Mahlu 21 - Chahta Holisso Holitopa 1886

Chisʋs ʋt kaniohmi hosh Chelusalem a̱ chukowa, 1; 12 anonti nachumpa ʋhleha, micha na‐kanchi ʋhleha aiena ka tempel a̱ a kocha weli. 18 Micha iti ʋlhpoba fik achi nan ik ʋno a bʋshit illa he im ahni; mikmʋt na yimmi micha anumpa ilbʋsha anumpuli aiena ka nan isht im aia̱hli ka ya̱ pim anoli. 23 Kanimi kʋt nan isht ai ʋlhpesa nana ho̱ isht ai yʋmohmi hatuk a̱ a ponaklo tuk kia, yʋmmak ash o̱ Chisʋs ʋt im a tʋblichi, 28 micha hatak ushi tuklo, 33 micha na‐pilesa ʋhleha pa̱kʋpi a holokchi i̱ pota tuk nan isht apesa hosh Chu okla nan im ai ashʋchi a̱ isht otʋnichi.

¹ Yʋmohmi tuk o̱ Chelusalem pit bili̱ka okla onʋt Alif nʋnih Betfachi ak o̱ ai ona ma, Chisʋs ʋt nan ithʋna tuklo ho̱ pit tihleli tok.

² Mihmʋt, Tʋmahushi hʋchi chapaka auet talaia ka hʋsh onashke; yokmikmʋt mih mak inli ho̱ issuba haksobish falaia ushi ilaueli kʋt asinta ho̱ hʋsh pisa chi̱ hoke: yʋmma hʋsh i̱ hotofi cha, isht hʋs sʋm ʋlashke.

³ Micha kʋna kia nana ka hʋchim achi hokma, Chitoka ka yak osh bʋnna hatuk oke, hʋsh im achashke: yohmikma mih mak inli ho̱ auet pila chi̱ hoke, im achi tok.

^4-5 Hopaii ʋt anumpohonlit, Saion ushetik a̱, yakeh! chi̱ mi̱ko chu̱kʋsh yohbi achukma, issuba haksobish falaia a toba tok issubushi haksobish falaia yo̱ om binili hosh a̱yʋt chim ʋlʋshke, hʋsh im achashke, achi tok a̱ ont aia̱hla chi̱ mak o̱ ilʋppa moma kʋt a yakohmi tok.

⁶ Mihma nan ithʋna yash osh itiachi mʋt, Chisʋs ʋt i̱ miha tuk mak o̱ ont yʋmohmit okla tok.

⁷ Micha issuba haksobish falaia, mikmʋt ushi aiena kash o̱ isht ʋla ma, im ilefoka ya̱ om pʋllit tahli cha, yʋmmak ash o̱ okla om binilichi tok.

⁸ Yohmi ma okla chinto fehna hosh hina ya̱ im anchi a̱ okla pʋlli tok; kanimi mʋto iti naksish o̱ ʋmot hina ya̱ pʋlli tok.

⁹ Yohmi ma okla chito tikba itʋnowa tuk, mikmʋt iakaiya aiena kash osh, tahpʋlʋt, Lewi Ushi a̱ Hosanna im ahanchashke. Chitokaka i̱ hohchifo ho̱ il ai eshi hosh a̱ya hokʋt holitopa mak oke. Shutik tʋbokaka fehna ma, Hosanna ai ahanchashke, achi tok.

¹⁰ Atuk o̱ Chelusalem a̱ ant chukowa ma, tʋmaha hash osh momʋt nukhlakancha mʋt, Ilʋppʋt kʋta hoh cho? achi tok.

¹¹ Mihma okla laua yash osh, Ilʋppak osh Kalili yakni Nasalet a̱ i̱ hopaii Chisʋs mak oke, achi tok.

¹² Yohmi ma Chisʋs ʋt iʋt Chihowa in tempel a̱ ont chukowa mʋt, tempel anu̱kaka ya̱ nana a kanchi, micha a chumpa aiena ma̱ya tuk ash mominchit kocha pit tihleli mʋt, ai impa tʋli holisso ai itatoba puta, mikmʋt pʋchi ʋlhpoba akanchi abinohli aiena kash halʋllit filemohlit kinahlichi tok.

¹³ Mihmʋt, Ʋm aboha hʋt ʋba pit ai anumpuli chuka yo̱ hohchifa he, achi hosh holisso tok; yohmi kia hʋchishno ʋto na‐hu̱kopa ʋhleha in chuka yo̱ hʋsh ikbishke, im achi tok.

¹⁴ Mihma lʋpa, micha hanali okpulo puta kʋt tempel anu̱kaka ya̱ im ai ʋla ma, yʋmmak oka hlakofichi tok.

¹⁵ Mihma na holitompa isht a̱sha pehlichi ʋhleha, micha na holissochi okla aiena kʋt, yʋmmʋt na fehna puta ka yʋmihchi, mikma tempel anu̱kaka ya̱ ʋlla ʋt Lewi Ushi a̱ Hosanna im ahanchashke, achi aiena ka pisa mʋt, okla isht ik i̱ yukpo fehna tok.

