Mahlu 5 - Chahta Holisso Holitopa 1886

Chisʋs ʋt nʋnih chaha ya̱ ai anumpuli. Yohmi kʋt kʋna hosh nan isht ilaiyukpa anoli, 11, 13. Klaist i̱ yimmi ʋhleha hʋt yakni i̱ hʋpi: 14 yakni a̱ im a tohwikelika; tʋmaha yosh nʋnih ai o̱ talaia ka chohmi; 15 pʋla ha̱ chohmi. 17 Chihowa i̱ nanʋlhpisa ya̱ Chisʋs ʋt aia̱hlicha chi̱ hosh ʋla. Kaniohmi hosh nanʋlhpisa isht hannali ka kobʋffi ka anoli. 27 Kaniohmi hosh nanʋlhpisa isht untuklo ka kobʋffi ka anoli. 33 Anumpa kʋllo isht ile onochi im olʋbbi. 38 Nukchintot nana ik achukmo ka a pim ahleka he pi̱ miha. 43, pin tʋnʋp puta ka il i̱ hulla he; 45 mikmʋt nan ai a̱hla he pim anukfila he aiena ka pi̱ miha.

¹ Yohmi ma okla chito ka pi̱sʋt, nʋnih chaha yo̱ pit oiya tok; atuk osh ont binili ma, nan im ai ithʋna ʋhleha hʋt im ai ona tok.

² Mihma itih ha̱ wakʋmmi cha, yʋmmak ash im abʋchi mʋt,

³ Chu̱kʋsh ilbʋsha ʋhleha yokʋto ʋba apehlichika yak osh immi hokʋt nayukpʋshke.

⁴ Nanukha̱klo ʋhleha yokʋto hopohla hi okʋt nayukpʋshke.

⁵ Anukhobela iksho ʋhleha yokʋto yakni a̱ isha he ʋlhpesa hokʋt nayukpʋshke.

⁶ Ahopoyuksaka aiahni ʋhleha hʋt hochaha̱fo, itukshihinla aiena hokʋto, kaiya hi okʋt na̱yukpʋshke.

⁷ Nan i̱ nukha̱klo ʋhleha yokʋto ilap ma i̱ nukha̱klo na pisa hi okʋt nayukpʋshke.

⁸ Chu̱kʋsh kashofa ʋhleha yokʋto Chihowa ya̱ pisa hi okʋt nayukpʋshke.

⁹ It i̱ nanaiyʋchi ʋhleha, yʋmmak okʋto Chihowa ushi hohchifa hi okʋt, nayukpʋshke.

¹⁰ Ahopoyuksaka pulla hatuk mak o̱ isht i̱ palʋmmi ʋhleha yokʋto, ʋba apehlichika yʋt immi hokʋt nayukpʋshke.

¹¹ Ʋno atuk pulla mak o̱ hatak puta kʋt isht hʋchi yopulʋt, hʋchi ilbʋshachit, a̱hli keyu kia nana okpulo ilaiyuka puta ka isht hʋchi mihahanchikma, na hʋchi yukpʋshke.

¹² Nayukpʋt hʋchi yukpa fenashke: isht hʋchim ʋlhtoba hi ʋt chinto hosh ʋba ya̱ a̱sha hoka; hopaii ʋhleha hʋchin tikba aiasha ka yakohmichit ilbʋshachi tok mak oka.

¹³ Yakni i̱ hʋpi hʋchia hoke; yohmi kia hʋpi hʋt ho̱mi kʋt i̱ kʋnia hokmʋt, nanta hak o̱ isht a homa hinla cho? yʋmmak okʋt himmakma nana ho̱ isht ai ʋlhpiesa he keyu; amba kocha pit hlaya na hatak puta iyi yosh ahʋhlihincha he ak o̱ pulla hoke.

¹⁴ Yakni in tohwikeli hʋchia hoke. Tʋmaha chito yosh nʋnih chaha ai on talaia hokʋt luma he keyushke.

¹⁵ Mikma hatak ʋt pʋla ha̱ pʋlalikmʋt, tanchi isht ʋlhpisa nutaka yo̱ talali chatuk keyu; amba pʋla ai‐o̱‐hikia yo̱ ai o̱ hilechi chatuk; yohmikma aboha anu̱kaka ma̱ya ka mominchit tohwikelichi chatuk oke.

¹⁶ Hʋchi̱ pʋla hʋt hatak puta itikba ya̱ ik a tommi pulla na inla a̱sha kʋt nana hʋsh akaniohmi hochukma puta ka pisa cha, I̱ki ʋba binili ka holitoblashke.

¹⁷ Nan ʋlhpisa, micha hopaii puta im anumpa aiena ha tok a̱ okpʋnit a̱ya li tuk a̱, ik hʋchim ahobo kashke; okpʋni la hi osh a̱ya li tuk keyu; amba aia̱hlichi la he mak a tok.

