Mahlu 16 - Chahta Holisso Holitopa 1886

Falisi ʋhleha hʋt, Chisʋs ʋt nan isht atokowa ya̱ ʋba ya̱ ai im otʋni cha hi a̱ ahni, 1; 6 micha nan im ai ithʋna ʋhleha hʋt, Falisi ʋhleha hʋt nana ithʋnanchi ka i̱ nukta̱hlʋt ahah! ahna he i̱ miha tok. 13 Pita yʋt Chisʋs a̱ Chihowa okcha̱ya Ushi, aiahnit yimmi kʋt miha. 21 Chisʋs ʋt iti‐taiyukhʋna ai illa he, atuk mʋt nitak ont atuchinakma falamʋt tana he aiena kʋt tikbanli anoli; 24 anonti Chisʋs a̱ im antia ʋhleha hʋt okla ile kaiyanchi, mikmʋt tikba na yukpa ai im ʋlhtoba he takanli kak o̱ isht ai ilbʋsha he mak o̱ achi.

¹ Falisi ʋhleha micha Satusi okla aiena kʋt ai ʋla cha, yʋmmak ash o̱ imomaka pisa hosh nan isht atokowa ya̱ ʋba ya̱ auet ai im otʋnicha hinla ka, im ahni tok.

² Mihma afalaminchi mʋt opiaka yokma, Shutik ʋt hum ma hoka, kocha yʋt achukma chishke, hʋsh achi.

³ Mikmʋt onnahinli yokma, Shutik ʋt humma cha hoshontichi fehna hokʋt, kocha yʋt okpula chishke, hʋsh achi Nan ilahobi hʋchia ma! shutik pisa yosh kaniohmi hokʋno hʋsh akostininchi kʋt, anonti himak nitak isht ai ʋlhpisa kʋno hʋch ik akostinincho ka hinla cho?

⁴ Hatak haksi micha haui aiena okla ash osh nan isht atokowa ya̱ pisa ka ahnishke: yohmi kia nan‐isht atokowa nana hosh im otʋna he keyu; amba hopaii Chonas a̱ nan‐isht im atokowa kak illa hi oke, im achi tok. Mihmʋt yʋmmak ash o̱ issʋt ia tok.

⁵ Atuk o̱ nan im ai ithʋna ʋhleha hʋt misha in tʋnnʋp a̱ ona mʋt, pʋska okla i̱sha he tuk ʋt imihaksi tuk a tok.

⁶ Yohmi ma Chisʋs ash osh, Falisi ʋhleha, micha Satusi ʋhleha aiena im pʋska isht‐shatʋmmi ya̱ i̱ nukta̱hlʋt ahah! hʋsh aiahnashke, im achi tok.

⁷ Yohmi ma yʋmmak ash osh, Pʋska kil esho kak oka, achit ilap bi̱ka it im anumpulit ma̱ya tok.

⁸ Mihma Chisʋs ʋt yʋmmak ash o̱ akostininchi mʋt, Na yimmi fehna keyu hʋchia ma! na katihmi ho̱ pʋska ya̱ isht hʋch ik a̱yo ke tuk ak osh isht it im anumpulit hʋsh ma̱ya cho?

^9-10 Pʋska tahlapi ho̱ tahlepa sipokni tahlapi tuk a̱, kishi kanohmi ho̱ hʋsh ishi tok ʋt, micha pʋska yʋt untuklo ho̱, tahlepa sipokni ushta tuk a̱, kishi kanohmi ho̱ hʋsh ishi tok aiena kʋt; hʋch ik ithanot hʋch ik akostinincho moma ho̱?

¹¹ Katiohmi ho̱ Falisi ʋhleha, micha Satusi ʋhleha aien im pʋska isht‐shatʋmmi ya̱ ahah! hʋsh aiahna he, yʋmmʋt pʋska imma yo̱ isht hʋch im anumpuli li tuk keyu ka hʋch ik akostinincho cho? im achi tok.

¹² Yohmi ma pʋska isht‐shatʋmmi hak o̱ ahah! im ahna hi o̱ i̱ miha hatuk keyu; amba Falisi ʋhleha, mikmʋt Satusi ʋhleha aiena nan‐isht ai ithʋnanchi ak atuk a̱ okla akostininchi tok.

¹³ Atuk o̱ Chisʋs ʋt Sesalea Fillippi yakni a̱ ona mʋt, nan im ai ithʋna ʋhleha im ponaklot, Hatak ʋto, Hatak Ushi sia ha̱, kʋta ho̱ si achi cho? achi tok.

