Mahlu 20 - Chahta Holisso Holitopa 1886

Na pilesa ʋhleha hʋt nitak achʋfa ka hʋshi kanʋlli ʋlhpisa ilaiyuka ho̱ pa̱kʋpi a holokchi ilhkoli tok nan isht ʋlhpisa. Nan isht ʋlhpisa ilʋppak o̱ Chisʋs ʋt ilap im antia ʋhleha aia̱hli ka ai ilaiyukachit im atobba hi ʋt ai isht apesa, 1, 17 Chisʋs ʋt anonti illa chi̱ kʋt tikbanlit anoli; 20 mihma Sebete ushi ishki ʋt Chisʋs a̱ nan im asilhha, mihma afalaminchit i̱ miha. 30 Chisʋs ʋt hatak lʋpa tuklo ho̱ hopo̱koyochi.

¹ Ʋba apehlichika yʋt, hatak chuka‐chʋfa pehlichi osh i̱ pa̱kʋpi aholokchi a toksʋla chi̱ ka, tohna chi̱ hosh onnahinli fehna ia ho̱, chohmi hoka.

² Atuk osh yʋmmak ash osh ilhtohno ʋhleha ha̱ nitak achʋfa ka iskʋli achʋfa chi̱ ho̱ it im apesa cha, pa̱kʋpi aholokchi a̱ pit tihleli tok.

³ Atuk osh hʋshi kanʋlli ʋlhpisa ont atuchina foka ho̱ kohchʋt a̱ya mʋt, inla yʋt nan‐isht ʋtta ik im iksho hosh ilhpak a kanchi a hiohma̱ya na pisa tok,

⁴ Mihmʋt yʋmmak ash o̱, Hʋchishno ak kia pa̱kʋpi aho lokchi a̱ pit hʋsh abehashke; atukma kaniohmi kak osh ai ʋlhpesakma, hʋch ima lashke, im achi na okla ilhkoli tok.

⁵ Atuk o̱ anonti hʋshi kanʋlli ʋlhpisa isht hannali, mikmʋt ont isht chakkali aiena ka kohchʋt a̱ya mʋt, yʋmmak ash inli ho̱ chohmichi tok.

⁶ Atuk osh hʋshi kanʋlli ʋlhpisa isht auah achʋfa foka ho̱ kohchʋt ia mʋt, anonti inla yʋt nan‐isht ʋtta ik im iksho hosh hiohma̱ya na pisa cha, Katiohmi ho̱ nan isht ʋtta ik hʋchim iksho hosh hʋsh hiohma̱ya na shoyubi cho? im achi tok.

⁷ Mihma yʋmmak ash osh, Amba hatak nana kia nan ik pi tohno kʋno, im achi tok: mihma yʋmmak ash o̱, Hʋchishno ak kia pa̱kʋpi aholokchi a̱ pit hʋsh abeha ak inlashke; atuk ma kaniohmi kak osh ai ʋlhpiesakma, mih mak o̱ hʋsh ishashke, im achi tok.

⁸ Yʋmohmi tuk o̱ ont opiʋt taha ma, pa̱kʋpi aholokchi in talaia atuk ash osh nan im apesʋchi asho̱, Na pilesa ʋhleha ha̱ i̱ howa cha, ʋlhtoba ha̱ imá: ishtaiyopi tuk ak o̱ ai ishtia hosh ti̱kba tuk a̱ ont ish tahlashke, im achi tok.

⁹ Atuk o̱ hʋshi kanʋlli ʋlhpisa ont isht auah achʋfa foka ho̱ tohno tuk ash o̱ okla ai ʋla mʋt, hatak achʋfa kʋt iskʋli achʋfa aiyuka ho̱ ishi tok.

¹⁰ Amba ti̱kba tuk ʋto ai ʋla mʋt, i̱ shahli ho̱ okla isha chi̱ kʋt im ahoba tok: atuk o̱ yʋmmak ash kia hatak achʋfa kʋt iskʋli achʋfa aiyuka ho̱ ishi tok.

¹¹ Micha yʋmma okla ishit tahli mʋt, chukachʋfa pehlichi hatak ash o̱ nanumachit ma̱ya mʋt,

¹² Ishtaiyopi tuk yakohmi kʋto hʋshi kanʋlli ʋlhpisa achʋfa illa ho̱ toksʋli tuk a̱ pishno nitak lʋshpa ho̱ toksʋli kʋllo ka isht il ahanta tuk a̱, ish pi ai itilauechishke, achi tok.

¹³ Yohmi kia afalaminchi mʋt, achʋfa ho̱, A̱ kana ma! nan ik ʋlhpeso nana ho̱ a chi̱ yʋmohmi li keyushke: chishno ʋt iskʋli achʋfa hi o̱ il it im apesa tuk keyu̱?

¹⁴ Chimmi mak o̱ ish ishi cha, ish iashke: ishtaiyopi tuk ilʋppak kia chishno a̱ it ilauechit ima la chi̱ hoke.

¹⁵ Ʋno ʋmmi hatuk ʋt ʋno nana aiahni li hosh kanimihchi la hi ʋt ʋm ʋlhpesa keyu̱? ʋno ak osh si achukma kak o̱, chi nishkin ʋt ik ʋlhpeso hoh cho? achi tok.

¹⁶ Yohmi ka yʋmmak inli ho̱ chiyuhmit ishtaiyopi tuk ʋt ti̱kbakma, ti̱kba tuk ʋt ishtaiyopa hi oke; im annoa hokʋto laua; amba ʋlhtoka kak osh achafoa hoka, achi tok.

