Mahlu 6 - Chahta Holisso Holitopa 1886

Chisʋs ʋt nʋnih chaha ai anumpuli tuk ʋt a moma. Yohmi kʋt na habenʋchi, 1, 5 anumpa ilbʋshʋt asilhha, 14 nan ai‐ashʋchi puta ka i̱ kashofa he, 16 na hollochi aiena ka isht anumpuli, na pim ilayak kanima yo̱ il a boyula hi a̱ pim anoli, 24 i shahli ha̱ tuklochit il ai okpʋcha he keyu ka miha, 25 yakni paknaka nana a kaniohmi ka ai isht im anukfilʋt isht ik ilbʋsho hosh, 33 amba Chihowa apehlichika yak o̱ na tikba e hoya hi a̱ miha.

¹ Ahah! hʋsh aiahnit na hʋsh habenʋchi kʋt, hʋchi pi̱sa chi̱ ka, hatak puta itikba yo̱ hʋch ik a yʋmihcho kashke; yʋmmak keyukmʋt hʋch I̱ki ʋba binili ka im a hʋchim ʋlhtoba hi o̱ keyu hoke.

² Yohmi ka na hʋsh habenʋchi kʋt, isht‐pu̱fa ya̱ chi tikba yo̱ ai olachit, nan‐ilahobi ʋhleha hokʋto hatak puta kak o̱ im a holitopa chi̱ hosh sinakak anu̱kaka, micha ai itʋnowa puta ka a yʋmohmi chatuk oka, hʋch ik chohmo kashke: a̱hli mak o̱ hʋchim achi lishke, yʋmmak okʋto im ʋlhtomba chatuk oke.

³ Amba nana ish habenʋchi hokmʋt, chibbak isht impakimma yʋt nana kaniohmi ka, chibbak ʋlhfʋbeka yʋt akostinincha hi a̱ chik im ahno kashke.

⁴ Yohmi na nan ish habenʋchi ka a luma̱kashke; yohmikma Chi̱ki aluma̱ka a pi̱sa yʋt ilap inli hosh otʋnichi achukma hosh chim atobba hi oke.

⁵ Micha ʋba pit ish anumpuli hokʋt, nan‐ilahobi ʋhleha hokʋno chik chohmo kashke; yʋmmak okʋto, hatak ʋt pisa chi̱ ka, sinakak anu̱kaka, ai itʋnowa ai itai okhʋnkʋchi aiena kak o̱ hiohma̱yʋt ʋba pit anumpuli kak osh im achukma chatuk oka; a̱hli mak o̱ hʋchim achi lishke, yʋmmak okʋto im ʋlhtomba chatuk oke.

⁶ Amba chishno ʋba pit ish anumpula chi̱ hokʋto, chim abohushi pit ish chukowa cha, okhissa ya̱ pit ish akʋmmikmʋt, Chi̱ki ai‐aluma̱ka ai ahanta yatuk ma pit ish im asilhhashke; yohmikma Chi̱ki aluma̱ka api̱sa yʋt otʋnichi achukma hosh chim atobba hi oke.

⁷ Yohmi kia ʋba pit hʋsh anumpuli hokʋt it ʋlbillit mihi̱ha kʋt, oklushi nan ik ithano ak okʋno hʋch ik chohmo kashke; yʋmmak okʋto anumpuli fehna kak o̱, hakla hinla, im ahoba cha tuk oka.

⁸ Yohmi hoka yʋmmak oka hʋch ik holbo kashke; nana a hʋchi bʋnna puta hokʋt hʋch ik im asilhho ki̱sha kak inli ho̱, hʋch I̱ki ʋt ithana hoke.

⁹ Yohmi hoka yakohmichi hosh ʋba hʋsh anumpulashke: Pi̱ki ʋba ish binili ma! Chi hohchifo hʋt holitopashke.

¹⁰ Ish apehlichika yʋt ʋlashke. Nana ish ai ahni ka yakni pakna ya̱ a yohmi kʋt, ʋba yakni a yohmi mak o̱ chiyuhmashke.

¹¹ Himak nitak ilhpak pim ai ʋlhpesa kako̱ ish pi ipetashke.

¹² Mikmʋt nana il aheka puta ish pi̱ kashofi kʋt, pishno ʋt nana pim aheka puta il i̱ kashofi chatuk a̱ ish chiyuhmichashke.

¹³ Mikmʋt anukpʋlika yoka ik ia chik pim aiahno hosh, amba nan‐okpulo a̱ ish pi a hlakofihinchashke: Apehlichika, mikmʋt nan‐isht‐aia̱hli, micha isht aholitopa aiena kʋt chimmi a bilia yoke. Amen.

¹⁴ Hatak nan ai ashʋchika puta ka hʋsh i̱ kashofi hokma, hʋch I̱ki ʋba binili kʋt hʋchishno ma hʋchi̱ kashofa hinla ak inli hoka.

¹⁵ Amba hʋchishno ʋt hatak nan ai ashʋchika puta ka hʋsh i̱ kashofi keyu hokma, hʋch I̱ki ʋba binili kak kia na hʋchim ai ashʋchika puta ka hʋch i̱ kashofa he keyu hoke.

¹⁶ Yohmikmʋt anonti, nana hʋsh hullochi kʋt nashuka ilapissa, nan ilahobi ʋhleha hoka hʋch ik chohmo kashke; yʋmmak okʋto na hullochi kʋt hatak puta im otʋna chi kʋt, nashuka ya̱ ilapissachi chatuk oka. A̱hli mak o̱ hʋchi̱ miha lishke, yʋmmak okʋto im ʋlhtomba hoke.

