Mahlu 22 - Chahta Holisso Holitopa 1886

Itauwayachi ai impa he tok ik itʋnaho ki tok nan isht ʋlhpisa, 1; 12 ai itauwaya a̱ya he i̱ nafohka ya̱ ik fohko hosh i̱ palʋmma he im ʋlhpisa; 15 Chisʋs ʋt Falisi ʋhleha, micha Helotian okla aiena kʋt Sesa ya̱ tʋli holisso im itahobi ka ʋlhpesa chishba, ahnit i̱ ponaklo, mihma Chisʋs ʋt afalaminchit nana i̱ miha. 23 Chisʋs ʋt Satusi ʋhleha hʋt illi yʋt falamʋt tana hi oka ik yimmo chatuk a̱ isht anumpuli; 34 nan ʋlhpisa chinto moma i̱ shahli, 41 kaniohmi kak osh Klaist ʋt Lewi in Chitokaka yʋt, anonti Lewi ushi ahinla ka, Chisʋs ʋt a ponaklo.

¹ Mihma Chisʋs ʋt anonti nan isht ʋlhpisa ho̱ isht im anumpulit,

² Ʋba apehlichika ʋt hatak mi̱ko yosh ushi ohoyo itauwaya chi̱ ho̱, impa im atahli ho̱ chohmi hoke.

³ Micha im annoa tuk ʋhleha ha̱ ont i̱ howʋt itauwaya ai impa ka isht ʋla chi̱ ho̱, in tishu ʋhleha ha̱ pit tihleli tok; yohmi kia okla minta hi a̱ ik ahno ki tok.

⁴ Mihma anonti tishu inla yo̱ pit tihleli mʋt, Inta! an tʋbokoli impa ha̱ atahli lishke; a̱ wak‐hobʋk, micha nana ʋlhpitʋt nia puta kʋt illi ma, nan oklu̱ha kʋt ʋlhtahʋshke; itauwaya ai impa ka hʋsh mintashke, achit im annoa tuk ʋhleha ha̱ hʋsh im anolashke, im achi tok.

⁵ Yohmi tok kia yʋmmak ash o̱ nan‐isht ik ahno hosh kanima pit ilhkolit, achʋfʋt im osapa ia ma, anonti achʋfʋt im ai itatoba ia tok.

⁶ Yohmi ma akashampa kʋto in tishu ʋhleha hatuk ash iti̱ hoklit ishi cha, kanimanchi fehnʋt, pola̱ka okla illichi tok.

⁷ Atuk o̱ mi̱ko ʋt yʋmmak ash o̱ haklo mʋt, anukshomunta fehna tok: mihmʋt in tʋshka chipota laua ka pit tihlelit, hatak ʋbi ʋhleha yʋmmak ash o̱ ʋbit tahli mʋt, in tʋmaha ha̱ hukmit tahli tok.

⁸ Yohmi mʋt in tishu ʋhleha hash o̱, Itauwaya ai impa hamo ʋlhtahʋshke; yohmi kia im annoa tuk ʋhleha hash osh ahalaia hi o̱ keyu tuk oke.

⁹ Yohmi hoka hina ai itafamoa puta ka itʋnowʋt, laua kʋt kaniohmi ho̱ hʋsh pisakmʋt, moyumʋt itauwaya ai impa ka a̱ya he hʋsh im anolashke, im achi tok.

¹⁰ Yohmi ma tishu ʋhleha yʋmmak ash osh ilhkoli mʋt, hina ai itafamoa puta ka itʋnowʋt, okpulo, mikmʋt hochukma aiena laua kʋt kaniohmi ho̱ pisa mʋt, mominchit hoyot itahobi tok: yohmi ma itauwaya ai impa yash osh im annoa tuk ʋhleha ha̱ isht alotʋt kʋnia tok.

¹¹ Atuk o̱ im annoa tuk ʋhleha hash pisa chi̱ hosh mi̱ko ʋt ant chukowa mʋt, hatak ʋt ai itauwaya a̱ya he i̱ nafohka ya̱ ik fohko hosh yʋmma a̱sha na pisa tok.

