Mahlu 4 - Chahta Holisso Holitopa 1886

Shilomish osh Chisʋs a ilauelit yakni haiaka isht ona: mihma nitak pokoli ushta ka nahullochi; micha Setan ak osh imomaka pisa: enchil ʋhleha hʋt ant nan isht im anta, 1, 12 Kapenaʋm a̱ Chisʋs ʋt ai anta: mihmʋt ile kostinincha he isht anumpohonli tok. 18 Pita, Antilu, Chemis, Chan aiena kʋt nan im aiithʋna ya chi̱ ho̱, Chisʋs ʋt atokolechi. 23 Chisʋs ʋt Kalili yakni a̱ nan im abʋchit a hlopullit, abeka puta atuk ma hlakofihinchi.

¹ Yʋmohmi ma Setan ʋt imomaka pisa chi̱ ka, Shilombish ʋt Chisʋs a̱ yakni haiaka isht ia tok.

² Atuk o̱ yʋmmak ash osh ik impo hosh nitak pokoli ushta cha ninak pokoli ushta aiena ho̱ anta tuk osh, misha pila mʋno hohchʋfo tok.

³ Mihma imomaka pisa yash osh im ʋla mʋt, Chihowa Ushi chia hokmʋt, tʋli yak ma̱ya kʋt pʋska toba chi̱ ka i̱ mihá, im achi tok.

⁴ Yohmi kia yʋmmak ash osh afalaminchi mʋt, Hatak ʋt pʋska yak bano ho̱ ai okcha̱ya he keyu; amba anumpa moyuma kʋt Chihowa itih akohoncha kak a hi o̱, holisso tok oke, achi tok.

⁵ Yohmi ma Setan ash osh ilauelit tʋmaha holitopa ya̱ ont isht chukowa cha, tempel wishakchi yo̱ ont o̱ hilechi tok.

⁶ Mihmʋt, Chihowa Ushi chia hokmʋt, aka pit ish ile pilashke; chi apesahancha chi̱ ka im enchil ʋhleha ha̱ atohno na ibbak a̱ isht ʋba takalihinchit chisht a̱ya na nitak kaniohmi kia chiyi ya̱ tʋli isht chik ai isso ka hi a̱, holisso tok oka, im achi tok.

⁷ Mihma Chisʋs ash osh, Chitokaka Chin Chihowa hoka imomaka chik peso kashke, achi kʋt holisso tok ak inli hoke, im achi tok.

⁸ Mihma anonti Setan ash osh ilauelit nʋnih chaha fehna ho̱ isht oiya cha, yakni apelichika moma, mikmʋt nan‐isht‐imaholitopa aiena ka pit pisachi tok;

⁹ Mihmʋt, Aka hlipiʋt is si aiokpʋchi hokma, ilʋppa moma ka chima lashke, im achi tok.

¹⁰ Mihma Chisʋs ash osh, Setan ʋt kanima iashke: chin Chitokaka Chihowa hak o̱ ish ai okpahanchikmʋt, yʋmmak illa ho̱ ish im antiashke, achi kʋt holisso hoka, im achi tok.

¹¹ Yohmi ma Setan ash osh i̱ filʋmmi ma, enchil osh ai ʋla cha, okla ant nan isht im anta tok.

¹² Yʋmohmi tuk o̱ Chisʋs ʋt, Chan ʋt aboha kʋllo fo̱ka na haklo mʋt, Kalili a̱ ia tok.

¹³ Atuk osh Nasalet a̱ issʋt ia mʋt, Kapenaʋm yʋmmʋt Sabulon yakni, micha Neftalim yakni aiena ont ai ʋhli okhʋta lapalika ak o̱ ont ahanta tok.

^14-16 Yakohmi kʋt hopaii Esaias anumpulit, Sabulon yakni, micha Neftalim yakni okhʋta lapalika, Chatan misha, Chentail okla i̱ Kalili ʋt aiokhlileka a̱sha tuk ʋt tohwikeli chinto pisa tuk; mihma isht aiilli yakni, micha isht‐aiilli i̱ hoshontika ma̱ya tuk a̱ tohwikeli hʋt i̱ kohchʋt takalishke, achi tok a̱ ont aia̱hla he mak a tok.

¹⁷ Yʋmma foka aiʋhlit mihinti ma, Chisʋs ʋt ʋba isht anumpulit, Oh ilekostininchi; ʋba apelichika yʋt olanlosi ʋla hoka, ahanchit ishtia tok.

¹⁸ Atuk osh Chisʋs ʋt Kalili okhʋta lapalika nowʋt a̱ya tuk osh, itibapishi tuklo, Saimon Pita hohchifo, anonti nakfish Antilu itatuklot nʋni‐hokli atuk osh nʋni‐isht‐hokli a̱ okhʋta pit okʋchi hosh a̱shwa na pisa tok.

¹⁹ Mihmʋt yʋmmak ash o̱, Hʋs siakaiyashke, mikma hatak hokli o̱ hʋch ikbi lashke, im achi tok.

²⁰ Yohmi ma mih makinli ho̱ i̱ nʋni‐isht‐hokli a̱ issa cha, yʋmmak ash o̱ iakaiyʋt okla tok.

²¹ Mihma yʋmmak ash ʋttʋt ia hosh a̱ya mʋt, anonti itibapishi tuklo inla, Sebete ushi Chemis, micha nakfish Chan itatuklo kʋt i̱ki Sebete a̱ api̱hʋt nʋni‐isht‐hokli a̱ apoksia hosh peni a̱lhto na pisa tok; micha pit i̱ howa tok.

²² Yohmi ma mih makinli ho̱ peni, micha i̱ki aiena kash o̱ issʋt, yʋmmak o̱ iakaiyʋt okla tok.

²³ Mihma Chisʋs ʋt Kalili a̱ mominchit a̱yʋt, i̱ sinakak puta ka nan ai im abʋchit, apehlichika isht anumpa hanta ya̱ isht anumpohonli; micha okla hʋt abeka, micha haknip ik in chukmo im a̱sha tuk a̱ mominchit hlakofihinchi tok.

²⁴ Mihma isht annoa kʋt Silia moma ka ont hlopulli tok; mihma okla hʋt abeka ilaiyuka puta isht issikkopa hatuk; micha nan isht‐ahullo okpulo ai i̱ fo̱ka hatuk; mihmʋt tasimbo yatuk; micha palsi isht abeka yatuk moyuma ka okla isht im ai ona tok; mihma yʋmmak ash hlakofolichi tok.

²⁵ Yohmi ma okla chinto Kalili minti, mikmʋt Tekapolis minti, mikmʋt Chelusalem minti, mikmʋt Chutea minti, mikmʋt Chatan misha minti aiena kʋt iakaiya tok.