ai asha tuk, micha Chelusalem ai asha tuk aiena kʋt, momʋt yʋmmak ash o̱ im ai ona cha, nan im ai ashʋchika puta ka il anohonlit, Chatan okhina yak o̱ ai im a baptismo tok.

⁶ Mihmʋt Chan ʋt kamel hishi nafohka fohka cha, na‐hakshup ʋskofʋchi yo̱ ʋskofaiyachi tok: mihmʋt ha̱wa, micha foi‐bila kowi anu̱ka a̱sha yak o̱ ʋpa beka tok.

⁷ Mihmʋt ʋbanumpa isht anumpohonli mʋt, Ʋno a̱ a̱ shahli fehna hosh auet siakaiyʋt minti, yʋmmak okʋno ʋno ʋt i̱ shulush isht‐talakchi yak kia a hlipiʋt hotofi la he si ahoba keyu hoke.

⁸ Ʋno ʋto oka yo̱ isht hʋchi baptismochi li mʋhli hatuk; amba yʋmmak okʋto Shilombish Holitopa yo̱ isht hʋchi baptismocha chi̱ hoke, achi tok.

⁹ Atuk o̱ nitak yʋmma foka ka yakohmi tok: Chisʋs ʋt Nasalet Kalili talaia ka ʋttʋt mintit ʋla cha, Chatan ak o Chan a̱ ai im a baptismo tok.

¹⁰ Micha oka ya̱ ai ʋttʋt kocha ia mak inli ho̱, ʋba shutik ʋt auet tiwa na Shilombish Holitopa yʋt pʋchi‐yoshuba chiyuhmi hosh ʋba mintit yʋmmak ash o̱ ant o̱ binili tok.

¹¹ Yohmi ma ʋba ya̱ anumpa hʋt auet takali kʋt, Chishno ak osh Sʋso a̱ holitopa chia hoke; chishno ak o̱ nan‐isht chi a sai yukpa hoke, achi tok.

¹² Atuk o̱ chekosi mak inli ho̱ Shilombish Holitopa yʋt yakni haiaka ya̱ pit chʋffichi tok.

¹³ Yohmi na yakni haiaka yʋmma nitak pokoli ushta ho̱ ahanta na Setan ʋt imomaka pihi̱sa tok; mihma napoa okpulo puta ka itintakla ahanta tok; mihma enchil ʋhleha hosh nan‐isht im anta tok.

¹⁴ Chan ʋt aboha kʋllo fohka ha yo, Chisʋs ʋt Kalili a̱ ʋla cha, Chihowa apehlichika isht anumpa hanta ya̱ isht anumpohonli tok.

¹⁵ Mihmʋt, Nana kʋt ont aia̱hlit taha na Chihowa apehlichika yʋt olanlosi ʋlʋshke; ile kostininchit, ʋbanumpa ha̱ ho yimmí, ahanchi tok.

¹⁶ Atuk osh Kalili okhʋta lapalika ya̱ a̱ya mʋt, Saimon ʋt itibapishi Antilu itatuklot, nʋni‐hokli yatuk okʋt, nʋni‐isht‐hokli a̱ okhʋta pit okʋchi hosh aha̱shwa na pisa tok.

¹⁷ Mihmʋt Chisʋs ʋt, Mintit ʋno ak o̱ hʋs si apeha na hatak hokli yo̱ hʋch ikbi lashke, im achi tok.

¹⁸ Yohmi ma mih‐makinli ho̱ i̱ nʋni‐isht‐hokli yash issa cha, iakaiyʋt okla tok.

¹⁹ Mihma yʋmmak atuk a̱ iʋt mishema ona mʋt, Sebete ushi Chemis, micha itibapishi Chan itatuklo kak kia, peni anu̱ka ya̱ nʋni‐isht‐hokli aiskiachi hosh chi̱ya na pisa tok.

²⁰ Mihmʋt mih makinli ho̱ yʋmmak ash o̱ pit i̱ howa tok; mihma yʋmmak ash osh i̱ki Sebete ʋt hatak ilhtohno ʋhleha ho̱ iba ta̱klʋt peni ash fo̱ka na issʋt, pit iakaiyʋt okla tok.

²¹ Atuk o̱ Kapenaʋm ak o̱ okla ai ona tok: atuk o̱ chekosi ma nitak‐hullo nitak o̱ sinakak a̱ ont chukowa cha, nana abahanchi tok.

²² Yohmi ma nan isht ai im abʋchi ka okla anukhlakancha tok: yʋmmak okʋt nana kʋt ai im ʋlhpiesa hosh nana im abahanchi kia, na‐holissochi ʋhleha yak okʋno ik holbo ki tok.

²³ Yohmi ma sinakak yʋmma hatak ʋt shilombish okpulo ai i̱ fo̱ka hosh a̱sha tuk osh, tahpʋlʋt,

²⁴ Ikikke! Chisʋs Nasalet ai ʋtta chia ha̱ nanta ho̱ isht e chi ahalaia cho? kʋna ho̱ chia hoka chithana li, Chihowa i̱ na‐holitopa chia mak oke, achi tok.

