Mahlu 25 - Chahta Holisso Holitopa 1886

Chisʋs ʋt nitak ishtaiyopi ʋla hi oka isht anumpuli: yohmi kʋt, ohoyo himita hatak haleli keyu pokoli, 1: 14 micha talent aiena ka nan isht apesʋt anumpuli. 31 Chisʋs ʋt ʋla cha nana apesa hi okʋt isht anumpuli.

¹ Yʋmma fokakma ʋba apehlichika yʋt ohoyo himithoa hatak ik halelo pokoli hosh pʋla sholit, hatak himona itauwaya chi̱ ka afamʋt ilhkoli tok o̱ chohma he.

² Mihmʋt tahlapi hosh hopoyuksa yokma, anonti tahlapi kʋto ik hopoyukso ya tok.

³ Ik hopoyukso ʋhleha hatuk ash osh pʋla ha̱ okla ishi kia, bila yano okla ik esho ki tok.

⁴ Amba hopoyuksa hatuk okʋto bila yʋt aiʋlhto a̱ abeha ho̱ pʋla ha̱ aieninchit okla ishi tok.

⁵ Hatak himona ohoyo itauwaya chin tuk ash osh ile sʋlahachit anta na nosilhhʋt taha cha, okla nusi tok.

⁶ Atuk o̱ ninak ont iklʋnna ma tahpahanla kʋt, Inta! hatak himona ohoyo itauwaya chin tuk ash osh mintishke, iʋt ont oh afamá, achi tok.

⁷ Yohmi ma ohoyo himithoa yʋmmak ash osh momʋt tanit i̱ pʋla ha̱ okla aiiskiachi tok.

⁸ Mihma ik hopoyukso ʋhleha hash osh hopoyuksa ʋhleha hash o̱, Pim pʋla hʋt mosholi hoka, hʋchi̱ bila ya̱ hʋsh pipetashke, im achi tok.

⁹ Yohmi kia hopoyuksa ʋhleha ash osh afalaminchi mʋt, Yohma he keyu; yʋmmak keyukma, pishno micha hʋchishno aiena ka hʋpim ona he keyu hoka: amba iʋt kanchi ʋhleha hak o̱ ont hʋsh in chumpa he, hʋsh ahna he ʋlhpesʋshke, achi tok.

¹⁰ Atuk o̱ chumpʋt ilhkoli ta̱kla ma, hatak himona itauwaya chin tuk ash osh ʋla tok; mihma im ʋlhta̱ha tuk ʋhleha hash osh api̱hʋt ai itauwaya ya̱ pit abeha na okhissa yʋt ʋlhkʋma tok.

¹¹ I̱ himmak o̱ anonti ohoyo himithoa kashapa kash osh ai ʋla mʋt, Chitokaka ma! Chitokaka ma! ish pin tiwashke, achi tok.

¹² Yohmi kia yʋmmak ash osh afalaminchi mʋt, A̱hli mak o̱ hʋchim achi lishke, Hʋch ithanali keyushke, achi tok.

¹³ Yohmi ka Hatak Ushi ʋt ai ʋla he nitak, mikmʋt hʋshi kanʋlli ʋlhpisa aiena hoka pit hʋsh ithana keyu hokʋt, o̱kchʋt hʋsh hoyashke.

¹⁴ Ʋba apehlichika yʋt, hatak osh yakni hopaki nowʋt a̱ya chi̱ hosh in tishu ʋhleha ha̱ itahobi cha, nana im a̱sha tuk ʋt ibbak fohki tok o̱ chohmi hoka.

¹⁵ Mihmʋt achʋfa ho̱ talent tahlapi ho̱ ima mʋt, anonti achʋfa ka tuklo ho̱ ima, anonti achʋfa ka achʋfa ho̱ ima tok; hatak ʋt kanimihcha hinla aiyuka ka ai ʋlhtokowa mak o̱ ima tok; micha mih mak inli ho̱ nowʋt a̱ya tok.

¹⁶ Yohmi ma talent tahlapi ishi tuk ash osh ia mʋt, yʋmmak ash o̱ isht itatobʋt, anonti talent tahlapi mak inli ka isht ikbi tok.

¹⁷ Mihma tuklo ho̱ ishi tuk ash kia, yʋmmak ash inli ho̱ chohmit tuklo mak inli ka isht ahayuchi tok.

