Mahlu 17 - Chahta Holisso Holitopa 1886

Chisʋs ʋt inlʋt toba, micha Moses Elias ita tuklo kʋt im ʋla na it im anumpuli, 1, 14 Chisʋs ʋt nʋnih chaha ʋttʋt akowa mʋt, haiochichi tuk a̱ hlakofichi; 22 micha illa he atuk mʋt falamʋt tana he tikbanlit anoli. 24 Chisʋs ʋt tʋli holisso holitopa ka tempel a̱ nan isht im ai atahla chi̱ ho̱ ima tok.

¹ Yʋmohmi tuk o̱ nitak hannali ont ia ma, Chisʋs ʋt Pita, Chemis, mikmʋt itibapishi Chan aiena ka ilap bano ho̱ pehlichi cha, nʋnih chaha yo̱ pit oiya tok.

² Mihmʋt itikba ya̱ ai inla tobʋt hikia tok; mihma nashuka yʋt shohpakali kʋt hʋshi ak o̱ chiyuhmi ma, im anchi ʋt tohbi kʋt tommi hak o̱ itilaui tok.

³ Yohmi ma Moses micha Elias itatuklo hosh yʋmmak ash ant it im anumpuli hosh im otʋni tok.

⁴ Yohmi ma, Pita yʋt anumpuli mut, Chitokaka ma! ilʋppa il a̱sha kʋt pim achukmʋshke; ʋlhpesa ish ahni hokma, ilʋppa ʋlhtipo tuchina ka il ai ikbashke; achʋfa kʋt chishno ak o̱ chimmi hokma, anonti achʋfa kʋt Moses ak o̱ immi hokma, anonti achʋfa kʋt Elias ak o̱ immi hashke, Chisʋs a̱ im achi tok.

⁵ Yʋmmʋt anumpohonli moma ho̱, hoshonti tohbi kʋt ant o̱ hoshontikachi tok; mihma anumpa hoshontika auet a kocha kʋt, Ilʋppak osh Sʋso a̱ holitopa yo̱, nan‐isht a sai yukpa fehna hoke; hʋsh i̱ haponaklashke, achi tok.

⁶ Mihma nan ithʋna ʋhleha hash osh haklo mʋt, hlipʋt kaha cha, okla nukshopa fehna tok.

⁷ Mihma Chisʋs ʋt ʋlʋt ant tebli mʋt, Ho tani; ik hʋchi nukshopa kashke, achi tok.

⁸ Yohmi ma okla ʋba chakali mʋt, hatak nana kia ik peso, amba Chisʋs ak illa tok.

⁹ Yʋmohmi tuk o̱ nʋnih chaha ya̱ a̱sht akowʋt okla minti ma, Chisʋs ʋt yʋmmak ash o̱ nan i̱ mihʋt, Nana hʋsh pi̱sa tuk ʋt hatak nana kia hʋch ik im anolo mak o̱, Hatak Ushi ʋt illit falamʋt tani hayashke, achi tok.

¹⁰ Mihma nan im ai ithana ʋhleha hʋt im ponaklot, Yohmi ka katiohmi ho̱ na holissochi ʋhleha hʋt, Elias ak osh ti̱kba ʋla pulla he, okla achi cho? achi tok.

¹¹ Mihma Chisʋs ʋt afalaminchi mʋt, Elias ak osh ti̱kba ʋla cha, nan oklu̱ha ka falaminchit achukmalit taiyahla he tuk o̱ mʋhli:

¹² Yohmi ka Elias ʋt himonasi ak kia ʋla ma̱shko hoke; mihma yʋmma okla ik ithano cha, amba nana ho̱ okla ahni tuk mʋt, yʋmmak atuk ma i̱ yʋmihchi tok; yohmi ka Hatak Ushi ak kia mih mak o̱, chiyuhmit im ai issikkopa chi̱ hoke, hʋchim achi lishke, achi tok.

¹³ Yohmi ma Chan Baptist ak o̱ yʋmmʋt isht anumpuli hatuk a̱ nan ithʋna ʋhleha hʋt akostininchi tok.

¹⁴ Atuk o̱ okla laua aiasha kash ʋlʋt taha ma, hatak achʋfa hosh im ʋla cha, ant i̱ hʋchukbihlepʋt hikia mʋt,

¹⁵ Chitokaka ma! sʋso ha̱ ish i̱ nukha̱klashke: yʋmmak okʋt haiochi atuk osh himonna̱ luak a̱ itatohonla fehna, mikmʋt oka ma himonna oka itohonla fehna aiena hatuk osh issikkopa fehna hoke.

