Mahlu 8 - Chahta Holisso Holitopa 1886

Chisʋs ʋt leplosi ʋbi ya̱ hlakofichi, 1, 5 Mikmʋt sintuliyʋn in tishu ha hlakofichi. 14 Chisʋs ʋt Pita tekchi ishki, micha inla aiena ka hlakofichi. 18 Mahli chito ya̱ yokopʋchi. 23 Micha kaniohmi hosh il iakaya he pim anoli: 28, nan isht ahullo okpulo ʋhleha ha̱ Chisʋs ʋt kocha weli ma; nan isht ahullo okpulo ʋhleha hash osh shukha laua ya̱ iba chukowa.

¹ Atuk osh nʋnih chaha ya̱ ʋttʋt akowa ma, okla chinto kʋt iakaiya tok.

² Mihma leplosi ʋbi yosh ʋlʋt ant aiokpʋchi mʋt, Chitokaka ma! ʋlhpesa ish ahni hokmʋt, is sa̱ kashofa hinlʋshke, achi tok.

³ Mihma Chisʋs ʋt ibbak a̱ pit weli cha, potoli mʋt, Ʋlhpesa ahni lishke; chi kashofashke, achi tok. Yohmi ma leplosi yash osh ashali̱ka i̱ kashofa tok.

⁴ Yohmi ma Chisʋs ʋt, Ahah! ish ahni cha, hatak nana kia chik im anolo kashke; amba okla isht im otʋna chi̱ ka, Moses nana apesa tok ʋba isht aiokpʋchi a̱ i̱sht iʋt, na holitompa isht a̱sha ak o̱ ont ish ile haiakachashke, im achi tok.

⁵ Atuk osh Chisʋs ʋt Kapenaʋm a̱ ont chukowa ma, sintuliyʋn ʋt mintit im ʋla tok.

⁶ Micha im asilhhʋt, Chitokaka ma! an tishu hʋt palsi isht abeka hosh issikkopa fehna kʋt chuka ya̱ itonlʋshke, achi tok.

⁷ Mihma Chisʋs ʋt, Ia lish ont hlakofichi lashke, im achi tok.

⁸ Mihma sintuliyʋn ash osh afalaminchi mʋt, Chitokaka ma! ʋm aboha ya̱ ant ish chukowa he si ʋlhpesa keyu hoke; amba anumpa illa ho̱ ish anumpuli kia, an tishu hatuk mʋt hlakofa hinlʋshke.

⁹ Ʋno yokʋt hatak tʋshka chipota ʋhleha pehlichit i̱ shahli nutaka ahanta chatuk sia hoke; yohmi kʋt ilʋppak atuk ma, Iá, im achi likma, ia hoke: mikmʋt inla ho̱, Minti, achi likma, minti hoke: mikmʋt an tishu ha̱, Ilʋppa yakohmichi, im achi likma, yʋmihchi chatuk oke.

¹⁰ Chisʋs ʋt yʋmma haklo kʋt nukhlakancha mʋt, api̱hʋt a̱ya kash o̱, A̱hli mak o̱ hʋchi̱ miha lishke; Islael okla ak oh kia nayimmi chinto yakohmi ka ak a pesoshke.

¹¹ Yohmi ka, Hʋshi akochaka, mikmʋt hʋshi a opiaka aiena ka a minti kʋt laua hosh ʋba apehlichika ya̱ ai ʋlʋt Eblaham, micha Aisaak, mikmʋt Chekob aiena ka ant ai itʋpehʋt binohla hi oke, hʋchim achi lishke.

¹² Yohmi ka ilʋppa apehlichika im ʋlla yatuk okʋno kocha aiokhlilika ka pit kampila he; yʋmmak oka a ya̱ha̱yʋt noti ma ahampa hi oke, im achi tok.

¹³ Mihmʋt Chisʋs ʋt sintuliyʋn ash o̱, Ish iashke: yohmikma isht a chi yimmi hatuk oka, mih mak osh a chi̱ yʋmohmashke, im achi tok. Mihma in tishu hatuk ʋt hʋshi kanʋlli ʋlhpisa mih mak inli ho̱ hlakofi tok.

¹⁴ Atuk o̱ Chisʋs ʋt Pita in chuka ya̱ ont chukowa mʋt, yʋmma tekchi a̱ ishki ʋt yʋnhʋt abeka hosh itonla na pisa tok.

¹⁵ Mihmʋt ibbak a̱ pit potoli ma, yʋnha kʋt shipʋchi tok: mihma yʋmmak ash osh wakaya mʋt, nan isht im ʋtta tok.

¹⁶ Atuk o̱ opiʋt taha ma nan isht ahullo okpulo ai i̱ fo̱ka puta kʋt laua ho̱ isht im ai ona tok; yohmi ma shilombish okpulo puta kash im anumpa hak o̱ isht kocha weli mʋt; abeka yatuk a̱ mominchit hlakofichi tok.

