Mahlu 3 - Chahta Holisso Holitopa 1886

Chan Baptist ʋt ʋba anumpa ha̱ Chutea yakni haiaka isht anumpohonli, mihmʋt baptismohonchi, 1, 13 Chisʋs ʋt Chan ak o̱ im a baptismo; mihma Shilombish Holitopa yʋt ʋba mintit onʋtula.

¹ Nitak yʋmma foka ma Chan Baptist ʋt Chutea yakni haiaka ya̱ ʋbanumpa isht ai anumpohonlit a̱ya tok;

² Mihmʋt, Ʋba apehlichika yʋt olanlosi ʋla hoka, hʋsh ilekostininchashke, ahanchi tok.

³ Ilʋppak o̱ hopaii Esaias ʋt isht anumpulit, Achʋfa hosh yakni haiaka ya̱ ai anumpohonlit, Chihowa ata̱ya hi a̱ apoksiachit, i̱ hina puta ka hʋsh apissʋlechashke, ahancha hi oke, achi tok mak oka.

⁴ Mihmʋt Chan yʋmmak okʋt im anchi yʋt Kamel hishi yosh toba ma, na‐hakshup chuhlafa ʋskufʋchi yo̱ ʋskufaiyachi tok; mihmʋt im ilhpak ʋt ha̱wa micha foi‐bila aiena kak a tok.

⁵ Yohmi ma Chelusalem, micha Chutea pit a moma, mikmʋt Chatan auet a bili̱ka yakni moma ka a̱sht a kohchʋt iʋt;

⁶ Yʋmmak ash o̱ im ai onʋt, nan im aiashʋchika puta ilanolit, Chatan a̱ ai im a baptismo tok.

⁷ Yohmi kia Falisi ʋhleha mikmʋt Satusi ʋhleha aiena kʋt laua hosh im a baptismot ai ʋla na pisa mʋt, yʋmmak ash o̱, Sinti chilita isht‐atiaka hʋchia ma! na palʋmmi mihinti ka hʋsh i̱ hlakofa hi okʋno kʋta hosh hʋchim anoli tuk oh cho?

⁸ Yohmi hokʋt ilekostininchi ai itʋlhpesa mak o̱ ʋnit hʋsh wayashke;

⁹ Micha, Eblaham ak osh pi̱ki oka, acha hi okʋno hʋch ik il anukfillo kashke; Chihowa hʋt tʋli yak aiasha ka Eblaham im ʋlla ya chi̱ ka ai ikba hinla hoke, hʋchim achi lishke.

¹⁰ Yohmikma himak ak kia iskifa yʋt iti puta akishtʋla ya̱ itonla hoke; yohmi hatuk o̱ iti yʋt ʋni achukma ho̱ ʋnit waya keyu kʋt moyumʋt cha̱yʋt akakoha cha, luak pit itokaha chatuk oke.

¹¹ Ʋno yokʋto hʋsh ilekostinincha chi̱ mak o̱, oka ya̱ ishit hʋchi baptismochi li ho mʋhlishke; yohmi kia auet siaka̱yʋt mihinti hokʋto ʋno a̱ shaiyahli, yʋmma i̱ shulush a̱ isht im a̱ya hi o̱ si ahoba keyu hoke; yʋmmak osh Shilombish Holitopa, micha luak aiena mak o̱ ishit hʋchi baptismocha hi oke.

¹² Yʋmmak osh i̱ nan‐isht‐mʋshahchi yʋt ibbak a foyuka; yohmi hokʋt i̱ nan‐anihichi yatuk ma achukmalit kashofit tahli cha, onush atuk ma kanchak a̱ pit ashacha hi oke; yohmi kia hakhlopish okʋno luak moshola hi keyu mak o ishit hukma hi oke, im achi tok.

¹³ Yohmi ma Chisʋs ʋt Kalili a̱ ʋttʋt minti hosh Chan a̱ im a baptisma chi̱ hosh Chatan a̱ ai im ona tok.

¹⁴ Yohmi kia Chan ʋt yʋmmak ash o̱ im alʋmmi mʋt, Ʋno ak osh chishno a̱ chim a baptismo la he si ʋlhpiesa ka, anonti ʋno ak o̱ is sʋm ʋla cho? achi tok.

¹⁵ Mihma Chisʋs ʋt afalaminchi mʋt, Himak okʋno yakohma hi oka ish ahnashke: ai yakohmi hosh nana ai ʋlhpiesa puta ka mominchit il aia̱hlicha he pim ʋlhpesa hoke, im achi tok. Yohmi ma ʋlhpesa, im ahni tok.

¹⁶ Yohmi na Chisʋs ʋt baptismo mak inli hosh oka ya̱ ai ʋttʋt kocha ia tok; yohmi ma ʋba shutik ʋt auet in tiwa tok; mihma Chihowa imi Shilombish ʋt pʋchi yoshuba chiyuhmi hosh aka mihintit, yʋmmak ash o̱ ant o̱ binili tok.

¹⁷ Yohmi ma ʋba shutik a̱ auet ai anuhumpa kʋt, Ilʋppak osh sʋso a̱ holitopa yo̱ ilʋppak o̱ nan isht a sai yukpa mak oke, achi tok.