¹² Micha yʋmmak ash o̱, A̱ kana ma! katiohmi ho̱ ai itauwaya a̱ya he i̱ nafohka ʋt iksho ho̱ ilʋppa ant ish chukowa tuk oh cho? im achi tok. Mihma yʋmmak ash osh nan ik acho ki tok.

¹³ Yohmi ma mi̱ko ʋt in tishu ʋhleha hash o̱, Ilʋppa ibbak, mikmʋt iyi aiena ka ho takchi cha, isht iʋt kocha aiokhlilika ya̱ ont hʋsh kanchashke: yʋmmak oka ya̱ha̱ya, mikmʋt noti ahampa aiena mak osh aiasha hi oke, im achi tok.

¹⁴ Im annoa hokʋto laua kia, amba ʋlhtoka kak osh achafoa hoka, achi tok.

¹⁵ Yʋmma foka ma Falisi ʋhleha hʋt ilhkoli mʋt, kaniohmit yʋmmak ash ilap im anumpa ho̱ isht a yukacha hinla kʋt isht anumpulit ma̱ya tok.

¹⁶ Mihmʋt ilap nan im ai ithʋna ʋhleha ha̱, Helotian iksa ai itapeha ho̱ pit in tihleli mʋt, Nan ithʋnanchi ma! chishno ʋt aia̱hli chia achukma chatuk; mikmʋt Chihowa i̱ hina aia̱hli mak o̱ ish ithʋnanchi chatuk, hatak nana kia nan isht ik chim ahobo chatuk; mikmʋt hatak ʋt chim it i̱ shashohli keyu chatuk a̱ il ithaiyanʋshke.

¹⁷ Yohmi hokʋt kaniohmi ho̱ chim anukfila hokmʋt ish pim anolashke: noshkobo isht chumpa tʋli holisso a̱ Sesa yak o̱ ima he ai ʋlhpesa hokmá, keyukmá, nanta cho? pit achi tok.

¹⁸ Yohmi kia yʋmmʋt im anukfila ai ʋlhpesa keyu atuk a̱, Chisʋs ʋt akostininchi mʋt, Katiohmi ho̱ nan ilahobi ʋhleha hʋchia hʋt imomaka hʋs sa pesa cho?

¹⁹ Noshkobo isht chumpa tʋli holisso a̱ ho ha̱ haiakʋchí, achi tok. Mihma iskʋli achʋfa ho̱ okla isht im ʋla tok.

²⁰ Mihma yʋmmak ash o̱, Ilʋppʋt kʋta hak o̱ holbʋt toba ho̱, mikmʋt kʋta ho̱ a hohchifo ho̱? im achi ma,

²¹ Sesa yak oke, okla im achi tok. Yohmi ma yʋmmak ash osh, Yohmi hoka nana kʋt Sesa yak o̱ immi hokma, Sesa yak o̱ hʋsh imashke: mikmʋt nana kʋt Chihowa yak o̱ immi hokmʋno, Chihowa yak ashke, im achi tok.

²² Yohmi ma okla haklo mʋt nukhlakancha cha, yʋmmak ash o̱ issʋt, okla ilhkoli tok.

²³ Mih nitak mak inli ka Satusi ʋhleha hʋt, illi yʋt falamʋt tana he keyu, achi chatuk osh im ai ʋla cha, ant i̱ ponaklot,

²⁴ Nan ithʋnanchi ma! Hatak ʋt ʋlla yʋt ik im iksho hosh illi hokma, nakfish ʋt tekchi atuk a̱ itauwaya cha, itibapishi hatuk a̱ ʋlla isht im ai ikbashke, Moses ʋt achi tok.

²⁵ Yohmi tuk o̱ itibapishi hʋt untuklo hosh pitintakla ya̱ ma̱ya tok: atuk o̱ akni hash osh ohoyo itauwaya tuk osh illi tok: mihmʋt ʋlla yʋt ik im iksho hatuk okʋt, tekchi atuk a̱ nakfish ak o̱ im a tosholichi tok.

²⁶ Atuk o̱ atu̱kla kak osh yohmi ak inli tuk o̱, anonti ont atuchina kʋt mihinli ma, maha̱ya mʋt isht untuklo kash osh yohmi tok.

²⁷ Atuk o̱ ont ishtaiyopi fehna ma, ohoyo hash kia illi ak inli tok.