¹⁷ Amba chishno ʋto nan ish hullochikmʋt, chi noshkobo ish ahʋmmi cha, chi nashuka ma ish achifashke.

¹⁸ Yohmi cha hatak puta kano na hullochi ho̱ chik i̱ holbo hosh, amba ai aluma̱ka ai ahanta Chi̱ki ak illa ho̱ ish im otʋnashke; yohmikma Chi̱ki ai aluma̱ka a pi̱sa yatuk mʋt, otʋnichi achukma hosh chim atobba he mak oke.

¹⁹ Hʋchim ilayak puta ka yakni paknaka nanilayak shu̱shi, micha na‐lakna aiena kʋt ai okpʋni chatuk, micha hu̱kopa puta yʋt tiwit isht chukowʋt a hu̱kopa ya̱ hʋchik ai atahlo kashke.

²⁰ Amba hʋchim ilayak puta ka ʋba yakni nanilayak shu̱shi, micha na‐lakna aiena kia ai okpʋni keyu, mikma hu̱kopa puta kia tiwit isht chukowʋt a hu̱kopa keyu ak o̱ hʋsh ai atahlashke.

²¹ Kanima yo̱ hʋchim ilayak ʋt itonla hokma, hʋchi chu̱kʋsh ak kia mihi yo̱ pit takanla hinla ak inli hoka.

²² Haknip a̱ i̱ pʋla hʋt nishkin ak oke. Yohmi hatuk o̱ chi nishkin ʋt achukma hokma, chi haknip ʋt momʋt tohwikelit alotowa hinla hoke.

²³ Amba chi nishkin ʋt ik achukmo hokma, chi haknip momʋt okhlilit alotowa he. Yohmi ka tohwikeli chi̱ foyuka, yʋmmak atuk ʋt ont okhlieli hokma, okhlili yʋmmʋt chinto fehna nana mak ahinla keyu̱?

²⁴ Hatak nana kia i̱ shahli ha̱ tuklochit holitobla he keyu; achʋfalit i̱ nukkilli cha, achʋfa yak o̱ holitobla hinla; keyukmʋt achʋfalit pit halanli cha, achʋfa yak o̱ kanimancha hinla hoke. Chihowa micha Mammon it aieninchit hʋsh holitobla he keyushke.

²⁵ Yohmi hoka hʋchi ai okcha̱ya hi a̱ nana ho̱ hʋsh pa he, micha nana ho̱ hʋsh ishka he aiena; mikmʋt hʋchi haknip ma nana ho̱ hʋsh fohka hi a̱ anukfillit isht hʋch ik ilbʋsho kashke, hʋchim achi lishke. Ilhfiopak ʋt ilhpak a̱ i̱ shahlikma, anonti haknip ʋt nafohka ya̱ i̱ shahli ho̱ keyu cho?

²⁶ Hushi ʋba itʋnowa ho̱ ho pesá: yʋmmak okʋt nana ho̱ hokchi keyu, anonti ʋmot, kanchak kia pit ashachi ho̱ keyu; yohmi kia ʋba hʋch I̱ki ʋt yʋmma ipehinta hoke. Holitopa kʋt yʋmma hʋsh i̱ shahli fehna ho̱ keyu̱?

²⁷ Hʋsh katima kak osh anukfihinlit isht ilbʋsha kʋt hʋchi chaha ka kubit achʋfa kia hʋsh il achakala hinla cho?

²⁸ Micha nanta katiohmi ho̱ na fohka ya̱ anukfihinlit isht hʋsh ilbʋsha cho? Na pakanli hochukma lilli oktak aiasha kʋt kaniohmit offo hoka anukfihinlit ho pesá: yʋmmak okʋt toksʋlit a hoyʋbli keyu, anonti nana ho̱ shʋnni keyushke.

²⁹ Yohmi ak inli kia Solomon ak kia nan‐isht im a holitopa moma isht a shema kʋt ilʋppa achʋfona kia chohmi tok keyu, hʋchim achi lishke.

³⁰ Yohmi ka hʋshuk himak nitak ano oktak aiasha tuk osh onna ha̱ apalʋska ʋlhpita chi̱ kia, Chihowa hʋt shemʋchi kʋt yʋmihchi kʋto, hʋchishno a̱ i̱ shahlichi hosh ik hʋchi shemacho ka hinla cho? na yimmi fehna keyu hʋchia ma!

³¹ Yohmi hoka anukfihinlit isht ilbʋshʋt, Nantak o̱ e pa chi̱? mikmʋt nantak o̱ iloh ishka chi̱ ho̱? micha nantak o̱ eho fohka chi̱ cho? hʋch ik acho kashke.

³² Ilʋppa puta kak o̱ okla nan ik ithano ʋhleha hʋt hoyo chatuk oka; ilʋppa moma ka a hʋchi bʋnna hokʋno ʋba hʋch I̱ki ʋt ithana hoka.

³³ Amba Chihowa apehlichika, micha nan isht im ai ʋlhpiesa aiena kak o̱ ti̱kba hʋsh hoyashke; yohmikma ilʋppa moyuma kʋt hʋchim aiena he mak oke.

³⁴ Yohmi hoka onna ha ya hi a̱ nana pit anukfihinlit isht hʋch ik ilbʋsho kashke; onna ha yokʋto ilapo inli nan isht il ai anukfihinlit isht ilbʋsha hi oka. Nana ik ai achukmo itonla kak osh nitak oka im ʋlhpesa hoke.