Mahlu 9 - Chahta Holisso Holitopa 1886

Chisʋs ʋt palsi isht abeka ya̱ hlakofichi, 1, 9 Chisʋs ʋt Mahlu i̱ howa; micha Falisi ʋhleha ha̱ Mahlu im ai impa a̱sha mʋt ai it im anumpuli. Chisʋs ʋt Chan nan im ai ithʋna ʋhleha na hullochi imma ka isht anumpuli. 18 Chisʋs ʋt na pehlichi ushetik ʋt illi tuk a̱ okchalinchit tanichi: micha ohoyo hʋt issish umbokafa isht abeka tuk a̱ hlakofichi. 27 Micha hatak nishkin lʋpa tuklo ho̱ i̱ fatummi. 32 Chisʋs ʋt hatak ik anumpolo nan‐isht ahullo okpulo ai i̱ fo̱ka yatuk a̱ im achukmali: mikmʋt okla puta kash i̱ nukha̱klo.

¹ Yohmi ma yʋmmak ash osh peni o̱ pit chukowa mʋt, pit tanʋbli cha, ilap in tʋmaha ak inli ho̱ ona tok.

² Mihma hatak ʋt palsi isht abeka hosh potʋlhpo pakna itonla ho̱ okla isht im ʋla tok; mihma Chisʋs ʋt okla na yimmi ka pisa mʋt, palsi isht abeka ash o̱, Sʋso ma! chi yukpashke; na chim ai‐ashʋchika puta kʋt chi̱ kashofa hoke, im achi tok.

³ Yohmi ma na holissochi ʋhleha kaniohmi kʋt, Hatak ilʋppʋt nan ik ahobalot anumpulishke, chu̱kʋsh anu̱kaka okla ahni tok.

⁴ Yohmi ma Chisʋs ʋt okla im anukfila ha̱ ithana hatuk osh, Nanta katiohmi ho̱ hʋchi chu̱kʋsh a̱ nan okpulo ishit hʋsh anukfilli cho?

⁵ Na chim ai ashʋchika puta kʋt chi̱ kashofa hoke, achi kak okmá, keyukmʋt, Tani cha nowá, achi kak okmá, katimampo kak osh ahchiba kʋt ik lauwo cho?

⁶ Yohmi kia Hatak Ushi yʋt yakni paknaka anta kʋt nan ai ashʋchika puta ka kashofa hi ʋt im ai ʋlhpesa hatuk a̱, hʋsh akostinincha chi̱ kak oka, palsi isht abeka ash o̱, Tanit chi̱ potʋlhpo ishi cha, chi̱ chuka ish iashke, im achi tok.

⁷ Mihma yʋmmak ash osh tani cha in chuka ia tok.

⁸ Yohmi ma okla chinto kʋt pisa mʋt, nukhlakanchʋt, hatak a̱ nan‐isht im ai a̱hli yohmi ka ima tok Chihowa ash o̱ ai okpahanchi tok.

⁹ Mihma Chisʋs ʋt yʋmmak asho̱ ʋttʋt ia mʋt, hatak ʋt Mahlu hohchifo hosh, tʋli holisso ai itahoba ya̱ binili ho̱ ont pisa tok; mihmʋt yʋmmak ash o̱, Is siakaiyashke, im achi tok; mihma wakaya mʋt iakaiya tok.

¹⁰ Atuk o̱ yakohmi tok; Chisʋs ʋt impa hosh aboha anu̱ka a̱sha ma, pʋblikan ʋhleha, mihmʋt nan ashʋchi ʋhleha aiena kʋt laua hosh ai ʋlʋt yʋmmak ash, micha nan im ai ithʋna aiena ka ant ta̱kla binohli tok.

¹¹ Mihma Falisi ʋhleha hʋt pisa mʋt, yʋmma nan im ai ithʋna ʋhleha hash o̱, Katiohmi ho̱ nan hʋch ithʋnanchi ʋt pʋblikan, micha nan ashʋchi ʋhleha aiena ka it ibai impa cho? im achi tok.

¹² Yohmi kia Chisʋs ʋt yʋmma haklo mʋt, Haknip im achukma hokano alikchi a̱ ai im ai ʋlhpiesa keyu chatuk, amba abeka yok mak oh chatuk oke.

¹³ Ʋba isht‐ai okpʋchi ak okano ak aiahno; amba nan i̱ nukha̱klo ak o̱ aiokpanchi li hoke, achi yʋmmak osh nana hokma, ont oh ithʋna; hopoyuksa ʋhleha ak o̱ hoyot a̱ya li ha tok keyu; amba nan ashʋchi ʋhleha hʋt ile kostinincha chi̱ mak a tok oke, im achi tok.

¹⁴ Yohmi ma Chan nan im ai ithʋna ʋhleha hʋt im ai ʋla mʋt, Katiohmi ho̱ pishno, micha Falisi ʋhleha il aiena kʋto nukha̱klot nan e hullochi fehna ma, amba nan chim ai ithʋna ʋhleha hʋt nukha̱klot nan ik hullocho cho? achi tok.

¹⁵ Mihma Chisʋs ʋt, Hatak himona ohoyo itauwaya tuk ʋt takla anta moma ka i̱ kanomi ʋhleha hʋt nukha̱kla hinla cho? yohmi kia hatak himona ohoyo itauwaya tuk ash ant im ai isha he nitak ʋt ai ona he; yohmikmak o̱ okla hʋt nukha̱klot na hullocha hi oke.

¹⁶ Hatak nana kia anchi sipokni a̱ nantʋnna hlilafa himona ya̱ lapalichi chatuk keyu; ʋlhkʋta lapali kash osh anchi ash hlilʋffit ishikma, i̱ shahlit hlilafʋt okpulo chatuk oke.

