Mahlu 26 - Chahta Holisso Holitopa 1886

Na pehlichi ʋhleha hʋt it afama cha, Chisʋs a̱ ʋba chi̱ kʋt isht anumpuli, 1, 6 Ohoyo hosh nan‐ahama ya̱ Chisʋs noshkobo isht im a hʋmmi. 14 Chutas Iskaliot ʋt Chisʋs a̱ tʋli hʋta pokoli tuchina ho̱ ishit kanchi. 17 Chisʋs ʋt nan im ai ithʋna ʋhleha ha̱ nan ʋbanʋblit ontia it ibai impa; 26 mihmʋt opiaka na holitopa impa isht ʋlhpisa ka apesa, 30 mihmʋt kohchʋt nʋnih chaha Alif a̱ ona; mihmʋt Pita yʋt ik ithano miha chi̱ ka tikbanlit anoli. 36 Chisʋs ʋt Ketsemane osapushi ont chukowa cha, ʋba pit anumpuli. Chutas Iskaliot ʋt hatak na‐halupa sholi bieka ho pehlichi cha, Chisʋs a̱ ont ishi. 57 Okla hʋt Chisʋs a̱ ishi mʋt na holitompa isht a̱sha pehlichi in chuka holitompa isht ona mʋt, okla hash osh kalakshichit on tuftua. 69 Pita yʋt in Chitokaka ya̱ ik ithano il ahobi: yohmit ashʋchi tok ʋt nukha̱klo.

¹ Atuk o̱ yakohmi tok; Chisʋs ʋt anumpa ilʋppa moma ka ahanchit ont in taiyaha mʋt, nan im ai ithʋna ʋhleha hash o̱,

² Nitak tuklokma ʋbanʋblit‐ontia impa hʋt a̱sha chi̱, mikma Hatak Ushi ʋt iti‐taiyukhʋna ahonʋhlʋt illa chi̱ mak o̱, ishit okla ibbak fohka chi̱ ka hʋsh ithaiyanʋshke, im achi tok.

³ Yʋmma foka ma na holitompa isht a̱sha pehlichi ʋhleha, mikmʋt na holissochi ʋhleha, mikmʋt okla ha̱ i̱ hochitoka ʋhleha aiena kʋt na holitompa isht a̱sha pehlichi Kaiafas hohchifo ho̱ im aboha holitopa ya̱ ai itʋnaha tok.

⁴ Mihmʋt haksichi hosh Chisʋs a̱ okla ishi cha, ʋba hinla kʋt it im anumpulit ma̱ya tok.

⁵ Yohmi kia, Impa chito a̱sha nitak ak o̱ keyu ho̱, yʋmmak keyukma okla hʋt i̱ sanali fehna hinla yoba ká achi tok.

⁶ Atuk o̱ Chisʋs ʋt Betani a̱ Saimon leplosi ʋbi a tok in chuka ya̱ a̱sha ma,

⁷ Ohoyo pa̱sh‐ahama holitompa fehna alabasta itombu shi achʋfa ho̱ ishi kʋt im ona mʋt, impa hosh a̱sha ma, noshkobo a̱ ont o̱ fohobli tok.

⁸ Yohmi kia nan im ai ithʋna ʋhleha hash osh pisa kʋt, okla ik im ʋlhpeso fehna mʋt, Katiohmi mak o̱ ilʋppʋt yakohmit okpulo cho?

⁹ Pa̱sh‐ahama ilʋppʋt la̱wa kia isht ʋlhtoba cha, ilbʋsha ʋhleha ha̱ i̱ holhpela hinla tuk oka, achi tok.

¹⁰ Chisʋs ʋt akostininchi mʋt, Nanta katiohmi ho̱ ohoyo ha̱ hʋsh ataklʋmmichi cho? ilʋppak okʋt nan achukma mak o̱ isht ʋm ai yʋmihchi hoka.

¹¹ Ilbʋsha yokʋto hʋchim a̱sha bilia cha tuk: amba ʋno yokʋto hʋch ibatakla li̱ bilia keyushke.

¹² Pa̱sh‐ahama ilʋppa sa haknip a̱ o̱ fohobli hokʋt, sa hollopa chi̱ kak o̱ ʋm atahli hosh yʋmihchi hatuk oke.

¹³ A̱hli mak o̱ hʋchi̱ miha lishke, Yakni moma ka kanima fehna yo̱ ʋbanumpa ilʋppʋt isht ai anuhumpakma, nana ka ohoyo ilʋppʋt yakohmichi tuk a̱ yʋmmak ash o̱ isht ithaiyana hi a̱, anoho̱wa hi oke, im achi tok.

