Mahlu 18 - Chahta Holisso Holitopa 1886

Chisʋs ʋt pim anukfila hʋt akanlosa he, 1, 7 micha ilap i̱ yimmi a̱hli ʋhleha hoka e shitelema he keyu ka pi̱ miha: 12 anonti i̱ yimmi ʋhleha ha̱ i̱ hullo kʋt isht anoli mak osh chukfʋlhpoba kʋnia isht apesʋt anumpuli: 15 micha itibapishi iksa ibafohka yatuk osh nana ka pim okpʋni hokma, il i̱ kaniohma hi oka pi̱ miha: 20 anonti kʋna hoh kia i̱ hohchifo ha̱ kanima yo̱ ai it afama ka ai ibafoka hi ʋt achi. 21 Chisʋs ʋt hatak okʋt nana ka ai iti̱ kaniohmi hokʋt, peh iti̱ kashofa he tuk nan isht apesa hosh anumpuli.

¹ Yohmi ma yʋmmak fehna akinli ka nan ithʋna ʋhleha hʋt Chisʋs a̱ im ai ʋla mʋt, Kʋta hosh ʋba apehlichika ya̱ ibafo̱ka kʋt moma i̱ shahli cho? achi tok.

² Mihma Chisʋs ʋt ʋlla iskitini o̱ i̱ howa cha, yʋmmak ash intinlakla ya̱ hilechi tok.

³ Mihmʋt, A̱hli ho̱ hʋchim achi lishke; Inlʋt toba cha, ʋlla chipunta yo̱ chiyuhmi ho̱ keyukmʋt, ʋba apehlichika ya̱ hʋsh chukowa he keyu hoke.

⁴ Yohmi hoka kʋna hosh ile akanlosichi kʋt ʋlla iskitini ilʋppak o̱ chiyuhmi hokmʋt, mihi yosh ʋba apehlichika ya̱ ibafo̱ka kʋt moma i̱ shahla hi oke.

⁵ Mikma kʋna hosh ʋno a̱ hohchifo hatuk mak o̱ ʋlla ilʋppa chohmi achʋfa ka ahninchi hokmʋt, ʋno ak o̱ ahninchi hoke.

⁶ Amba kʋna hosh a̱ yimmi chipunta yakohmi achʋfona kia ibetʋblichi hokmʋt, yʋmmak ash o̱ ilap ak o̱ tʋli tanch botoli osh ikunla ya̱ atakanli ho̱, okhʋta ahofobi fehna yo̱ ai oka illi hok mak osh im ʋlhpiesa he tuk mak a hi oke.

⁷ Nan‐isht‐ai ibetʋbli ak pulla tok mak o̱ yakni ʋt nan i̱ palʋmmi hoke: nana ai ibetʋbli okakanto kaniohmi kia ik takalo ka wa: yohmi kia hatak nana ho̱ ai ibetʋbli ʋt isht a tobʋt minti hatuk okʋno i̱ palʋmmi mak oke.

⁸ Yohmi hoka chibbak okmá, chiyi yokmá, nana hosh chi ibetʋblichi hokma, hokofit ish kanchashke; hanali okpulo, keyukmʋt imomokpulo yokmá, nana hosh ai okcha̱ya ya̱ ont ish chukowa kak osh ibbak ʋt tu̱klo, keyukmʋt iyi yʋt tu̱klo, kanima hosh luak ataha iksho ma ish itokʋnia he tuk a̱ chim i̱ shahla hi oke.

⁹ Mikmʋt chi nishkin ʋt chi ibetʋblichi hokma, kohchit ish kanchashke; nishkin ʋt im achʋfa hosh aiokcha̱ya ya̱ ont ish chukowa hok mak osh nishkin tu̱klo hosh aiokpuloka luak a̱ ish itokʋnia he tuk a̱ chim i̱ shahla hi oke.

¹⁰ Ahah! aiahnit chipota ʋhleha ilʋppa achʋfona kia hʋch ik kanimancho kashke: yʋmmak oka im enchil ʋhleha ʋba yakni aiasha kʋt, A̱ki ʋba binili ka nashuka ya̱ pi̱sa na bilia hoke, hʋchim achi lishke.

¹¹ Hatak Ushi ʋt okpulot taha yak o̱ okchalincha chi̱ hosh a̱ya hatuk oke.

¹² Katiohmi hʋsh ahni cho? Hatak ʋt chukfʋlhpoba tahlepa achʋfa hosh im a̱sha tuk osh, achʋfonʋt yoshubʋt kʋnia ka, pokoli chakkali akocha chakkali kash ashachi cha, iʋt yoshubʋt kʋnia tuk a̱ hoyot, nʋnih foka ya̱ hikikia chatuk keyu cho?

¹³ Atuk osh ahayucha he yoba tuk osh yohmi hokmʋt, achʋfa yʋmma isht a na yukpa kʋt, yoshubʋt ik tʋmoo ke tuk pokoli chakkali akocha chakkali ka im i̱ shahli chatuk oke, a̱hli mak o̱ hʋchim achi lishke.

¹⁴ Yohmi ka chipota ʋhleha ilʋppa achʋfona kia okpulot taha hi a̱, hʋch I̱ki ʋba binili kʋt ik ahno kʋt, yʋmmak inli ho̱ chiyuhmi hoka.

¹⁵ Yohmi ka ish itibapishi hʋt nana ka chim ashʋchi hokma, iʋt chishno, micha ilap hʋsh ita tuklo bano ho̱ nana ai ashʋchi tuk a̱ ish im anolashke: chi̱ haponaklo hokma, ish itibapishi hatuk a̱ falaminchit ish im aiyubacha he mak oke.

