Mahlu 24 - Chahta Holisso Holitopa 1886

Chisʋs ʋt ishtaiyopi mak o̱ tempel a̱ a kohcha tuk osh, yʋmmʋt okpula he, tikbanli anoli: 3 micha ilap okʋt mihintikma, nan isht atokowa kʋt yʋmohma he, micha na palʋmmi kʋt ibafo̱ka he miha: 32 mikmʋt nana a mihi̱ha kʋt ont aia̱hla hi oka, iti ʋlhpoba fik achi kʋt hishi toba chi hosh bokobli chatuk a̱ nan isht apesʋt anumpuli: 42 micha ahah! ahnit im ʋlhtaha he im apesa.

¹ Yʋmohmi mʋt Chisʋs ʋt kohcha mʋt, tempel a̱ issʋt kanima ia tok: mihma nan im ai ithʋna ʋhleha hʋt, tempel ʋt toba kʋt kaniohmi puta ka pisacha chi̱ hosh im ai ʋla tok.

² Mihma Chisʋs ʋt, Na yakohmi puta moma ka hʋch ik peso cho? a̱hli mak o̱ hʋchim achi lishke, Ilʋppak oka tʋli ʋt achʋfona kia aka ik itolo ke tuk osh, it on tʋlkanchit itonla kʋt iksho ka hi oke, im achi tok.

³ Yʋmohmi tuk o̱ yʋmmak ash osh nʋnih chaha Alif paknaka ya̱ a̱sha ma, nan ithʋna ʋhleha hʋt lumʋt im ai ona mʋt, Nitak kaniohmikmak o̱ nana kʋt ai yakohma hi o̱, micha ish minta he, mikmʋt yakni ʋt ont ai ʋhli aiena chi̱ isht atokowa kʋto nanta hi o̱? ish pim anolashke, achi tok.

⁴ Mihma Chisʋs ʋt afalaminchi mʋt, Ahah! hʋsh aiahni na hatak nana kia ik hʋchi yoshublecho kashke.

⁵ La̱wa hosh sa hohchifo ha̱ ishit hohchifo kʋt itʋnowa cha, Klaist sia hoke, acha hi oka; mikmʋt lauachit yoshublicha he oka.

⁶ Yohmikma tʋnʋp a̱sha, micha tʋnʋp a̱sha he annoa aiena ka hʋsh hakla hi oke: ahah! hʋsh aiahni cha ik hʋchi komunto kashke: ilʋppa puta kʋt moyumʋt ont a yʋmohmi pulla hi oka: yohmi kia ont ai ishtaiyopi kʋno keyu ki̱sha hi oke.

⁷ Okla achʋfa kʋt okla mak inli ka it amokʋfa he, mikmʋt apehlichika achʋfa kʋt apehlichika mak inli ka it amokʋfa hi oka: yohmikma hohchʋfo chinto, micha ililli puta, mikmʋt yakni winakʋchi aiena kʋt yakni kaniohmi ka ai itulʋt a̱ya hi oke.

⁸ Ilʋppa puta kak osh nanukha̱klo ai ishtia ʋmmona mak oke.

⁹ Yohmikma hʋch issikkopa chi̱ ka hʋch ishit okla ibbak hʋchi fohki, mikmʋt hʋch illicha hi oke; micha sa hohchifo pulla hatuk mak o̱ oklushi moyumʋt hʋchi̱ nukkilla hi oke.

¹⁰ Yʋmma fokakma ibetʋbli kʋt laua he, micha ilap bi̱ka atuk kia ishit okla ha̱ im issa, micha ilap bi̱ka iti̱ nukkilla hi oke.

¹¹ Mikma hopaii ilahobi ʋt hiohli kʋt laua cha, laua o̱ yoshublicha hi oke.

¹² Mikma nan ik ʋlhpeso bieka hatuk mak o̱ i̱ hullo atuk ʋt kapʋssʋt taha kʋt laua hi oke.

¹³ Yohmi kia kʋna hosh achunanchit ma̱ha̱yʋt ai ʋhli ka ona hok mak osh mihi yosh okcha̱ya hi oke.

¹⁴ Yohmi ka ʋba apehlichika isht anumpa hanta ilʋppʋt oklushi moyuma ka isht im ai atokowa he mak osh yakni mominchit ai annoa he: yʋmohmi mak o̱ ont ishtaiyopi kʋt ʋla hi oke.

¹⁵ Yohmi hoka nan okpʋni a̱ i̱ nukkilli ʋlhpesa ka hopaii Taniel ʋt isht anumpuli tok a̱, aholitopaka ya̱ a hikia na hʋsh pisa hokma, kʋna hosh ilʋppa it im anumpuli hokmʋt, akostininchashke.