¹⁴ Yʋmma foka ma auah tuklo tuk ash achʋfʋt Chutas Iskaliot hohchifo hosh iʋt na holitompa isht a̱sha pehlichi ʋhleha hash o̱ im ona tok.

¹⁵ Mihmʋt, Yʋmmak oka ishit hʋchim issa la chi̱ ka nanta ho̱ hʋs sʋma hinla cho? yʋmmak ash o̱ im achi tok. Mihma tʋli hʋta boshulli pokoli tuchina hi o̱ okla i̱ kahli tok.

¹⁶ Yohmi ma nitak yʋmma ai ʋhlit ma̱ha̱ya ka yʋmmak ash o̱ kaniohmichit ishit im issa he akostininchi baha̱na tok.

¹⁷ Yohmi tuk o̱ pʋska ik shatʋmmo ʋpa nitak ʋmmona ho̱ nan ithʋna ʋhleha hʋt Chisʋs a̱ im ai ona mʋt, Ʋbanʋblit‐ont ia ish impa chi̱ ka, katima yak o̱ ont e chim ai atahla hi a̱ ish ahni cho? im achi tok.

¹⁸ Mihma yʋmmak ash osh, Iʋt tʋmaha ha̱ hʋsh onak mʋt, hatak yʋmmak o̱ hʋsh im ona cha, Nan ithʋnanchi ʋt, Nitak ʋt ʋm ai ona̱ hosishke: chin chuka ak o̱ nan ʋm ai ithʋna ʋhleha ha̱ pehlichit ʋbanʋblit‐ontia ya̱ a holitobli la chi̱ hoke, achi kano, hʋsh im achashke, achi tok.

¹⁹ Yohmi ma nan ithʋna ʋhleha hash osh, Chisʋs ʋt ai im atokoli tuk mak o̱ yʋmohmi tok; micha ʋbanʋblit‐ontia ya̱ okla atahli tok.

²⁰ Yohmi ma ont opiʋt taha ma, auah tuklo kash o̱ pehlichi cha impa chi̱ hosh binili tok.

²¹ Atuk osh okla impʋt ma̱ya ma, A̱hli mak o̱ hʋchi̱ miha lishke, Hʋsh achʋfona kʋt sʋshit okla ha̱ hʋsh im issa chi̱ hoke, achi tok.

²² Mihma okla nukha̱klo fehna mʋt, achʋfaiyukʋt momʋt, Chitokaka ma! ʋno ak oh cho? im achi tok.

²³ Mihma yʋmmak ash osh afalaminchi mʋt, Kʋna hosh ampo a̱ ibbak a̱ pit sʋb ai okʋchikmʋt, mihi yosh sʋshit okla ha̱ im issa chi̱ mak oke.

²⁴ Kaniohmit isht holihi̱so tok mak o̱ Hatak Ushi ʋt a yʋmohmi hoke: amba Hatak Ushi a̱ ishit inla ya̱ im issa hatak okʋto i̱ palʋmma chi̱ mak oke; hatak yʋmmak okʋt ik tobo tok okmak osh im achukma hi atuk oke achi tok.

²⁵ Yohmi ma ishit inla ya̱ im issa Chutas ash osh afalaminchi mʋt, A̱ shali ma! ʋno ak oh cho? achi ma, A̱hli, ish mihʋshke, achi tok.

²⁶ Mihmʋt okla impa hosh ma̱ya ma, Chisʋs ʋt pʋska ya̱ ishi cha, ʋba pit aiokpʋchi mʋt, tushahlichi cha, nan ithʋna ʋhleha hash o̱ pit ima mʋt, Ilʋppʋt sa haknip mak oke; ishit oh ʋpá, achi tok.

²⁷ Mihmʋt isht‐ishko ya̱ ishi cha ʋba pit aiokpʋchi mʋt, yʋmmak ash o̱ pit ima mʋt, Hʋsh moma kʋt hʋsh ishkashke.

²⁸ Ilʋppak okʋt sʋssish nan isht ʋlhpisa himona, laua kʋt nan ai ashʋchika puta isht i̱ kashofa he mak o̱, hlatapa hatuk oka.

²⁹ Yohmi kia himak a̱ pilla ma pa̱kʋpi ʋnit waya ilʋppa ak ishko mak atuk osh himonʋchit A̱ki apehlichika ya̱ a hʋch ibai ishko la he nitak mak a hi oke, hʋchim achi lishke, achi tok.