¹⁸ A̱hli mak o̱ hʋchi̱ miha lishke, Yakni, mikmʋt ʋba shutik aiena hokʋto ont ik ai iksho kia, ʋba nan ʋlhpisa yʋt moma ont ik a lauwo achʋfona nana kia a kaniohmit aiokpuloka iksho mak osh, mo̱mʋt ont aia̱hla he mak oke.

¹⁹ Yohmi hoka kʋna hosh ʋba nan ʋlhpisa ik a lauwo ilʋppa puta ka achʋfona ka kobʋffi cha, hatak puta kʋt ai yʋmihcha chi̱ ho̱ im abʋchi hokmʋt, ʋba apehlichika aiasha ka moma ik a lauwo hohchifa he; amba kʋna hosh mihma holitobli cha, inla ma isht im abʋchi hokʋto, mihi yosh ʋba apehlichika ya̱ chito ont a hohchifa hi oke.

²⁰ Hʋchi aiʋlhpiesa kʋt na‐holissochi ʋhleha, micha Falisi ʋhleha aiena ka i̱ shahli ho̱ keyukmʋt, nana hosh a kaniohmi kak o̱ ʋba apehlichika ya̱ ont hʋsh chukowa he keyu hoke, hʋchim achi lishke.

²¹ Nitak ti̱kba aiasha kʋt, Kʋna kia ish bi na: kʋna hosh inla ʋbi hokʋt nan ʋlhpisa yo̱ isht im ahlekashke; achi tok a̱ hʋsh ha̱klo chatuk.

²² Amba ʋno ʋto, Kʋna hosh nana hosh a kaniohmi keyu ho̱, itibapishi ha̱ i̱ nukkilli hokmʋt, nan ʋlhpisa yo̱ isht im ahlekashke: mikma kʋna hosh itibapishi ha̱, Ik chi ahobo, im achi hokmʋt, nan ʋlhpisa kʋllo i̱ shahli ho̱ isht im ahleka he: amba kʋna hosh, Im anukfila iksho chia hoka, im achi hokʋto aiokpuloka luak o̱ ont isht im ahleka hi oke.

²³ Yohmi hoka ʋba chi̱ nan‐isht‐aiokpʋchi ya̱ ieshit alta ya̱ ish ona kʋt, ish itibapishi ha̱ nana ish i̱ kaniohmi tuk a̱ a̱sha ka ish ithaiyana hokmʋt;

²⁴ Ʋba chi̱ nan‐isht‐aiokpʋchi ash alta itikba yo̱ ish bohli cha, iʋt ti̱kba ish itibapishi ak o̱ ont ish it i̱ nanaiya ha yosh, ʋlʋt, ʋba chi̱ nan‐isht‐aiokpʋchi ash pit isht ish aiokpʋchashke.

²⁵ Nan ʋlhpisa chi onochi yatuk ma apehʋt ish ma̱ya ta̱kla kak osh, tu̱shpʋt ish it ibai achʋfashke; keyukma nitak kaniohmi kash inli ho̱ nan ʋlhpisa chi onochi yash osh chisht nan apesa ibbak a̱ chi fohkikma, anonti nan‐apesa yash osh nanʋlhtoka ibbak a̱ chi fohki na aboha kʋllo ya̱ ish fohka he mak oke.

²⁶ A̱hli mak o̱ chi̱ miha lishke, Ont ishtaiyopi fehna ka atobbit ish kaiyanchi ho̱ keyukmʋt, kaniohmi kak osh yʋmmak atuk a̱ ish kohcha he keyu mak a hi oke.

²⁷ Nitak ti̱kba aiasha kʋt, Hʋsh it in luma̱ka ná; achi tok a̱ hʋsh ha̱klo chatuk.

²⁸ Amba ʋno ʋto, Kʋna hosh ohoyo ha̱ i̱ nukpʋli hosh pisa hokʋt, chu̱kʋsh anu̱ka̱ka ya̱ isht in luma̱ka ma̱shko hoke, hʋchim achi lishke.

²⁹ Micha chi nishkin isht impak‐imma yʋt chi ibetʋblichi hokma, halʋllit kohchit ish kanchashke: chi̱ nana achʋfona hosh okpulo kia, chi haknip ʋt momʋt aiokpuloka ik aiyo ka he ak osh chim ʋlhpesa hoke.

³⁰ Mikmʋt chibbak isht impak‐imma yʋt chi ibetʋblichi hokma, bʋshlit tʋplit ish kanchashke; chi̱ nana achʋfona hosh okpulo kia, chi haknip ʋt momʋt aiokpuloka ik aiyo ka he ak osh chim ʋlhpesa hoke.