¹⁶ Yohmikma kʋna hosh Chutea, ya̱ ma̱ya tuk mʋt, nʋnih chaha puta ka pit ik o̱ yihlepá;

¹⁷ Aboha pakna yo̱ anta tuk ʋt akowʋt, im aboha ya̱ nana kia ont kohchit ik esho kashke;

¹⁸ Mikma osapa anu̱ka yo̱ anta tuk mʋt, falamʋt im ilefoka ya̱ ont ik esho kashke.

¹⁹ Yohmikma nitak yʋmma fehna ka kʋna hosh ʋlla i̱ fo̱ka hatuk, micha pishechi atuk aiena hokʋto i̱ palʋmma he mak oke.

²⁰ Yohmi kia hʋsh yihlepa hi a̱ hʋshtula yokmá, keyukmʋt nitak hullo nitak okmá, ik nano ka hi a̱ ʋba pit hʋsh asihi̱hlashke.

²¹ Yʋmma fehnakma na palʋmmi kʋt chinto fehna hosh takanla he, yakni ʋt toba ʋmmona tok ai ʋhlit mihintit himak a̱ ai ʋla ka, yʋmma chohmi kʋt takali chatuk keyu, mikmʋt himmakma nitak nana yʋmma chohma he keyu ka hi oke.

²² Yohmi ka nitak yʋmma chohmi ka ik falaiacho ho̱ keyukma, hatak nana hosh okcha̱ya he keyushke: yohmi kia nan ʋlhtoka ʋlheha ak pulla tuk mak o̱ nitak yʋmma puta kʋt ik falaio ka hi oke.

²³ Yʋmohmikma hatak nana kia, Yakeh! ilʋppa Klaist ʋt antʋshke, achi; keyukmʋt yʋmma antʋshke, hʋchim achi hoh kia, ik hʋchi yimmo kashke.

²⁴ Klaist ilahobi ʋhleha, micha hopaii ilahobi ʋhleha aiena kʋt hiohlit nan isht atokowa chinto puta, mikmʋt na fehna puta aiena ka okla otʋnicha he; yʋmohmi cha, yʋmmʋt yohma hinlakma, nan ʋlhtoka, ʋhleha fehna atuk kia yoshublicha hi oke.

²⁵ Yakeh! tikbanli hʋchim anoli lishke.

²⁶ Yohmi hoka, yakeh! yʋmmʋt yakni haiaka ya̱ anta hoke, hʋchim achi hoh kia, kohchʋt hʋch ik aiyo kashke: micha, yakeh! ʋba potʋlhpo a luma̱ka yak o̱ yʋmmʋt anta hoke, hʋchim achi hoh kia, ik hʋchi yimmo kashke.

²⁷ Malʋtha kʋt hʋshi akochaka imma yo̱ a kohchakmʋt, hʋshi aiokʋtula ya̱ pit tohwikelichi chatuk oka, Hatak Ushi ʋt minti kak kia yʋmmak inli ho̱ chiyuhma hi oke.

²⁸ Kanima yo̱ nan illi ʋt itonla hokma, mihi yo̱ o̱ssi puta mʋt ai itahomba hi oke.

²⁹ Na palʋmmi nitak yʋmmak atuk a̱ in chekosikma, hʋshi ʋt okhlilikma, anonti hʋshi ninak a̱ya mʋt ik tommo ka he: mikma fochik puta kʋt ʋba ya̱ a̱sht aka fohopakma, nan isht aia̱hlika puta ʋba shutik ash osh faiokahancha hi oke.

³⁰ Yʋmma fokakma, Hatak Ushi a̱ isht atokowa kʋt ʋba ya̱ auet a haiaka hi oke: yohmikma oklushi moma yakni paknaka aiasha kʋt yaha̱ya he, mikma Hatak Ushi ʋt nan isht aia̱hlika, micha isht a holitopaka chinto aiena ka il ai eshi hosh ʋba hoshonti anu̱kaka ya̱ mihinti na okla pisa hi oke.

³¹ Atuk ma yʋmmak ash osh im enchil ʋhleha ha̱ isht‐pu̱fa ola chinto ieshi ho̱ tihlihinlikma, ilap atokoli tok ʋhleha ha̱ a mahli ushta shutik ont ai ʋhli achʋfa ka ʋhlit iʋt in tʋnnʋp pit a fullota ka a hoyot itahohomba hi oke.

³² Yohmi ka fik ʋpi nan isht ʋlhpisa ka hʋsh ai ithʋnashke. Yʋmmak okʋt hishi toba chi̱ hosh bokoblit tahakma, tofa yʋt olanlosi ʋla ka hʋsh ithana chatuk:

³³ Yohmi hokʋt na yakohmi puta ka hʋsh pisakmʋt, ai ʋla̱ hosi, okhissa ak kia ai itukonofa hoka, hʋsh ithanashke.

