Mahlu 23 - Chahta Holisso Holitopa 1886

Chisʋs ʋt nan im ai ithʋna ʋhleha hʋt na holissochi micha Falisi aie na kʋt nana isht ithʋnanchi kʋno im antia he, amba nana a kaniohmi yokʋno okla ik iakaiyo ka hi a̱ im apesa, 1, 13 Chisʋs ʋt na holissochi micha Falisi ʋhleha aiena kʋt im a yʋmohma he ʋlhpesa hoka, na palʋmmi kʋt onʋtula chi̱ ka tikbanli anoli, 37 na palʋmmi kʋt ai imma tikeli ka ithana hatuk osh Chelusalem a̱ Chisʋs ʋt isht yaiya.

¹ Yʋmma foka ma Chisʋs ʋt okla chinto, mikmʋt ilap nan im ai ithʋna ʋhleha aiena kash o̱ im anumpuli mʋt,

² Na holissochi ʋhleha, micha Falisi ʋhleha aiena kʋt Moses im aiasha ya̱ chieyʋshke.

³ Yohmi hoka nan oklu̱ha puta ka nana ho̱ hʋsh holitobla hi a̱ hʋchi̱ miha hokma, yʋmmak atuk ma holitoblit a hʋchi yʋmohmashke: amba okla nana a kaniohmi hokʋno hʋch ik holbo kashke: yʋmmak okʋt anumpuli tuk kia yohmi keyu hoka.

⁴ Shapoh weki shali ka palʋmma hinla ho̱ takchit tahli cha, hatak puta tahchi ma onochi hoka: yohmi kia ilap ak inli kʋto yʋmmak oka ibbak ushi achʋfona kia pit isht kanʋllicha hi a̱ okla ahni keyu hoke.

⁵ Amba nana a kaniohmi puta kʋt, hatak ʋt pi̱sa chi̱ kak o̱, yʋmohmi hoke: i̱ failaktili ya̱ okla hopʋtkʋlli mʋt, anonti im anchi aposhokʋchi ma hofalohli chatuk,

⁶ Mikmʋt impa a̱sha ka aiasha holitopa i̱ shahli puta kak o̱ im ai achukmakmʋt, anonti sinikak puta anu̱kaka ma ai‐o̱‐minili holitopa i̱ shahli puta kak o̱ im ai achukma chatuk,

⁷ Mikmʋt ilhpak a kanchi ai it aiokpʋchi, micha hatak puta kʋt Labai, Labai, im achi aiena kak o̱ im ai achukma chatuk oke.

⁸ Yohmi kia hʋchishno yokʋto Labai ik hʋchi hohchifo kashke; hʋch i̱ shahli hʋto achʋfa, yʋmmʋt Klaist ak oke. Yohmikma hʋsh moyuma kʋto itibapishi hʋchia hoke.

⁹ Micha yakni paknaka ya̱ hatak nana kia hʋch i̱ki hʋch ik hochifo kashke: achʋfa hosh hʋch I̱ki okʋto ʋba yak o̱ binili hoka.

¹⁰ Micha i̱ shahli ʋhleha ik hʋchi hohchifo kashke: achʋfa hosh hʋch I̱ shahli, yʋmmʋt Klaist ak oke.

¹¹ Amba kʋna hosh moma i̱ shahli kʋt hʋch ibafo̱ka hokmʋt, hʋchin tishu mak a hi oke.

¹² Mikma kʋna hosh ilefehnʋchi hokmʋt, aka ona he; mikma ile akanlosechi hokmʋt, holitopa he oke, im achi tok.

¹³ Amba na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: ʋba apehlichika ya̱ hatak inla puta ka hʋsh im okhishta hokʋt: mikmʋt hʋchishno ʋt yʋmma pit hʋch ik abeho mʋt, anonti pit abeha he tuk a̱, ant ik abeha hʋch ik im ahnoshke.

¹⁴ Na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: ohoyo i̱ hatak illi in chuka puta ka wehpulit hʋsh tahli, mikmʋt peh ilahobi kʋt ʋba pit anumpuli hosh hʋsh falaiachi hoka: yohmi hokʋt na palʋmmi chito i̱ shahli hosh hʋchim ʋlhpisa hi oke.