³¹ Kʋna hosh tekchi a̱ kanchikmʋt, it i̱ kʋnia holisso ha̱ imashke; achi tok a̱ takalishke.

³² Amba ʋno ʋto, Kʋna hosh tekchi ʋt luma̱ka tuk o̱ keyu ho̱ kanchikmʋt, haui ikbicha he: yohmikma kanchi haya kʋna hosh itauwayakmʋt, haui toba mak a hi oke, hʋchim achi lishke.

³³ Micha anonti, nitak ti̱kba aiasha kʋt, Anumpa kʋllo ish ile onochi tuk ʋt chik kobʋffo kashke: amba anumpa kʋllo ish ile onochi tuk okʋt Chitokaka ya̱ ish im aia̱hlicha hi oke; achi tok a̱ hʋsh ha̱klo chatuk.

³⁴ Amba ʋno ʋto, Anumpa kʋllo chik ile onocho kʋmohmashke; ʋba shutik ak kia pit isht chik ai a miho kashke; yʋmmak okʋt Chihowa im aiasha mak oka:

³⁵ Mikmʋt yakni ʋt iyi im ai‐o̱‐heli mak oka, yʋmma isht chik ai a miho kashke; anonti Chelusalem a̱ isht chik ai a miho kashke; yʋmmak okʋt Mi̱ko chito in tʋmaha chito yoka:

³⁶ Micha chi noshkobo ak kia isht chik ai a miho kashke; chi̱ pa̱shi achʋfa kia ish tohbichikmá, ish lusachikmá, nana he keyu hokʋt:

³⁷ Amba chim anumpa hʋt Ome, ome; Keyu, keyu; achi aiena kak ashke: ilʋppak o̱ nana kʋt ont atampa hokʋt o nana ik ʋlhpeso mak o̱ a minti hoke, hʋchim achi lishke.

³⁸ Nishkin atuk ma, nishkin makinlashke, mikmʋt noti atuk ma, noti makinlashke; achi tok a̱ hʋsh ha̱klo chatuk:

³⁹ Amba ʋno ʋto, Nan ik ʋlhpeso ka chik i̱ sanalo kashke; amba kʋna hosh chitisopi isht impakimma ya̱ issokma, in tʋnnʋp ma pit ish i̱ weli makinlashke.

⁴⁰ Micha hatak nana kia nan ʋlhpisa chi onochi cha, chim ilefoka ya̱ chim ai ishikma, chim anchi ma ik ishi, ish im ahni akinlashke.

⁴¹ Micha kʋna kia awant iʋt kowi achʋfa ka ish ona pulla hi a̱ chim ahnikma, awant iʋt tuklo ho̱ ish onashke.

⁴² Nana chim asilhhakma, ish imashke: mikmʋt chim a pota bʋnna hoka, chik i̱ shanaiyo kashke.

⁴³ Chin chukapanta hatak a̱ ish i̱ hullo cha, chin tʋnʋp okʋno ish i̱ nukkillashke; achi tok a̱ hʋsh ha̱klo chatuk.

⁴⁴ Amba ʋno ʋto, Hʋchin tʋnʋp ʋhleha ha̱ hʋsh i̱ hullo cha, nana okpuloka hʋchim anukfillit miha aiena ka, nana achukma ho̱ im ahnit hʋsh mihashke; hʋchi̱ nukkilli ma ai achukma hi o̱ isht hʋsh i̱ yʋmohmikmʋt, hʋchi kanimachit, hʋchi ilbʋshachikma, ʋba isht hʋsh anumpohonlashke.

⁴⁵ Yakohmi hosh hʋch I̱ki ʋba binili ka im ʋlla hʋchia hi oke: yʋmmak okʋt i̱ hʋshi atuk ma nan ik ʋlhpeso, micha na‐hochukma aiena ka i̱ kohchihinchikmʋt, kocha umba ka nan‐aia̱hli hochukma, mikmʋt nan ik a̱hlo aiena ka auet i̱ pihinla chatuk oka.

⁴⁶ Hʋchishno a̱ hʋch i̱ hullo ho̱ hʋsh i̱ hullo hokʋt, nanta hosh isht hʋchim ʋlhtoba ho̱? pʋblikan ʋhleha ak kia yʋmmak okʋno yohmi akinli chatuk keyu̱?

⁴⁷ Micha hʋsh itibapishi ʋhleha ak bano ho̱ hʋsh aiokpʋchi hokmʋt, inla a̱sha ka nantak o̱ isht i̱ shahlichi hosh hʋchi yʋmohmi ho̱? pʋblikan ʋhleha ak kia yohmi ak inli chatuk keyu̱?

⁴⁸ Yohmi hoka aia̱hli hʋchi achukma kʋt, hʋch I̱ki ʋba binili kʋt aia̱hli achukma kak inli ho̱ hʋsh chiyuhmashke, hʋchim achi lishke.