¹⁶ Amba chi̱ haponakla he keyu, yohmi hok mʋno, himmakma achʋfá, keyukmʋt tuklokma, nana ho̱ pehlinchit ish ia na nan anoli tuklo, keyukmʋt tuchinakmá nana itih ho̱ anumpa puta mʋt isht ai ahlashke.

¹⁷ Yohmikma yʋmmak atuk ma i̱ haponakla he keyuk ma, chʋch a̱ ish im anolashke: yohmi kia chʋch atuk ma i̱ haponakla he keyu hokmʋt, yʋmmak atuk mʋt Chentail hatak, micha pʋblikan aiena mak o̱ chim ai itilauashke.

¹⁸ A̱hli mak o̱ hʋchim achi lishke, Nana ho̱ yakni pakna ya̱ hʋsh a takchi hoka, ʋba yakni ma a talakcha he; mikmʋt nana ho̱ yakni pakna ya̱ hʋsh ai i̱ hotofi hoka, ʋba yakni ma ai i̱ hotofa he mak oke.

¹⁹ Anonti hʋsh tuklo hosh nana ka asilhha he imma ho̱ yakni pakna ya̱ hʋsh ai it im achʋfa hokma, A̱ki ʋba binili kʋt ai im aia̱hlicha he mak oke, hʋchim achi lishke.

²⁰ Kanima yo̱ tuklokmá, tuchinakmá, nana hosh sa hohchifo ha̱ isht ai itʋnaha hoka, yʋmma ai iklʋnna hikia li hoka, achi tok.

²¹ Yohmi ma Pita yʋt im ona mʋt, Chitokaka ma! itibapishi li hʋt katohmi ha yo̱ ʋm ashʋchi ka, i̱ kashofi la hinla cho? untuklo haya hi o̱? achi tok.

²² Mihma Chisʋs ʋt, Untuklo ha ya hi o̱ ak chim achoshke: amba, Pokoli untuklo bat untukla hi oke, chim achi lishke, im achi tok.

²³ Yohmi hoka ʋba apehlichika yʋt mi̱ko yosh in tishu ʋhleha ha̱ aheka i̱ hotihnʋt pisa bʋnna ho̱ chohmi hoke.

²⁴ Atuk osh i̱ hotihnʋt ishtia ma, achʋfa hosh talent tahlepa sipokni pokoli hosh aheka im asha tuk o̱, ilauelit im ʋla tok.

²⁵ Yohmi kia isht atobba hi ʋt ik im iksho hatuk o̱, i̱ shahli hash osh yʋmmʋt, tekchi, micha im ʋlla ʋhleha, mikmʋt nan im a̱sha tuk moma aiena kʋt kʋnia na aheka yʋt ʋlhtoba hinla ka apesa tok.

²⁶ Yohmi hatuk o̱ tishu hash osh aka hlipia cha, aiokpahanchi mʋt, Chitokaka ma! is sʋmi̱ sʋlaha hokma, mominchit chim atobbi lashke, achi tok.

²⁷ Yohmi ma tishu yʋmma i̱ shahli yatuk ʋt i̱ nukha̱klo cha, i̱ hotofi mʋt, aheka atuk a̱ i̱ kashofi tok.

²⁸ Yohmi tuk kia tishu yʋmmak ash inli kʋt kohchʋt ia mʋt, tishu ilapa ai itilaui yʋt achʋfa hosh, aheka iskʋli tahlepa achʋfa hosh in takanli hatuk a̱ ont pisa tok: mihmʋt yʋmmak ash o̱ hoklit ishi cha, nuktihliffi mʋt, Aheka chin takali kʋt is sʋm atobbashke, achi tok.

²⁹ Mihma tishu itilaui yatuk ash osh iyi ituma aka ya̱ hlipia cha, Is sʋmi̱ sʋlaha hokma, mominchit chim atobbi lashke, achit im asilhha tok.

³⁰ Yohmi kia ʋlhpesa ik ahno ki tok: amba aheka ya̱ atobbi pulla chi̱ mak o̱, yʋmmak ash o̱ aboha kʋllo pit fohki tok.

³¹ Yohmi ma tishu bi̱ka ʋhleha hʋt nana kʋt yʋmohmi na pisa mʋt, okla nukha̱klo fehna cha, iʋt nana a kaniohmi tuk a̱ mominchit i̱ shahli ha̱ okla ont im anoli tok.

³² Yohmi tok a̱ i̱ shahli hatuk ʋt yʋmmak ash o̱ pit hoyo cha, Tishu haksi chia ma! chishno ʋt is sʋm aiahni ma, aheka yʋmma mominchit chi̱ kashofi li tuk.

³³ Yohmi ka chishno ak kia tishu chi̱ bi̱ka ya̱ ish i̱ nukhaklo kʋt, ʋno ʋt chi̱ nukha̱klo li tuk a̱, ish chiyuhma he tuk keyu cho? im achi tok.

³⁴ Mihmʋt i̱ shahli hatuk ʋt anukhobela mʋt, aheka in takanli tuk ʋt, mominchit atobbi pulla chi̱ mak o̱, issikkopali ʋhleha ha̱ im issa tok.

³⁵ Yohmi ka hʋchishno hʋsh moma kʋt hʋsh itibapishi nana ai ashʋchi ya̱ hʋchi chu̱kʋsh ak o̱ isht hʋsh i̱ kashofi keyukma, yʋmmak inli ho̱ ohmichit A̱ki ʋba binili kʋt hʋchi̱ yʋmihcha he akinli hoke, achi tok.