¹⁶ Mihmʋt yʋmmak ash o̱, Ilʋppʋt nana achit ma̱ya ka ish ha̱klo cho? im achi tok; Mihma Chisʋs ʋt, Yau, ʋlo̱si mikmʋt pi̱shi puta itih ha̱ Chihowa hʋt a holitopa he ish apesa tok achi holisso ka, himonna kia hʋch ik it im anumpulo chatuk oh cho? im achi tok.

¹⁷ Mihmʋt yʋmmak ash o̱ issʋt tʋmaha a kohchʋt ia mʋt, Betani a̱ ona cha, yʋmmak o̱ ont nusi tok.

¹⁸ Atuk osh onnahinli ma falamʋt tʋmaha ia hosh a̱ya mʋt, hohchʋfo tok.

¹⁹ Micha fik ʋpi ʋt tikba ya̱ hikia na pit pisa mʋt, yʋmmak ash o̱ ona; yohmi kia nana kia takanli na ik ahayucho; amba hishi ak illa tok; mihmʋt, Himak a pilla ma nitak nana ʋni yʋt ik chi a tobo kashke, im achi tok. Mihma chekosi mak inli ho̱ fik ʋpi ʋt bʋshit taha tok.

²⁰ Yohmi ma nan ithʋna yʋt pisa cha, okla okokko! aiahni mʋt, Chekosi fehna ho̱ fik ʋpi ʋt bʋshit taha chá, achi tok.

²¹ Mihma Chisʋs ʋt afalaminchi mʋt, A̱hli mak o̱ hʋchi̱ miha lishke, Na yimmi kʋt hʋchi anukfoyuka, micha ik hʋchi nukwiyo hokmʋt, fik ʋpi nana a kanimihchi ilʋppak bano ho̱ hʋsh yʋmihcha hi o̱ keyu, amba, Nʋnih chaha ilʋppa kanʋllit iʋt okhʋta hak o̱ pit ish okʋtulashke, hʋsh im achi aienakma, yʋmohma hinla hoke.

²² Micha hʋchi yimmi hosh nan oklu̱ha ka nana ho̱ anumpa ilbʋsha isht hʋsh asilhha hokʋt, hʋsh isha hi oke, im achi tok.

²³ Atuk osh tempel a̱ ona cha, nan ithʋnanchi hosh ahanta ma, na holitompa isht a̱sha pehlichi ʋhleha, mikmʋt okla i̱ hochitoka ʋhleha aiena kʋt im ai ʋla cha, Nan isht ai ʋlhpesa nanta mak o̱ ilʋppa puta ka isht ish yakohmichi cho? micha kʋta hosh nan isht ai ʋlhpesa ilʋppa chima tok oh cho? achi tok.

²⁴ Mihma Chisʋs ʋt afalaminchi mʋt, Ʋno ak kia nan achʋfa ka a hʋchim asilhhʋchi lashke; yʋmmak o̱ hʋs sʋm anoli hokma, ʋno ʋt yʋmmak inli ho̱ chohmit nan isht ai ʋlhpesa nana ho̱ ilʋppa puta ka ishit yakohmichi li hatuk ʋt hʋchim anoli lashke.

²⁵ Chan i̱ baptismo ʋt katimak o̱ a minti ha tok oh cho? ʋba yakni okmá, hatak okmá, nanta ha tok oh cho? im achi tok. Yohmi ma, Ʋba yak o̱ minti ha tok: il achi hokma, Yohmi kak o̱ katiohmi ho̱ yʋmma hʋch ik i̱ yimmo ke tok oh cho? pim acha hinlʋshke.

²⁶ Yohmi kia moma kʋt Chan a̱ hopaii o̱ okla ahni hatuk oka, Hatak ak a tok: achi kʋt okla ha̱ il i̱ nukshopʋshke, achit ilap bi̱ka it im anumpulit ma̱ya tok.

²⁷ Micha Chisʋs ash o̱ im afalaminchi mʋt, Kil ithano shke, im achi tok. Mihma yʋmmak ash osh, Yohmi ka ʋno ak osh nan isht ai ʋlhpesa nana ho̱ ilʋppa puta ka isht yakohmichi li hatuk ʋt ak hʋchim anoloshke, achi tok.

²⁸ Yohmi kia katiohmi ho̱ hʋsh ahni cho? Hatak achʋfa hosh ushi ʋt in tuklo tok; atuk osh ti̱kba yash o̱, Sʋso ma! himak nitak a̱ a̱ pa̱kʋpi a holokchi a̱ ont ish toksʋlashke, ont im achi tok.

²⁹ Mihma afalaminchi mʋt, Yohmi la he ak ahnoshke, achi tok: yohmi tuk kia i̱ himmakma inlanchit anukfilli cha, ia tok.

³⁰ Yohmi ma anonti atu̱kla kash yʋmmak inli chohmi ka ont i̱ miha tok. Mihma afalaminchi mʋt, Ia lashke, a̱ shahli ma! achi; yohmi tuk kia ik aiyo ki tok.