¹⁴ Mihma, Kanimi kʋto, Chan Baptist chia ho̱ mihakma kanimi kʋto, Elias; mikma inlaka yʋto Chelemaias; keyukmʋt hopaii a tok achʋfona mak o̱ chia ho̱ miha hoke, achi tok.

¹⁵ Mihma, Amba hʋchishno ʋto kʋta ho̱ hʋs si achi cho? im achi tok.

¹⁶ Mihma Saimon Pita yʋt afalaminchi mʋt, Chihowa okcha̱ya Ushi, Klaist chia mak oke, achi tok.

¹⁷ Mihma Chisʋs ʋt afalaminchi mʋt, Saimon Ba Chona chia hʋt na chi yukpʋshke: nipi micha issish aiena hosh yʋmma chim otʋnichi ho̱ keyu hoka, amba A̱ki ʋba binili kak oke.

¹⁸ Yohmi ma anonti, Chishno ʋt Pita chia, yohmi ka tʋli ilʋppak o̱ an chʋch atuk ma ai ikbit hilechi la hi oke: yohmikma aiokpuloka okhissa puta kʋt yʋmmak atuk ma ik imaiyacho ka he mak oke.

¹⁹ Micha ʋba apehlichika ishit‐tiwa puta ka chishno ak o̱ chima lashke: mikma nana ho̱ yakni paknaka ya̱ ish a takchi hoka, ʋba yakni ma a talakcha he: mikmʋt nana ho̱ yakni paknaka ya̱ ish ai i̱ hotofi hoka ʋba yakni ma ai i̱ hotofa he mak oke, chim achi li akinlishke, achi tok.

²⁰ Yohmi mʋt ilap ak osh Chisʋs Klaist mak atuk a̱ hatak nana kia okla ik im anolo ka hi a̱, nan im ai ithʋna ʋhleha hash kʋllochit i̱ miha tok.

²¹ Nitak yʋmma ai ʋhlit ma̱ya kak o̱ Chisʋs ʋt ilapʋt Chelusalem a̱ ona cha, hatak hochitoka ʋhleha, micha na holitompa isht a̱sha pehlichi ʋhleha, na holissochi ʋhleha aiena ka nan isht im ai ilbʋsha in laua he, micha illichi tuk ma, nitak ont atuchinakma falamʋt tana he aiena ka nan im ai ithʋna ʋhleha ha̱ im anolit ishtia tok.

²² Yohmi ma Pita yʋt ilauelit ishi cha, im alʋmminchit ishtia mʋt, Na yakohmi kʋt chi̱ mishemashke, Chitokaka ma! ilʋppak okʋt a chi̱ yʋmohma he keyu hoke, achi tok.

²³ Yohmi kia yʋmmak ash osh filema mʋt, Pita yash o̱, Setan chia hʋt ʋm ashaka yo̱ ish hikiashke; chishno ak osh is si ataklʋmmichishke: nana kʋt Chihowa ya̱ ahala̱ya kak o̱ ish ahninchi keyu, amba nana kʋt hatak o̱ ahala̱ya hok mak bano hoka, im achi tok.

²⁴ Yohmi mʋt nitak yʋmma foka ma Chisʋs ʋt nan im ai ithʋna ʋhleha hash o̱, Hatak nana hosh siakaiya bʋnna hokmʋt, ile kaiyanchi cha, im iti‐taiyukhʋna ya̱ sholi hosh siakaiyashke.

²⁵ Kʋna kia ilap im ilhfiopak a̱ okchalinchi bʋnna hokʋto, i̱ kʋnia hi oke: yohmikma kʋna kia ʋno pulla hatuk mak o̱ im ilhfiopak ʋt isht i̱ kʋnia hoh kia, ahayucha hi oke.

²⁶ Hatak ʋt yakni a̱ ai ila mominchi hosh ahanta na ilap imi shilombish ash osh i̱ kʋnia hokma, nanta ho̱ ai‐isht il aiyukpa hinla cho? yʋmmak keyukmʋt hatak ʋt nanta ak o̱ ilap shilombish a̱ isht atobba hinla cho?

²⁷ Hatak Ushi ʋt enchil ʋhleha ha̱ pehlichi cha, I̱ki isht aholitopaka ya̱ il aieshi hosh a̱ya hi oka; yohmikmak osh hatak moma ka ilap nana akaniohmi tok aiyuka mak o̱ isht im atobba hi oke.

²⁸ A̱hli mak o̱ hʋchim achi lishke, Ilʋppa hiohma̱ya kʋt kanimi kʋt ik illo hosh ahanta cha, Hatak Ushi ʋt im apehlichika il aieshit minti ka, pisa hi ʋt a̱sha hoke, im achi tok.