¹⁸ Amba achʋfa ho̱ ishi tuk okʋto ia mʋt, yakni o̱ ont kulli cha, i̱ shahli in tʋli holisso atuk ash luhmi tok.

¹⁹ Atuk o̱ hopakit taiyaha ma tishu ʋhleha yʋmma i̱ shahli hash osh ʋla cha, yʋmmak ash i̱ hotinʋt pisa tok.

²⁰ Yohmi ma talent tahlapi ishi tuk ash osh, anonti talent tahlapi mak inli ka aieninchit isht ʋla mʋt. Chitokaka ma! yakeh! talent tahlapi ho̱ is sʋma tok: yʋmmak atuk a̱ talent tahlapi mak inli ka isht ahayuchi li tuk oke, achi tok.

²¹ I̱ shahli hash osh, Ʋlhpiesʋshke, tishu aia̱hli achukma chia ma! nana kanomosi ka aia̱hli chi achukma hoka, nana la̱wa pehlichi a̱ chikbi la chi̱ hoke: chi̱ shahli nan isht im ilaiyukpa ya̱ ish chukowashke, im achi tok.

²² Mihma talent tuklo ho̱ ishi tuk ash kia ʋla mʋt, Chitokaka ma! yakeh! talent tuklo ho̱ is sʋma tok: yʋmmak atuk a̱ talent tuklo mak inli ka isht ahayuchi li tuk oke, achi tok.

²³ I̱ shahli hash osh, Ʋlhpiesʋshke, tishu aia̱hli achukma chia ma! nana kanomosi ka aiahli chia achukma hoka, nana la̱wa pehlichi a̱ chikbi la chi̱ hoke: chi̱ shahli nan isht im ilaiyukpa ya̱ ish chukowashke, im achi tok.

²⁴ Yohmi ma talent achʋfa ho̱ ishi tuk ash osh ʋla mʋt, Chitokaka ma! hatak palʋmmi chia chatuk; chishno ak osh ish hokchi keyu kia, ish ai ʋmo chatuk; mikmʋt chishno ak osh ish mʋshlichi tuk keyu kia, ish pehli chatuk oke, chithanali tuk:

²⁵ Yohmi hatuk osh sa nukshopa cha, iʋt chin talent a̱ yakni anu̱ka yo̱ luhmi li tuk oke: yakeh! chimmi hatuk ʋt yak chin tonlʋshke, achi tok.

²⁶ Mihma i̱ shahli hash osh afalaminchi mʋt, Tishu haksi nan intakobi chia hʋt, ʋno ak osh hokchi li tuk keyu kia ai ʋmo likmʋt, anonti ʋno ak osh a mʋshlichi li tuk keyu kia, a pehli li chatuk a̱, ish ithana;

²⁷ Yohmi hokʋt an tʋli holisso a̱ tʋli holisso abohli ya̱ ont ish bohla he tuk: yohmi tuk ma minti li kʋt ʋmmi atuk micha ushi atuk a̱ aieninchit ishi la hi atuk oke.

²⁸ Yohmi hoka talent a̱ oh im ai eshi cha, talent pokoli i̱shi kak o̱ oh imá.

²⁹ Kʋna hosh i̱shi hok mak o̱ ima na lauʋt im aiasha hi oka: amba ik im iksho hatuk okʋno i̱shi tuk ash kia, im ai isha he oke.

³⁰ Mikmʋt tishu ik ahobo yokʋno kocha aiokhlilika mak o̱ pit hʋsh kanchashke: yʋmmak oka yaha̱ya micha noti ahampa aiena mak a hi oke, im achi tok.

³¹ Hatak Ushi ʋt, enchil ʋhleha moma kʋt api̱ha ho̱, ilap isht aholitopaka il ai i̱shit ʋla he, yohmikmʋt im ai om binili holitopa yatuk ma om binila he oke.

³² Yohmikma itikba ya̱ oklushi moma kʋt ai itahoba he: yohmikma yʋmmak ash osh yʋmma achafolichit iti̱ filamohlichi kʋt, chukfʋlhpoba apesʋchi ʋt chukfʋlhpoba ya̱ isi kosoma iti̱ filamohlichi chatuk mak o̱ chiyuhma he.

