Mahlu 19 - Chahta Holisso Holitopa 1886

Falisi ʋhleha hʋt Chisʋs a̱ nan im ponaklo ma, Chisʋs ʋt afalaminchi mʋt, á hatak ʋt tekchi iti̱ kʋnia ka ik ʋlhpeso ka miha, 3, 13 Chisʋs ʋt ʋlla chipunta hoka ibbak a̱ onochi cha, ʋba isht anum puli. 16 Chisʋs a̱ hatak himita yosh, Nantak o̱ katiohmi li kak osh ai okcha̱yʋt bilia yoka ona la hinla cho? im achi ma, Chisʋs ʋt isht im anumpuli: 23 nan in laua yʋt ai okcha̱ya yoka palʋmmi ho̱ chukowa he achi: 27 anonti ilap i̱ yimmi a̱hli ʋhleha ha̱ yukpala hi ʋt miha.

¹ Atuk o̱ yakohmi tok; Chisʋs ʋt ilʋppa puta ka ahanchit tahli mʋt, Kalili a̱ ʋttʋt iʋt, Chatan misha Chutea yakni ai ʋhli ho̱ ona tok.

² Mihma okla chito yʋt iakaiya tuk o̱, yʋmmak o̱ a hlakofohlichi tok.

³ Mihma Falisi ʋhleha hak kia im ai ʋla cha, yʋmmak ash o̱ imomaka pisa hosh, Nana hosh a kaniohmi mak inli ho̱ hatak ʋt tekchi a̱ kancha hi ʋt im ai ʋlhpesa hoh cho? im achi tok.

⁴ Mihma yʋmmak ash osh afalaminchi mʋt, Ʋmmona hokʋno yʋmma ikbi hokʋt, nakni micha tek itatuklo ho̱ ikbi tok.

⁵ Mihmʋt, Ilʋppa pulla hatuk mak o̱ hatak ʋt i̱ki micha ishki aiena ka issa cha, tekchi ak o̱ it asitia hi oke: yohmikma tuklo yʋmmak atuk ʋt haknip achʋfa hi oke; achi tok holisso ha̱ hʋch ik it im anumpulo chatuk oh cho?

⁶ Yohmi hoka yʋmmak okʋt himmakma tuklo mak a hi o̱ keyu, amba haknip achʋfa hoke. Yohmi hoka Chihowa hosh nana ka ita halʋllichi ha ya, hatak ʋt ik iti̱ filʋmmicho kashke, im achi tok.

⁷ Mihma okla hash osh, Yohmi ka katiohmi ho̱ iti̱ kʋnia holisso ha̱ ima cha, ohoyo ha̱ kancha hi a̱, Moses ʋt apesa tok oh cho? im achi tok.

⁸ Mihma, Hʋchi chu̱kʋsh ʋt kullo pulla hatuk mak o̱, hʋchi tekchi hʋsh kancha hi a̱, Moses ʋt hʋchim ahni tok: amba ʋmmona a mihinti kʋno yohmi tok keyushke.

⁹ Yokmi kia ʋno ʋt, Kʋna hosh tekchi a̱ inla itinluma̱ka tuk keyu ho̱, kanchi cha, inla itauwaya hokmʋt, haui toba mak oke: mikma ohoyo kanchi tuk ash o̱ kʋna hosh itauwayakmʋt, haui toba hoke, hʋchim achi lishke, im achi tok.

¹⁰ Mihma nan im ai ithʋna ʋhleha hash osh, Hatak ʋt tekchi a̱ isht im a yakohma hinlakma, itauwaya ka achukma keyushke, im achi tok.

¹¹ Yohmi ma yʋmmak ash osh, Hatak moma kʋt anumpa ilʋppa aiokpʋcha he keyu, amba kʋna ho̱ isht ai im ʋlhpesa ak illa hinla hoke.

¹² Kanimi kʋt ishki ikfoka anu̱ka ak inli ho̱ yohmi hosh atobʋt ʋtta tuk yunʋk ʋt a̱sha; mikma kanimi kʋto hatak osh yunʋk ikbi tok o̱, yunʋk ʋt a̱sha: yohmi ma kanimi kʋto ʋba apehlichika pulla hatuk mak o̱, ilap inli hosh yunʋk il ikbi tok ʋt, yunʋk ʋt a̱sha hoka. Kʋna hosh ilʋppa aiokpʋcha hinlakmʋt aiokpʋchi mak inlashke, im a̱chi tok.

¹³ Yʋmma foka ma yʋmmak atukma ibbak a̱ ʋlla chi punta ya̱ isht umbitepa cha, ʋba pit anumpula chi̱ ka isht im ai ʋla tok: mihma nan ithʋna ʋhleha hʋt okla ha̱ im alʋmmin chi tok.

¹⁴ Yohmi kia Chisʋs ʋt, Ʋlla chipunta yʋt ʋm ʋla hi a̱ hʋsh im ahni cha, hʋch ik im alammo kashke: ilʋppa chiyuhmi kak osh ʋba apehlichika mak oka, achi tok.