³⁰ Mihma ʋba isht taloa ya̱ okla taloʋt issa mʋt, okla kohchʋt nʋnih Alif a̱ pit ilhkoli tok.

³¹ Yohmi ma Chisʋs ʋt yʋmmak ash o̱, Himak ninak a̱ ʋno ak atuk mak o̱ hʋsh moma kʋt hʋch ibetʋbla chi̱ hoke. Chukfʋlhpoba apesʋchi a̱ issot kanchi likma, chukfʋlhpoba atuk ʋt itafimimpʋt a̱ya he, achi hosh holisso hatuk oka.

³² Yohmi kia falamʋt tani li ha yokʋto, hʋchi ti̱kba Kalili a̱ ona la chi̱, im achi tok.

³³ Pita yʋt afalaminchi mʋt, Moma kʋt chishno ak atuk mak o̱ isht ai ibetʋbli kia, ʋno yokʋto nitak nana si a ibetʋbla he keyushke, im achi tok.

³⁴ Mihma Chisʋs ʋt, A̱hli mak o̱ chi̱ miha lishke, Himak ninak a̱ aka̱ka yʋt ik olo ki̱sha ho̱, hituchina ha chik sʋthano ka ish miha chi̱ hoke, im achi tok.

³⁵ Pita yash osh, Chi awant sʋlla chi̱ ik nana kia, ak chithano miha la he keyushke, im achi tok. Mihma nan ithʋna ʋhleha hʋt momʋt yʋmmak inli ho̱ miha tok.

³⁶ Yʋmma foka ma Chisʋs ʋt yʋmmak ash o̱ pehlichi cha, yakni Ketsemane hohchifo ho̱ ona mʋt, nan im ai ithʋna ʋhleha hash o̱, yʋmma iʋt ont ʋba pit anumpʋli li ta̱kla ka, ilʋppak inli ho̱ hʋsh chi̱yashke, im achi tok.

³⁷ Mihmʋt Pita, micha Sebete ushi tuklo aiena kʋno pehlichi cha ia tok; mihmʋt nukha̱klo fehnʋt i̱ wekit kʋnia tok.

³⁸ Yohmi mʋt yʋmmak ash o̱, Sa shilombish ʋt nukha̱k lo fehna, illa̱ he ak kia chiyuhmishke: ilʋppak inli ho̱ chi̱yʋt hʋs sʋb ai o̱kchashke, im achi tok.

³⁹ Mihmʋt achakalit iʋt misha ituma ona mʋt, hlipiʋt itula cha, ʋba pit anumpuli mʋt, A̱ki ma! yohma hinla yoba hokma, isht‐ishko ilʋppʋt a̱ kanʋllashke: yohmi kia ʋno ak osh ahni li kak keyu, amba chishno ish ahni kak ashke.

⁴⁰ Mihmʋt mintit nan ithʋna aiasha kash o̱ ʋla mʋt, nusi hosh ma̱ya na ant pisa cha, Pita yash o̱, Hʋs sʋb ai o̱kcha na hʋshi kanʋlli achʋfa ka ona hinla keyu mak oh cho?

⁴¹ O̱kchʋt ʋba pit hʋsh anumpohonli cha, ayoshuba ya̱ hʋch ik iba chukowo kashke: shilombish okʋto im ʋlhtaha ho mʋhli, amba nipi ak osh tikambishke, im achi tok.

⁴² Anonti atu̱kla ma ia cha, ont ʋba pit anumpuli mʋt, A̱ki ma! isht‐ishko ilʋppa ai ishko li ha yo keyukma, a̱ kanʋlla he keyu hokma, chishno nana ish aiahni ka yʋmohmashke, achi tok.

⁴³ Micha ʋla mʋt, anonti nusi hosh ma̱ya na ant pisa tok: nishkin ak osh weki hatuk okʋt.

⁴⁴ Mihma anonti issʋt ia mʋt, ont atuchina ma ʋba pit anumpuli kʋt, anumpa yʋmmak ash inli ho̱ miha tok.

⁴⁵ Yohmi mʋt nan im ai ithʋna aiasha kash o̱ ʋla mʋt, Himmak mak o̱ ma̱yʋt nusit hʋsh fohashke; inta! hʋshi kanʋlli ʋlhpisa hʋt ai ona mak oke; yohmi ka Hatak Ushi a̱ haksichit nan ashʋchi ʋhleha ibbak sa fohka chi̱ mak oke.

