Mahlu 7 - Chahta Holisso Holitopa 1886

Nʋnih chaha Chisʋs ʋt anumpuli tok osh a moma; yohmi kʋt himakfokalechit inla ya̱ na mihacha chi̱ ka imolʋbbi, 1; 6 micha nana kʋt holitompa hokʋto ofi puta, keyukmʋt shukha aiena ka pit ik i̱n hlatapo ka he miha, 7 anumpa ilbʋsha ishit asilhha ka miha, 13 okhissa iskʋtinosi, micha hina ik pʋtho, mikmʋt okhissa chito, micha hina pʋtha isht anumpuli. 15 Hopaii ilahobi ya̱ ahah! im ahna he, 21 ʋbanumpa haklo illa he keyu, amba im antia he; 24 tʋli chito chuka yʋt ai itʋbana chatuk a̱ chohmi; mikma kʋna hoh kia i̱ yimmi keyu hokʋt chuka yʋt shinuk o̱ ai itʋbana chatuk a̱ chohma hi a̱ miha.

¹ Hʋchishno a̱ nana ik hʋch i̱ mihacho ka chi̱ ka, inla ya̱ nana hʋch ik mihacho kashke.

² Kanimihchit inla ya̱ nana mihachi hosh hʋsh mihachi tuk ma, hʋchishno ma isht hʋch i̱ mihacha he; mikmʋt isht ʋlhpisa nana ho̱ isht hʋsh apesa tuk mʋt, hʋchishno mʋt isht hʋchim ʋlhpisa he akinli hoka.

³ Micha nanta katiohmi ho̱ na hishonluk iskʋtinosi kʋt ish itibapishi nishkin a fo̱ka na ish pisa ho kak osh, anonti iti chito yʋt chi nishkin ak inli fo̱ka kano chik akostinincho cho?

⁴ Micha katiohmi ho̱ iti chito yʋt chishno chi nishkin ak inli ho̱ fo̱ka ka, ish itibapishi ha̱, Na‐hishonluk iskʋtinosi ka chi nishkin a̱ ai ishit ak kohchi, ish im acha hinla cho?

⁵ Nan ilahobi chia hoka, chishno chi nishkin ak o̱ ti̱kba iti chito a̱ ish a kohchashke; yohmikmak osh ish pi̱sa achukma cha na hishonluk iskʋtinosi ka ish itibapishi nishkin a fo̱ka tuk a ish a kohcha hinla hoke.

⁶ Nana kʋt holitompa hokʋno ofi puta ma pit hʋch ik imokmʋt, anonti hʋch i̱ na holitopa puta hatuk ma shukha itikba ya̱ hʋch ik ashacho kashke; yʋmmak keyukma yʋmmak ash o̱ iyi isht a hʋhlichi cha, anonti filemʋt hʋchishno ash o̱ hʋchi okpʋna hinla hoke.

⁷ Hʋsh asilhhakma, hʋch ima he; hʋsh hoyokmʋt, hʋsh ahayucha he; hʋsh soko̱hakma, hʋchin tiwa he oke.

⁸ Asi̱lhha aiyuka hokʋto ishi bano hoke: mikma kʋna hosh hoyo hokʋto, ahayuchi hoke; mikma kʋna hosh soko̱ha hokʋno, in tiwa pulla hi oke.

⁹ Yohmi ka hatak hʋsh katima kak osh, ushi osh pʋska im asilhha ka, tʋli yo̱ isht ima hinla ho̱?

¹⁰ Keyukmʋt nʋni yo̱ asilhhakma, sinti yo̱ isht ima hinla cho?

¹¹ Yohmi ka nan ik ai ʋlhpeso hʋchia kia hʋchim ʋlla ya̱ na hochukma isht ima kʋt hʋchimponna chatuk a̱, im asilhha hoka hʋch I̱ki ʋba binili kʋt na hochukma isht ima kʋt i̱ shahlichi ik fehno ka hinla ho?

¹² Yohmi hoka nan‐oklu̱ha ka hatak puta kʋt hʋchim a yʋmohma hi a̱ hʋsh aiahni hosh, mih mak o̱ hʋsh ai i̱ yʋmohmi mak inlashke: ilʋppak o̱ nan ʋlhpisa, micha hopaii puta aiena kʋt miha hoka.