³³ Mikmʋt chukfʋlhpoba ya̱ im ibbak isht‐impak imma yak o̱ ashachikmʋt, amba isi kosoma yokʋno ʋlhfʋbekimma yo̱ ashacha he.

³⁴ Yohmikmʋt Mi̱ko ash osh im ibbak isht‐impak‐imma a̱sha kash o̱, A̱ki i̱ holitopa hʋchia ma! ho minti, ʋba apehlichika yakni ʋt ik tobo ki̱sha mak o̱ hʋchim ʋlhtaha tok ʋt hʋsh ai ahantashke.

³⁵ Ʋno ʋt sa hohchʋfo ma, ilhpak a̱ hʋs sʋpeta tok: sa tukshila ma, nana ho̱ hʋs sʋshkochechi tok: hatak ik ithano sia hatuk a̱, aboha ya̱ ik chukowa, hʋs sʋm aiahni tok:

³⁶ Sa nipi bano ma, nana hʋs sa fohkichi tok: si abeka ma, ant hʋs sa pesa tok: ʋno ʋt aboha kʋllo fo̱ka li ma, ant hʋs sa̱ nowa tok okʋt, im acha he.

³⁷ Yohmikma hopoyuksa ʋhleha hash osh im afalaminchi kʋt, Chitokaka ma! katiohmi kash o̱ chishno ʋt chi hohchʋfo tuk a̱, e chi pisa cha nana e chipeta tok o̱? micha chi tukshila tuk a̱, nana e chishkochechi tok o̱?

³⁸ Katiohmi kash o̱ hatak ik ithano chia hatuk a̱ e chi pisa cha, aboha ya̱ ik chukowa, e chim aiahni tok o̱? mihmʋt chi nipi bano tuk a̱, nana e chi fohkichi tok o̱?

³⁹ Micha katiohmi kash o̱ chi abeka, mihmʋt aboha kʋllo ish fo̱ka aiena tuk a̱, e chi pisa cha, a chi̱ nowa tok oh cho? acha he.

⁴⁰ Mikma Mi̱ko ʋt afalaminchikmʋt A̱hli mak o̱ hʋchi̱ miha lishke, Itibapishi li ʋhleha yakohmi ka moma ik lauwo achʋfona ka kaniohmi ho̱ hʋsh ai i̱ yʋmohmi tuk okʋt, ʋno ak o̱ hʋs sa̱ yʋmohmi mak atuk oke, im acha hi oke.

⁴¹ Yohmikmʋt ibbak ʋlhfʋbeka imma a̱sha tuk ash kia, Issikkopa he ʋlhpesa hʋchia hʋt, a̱ filʋmmit luak ataha iksho, Setan micha imi shilombish okpulo ʋhleha aiena im ʋlhtaha tok mak o̱, hʋsh ilhkolashke.

^42-43 Ʋno ʋt sa hohchʋfo ma, ilhpak nana kia hʋch ik sapeto ki tok: sa tukshila ma, nana kia hʋch ik sʋshkochecho ki tok: hatak ik ithano sia hatuk a̱, aboha ya̱ ik chukowa hʋch ik sʋm ahno tok: si abeka, micha aboha kʋllo fo̱ka li aiena ma, ant hʋch ik sa̱ nowo ki tok okʋt, im acha he.

⁴⁴ Yohmikma yʋmmak ash kia afalaminchi kʋt, Chitokaka ma! katiohmi kash o̱ chi hochaiyafo, mihmʋt chi tukshila, micha hatak ik ithano chia, mihmʋt chi nipi bano, chi abeka, mihmʋt aboha kʋllo ish fo̱ka aiena ka e chi pisa cha ke chi apelacho ke tuk oh cho? acha hi oke.

⁴⁵ Yohmikma yʋmmak ash osh afalaminchikmʋt, A̱hli mak o̱ hʋchi̱ miha lishke, Yakohmi ka moma ik lauwo achʋfona kia kaniohmi ka a hʋch ik i̱ yʋmihcho tok mʋt, ʋno ak o̱ hʋch ik sa̱ yʋmihcho tok mak oke, acha hi oke.

⁴⁶ Yohmikma yakohmi kash osh ai issikkopa bilia mak o̱ pit ilhkola he, amba hopoyuksa yokʋto aiokcha̱yʋt bilia yo̱ ia hi oke.