³⁴ A̱hli mak o̱ hʋchim achi lishke. Himak a okla a̱sha ilʋppʋt ont ik taho ki̱sha ho̱, na yakohmi puta kʋt ont aia̱hla chi̱ hoke.

³⁵ Ʋba shutik micha yakni aiena kʋto ont ai iksho ka he, amba ʋno ʋm anumpa puta hatuk ʋto ont ai iksho ka he keyu hoke.

³⁶ Yohmi ka nitak yʋmmak a he, micha hʋshi kanʋlli ʋlhpisa a he aiena hokʋno, hatak nana hosh, mikmʋt enchil puta ʋba aiasha mak osh pit ithana keyu ho̱, amba A̱ki ak bano hoke.

³⁷ Yohmi ka Noah hʋt ahanta nitak a̱ kaniohmi tok ma, Hatak Ushi ʋt mihinti kak kia yʋmmak inli ho̱ chiyuhma hi oke.

³⁸ Oka falama yʋt ik aiyo ki̱sha nitak foka ma, impa micha nan ishko, itauwaya mikmʋt itauwaya he im ʋlhpisa aiena hosh aiasha na Noah hʋt peni chukowa he nitak ʋt ona tok,

³⁹ Yohmi ma ik ithano hosh okla aiasha na oka falama yʋt ʋla cha, mominchit ishit kaiyanchi tok a̱, Hatak Ushi ʋt mihinti kak kia yʋmmak inli ho̱ chiyuhma hi oke.

⁴⁰ Yʋmma fokakma tuklo kʋt osapa ya̱ a̱shwa tuk ma; achʋfa ho̱ ai eshi na achʋfa kʋto anta he.

⁴¹ Ohoyo tuklo kʋt nana a botoli a botoli hosh a̱shwa tuk ma; achʋfa ho̱ ai eshi na achʋfa kʋto anta hi oke.

⁴² Yohmi hoka hʋchishno ʋt hʋchin Chitokaka yʋt ai ʋla he hʋshi kanʋlli ʋlhpisa ha̱ hʋsh ithana keyu kʋt, o̱kchʋt hʋsh hoyashke.

⁴³ Yohmi kʋt hatak chuka‐chʋfa pehlichi yatuk mʋt hʋshi kanʋlli ʋlhpisa kaniohmi kak o̱ na hu̱kopa yʋt a̱ya hinla ka ithana hatuk okmʋt, o̱kcha pulla cha, im aboha yatuk mʋt tiwa hi a̱ ahna he tuk keyu, ilʋppa hʋsh ithanashke.

⁴⁴ Yohmi hoka hʋchishno ak kia hʋchim ʋlhtahashke: yʋmmak a he hʋch ik aiahno hʋshi kanʋlli ʋlhpisa takla kia, Hatak Ushi ʋt ʋla hi oke.

⁴⁵ Yohmi ka kʋta hak osh tishu aia̱hli, hopoyuksa achukma aiena tuk o̱, i̱ shahli hʋt ilap in chuka chʋfa ya̱ apesʋchit ont ai ʋlhpiesakma ilhpak ipihinta chi̱ ka, atokoli tok oh cho?

⁴⁶ Yʋmohmi hosh ahanta ho̱, i̱ shahli hatuk ʋt ʋla cha ant pisa chi̱ ka, tishu yʋmmʋt na yukpa hi oke.

⁴⁷ A̱hli mak o̱ hʋchi̱ miha lishke, Yʋmmak atuk ma nana im a̱sha ka moma apesʋchi mak o̱ ikba hi oke.

⁴⁸ Yohmi tuk kia tishu ik ʋlhpeso yo kʋto chu̱kʋsh anu̱kaka, A̱ shahli hʋt ai ʋla he tuk ʋt ʋbanʋblichishke, achi;

⁴⁹ Yohmi cha tishu bi̱ka ʋhleha hash o̱ bolit ishtia, yohmi mʋt ishkot haksi ʋhleha ha̱ it ibai impʋt ibai ishkot ahanta hokmʋno;

⁵⁰ Tishu yʋmma i̱ shahli hatuk ʋt, yʋmmak ash osh ʋla chi̱ ik ahno nitak, mikmʋt ik akostinincho i̱ hʋshi kanʋlli ʋlhpisa ho̱ ʋla hi oke.

⁵¹ Yohmikmʋt yʋmmak ash o̱ chanlit ita hokofi cha, nan ilahobi ʋhleha isht ai im ʋlhtoba mak o̱ ibafohkit im apesa he: yʋmmak oka yaha̱ya micha noti ahampa aiena he mak oke.