¹⁵ Na holissochi ʋhleha, mikmʋt Falisi ʋhleha, nan ilahobi hʋchia ma! na hʋchi̱ palʋmma he mak oke; na hʋchim ai ithʋna achʋfa kia ikbi hʋchi bʋnna kʋt, okhʋta micha yakni aiena ka hʋsh ʋlhfullihinchi hoka: atuk o̱ yʋmmak ash osh tobakma, anonti aiokpuloka im ʋlla fehna kʋt hʋchishno a̱ chohmi tuklo ho̱ hʋsh ikbi hoke.

¹⁶ Kʋna hosh anumpa kʋllo a̱ tempel ak o̱ isht ai a miha hokʋno nana keyu; amba kʋna hosh tʋli holisso lakna tempel anu̱kaka a̱sha kak o̱ anumpa kʋllo isht ai a miha hok mʋto, nan il aia̱hlicha he ʋlhpesa, hʋsh achi, na pehlichi lʋpa hʋchia ma! na hʋchi̱ palʋmma he mak oke.

¹⁷ Nan im anukfila iksho, micha lʋpa aiena hʋchia hoka, tʋli holisso lakna yak okmá, keyukmʋt tempel a̱ tʋli holisso lakna yʋt isht a holitopa kak okmá, nanta hosh i̱ shahli ho̱?

¹⁸ Micha kʋna hosh anumpa kʋllo a̱ alta yak o̱ isht ai a miha hokʋno nana keyu; amba kʋna hosh ʋba pit isht aiokpʋchi ʋt yʋmma pakna onʋtonla kak o̱, nan il aia̱hlicha he ʋlhpesa, hʋsh achi.

¹⁹ Nan im anukfila iksho, micha lʋpa aiena hʋchia ma! ʋba pit isht aiokpʋchi ak okmá, keyukmʋt alta ya̱ ʋba pit isht aiokpʋchi ʋt isht a holitopa kak okmá, nanta hosh i̱ shahli ho̱?

²⁰ Yohmi hoka kʋna hosh anumpa kʋllo a̱ alta yak o̱ isht ai a miha hokmʋt, yʋmmak ash o̱, micha nana hosh yʋmma onʋtonla ka mominchit anumpa kʋllo a̱ isht ai a miha hoke.

²¹ Micha kʋna hosh anumpa kʋllo a̱ tempel ak o̱ isht ai a miha hokmʋt, yʋmmak ash o̱, micha yʋmma anu̱kaka ai asha aiena kak o̱ anumpa kʋllo a̱ isht ai a miha hoke.

²² Yohmikma kʋna hosh anumpa kʋllo a̱ ʋba yak o̱ isht ai a miha hokmʋt, Chihowa im aiasha, micha yʋmma om binili hatuk ma aieninchit anumpa kʋllo a̱ isht ai a miha hoke.

²³ Na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: mint, mikmʋt anise, micha kʋmmin aiena kʋt ont isht pokoli kash osh hʋchi̱ kʋnia hoka; yohmi mʋt nan ʋlhpisa kʋllo i̱ shahli, nana ai ʋlhpiesa, micha nana i̱ nukha̱klo, mikmʋt na yimmi aiena hokʋno hʋsh a haksichishke: ilʋppa puta hoka hʋchi yʋmohma he ʋlhpesa hatuk, yohmikmʋt yʋmmak ash kia hʋsh a haksicha he tuk keyu hoke.

²⁴ Na pehlichi lʋpa ma! shu̱shi ya̱ hoiyʋchit hʋsh kohchi tuk osh, kamel okʋno ishit hʋsh nanʋbli hoke.

²⁵ Na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: isht‐ishko micha ampo aiena ka paknaka yokʋno hʋsh kashofi hoka; yohmi kia anu̱kaka yokʋto na wehpuli micha nan ik ʋlhpeso aiena hosh isht alotowa hoke.

²⁶ Falisi lʋpa chia ma! isht‐ishko ampo aiena ka anu̱kaka yak o̱ ti̱kba ish kashofi ha yo̱, paknaka yokak heto kashofa mak inlashke.