¹⁷ Mikma hatak puta kʋt oka‐pa̱ki himona ya̱ shukcha sipokni yo̱ apitta chatuk keyu; yʋmmak keyukma shukcha yʋt mitahli na oka‐pa̱ki yʋt hlayakma, shukcha yʋto okpulo chatuk; amba oka pa̱ki himona ya̱ shukcha himona yo̱ apittakmak o̱, tu̱klot nan ik okpulo chatuk oke, im achi tok.

¹⁸ Ilʋppa puta ka isht im anumpulik fehna, hatak na pehlichi achʋfa hosh ʋla cha, ant aiokpʋchi mʋt, Himonasi ak kia sʋso‐tek ʋt illi mak osh itonlʋshke: yohmi kia minti cha, chibbak ant isht ish umbitepa hokma, okcha̱ya hinla hoke, achi tok.

¹⁹ Mihma Chisʋs ʋt wakaya cha, iakaiyʋt ia ma, nan im ai ithʋna ʋhleha aiena kʋt yohmi ak inli tok.

²⁰ Yʋmohmi tuk o̱ ohoyo hʋt issish umbokafa isht abeka tok afʋmmi auah tuklo hosh, yʋmmak ash im ashaka ya̱ ma̱yʋt ona cha, im anchi aposhokʋchi a̱ pit potoli tok.

²¹ Im anchi ak illa ho̱ ak potoli kia, sa hlakofa hinlʋshke, ahnit im anukfila hatuk osh.

²² Yohmi kia Chisʋs ʋt filemʋt yʋmmak ash o̱ pisa mʋt, Sʋso‐tek ma! na chi yukpa achukmashke; na chi yimmi pulla hosh chi hlakofichi hoke, achi tok. Mihma hʋshi kanʋlli ʋlhpisa yʋmma fehna ho̱ ohoyo yʋmmak ash osh hlakofi tok.

²³ Mihma Chisʋs ʋt hatak na‐pehlichi in chuka yash ona cha, oskula olachi ʋhleha, micha okla yaiya aiena ka ont pisa mʋt,

²⁴ Oh iti̱ kanʋlli; ohoyo himita yʋt illi keyu hoka, amba nusi hoke, im achi tok. Mihma isht yopulʋt okla i̱ yukpa tok.

²⁵ Yohmi kia okla hʋt kocha wihʋt taha ma, pit chukowa cha, ibbak a̱ ont halʋlli ma, ohoyo himita yash osh tani tok.

²⁶ Yohmi ma ilʋppak atuk ʋt annoʋt yakni yʋmma moma hlopulli tok.

²⁷ Atuk o̱ Chisʋs ʋt yʋmmak ash ʋttʋt ia ma, hatak lʋpa tuklo kʋt iakaiyʋt a̱yʋt, tahpahanlʋt, Lewi ushi chia ma! ish pi̱ nukha̱klashke, ahanchi tok.

²⁸ Mihma yʋmmak ash osh aboha ont chukowa ma, hatak lʋpa atuk ʋt im onʋt okla tok: mihma Chisʋs ʋt, Ilʋppa yakohmichi la hinla ka hʋchi yimmi cho? im achi ma, Yau, Chitokaka ma! im achit okla tok.

²⁹ Yohmi ma nishkin a̱ pit potoli mʋt, Na hʋchi yimmi tuk pulla mak osh isht a hʋchim ʋlhpesashke, achi tok.

³⁰ Mihma nishkin ʋt i̱ fatumʋt okla tok: yohmi ma Chisʋs ʋt kʋllochi fehna hosh i̱ mihʋt, Ahah! hʋsh ahni na hatak nana kia ik akostinincho kashke, achi tok.

³¹ Yohmi tuk kia itiachi mʋt, yʋmmak ash o̱ yakni yʋmma mominchit ai im annowachi tok.

³² Yʋmmʋt a kohcha ma, hatak ik anumpolo nan isht ahullo okpulo ai i̱ fo̱ka ho̱ okla isht im ʋla tok.

³³ Atuk o̱ nan‐isht ahullo okpulo yash osh a kohcha ma, ik anumpolo yash osh anumpuli tok: yohmi ma okla laua yash osh nukhlakancha mʋt, Himonna kia Islael okla ha̱ a yakohmi na kʋna hosh pisa chatuk keyushke, achi tok.

³⁴ Yohmi kia Falisi ʋhleha hash osh, Ilʋppʋt nan‐isht ahullo okpulo puta ka nan‐isht ahullo okpulo i̱ mi̱ko yak o̱ isht kocha weli hoke, achi tok.

³⁵ Yohmi ma Chisʋs ʋt tʋmaha moma, micha tʋmahushi puta aiena ka mominchit a̱yʋt, i̱ sinakak puta kak o̱ nan im ai abahanchi, mihmʋt ʋba apehlichika isht anumpa hanta isht anumpohonli, mihmʋt abeka moma ka hlakofihinchit, haknip ik in chukmo okla im a̱sha tuk a̱ mominchit hlakofihinchi tok.

³⁶ Yohmi tuk kia okla laua yash osh hoyʋbli cha, it a fimimpʋt aiasha, chukfʋlhpoba yosh apesʋchi ik im iksho ho̱, chohmi na pisa hatuk osh i̱ nukha̱klo tok.

³⁷ Yohmi mʋt nan im ai ithʋna ʋhleha hash o̱, Na‐hoya hi okʋto laua ho̱ mʋhli, amba toksʋli ʋhleha hak osh ik lauwoshke.

³⁸ Yohmi hoka na‐hoya hi okʋt Chitokaka immi hoka nan im ahoya hi a̱ toksʋli ʋhleha ha̱ auet tihlela chi̱ ka, hʋsh im asilhhashke, im achi tok.