¹⁷ Atuk osh Chisʋs ʋt Chelusalem a̱ ia hosh a̱ya mʋt, takla ya̱ nan im ai ithʋna ʋhleha auah tuklo kash pehlichit naksika isht ona mʋt,

¹⁸ Inta! Chelusalem a̱, iloh iʋshke; yohmi ka Hatak Ushi ishit na holitompa isht a̱sha pehlichi ʋhleha, mikmʋt na holissochi ʋhleha aiena ka ibbak fohkikma, yʋmmak ash osh illa hi a̱ okla im apesa chi̱ hoke.

¹⁹ Yohmikma yʋmmak atuk ma ishit yopula chi̱, micha fʋmmi, mikmʋt ititaiyukhʋna ahonʋhlichit ʋbi aiena chi̱ mak o̱, Chentail okla ha̱ ibbak fohka chi̱ hoke: yohmi tuk kia nitak ont atuchinakma falamʋt tana chi̱ hoke, im achi tok.

²⁰ Yohmi ma Sebete ushi ʋhleha ishki osh ushi a̱ pehlinchit im ona cha, aiokpahanchi kʋt, nana achʋfa ho̱ im asilhha tok.

²¹ Mihma ohoyo hash o̱, Nanta hak o̱ ish aiahni hoh cho? im achi ma, yʋmmak ash osh, Sʋso tuklo ilʋppʋt ish apehlichika ya̱ achʋfʋt chibbak isht‐impakimma ya̱ ont a binilikma, anonti achʋfa kʋt ʋlhfʋbekimma ya̱ a̱sha hi a̱ ish im apesashke, im achi tok.

²² Yohmi kia Chisʋs ʋt afalaminchi mʋt, Nana ho̱ hʋsh asilhha hokʋt hʋsh akostininchi keyushke. Hʋchishno ʋt isht‐ishko ai ishko la chi̱, yʋmma hʋsh ai ishka hinla cho? anonti baptismo isht a sa baptismo ka isht hʋchi baptisma hinla cho? im achi ma, yʋmmak ash osh, Pi yʋmohma hinla hoke, im achi tok.

²³ Mihma yʋmmak ash o̱, Ʋm isht‐ishko yoka hʋsh ai ishka chi̱ ho mʋhli; mikmʋt baptismo isht a sa baptismo ka isht hʋchi baptisma chi̱ ho mʋhli hoke; yohmi kia sʋbbak ishtimpakimma, micha ʋlhfʋbekimma aiena aiasha hokʋno ʋno yosh ima la hi o̱ keyu, amba A̱ki ʋt kʋna ho̱ im atahli tok mak illa hi oke, achi tok.

²⁴ Yohmi ma pokoli kash osh haklo mʋt, itibapishi tuklo kash o̱ isht ik i̱ yukpo fehna tok.

²⁵ Yohmi kia Chisʋs ʋt yʋmmak ash o̱ i̱ howa mʋt, Chentail mi̱ko ʋhleha hʋt ai i̱ shahlit pehlichi chatuk, mikma i̱ hochitoka ʋhleha hʋt nana im ai ʋlhpesa hatuk osh im ai yʋmihchi chatuk a̱ hʋsh ithaiyanʋshke.

²⁶ Amba hʋchishno yokʋno ai yʋmohma he keyushke: amba kʋna hosh ai i̱ shahli̱t hʋch itintakla ya̱ anta bʋnna hokmʋt, yʋmmak osh hʋchin tishu hashke.

²⁷ Mikma kʋna hosh holitopa i̱ shahli bʋnna hosh hʋchi itintakla ahantakmʋt, yʋmmak osh nan isht hʋchim ʋtta yashke.

²⁸ Hatak Ushi ʋt ilapo ak o̱ nan isht im ʋtta chi̱ ho̱ a̱ya ha tok keyu: amba nan isht ʋtta chi̱, mikmʋt laua ho̱ ilap im ilhfiopak a̱ isht chumpa chi̱ aiena hosh a̱ya tok a̱, mih mak o̱ hʋsh chiyuhmashke, achi tok.

²⁹ Yohmi ma Cheliko a̱ a̱sht ilhkoli ma, okla laua fehna kʋt yʋmmak ash o̱ iakaiya tok.

³⁰ Atuk o̱ hatak lʋpa tuklo kʋt hina lapalika yo̱ chi̱ya tuk osh, Chisʋs ʋt ont ia ho̱ haklo mʋt, pit tahpʋlʋt, Chitokaka Lewi ushi chia ma! ish pi̱ nukha̱klashke, achi tok.

³¹ Yohmi ma okla laua yash osh, yʋmmʋt nukchinta chi̱ ka, im alʋmmi tok; yohmi kia yʋmmak o̱ i̱ shahlichit tahpʋlʋt, Ish pi̱ nukha̱klashke, Chitokaka Lewi ushi chia ma! achi tok.

³² Mihma Chisʋs ʋt lumʋt hikia cha, yʋmmak ash o̱ pit i̱ howa mʋt, Nanta hak o̱ a hʋchi̱ katimichi la he a̱ hʋsh aiahni cho? achi ma,

³³ Pi nishkin ʋt fatuma he ak oke, Chitokaka ma! im achit okla tok.

³⁴ Yohmi ma Chisʋs ʋt i̱ nukha̱klo cha, nishkin ash pit potoli tok: yohmi ma mih mak inli ho̱ nishkin ashot falamʋt pisa ma, yʋmmak ash o̱ iakaiyʋt okla tok.