²⁷ Na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: sepʋlka tohbit ʋlhtaha yak o̱ hʋsh chiyuhmi hoka; yʋmmak okʋt paknaka yokʋto pisa ka aiokli fehna ho mʋhli chatuk; yohmi kia anu̱kaka yokʋto hatak illi foni, micha nan liteha okpulo moma kʋt isht alotowa chatuk oke.

²⁸ Yohmi ka hʋchishno ak kia paknanli ʋt ʋlhpiesa ho̱ hatak a̱ hʋsh im ahoba; yohmi kia anu̱kaka yokʋto nan ilahobi, micha nan ik ʋlhpieso aiena bano hosh ishit hʋchi alotowa kʋt, yʋmmak inli ho̱ hʋsh chiyuhmi hoke.

²⁹ Na holissochi ʋhleha, micha Falisi ʋhleha, nan ilahobi hʋchia ma! na hʋchi̱ palʋmma he mak oke: hopaii ʋhleha, i̱ sepʋlka ya̱ hʋsh im ikbi mʋt, anonti hopoyuksa ʋhleha ha tok isht ithaiyana he sepʋlka ya̱ hʋsh aioklichi chatuk,

³⁰ Mihmʋt, Pin tikba ʋhleha aiasha nitak ak o̱ il a̱shwa tok mak osh, hopaii puta im issish hlatʋbli ka il ibatakla he tok keyu, hʋsh achishke.

³¹ Yohmi hatuk osh hopaii puta ʋbi tok ʋhleha ha̱ in chipota hʋchia hatuk ʋt, hʋchishno inli kak osh hʋsh il ai atokolishke.

³² Yohmi hokʋt hʋchin tikba ʋhleha nan isht im ʋlhpisa ya̱ hʋsh alotolashke.

³³ Sinti hʋchia, sinti chilita isht unchululi hʋchia hʋt, katiohmi kak osh aiokpuloka ai ilbʋsha he ʋlhpisa ya̱ hʋsh i̱ hlakofa hinla cho?

³⁴ Yohmi hoka, Yakeh! hopaii ʋhleha, micha hatak hopoyuksa ʋhleha, mikmʋt na holissochi ʋhleha aiena ka pit hʋchin tihleli lishke; yohmi ka kanimi ka hʋsh ba he, mikmʋt, iti‐taiyukhʋna hʋsh a honahlichi aiena he; mikmʋt kanimi ma hʋchi̱ sinakak puta hʋsh a fʋmmikmʋt, hʋsh ilbʋshachi kʋt tʋmaha puta ma isht hʋsh a̱ya hi oke.

³⁵ Yohmi hokʋt hʋchishno ak o̱ hopoyuksa puta im issish yakni pakna a hlatahampa tok, hatak hopoyuksa Ebel a̱ im issish a tok ai ʋhlit mihintit, Sakalias, Balakias ushi, yʋmma tempel, micha alta aiena itintakla ya̱ hʋsh ai ʋbi tok im issish ant ai ʋhli kʋt, momʋt hʋchi onʋtula hi oke.

³⁶ A̱hli mak o̱ hʋchim achi lishke, Ilʋppa moyuma kak osh okla himonasi ilʋppa a̱sha ka onʋtula he mak oke.

³⁷ Chelusalem, Chelusalem, hopaii ʋhleha ʋbi, micha auet chi̱ kanchi tuk ma tʋli ishit boli chia ma! aka̱ka yosh ushi ʋhleha ha̱ sinahchi nuta ya̱ pit ai itahobi chatuk mak o̱, chiyuhmit chim ʋlla ʋhleha ha̱ itahombi la he ahni li tuk nana kia, hʋchishno ak osh ʋlhpesa hʋch ik aiahno hokʋno.

³⁸ Inta! hʋchin chuka yʋt hʋchin chukillissʋt taiyaha mak oke.

³⁹ Himak a̱ pilla ma, Hʋs sa pisa chi̱ keyu; amba, Chitokaka i̱ hohchifo ho̱ mihnti hokʋt holitopa mak oke, hʋsh acha chi̱ hok mak a hi oke, hʋchim achi lishke, im achi tok.