⁴⁶ Ho taní, kiloh ilhkolí, yakeh! sa haksichit okla ibbak sa fohka chi̱ hokʋt olanlosi ʋlʋshke, im achi tok.

⁴⁷ Mihma anumpohonli moma ho̱, auah tuklo atuk achʋfa Chutas ʋt na holitompa isht a̱sha pehlichi ʋhleha micha okla i̱ hochitoka ʋhleha aiena im anumpa ho̱ okla chinto bʋshpo falaia puta, mikmʋt iti tʋptua aiena sholi ho̱, pehlichi cha ʋla tok.

⁴⁸ Yohmi kʋt haksichit okla ibbak fohka chi̱, yʋmmak okʋt isht akostinincha hi a̱ im anoli kʋt, Kʋna ho̱ ont i̱ su̱ksowa likma, yʋmmak osh mih mak a chi̱ hoke; kʋllochit hʋsh ishashke, achi tok.

⁴⁹ Mihmʋt yʋmmak ash osh Chisʋs a̱ im ona mʋt, A̱ shahli ma! na chi yukpashke, achi mʋt, i̱ su̱ksowa tok.

⁵⁰ Mihma Chisʋs ʋt, A̱ kana hʋt katiohmi ho̱ ish la cho? im achi tok. Yohmi ma okla ai onʋt Chisʋs ash o̱ iti̱ hoklit ishi tok.

⁵¹ Yohmi ma Chisʋs a̱ apehʋt a̱ya tuk ʋt achʋfa hosh ibbak atuk ma i̱ bʋshpo falaia ya̱ pit ishit shu̱fi mʋt, na holitompa isht a̱sha pehlichi in tishu ho̱ isht fahamʋt, haksobish a̱ chanlit tʋbli tok.

⁵² Yʋmma foka ma Chisʋs ash osh, Chim bʋshpo falaia a falaminchit afohka ya̱ pit ish fohkashke: kʋna hosh bʋshpo falaia yo̱ ishi hokʋto, bʋshpo falaia yo̱ isht illa he bano hoka.

⁵³ Himonasi ak kia A̱ki a̱ pit im asilhha li hok ma, ashali̱ka enchil ʋhleha lechʋn auah tuklo atampa ka auet ʋma hinla ka ik chim ahobo cho?

⁵⁴ Yohmi hokma katiohmi hosh yakohma hi a tok ʋt Baibil ʋt ont aia̱hla hinla cho? im achi tok.

⁵⁵ Chisʋs ʋt hʋshi kanʋlli ʋlhpisa yʋmmak inli ho̱ okla laua yash o̱, Hatak hu̱kopa yo̱ a̱yʋt i̱ kohcha ho̱ chiyuhmit bʋshpo falaia, mikmʋt iti tʋptua aiena sholi hosh hʋs sʋsha chi̱ kʋt hʋsh itʋnowa cho? tempel anu̱kaka ya̱ nana ai ithʋnanchit nitak moma hʋch itinta̱kla binili li ka iti̱ hoklit hʋch ik sasho chatuk oke, im achi tok.

⁵⁶ Yohmi kia hopaii ʋhleha hʋt holissohonchi tok a̱ ont aia̱hla chi̱ mak o̱, ilʋppa moma kʋt yakohmi tok. Yohmi ma nan ithʋna ʋhleha hatuk ʋt momʋt yʋmmak ash o̱ issʋt yihlepa tok.

⁵⁷ Yohmi ma Chisʋs a̱ iti̱ hoklit ishi tuk ʋhleha hash osh yʋmmak ash o̱ ilauelit iʋt na holitompa isht a̱sha pehlichi i̱ shahli Kaiafas a̱ isht im ona tok; yʋmmak o̱ na holissochi ʋhleha, mikmʋt hochitoka ʋhleha aiena kʋt ai itʋnahʋt ma̱ya hatuk oka.

⁵⁸ Yohmi ma Pita yʋt auet i̱ mishemanchit pit iakaiyʋt ya̱ha̱yʋt na holitompa isht a̱sha pehlichi i̱ shahli im aboha holitopa hatuk ma ont chukowʋt, ont ishtaiyopi ka pi̱sa chi̱ hosh tishu ʋhleha ha̱ ta̱kla ont binili tok.

⁵⁹ Mihma na holitompa isht a̱sha pehlichi ʋhleha, micha hochitoka ʋhleha, mikmʋt nan‐apesa moyuma kʋt Chisʋs a̱ ʋba chi̱ kʋt, anumpa ik a̱hlo isht atokola hi a̱ hoyot aiasha tok.

