Mahlu 28 - Chahta Holisso Holitopa 1886

Nitak ont atuchina onnahinli fehna ohoyo tuklo kʋt Chisʋs ahollopi tuk a̱ ona; yʋmma enchil ʋt ai afama, 1; 2 micha Chisʋs ʋt illi tuk ʋt falamʋt tani tuk a̱, im anoli; mihmʋt nan im ai ithʋna ʋhleha ha̱ ia cha, ont im anola chi̱ ka i̱ miha. 11 Kaniohmi hosh Chisʋs ahollopi ya̱ atonit aiasha tuk ʋt falamʋt tʋmaha chito ya̱ ona cha, ahollopi nana a kaniohmi tuk a̱ na holitompa isht a̱sha pehlichi ʋhleha ha̱ im anoli. 15 Chisʋs ʋt nan im ai ithʋna auah achʋfa ka Kalili ak o̱ ai i̱ haiaka, 19 micha ʋbanumpa ha̱ oklushi puta ka isht im anumpohonlit itʋnohowa he a̱ im apesa.

¹ Yʋmohmi tuk o̱ nitak hullo ʋt ont taha tuk wek nitak ʋmmona chi̱ hosh onnʋt mihinti ma, Meli Maktalene, micha Meli achʋfa itatuklo kʋt sepʋlka yash pisʋt a̱ya hosh itonachi tok.

² Yohmi ma yakni ʋt winakʋchi fehna tok: Chitokaka im enchil osh ʋba mintit ʋla cha, tʋli okhissa onʋtula tuk a̱ kanompit tonolichi cha, paknaka ya̱ on a̱sha ha tok,

³ Mihma haknip ʋt malʋtha ak o̱ chiyuhmi ma, im ilefoka yʋt tohbi kʋt okti pushi ak o̱ chiyuhmi tok.

⁴ Mihma nan atoni ʋhleha hatuk ʋt yʋmma i̱ nukshopa kʋt wʋnihinchi mʋt, illi yo̱ chiyuhmi tok.

⁵ Yohmi ma enchil ʋt anumpuli mʋt, ohoyo hash o̱, Ititaiyukhʋna ahonʋhlʋt illi tuk Chisʋs ak o̱ hʋsh hoyo ka hʋchim ithanali hoka, ik hʋchi nukshopo kashke.

⁶ Ilʋppa ikshoshke; miha tuk okʋt falamʋt tani tuk oke. Mintit Chitokaka yʋt ai itola tuk a̱ ant ho pesá.

⁷ Micha tu̱shpʋt iʋt, illi tuk ʋt falamʋt tani cha, hʋchi ti̱kba Kalili a̱ ia chi̱ ka, yʋmmak o̱ ont hʋsh a pisa chi̱ hoke, nan im ai ithʋna ʋhleha ha̱ ont hʋsh im anolashke: inta! hʋchim anoli li mak oke, im achi tok.

⁸ Yohmi ma nukshopa, mikmʋt nayukpa fehna aiena hosh sepʋlka ya̱ ashwʋt tu̱shpʋt itiachi tok; mihmʋt nan im ai ithʋna ʋhleha hatuk a̱ anumpa isht im ona chi̱ kʋt tihlaha̱ya tok.

⁹ Atuk o̱ nan im ai ithʋna ʋhleha ha̱ im anolit ia hosh a̱yʋt okla ma, Chisʋs ʋt afama cha, Na hʋchi yukpashke; achi tok. Mihma iʋt yʋmmak ash o̱ iyi a̱ ont halʋlli cha, aiokpahanchit okla tok.

¹⁰ Yohmi ma Chisʋs ash osh, Ik hʋchi nukshopo kashke: Oh ia cha, itibapishili ʋhleha ha̱ ont hʋsh im anolikma, Kalili a̱ okla ai onʋt yʋmmak o̱ a sa pesashke, im achi tok.

¹¹ Yohmi na itiachi hosh a̱yʋt okla ma, nan atoni ʋhleha hatuk kaniohmi kʋt tʋmaha ha̱ ona cha, nana kʋt kaniohmi tuk a̱ mominchit na holitompa isht a̱sha pehlichi ʋhleha ha̱ im anoli tok.

¹² Mihma yʋmmak ash osh hochitoka ʋhleha ai itapi̱hʋt itʋnaha cha, it im anumpulit okla in taiyaha mʋt, tʋshka chipota ʋhleha hash o̱ tʋli holisso la̱wa ka ima cha,

¹³ Nan im ai ithʋna ʋhleha hʋt ninak o̱ ai ʋla cha, nusi hosh e ma̱ya takla ma, ant hu̱kopʋt ishit kʋnia tuk oke, hʋsh achashke.

¹⁴ Yohmikma ilʋppak atuk mʋt nahullo mi̱ko haksobish a̱ afohka hokma, yʋmmak oka e hopohlʋchi cha, e hʋchi hlakofichashke, achi tok.

¹⁵ Yohmi ma tʋli holisso ash o̱ okla ishi mʋt, nan im abʋchi tok mak o̱ okla ai yʋmohmi tok: yʋmohmi tok o̱ anumpa ilʋppʋt himak nitak ak kia Chu okla itintakla ya̱ ai anno̱hoa hoke.

¹⁶ Yohmi ma nan ithʋna auah achʋfa kash osh Kalili a̱ ilhkolit, nʋnih chaha Chisʋs ʋt ai im atokoli tok mak o̱ ona tok.

¹⁷ Micha yʋmmak ash o̱ pisa mʋt, okla ai okpahanchi tok: yohmi kia kanimi kʋto anuktuklo tok.

¹⁸ Yohmi ma Chisʋs ʋt ʋla cha, ant im anumpuli mʋt, Ʋba yakni, micha yakni ilʋppa aiena nan‐isht im ai a̱hlika puta moma kʋt ʋmmi toba hoke.

¹⁹ Yohmi hoka hʋsh ilhkoli cha, oklushi moma ka nan ithʋna ikbit, I̱ki, micha Ushi, mikmʋt Shilombish Holitopa aiena ho̱ isht a hochifochit hʋsh baptismo honchashke:

²⁰ Nan oklu̱ha ka nana ho̱ hʋchim apesa li tuk a̱ holitobla he mak o̱ hʋsh im abahanchashke: yohmikma yakeh! ʋno ʋt hʋchi awant a̱ya li̱ bilia ho̱, yakni ʋt ont ai ʋhla hi oke, achi tok oke. Amen.