¹⁶ Yohmi ho̱ nan chim aiithʋna ʋhleha ha̱ isht im ʋla li tuk a̱, okla hlakoficha he keyu tuk oke, achi tok.

¹⁷ Mihma Chisʋs ʋt afalaminchi mʋt, Na yimmi iksho, micha na shanaiya fehna okla hʋchia ma! hʋchi ta̱kla ahanta li̱ katiohmi foka chi̱ cho? nana ka isht ak hʋchi ahno ho̱ katiohmi foka chi̱ cho? Ilʋppak o̱ isht hʋs sʋm ʋlashke, achi tok.

¹⁸ Mihmʋt Chisʋs ʋt nan‐isht ahullo okpulo ya̱ im alʋmmi ma, yʋmmak ash a kohcha tok; yohmi ma ʋlla yash osh hʋshi kanʋlli ʋlhpisa mih makinli ho̱ hlakofi tok.

¹⁹ Yʋmohmi tuk o̱ Chisʋs ʋt ilap bano ma, nan ithʋna ʋhleha hʋt im ona cha, Katiohmi ho̱ pishno ʋto yʋmma e kohcha he keyu tuk oh cho? achi tok.

²⁰ Mihma Chisʋs ʋt, Nan ik hʋchi yimmo kak atuk oka; a̱hli mak o̱ hʋchim achi lishke: Na yimmi kʋt mʋstʋt nihi achʋfa yak o̱ chohmi hosh hʋchi nukfo̱ka hatuk okmʋt, nʋnih chaha ilʋppa, Ilʋppak atuk ma a kanʋllit yʋmmak o̱ ish onashke, hʋsh im achi hoka, yʋmmʋt kanʋlla hinla hoke: mikma nana hosh hʋchi̱ na fehna hi ʋt iksho ka hinla hoke.

²¹ Yohmi kia ilʋppa chohmi hokʋt ʋba pit anumpuli, micha nahullochi aiena kak o̱ keyukma kohcha chatuk keyushke, im achi tok.

²² Atuk osh Kalili a̱ okla ma̱ya ho̱, Hatak Ushi a̱ ishit okla ibbak a̱ fohka chi̱ hoke.

²³ Yohmikma yʋmmak ash o̱ okla ʋbi tuk ma, anonti nitak ont atuchinakma falamʋt tana hi oke, Chisʋs ʋt im achi tok. Yohmi ma okla nukha̱klo fehna tok.

²⁴ Yʋmohmi tuk o̱ Kapenaʋm a̱ okla ai ʋla ma, ʋba isht ai okpʋchi tʋli holisso a̱ sholi ʋhleha hʋt Pita ya̱ im ona mʋt, Na hʋch ithʋnanchi ʋt ʋba isht aiokpʋchi tʋli holisso a̱ bohli chatuk keyu ho̱? achi tok.

²⁵ Mihma yʋmmak ash osh, A̱hli; achi tok. Micha aboha ya̱ ont chukowa ma, Chisʋs ʋt tikbanli. Saimon ʋt katiohmi ish ahni cho? mi̱ko ʋhleha yakni pakna aiasha kʋt ilap im ʋlla yak okmá, keyukmut hatak inla yak okmá, nanta ho̱ ʋlhpoyak i̱ nan ʋlhpisa tʋli holisso, micha noshkobo chumpa tʋli holisso, aiena ka im a hoyo chatuk o̱? achi tok.

²⁶ Pita yash osh, Hatak inla ʋhleha ha, im achi tok. Mihma Chisʋs ʋt, Yohmikma im ʋlla yokʋto yʋmma ik ahalaiyo ho tumʋshke.

²⁷ Yohmi kia kil ibetʋblecho ka chi̱ ka, iʋt okhʋta ona cha, nʋni isht‐ʋlbi ya̱ pit okʋchi; atuk osh nʋni ti̱kba kohcha ho̱ ish ishashke: micha itakha ya̱ ish wakʋmmikmʋt, tʋli holisso tushafa kʋt fo̱ka na ish pisa chi̱ hoke; yʋmmak o̱ ish ishi cha, ʋno, micha chishno, il ita tuklo isht ʋlhtoba mak o̱ yʋmma ont ish imashke, im achi tok.