³¹ Tuklo yʋmmʋt katimampo kak osh i̱ki nan aiahni tuk a̱ yʋmohmi tok oh cho? im achi tok. Mihma, Tikba yatuk á, im achi tok. Mihma Chisʋs ʋt, A̱hli mak o̱ hʋchim achi lishke, Pʋblikan ʋhleha, micha haui puta kʋt hʋchi tikba Chihowa apehlichika ya̱ pit abehi̱ha hoke.

³² Chan ʋt ai ʋlhpiesa ata̱ya mak osh hʋchim ʋla ka, yʋmma hʋch ik i̱ yimmo tok: yohmi kia pʋblikan ʋhleha, micha haui puta kʋto i̱ yimmi tok: mihma hʋchishno ʋt yʋmmak atuk ma hʋsh pisa ha yʋt, yʋmma hʋchi yimma hi ʋt i̱ himmak a̱ inlanchit hʋch ik anukfillo tok, im achi tok.

³³ Nan isht ʋlhpisa inla ka hʋsh haklashke; Hatak chuka‐chʋfa pehlichi achʋfa hosh pa̱kʋpi a̱ hokchit tahli cha, kʋti apushi isht a holitʋchit apakfobli mʋt, oka‐pa̱ki ai ʋlhto a̱ yʋmma anu̱kaka ya̱ a kulli cha, chuka chaha ya̱ ikbit tahli mʋt, hatak na pilesa ʋhleha ho̱ pota cha, yakni hopaki ho̱ ia tok.

³⁴ Atuk osh nan ʋni waya ai ona̱ hosi ma, yʋmmak ash ʋni waya ka ont isha chi̱ ho̱, in tishu ʋhleha ha̱ hatak na pilesa ʋhleha hash pit in tihleli tok.

³⁵ Atuk o̱ hatak na pilesa ʋhleha hʋt in tishu ʋhleha hash o̱ hoklit ishi cha, achʋfa ka boli mʋt, anonti achʋfa ka ʋbi cha, anonti achʋfa ka tʋli isht boli tok.

³⁶ Atuk o̱ anonti inla laua kʋt tikba atuk a̱ i̱ shahli ho̱ pit tihleli tok: yʋmmak ash kia yʋmmak atuk mak inli ho̱ okla itilauechi tok.

³⁷ Yohmi kia ont ishtaiyopi fehna ma, Sʋso ha̱ holitobla chi̱ hoke, achi mʋt, ushi ak o̱ pit i̱ pila tok.

³⁸ Yohmi tuk kia hatak na pilesa ʋhleha hash osh ushi ash o̱ pisa mʋt, Ilʋppak osh immi mak oke: kiloh ʋbi cha, immi yatuk a̱ kiloh ai ishí, ilap bi̱ka it im achi tok.

³⁹ Mihmʋt yʋmmak ash o̱ okla iti̱ hoklit pa̱kʋpi a holokchi a̱ ishit a kohchi cha, ʋbi tok oke.

⁴⁰ Yohmi ka pa̱kʋpi a holokchi immi atuk ʋt onakmʋt, hatak na pilesa ʋhleha yʋmmak atuk a̱ nanta hak o̱ katimihcha hinla cho? im achi tok.

⁴¹ Yohmi ma, Hatak haksi ʋhleha yʋmmak atuk ma issikkopalit tʋmoli cha, pa̱kʋpi a holokchi yash hatak na pilesa ʋhleha inla yʋto ont ai ʋlhpiesakma na waya ka ihi̱ma he fehna ho̱, i̱ pota he mak oke, im achi tok.

⁴² Mihma Chisʋs ʋt, Tʋli yʋmma chuk‐ikbi ʋhleha hʋt shitilema yash o̱, yʋmmak ash fehna hosh chukbika nutaka in tola holitopa i̱ shahli ho̱ tobʋshke: ilʋppa Chihowa hosh yʋmihchi ho̱, pi nishkin a̱ i̱ na fehnʋshke, achi ka Baibil a̱ himonna kia hʋch ik ai it im anumpulo chatuk oh cho?

⁴³ Yohmi hoka Chihowa apehlichika ya̱ mokofit hʋchim ai ishi cha, yʋmmak atuk ma isht a waya he fehna oklushi o̱ ima he mak oke, hʋchim achi lishke.

⁴⁴ Micha kʋna hosh tʋli ilʋppa onʋtulakmʋt, litoa he, amba ilap ak osh kʋna ho̱ onʋtula hokmʋt, botolichit kancha hi oke, im achi tok.

⁴⁵ Mihma na holitompa isht a̱sha pehlichi ʋhleha micha Falisi ʋhleha aiena kʋt, yʋmmʋt nan isht apesa ka haklot tahli mʋt, yʋmmʋt ilap ak o̱ isht anumpuli hatuk a̱ okla akostininchi tok.

⁴⁶ Yohmi kia yʋmmak oka hopaii ak o̱ okla ahni hatuk oka, yʋmmak ash o̱ iti̱ hoklit ishi bʋnna tuk kia okla chito ak o̱ i̱ nukshopa tok.