¹⁷ Yʋmmʋt hopaii Esaias ʋt anumpulit, Ilap ak inli hosh nan isht ik pi ai iksitopo puta ka pim ai ishit, nan isht pi abeka a puta ma i̱sht pi̱ kanchishke, achi tok a̱ ont ai a̱hla chi̱ mak a tok.

¹⁸ Yohmi ma okla chito fehna kʋt apehʋt ai asha na Chisʋs ʋt pisa mʋt, misha in tʋnnʋp ak o̱ ilhkola hinla ka miha tok.

¹⁹ Mihma na holissochi achʋfa hosh ʋla mʋt, Nan ithʋnanchi ma! kanima yo̱ chik a̱ya kia, chiakaiya la chi̱ mak oke, im achi tok.

²⁰ Mihma Chisʋs ash osh, Chula puta kʋt chiluk ʋt im a̱shakma, ʋba hushi puta kʋt ʋlhpichik ʋt im asha hoke; amba Hatak Ushi okʋto noshkobo ha̱ kanima a bohla hi ʋt ik im iiksho hoke, im achi tok.

²¹ Mihma nan im ai ithʋna ʋhleha hash osh achʋfʋt, Chitokaka ma! ʋmmona kano iʋt, a̱ki a̱ ont hohpi la hi a̱, ʋlhpesa is sʋm ahnashke, im achi tok.

²² Yohmi kia Chisʋs ash osh, Is siakaiyashke; yohmikma illi ak osh ilap bi̱ka illi yokʋno hohpashke, im achi tok.

²³ Mihmʋt peni chukowa ma, nan im ai ithʋna ʋhleha hʋt iakaiya tok.

²⁴ Atuk o̱ mahli kʋllo fehna kʋt okhʋta ha̱ a tobʋt kocha ma, peni ash o̱ oka banʋtha kʋt isht ompohomo tok; yohmi kia yʋmmak ashot nusi hosh itonla tok.

²⁵ Mihma nan im ai ithʋna ʋhleha hʋt im ai ʋlʋt ant okchʋli mʋt Chitokaka ma! ish pi okchalinchashke; pilli mak oke, achi tok.

²⁶ Mihma yʋmmak ash o̱, Na‐yimmi fehna keyu hʋchia ma! na katihmi ho̱ hʋchi nukshopa cho? im achi tok. Micha tani mʋt, mahli mikmʋt okhʋta aiena kash im alʋmmi tok; mihma yokopa ai a̱hlit talaia tok.

²⁷ Yohmi ma hatak ash osh okla nukhlakancha mʋt, Ilʋppʋt hatak katiohmi hatuk okak o̱, mahli micha okhʋta aiena hokak kia im antia cho? im achi tok:

²⁸ Atuk o̱ misha in tʋnnʋp Kekesenes yakni a̱ ona ma, nan isht ahullo okpulo ai i̱ fo̱ka kʋt tuklo hosh anukshomunta fehna hatuk o̱, hatak nana kia yʋmma imma ka ont ia he keyu chatuk o̱, hatak illi aiasha ya̱ a̱shwʋt kohchʋt minti hosh ont afama tok.

²⁹ Mihmʋt tahpʋlʋt okla mʋt, Chisʋs, Chihowa Ushi chia hʋt nanta ho̱ isht ish pi ahalaia cho? ik ai ono ki̱sha ho̱, ish pilbʋshacha chi̱ hosh ilʋppa ish la hoh cho? achit okla tok.

³⁰ Yohmi ma shukha laua kʋt impa hosh auet i̱ hopaki ka ai asha tok.

³¹ Yohmi hatuk o̱ nan isht ahullo okpulo ʋhleha hash osh im asilhha mʋt, Ish pi kocha weli hokmʋt, iʋt shukha laua ya̱ ont il abeha he ak o̱ ish pim ahnashke, achi tok.

³² Mihma, Hʋsh iashke, im achi tok; mihma kocha wiha mʋt, shukha laua yash o̱, ont abeha tok; mihma shukha laua yash osh momʋt yihlepa fehnʋt okhʋta sakti chaha yo̱ pit ai oka kahʋt ok ai illit taha tok.

³³ Mihma apesʋchi ʋhleha hatuk ʋt yihlepʋt, ilhkolit tʋmaha ona cha, nana ka mominchit anoli tok; micha nan isht ahullo okpulo ai i̱ fo̱ka tuk ʋt nana im a kaniohmi tuk a̱ aieninchit anoli tok.

³⁴ Yohmi ma tʋmaha hash osh momʋt Chisʋs a̱ afamʋt ilhkoli tok; atuk osh yʋmmak ash o̱ okla pisa mʋt, i̱ yakni a̱ a kohchʋt a̱ya hinla ka okla im asilhha tok.