¹³ Okhissa iskʋtinosi ak o̱ hʋsh ai abehashke; okhissa yʋt chito cha, hina mʋt pʋtha hosh aiokpuloka ya̱ ona hatuk o̱, yʋmma ai abeha kʋt laua hoke.

¹⁴ Okhissa yʋt iskʋtinosi cha, hina mʋt ik pʋtho hosh ai okcha̱ya ya̱ ona hatuk o̱, ik lauwo hosh yʋmmak oka ahayuchi hoke.

¹⁵ Hopaii ilahobi ʋhleha chukfʋlhpoba i̱ na fohka fohka hosh hʋchim ai ʋla kia, anu̱kaka yokʋto nashoba isikopa ʋhleha mak oka, ahah! hʋsh im ahnashke.

¹⁶ Ilap ʋni kak o̱ isht hʋsh akostininchi pulla hi oke. Hatak ʋt kʋti hak o̱ pa̱ki a̱ ai ʋmo chatuk o̱? micha fik a̱ shumʋti ak o̱ ai ʋmo chatuk oh cho?

¹⁷ Yʋmmak inli ho̱ chohmit iti hochukma moma kʋt ʋni hochukma ho̱ ʋni chatuk; amba iti okpulo yokʋto ʋni yʋt okpulo yo̱ ʋni chatuk.

¹⁸ Iti achukma yʋt ʋni okpulo yo̱ ʋna he keyukma, anonti iti okpulo ʋt ʋni achukma ho̱ ʋna he keyushke:

¹⁹ Iti ʋt ʋni achukma ho̱ ʋni keyu hokʋto momʋt cha̱yʋt akakoha cha, luak itokaha chatuk oke.

²⁰ Yohmi hoka ilap ʋni ak o̱ isht hʋsh akostininchi pulla hi oke.

²¹ Chitokaka ma! Chitokaka ma! ʋm achi kak osh momʋt ʋba yakni a̱ chukowa hi o̱ keyushke; amba A̱ki ʋba binili nan aiahni ka yʋmohmi tuk mak a hi oke.

²² Nitak yʋmma fehnakma Chitokaka ma! Chitokaka ma! chi̱ hohchifo ha̱ nan isht anumpulit, chi̱ hohchifo ha̱ nan‐ishtahullo okpulo puta isht kocha welit, anonti chi̱ hohchifo ha̱ na fehna la̱wa ka isht il a yʋmihchi tok keyu cho? ʋm achi kʋt laua hi oke.

²³ Yohmikma otʋnichit, Nitak nana asho̱ hʋch ithana li tuk keyu, nan ik ʋlhpeso yohmi hʋchia hʋt a̱ filʋmmit misha oh ia chá, im achi la hi oke.

²⁴ Yohmi hoka kʋna hosh ʋm anumpa ilʋppa puta hatuk ma haklo cha, mihma yʋmohmi ka, hatak hopoyuksa yosh tʋli paknaka yo̱ in chuka a talali tok a̱ it apesa lashke.

²⁵ Yohmi tuk o̱ umba hatuk mʋt aka ituyula na okchitot ʋla ma, anonti mahli hʋt mahli cha, chuka yʋmmak ash ai ihi̱so ka, tʋli paknaka yo̱ ai itʋbana hatuk okʋt, ik akamo ki tok.

²⁶ Yohmikma kʋna hosh ʋm anumpa ilʋppa puta hatuk ma haklo cha, mihma ik yʋmohmo hokʋto, hatak ik hopoyukso yosh in chuka ya̱ shinuk paknaka yo̱ a talali tok a̱ it ʋlhpisashke.

²⁷ Yʋmohmi tuk o̱ umba hatuk mʋt aka ituyula na okchitot ʋla ma, anonti mahli hʋt mahli cha, chuka yʋmmak ash ai ihi̱so ma, akama tok; micha okpuloka kʋt aia̱hli tok oke, ahanchi tok.

²⁸ Atuk o̱ yakohmi tok; Chisʋs ʋt ilʋppa ahanchit ont in taiyaha ma, nan isht im abʋchi tuk a̱ okla hʋt anukhlakancha tok.

²⁹ Im ai ʋlhpesa mak osh nana im abʋchi tok; amba na holissochi ʋhleha hokʋno ik chohmo ki tok.