²⁸ Yohmi ka yʋmma momʋt okla itauwaya tok oka, illi yʋt falamʋt tani kano, untuklo ka katima mak o̱ tekchi mak a hi oh cho? achi tok.

²⁹ Mihma Chisʋs ʋt afalaminchi mʋt, Baibil, mikmʋt Chihowa nan im aia̱hli aiena ka hʋch ik ithano hatuk osh hʋsh ashʋchishke.

³⁰ Illi yʋt falamʋt tani hokʋt okla itauwaya he keyu mʋt, anonti itauwaya he im ʋlhpisa he keyu, amba Chihowa im enchil ʋhleha ʋba aiasha kak o̱, chiyuhma hi oke.

³¹ Amba illi yʋt falamʋt tana he yʋmmak okʋno, Chihowa hʋt hʋchim anumpohonli mʋt,

³² Ʋno ak osh Eblaham in Chihowa sia, mikmʋt Aisaak in Chihowa sia, micha Chekob aiena ka in Chihowa sia hoke, achi tok holisso ka hʋch ik it im anumpolo chatuk oh cho? Chihowa hʋt illi ak o̱ in Chihowa keyu, amba okcha̱ya ak oke, i̱m achi tok.

³³ Yohmi ma okla laua yʋt ilʋppa haklo mʋt, nan isht ai ithʋnanchi ka anukhlakancha tok.

³⁴ Amba Falisi ʋhleha hokʋto, yʋmmak ash osh Satusi ʋhleha ha̱ nana acha he keyuchi tok a̱ haklo mʋt, okla itahoba tok.

³⁵ Yohmi ma achʋfa hosh yʋmmʋt ʋba nan ʋlhpisa ithʋnanchi yosh, imomaka pisa hosh nan i̱ ponaklot.

³⁶ Nan ithʋnanchi ma! ʋba nan ʋlhpisa katima kak osh nan ʋlhpisa holitopa kʋt moma i̱ shahli cho? achi tok.

³⁷ Mihma Chisʋs ʋt, Chitokaka chin Chihowa hoka chi chu̱kʋsh a̱ mominchit, mikmʋt chi shilombish a̱ mominchit, anonti chim anukfila ha̱ mominchit isht ish holitoblashke;

³⁸ Achi ilʋppak osh nan ʋlhpisa in tikba, mikmʋt moma i̱ shahli mak oke.

³⁹ Mikma atu̱kla kʋt yʋmmak inli ho̱ chohmi hoke; Chin chuka‐panta hatak a̱ ish holitobli kʋt chishno ak inli chim itilauashke, achi kak oke.

⁴⁰ Nan ʋlhpisa tuklo ilʋppak o̱ nan ʋlhpisa moma, micha hopaii holissochi tok aiena kʋt a shaiyahli hoke, im achi tok.

⁴¹ Falisi ʋhleha hʋt itʋnahʋt chi̱ya takla ma, Chisʋs ʋt i̱ ponaklot,

⁴² Klaist a̱ katiohmi isht hʋchim anukfila cho? yʋmmʋt kʋta hak o̱ ushi o̱? achi ma, Lewi ak o̱ ushi oke, okla im achi tok.

⁴³ Mihma yʋmmak ash osh, Yohmi ka katiohmi ho̱ Le wi ʋt Shilombish isht anukfoyuka mʋt, yʋmmak oka hochifo cha,

⁴⁴ Chitokaka yʋt an Chitokaka ya̱, Sʋbbak ishtimpakimma ya̱ ish binili na chin tʋnʋp ʋhleha chiyi ai o̱ hikia yo̱ ikbi lashke, im achi tok oh cho?

⁴⁵ Yohmi ka Lewi ʋt yʋmmak oka Chitokaka hochifo tok okma, anonti yʋmmʋt katiohmi hosh ushi ahinla cho? im achi tok.

⁴⁶ Yohmi ma hatak nana hosh yʋmmak ash o̱ anumpa achʋfa kia im afalamincha hinla kʋt iksho ma, anonti nitak yʋmma ai ʋhlit mihinti ka himmakma hatak nana kia ik nukwiyo hosh nan im ai asilhhʋchi kʋt iksho ki tok.