⁶⁰ Yohmi kia ik ahayucho tok. Anumpa ik a̱hlo isht atokoli hokʋto lauʋt ai ahanla mʋhli kia, ai ʋlhpesa hi a̱ ik ahayucho tok. Ont ishtaiyopi ma anumpa ik a̱hlo isht atokoli ʋt tuklo hosh ʋla tok;

⁶¹ Mihmʋt, Ilʋppʋt Chihowa in tempel a̱ okpʋni li tuk mʋt, anonti nitak tuchinakma ikbit tahli la hinla hoka, achi kʋno, achi tok.

⁶² Yohmi ma na holitompa isht a̱sha pehlichi i̱ shahli ʋt wakaya mʋt, afalaminchit, Afalaminchit nana kia chik acho cho? nanta mak o̱ yakohmit isht chi atokoli cho? im achi tok.

⁶³ Yohmi kia Chisʋs ʋt nana ik acho ki tok. Mihma na holitompa isht a̱sha pehlichi i̱ shahli ʋt anumpuli mʋt, Chishno ak osh Klaist Chihowa Ushi chia hatuk okmʋt, keyukma nana hatuk okmʋt, ish pim anola he mak o̱ Chihowa okcha̱ya pulla ka isht a chim apesa lishke, im achi tok.

⁶⁴ Mihma Chisʋs ʋt, Ʋlhpesa ish mihʋshke: yohmi kia, Himak a pilla ma Hatak Ushi ʋt nan oklu̱ha im aiya im ibbak‐ishtimpakimma ya̱ binili, micha ʋba hoshonti anu̱kaka minti aiena ho̱ hʋsh pisa hi oke, hʋchim achi lishke, im achi tok.

⁶⁵ Yohmi ma na holitompa isht a̱sha pehlichi i̱ shahli ash osh im ilefoka, im anchi aieninchit ita hlilʋffi mʋt, Chihowa ik ahobalot anumpa ha̱ anumpulishke; himmakma nan‐isht ai atokowa katiohmi ho̱ iloh ahna hinla cho? inta! himak okʋno Chihowa ik ahobalot anumpuli ka hʋchishno ʋt hʋsh hakloshke.

⁶⁶ Katiohmi hʋchim anukfila cho? achi ma, okla afalaminchi mʋt, Illa he ak o̱ ʋlhpesa hoke, achi tok.

⁶⁷ Yohmi ma nashuka ya̱ on tuftua ma, ibbak a̱ bonullit isht isso tok, kanimi kʋt ibbak a̱ isht pasalichi mʋt,

⁶⁸ Klaist chia ma! kʋna hosh chisso hokma, akostininchit pin anoli, achi tok.

⁶⁹ Yohmi ma Pita yʋt aboha holitompa kocha ya̱ asha tok: mihma ohoyo himita yosh yʋmmak ash o̱ ʋla mʋt, Chishno ak kia Chisʋs Kalili ʋtta ya̱ awant ish a̱ya kamo, achi tok.

⁷⁰ Yohmi kia moma itikba yatuk ma ik ithano ilahobit, Nana ish miha hoka, ak akostininchoshke, achi tok.

⁷¹ Micha kohchʋt iʋt apishia ona ma, ohoyo himita inla yosh pisa mʋt, yʋmma ma̱ya kash o̱, Ilʋppak kia Chisʋs Nasalet ʋtta ya̱ awant a̱ya kamo, im achi tok.

⁷² Mihma anonti anumpa kʋllo isht il onochit ik ithano ilahobit, Hatak yʋmma ithana li keyushke, achi tok.

⁷³ Atuk o̱ in chekosi ma bili̱kasi hiohma̱ya tuk ash osh ai ʋla mʋt, Pita yash o̱, Chishno ak kia okla yʋmma ish ib ai achʋfa yatuk o̱ pullʋshke; chim anumpa hʋt chi otʋnichi hoka, im achi tok.

⁷⁴ Yohmi ma yʋmmak ash osh, Hatak yʋmma ithana li keyushke, achit ik ahobalot anumpulit anumpa kʋllo isht il onochit ishtia tok. Mihma chekosi mak inli ho̱ aka̱ka yʋt ola tok.

⁷⁵ Yohmi ma Pita yash osh, Aka̱ka yʋt ik olo ki̱sha ho̱, hituchina ha chik sʋthano ish miha chi̱ hoke, im achi tok, Chisʋs im anumpa hash pit ithaiyana tok. Mihmʋt kocha ia cha, yaha̱ya fehna tok oke.