²⁵ Mihma Chisʋs ʋt yʋmmak ash im olʋbbit, Nukchintot yʋmma ish a kohchashke, im achi tok.

²⁶ Mihma shilombish okpulo ash osh yʋmmak ash o̱ haiochechi cha, chitolit tahpʋla mʋt, yʋmmak ash a kohcha tok.

²⁷ Yohmi ma momʋt, okokko! aiahni fehna; yohmi cha, Ilʋppʋt nanta mak osh yakohmi cho? ilʋppak osh nan‐isht abʋchi himona nanta mak oh cho? ai im ʋlhpiesa hosh yʋmmak ash osh shilombish okpulo ʋhleha hak kia nan im apesa ma, im antiʋshke, achit okla it im a ponaklot ma̱ya tok.

²⁸ Yohmi ma chekosi makinli ho̱ yʋmmak ash isht annoa kʋt Kalili a folumpa yakni moma ka hlopulli tok.

²⁹ Atuk o̱ sinakak a̱ a̱shʋt a kohcha makinli hosh Chemis, Chan itatuklo ka ai it api̱hʋt Saimon, micha Antilu itatuklo in chuka yo̱ okla ont abeha tok.

³⁰ Mihma Saimon tekchi ishki yʋt‐yʋnha hosh itonla tuk o̱, ashali̱ka yʋmmak ash im anoli tok.

³¹ Mihma ona cha ibbak a̱ halʋllit, tanichi tok; mihma yʋnha hash osh ashali̱ka shipa na nan isht im ʋtta tok.

³² Atuk o̱ ont opia hʋshi ʋt okatula ma, haknip ik in chukmo puta, mihmʋt nan‐isht‐ahullo okpulo ai i̱ fo̱ka aiena tuk a̱, mominchit okla isht im ai ʋla tok.

³³ Mihma tʋmaha okla hash osh momʋt okhissa ya̱ ant ai itahoba tok.

³⁴ Mihma haknip ik in chukmo ilaiyuka isht abeka tuk a̱ laua ho̱ hlakofichi mʋt, nan‐isht‐ahullo okpulo mʋt laua ho̱ kocha weli tok: mihmʋt nan‐isht‐ahullo okpulo yʋt ilapa okla ithana hatuk o̱, ik anumpulí ik im ahno ki tok.

³⁵ Atuk osh ont onnahinli, onnʋt ik taho ki̱sha pilla ho̱, tani cha, kohchʋt iʋt haiaka ona cha, ʋba pit anumpuli tok.

³⁶ Mihma Saimon, micha apeha tuk ash aiena kʋt pit iakaiyʋt ilhkoli tok.

³⁷ Atuk osh yʋmmak ash ont pisa mʋt, Hatak momʋt chi hoyoshke, okla im achi tok.

³⁸ Mihma auet apanta tʋmaha ma̱ya kak o̱ kil oho̱na na yʋmmak ma ʋba isht ai anumpohonli lashke, yʋmmak a he mak osh a̱ya li ha tok okʋt, im achi tok.

³⁹ Atuk osh Kalili fullota i̱ sinakak puta ka ʋba isht ai anumpohonlit, nan‐isht‐ahullo okpulo puta ka kocha wihinli tok.

⁴⁰ Mihma leplosi ʋbi yosh a̱yʋt im ona cha, i̱ hʋchukbihlepʋt im ilbʋsha mʋt, Ʋlhpesa ish ahni hokmʋt, is sa̱ kashofa hinlʋshke, im achi tok.

⁴¹ Mihma Chisʋs ʋt i̱ nukha̱klo cha, ibbak a̱ pit welit, potoli mʋt, Ʋlhpesa ahni lishke; chi kashofashke, im achi tok.

⁴² Mihma anumpulit ont issa makinli ho̱, leplosi ash ot ashali̱ka i̱ kʋnia na yʋmmak ash osh kashofa tok.

⁴³ Mihma ik annoo ka hi a kʋllochi fehna hosh yʋmmak ash i̱ mihʋt taiyahli cha, ashali̱ka kanima pit chʋffichi;

⁴⁴ Yohmi mʋt ahah! aiahnit hatak kʋna kia na chik im anolo kashke; amba chi hlakofi hokʋt okla ha̱ nan im atokowa chi̱ ka, ia cha, na‐holitompa‐isht ʋtta yak o̱ ont ish il imi̱ haiakʋchi cha, nana puta ka Moses ʋt apesa tok mak o̱ ish yʋmihchashke, im achi tok.

⁴⁵ Yohmi tuk kia yʋmmak ash osh ia mʋt, anoli fehnʋt, nana kash kanima moma ai im annoachi, yohmi na Chisʋs ʋt himmakma ile haiakʋchit a̱yʋt tʋmaha ha̱ chukowa he keyu hosh, amba kochʋt yakni haiaka yak o̱ ʋttʋt a̱ya tok: yohmi ma kanima moma a mintit im ai oho̱na tok.