¹⁵ Mihmʋt yʋmmak ash o̱ ibbak a̱ isht umbitepʋt tahli mʋt, yʋmmak ash a kohchʋt ia tok.

¹⁶ Yohmi tuk o̱ achʋfa hosh a̱yʋt ona mʋt, Nan ithʋnanchi achukma ma! ai okcha̱yʋt bilia yoka pisa la hi ʋto nana achukma nanta hak o̱ yʋmohmi la hinla cho? im achi tok.

¹⁷ Mihma yʋmmak ash osh, Katiohmi ho̱ achukma is si achi cho? achukma kʋt iksho ho̱ amba achʋfa illa, yʋmmʋt Chihowa ak oke: yohmi kia ai okcha̱ya yoka ont ish chukowa he ish ahni hokmʋto, nan ʋlhpisa puta mak o̱ ish holitoblashke, im achi tok.

¹⁸ Mihma, Katima kak o̱? im achi ma, Chisus ʋt, Kʋna kia chik bo kashke, Chik itinluma̱ko kashke, Chik hu̱kopo kashke, Anumpa ik a̱hlo isht atokolit chik anto kashke.

¹⁹ Chi̱ki micha chishki aiena ka ish holitoblashke: mikmʋt, Chin chukapanta hatak a̱ ish holitobli kʋt, chishno akinli ka chim itilauashke, achi tok.

²⁰ Hatak himita yash osh, Ʋlla sa tomba mak inli hosh nana ilʋppa moma ka holitoblit isht mihinti li tok mak oke: nanta hosh ik sʋm ono moma cho? im achi tok.

²¹ Mihma Chisʋs ʋt, Aia̱hli kak o̱ ish ahni hokmʋt, ia cha nan chim a̱sha ka kampilʋt, ilbʋsha ʋhleha ha̱ ish i̱ hopelashke; yohmikmʋt na holitompa kʋt ʋba yakni ya̱ chin tonla he mak oke: mikmʋt ish la cha, ant is siakaiyashke, im achi tok.

²² Yohmi kia hatak himita yash osh anumpa yʋmma haklo mʋt, nan in laua fehna hatuk okʋt, nukha̱klo fehna hosh kanʋllit ia tok.

²³ Yohmi ma Chisʋs ʋt nan im ai ithʋna ʋhleha hash o̱, A̱hli mak o̱ hʋchi̱ miha lishke, Hatak nan in laua yʋt ʋba apehlichika ya̱ palʋmmi ho̱ chukowa hi oke.

²⁴ Mikma anonti, Kamel ʋt chofak ushi nishkin a̱ hlopulli ka palʋmmi kʋt, hatak nan in laua yosh Chihowa apehlichika pit chukowa hokʋno, ik lauwo ka he hʋchim achi lishke, achi tok.

²⁵ Mihma nan im ai ithʋna ʋhleha hʋt okla haklo mʋt, nukhlakancha fehna tok: mihmʋt, Yohmikma kʋta hosh okcha̱ya hinla cho? achi tok.

²⁶ Yohmi kia Chisʋs ʋt yʋmmak ash o̱ atokolit pisa mʋt, Hatak okmʋno ilʋppʋt yohma he keyu, amba Chihowa hokmʋno nan oklu̱ha kʋt yohma he bano hoke, im achi tok.

²⁷ Yohmi ma Pita yʋt afalaminchi mʋt, Yakeh! pishno ʋt mominchit il issa cha, e chiakaiya tuk; yohmi kʋt nanta hak o̱ il i̱sha chi̱ cho? im achi tok.

²⁸ Mihma Chisʋs ʋt, A̱hli mak o̱ hʋchi̱ miha lishke; Si apehʋt hʋsh itʋnowa tuk ʋt, nan oklu̱ha kʋt himonʋt tobakma, Hatak Ushi yʋt im aholitopaka ya̱ aiasha holitopa ai om binilikma hʋchishno ak kia aiasha holitopa auah tuklo ka hʋsh a chieyʋt, Islael oklushi auah tuklo ka na hʋchim apesa hi oke.

²⁹ Yohmikma chuka puta, mikmʋt itibapishi ʋhleha, micha in tek ʋhleha, keyukmʋt i̱ki okmá, ishki okmá, tekchi okmá, keyukmʋt ʋlla yokmá, yakni okmá, nana ho̱ sa hohchifo pulla hatuk mak o̱ issʋt a̱ya tuk ʋt momʋt yʋmmak atuk a̱ ohmi tahlepa achʋfa ka pisa tuk mʋt, anonti ai okcha̱yʋt bilia ma iesha he mak oke.

³⁰ Yohmi kia ti̱kba tuk ʋt ont ishtaiyopa hi ʋt lauakma, anonti ishtaiyopi atuk ʋt ti̱kba hi ʋt a̱sha hi oke.