Mahlu 15 - Chahta Holisso Holitopa 1886

Chisʋs ʋt na holissochi ʋhleha micha Falisi ʋhleha aiena kʋt anumpa kochanli i̱ nan ʋlhpisa puta kak o̱ ahninchi kʋt, Chihowa i̱ nan ʋlhpisa puta ka i̱ shahlichi ka nan i̱ miha tok, 1: 11 micha nana puta nana hosh hatak a̱ okpaiyani kʋt a̱sha ka anoli. 21 Chisʋs ʋt Kenan ohoyo ho̱ ushetik a̱ hlakofichi, 30 micha okla laua kʋt im ona na hlakofihinchi tok; 32 micha pʋska lumbo untuklo, micha nʋni chipunta kanomosi aiena ho̱ hatak tahlepa sipokni ushta ka ipeta.

¹ Yʋmohmi ma na holissochi ʋhleha, micha Falisi ʋhleha aiena kʋt, Chelusalem minti hosh Chisʋs a̱ im ai ʋla mʋt,

² Nanta katiohmi ho̱ na chim ai ithʋna ʋhleha hʋt hatak tikba ʋhleha anumpa kochanli isht i̱ nana ʋlhpisa ha tok a̱ kobʋffi cho? okla ibbak achifa keyu hosh pʋska ʋpa kʋt, achi tok,

³ Yohmi kia yʋmmak ash osh afalaminchi mʋt, Nanta katiohmi ho̱ hʋchishno mʋt, Chihowa i̱ nan ʋlhpisa ya̱ anumpa kochanli chi̱ nana ʋlhpisa ka isht hʋsh kobʋffi cho?

⁴ Chihowa yʋt apihi̱sa kʋt, Chi̱ki micha chishki aiena ka ish holitoblashke; yohmikma, Kʋna hosh i̱ki okmá, keyukmʋt ishki okmá, nana ho̱ na mihachikmʋt, illi mak o̱ illashke, achi tok oka.

⁵ Amba hʋchishno ʋt, Kʋna kia i̱ki, keyukmʋt ishki okma nana kash o̱ ʋm isht ish aiyukpa he tuk a̱, Ʋba‐isht aiokpʋchi oke, im achi: yohmi cha i̱ki okmá, ishki okmá, nana ka ik holitoblo kia nan ik i̱ kanihmo ka hi oke, hʋsh achi.

⁶ Yohmi hosh Chihowa i̱ nana ʋlhpisa ya̱ anumpa kochanli chi̱ nana ʋlhpisa ya̱ isht hʋsh ai okpʋnichishke.

⁷ Nan‐ilahobi hʋchia ma! Esaias ʋt tikbanli nan isht hʋchi anohonli hosh,

⁸ Okla ilʋppʋt itih hokʋno a̱ bili̱kasi isht ʋla mʋt, itiʋlbi ma ishit sa holitoblishke; yohmi kia chu̱kʋsh okʋto auet a̱ hopakishke.

⁹ Nana abʋchi kʋt hatak i̱ nana ʋlhpisa yo̱ ithananchi hokʋt, nana ʋlhpesa keyut okla si aiokpahanchishke, achi tok, im achi tok.

¹⁰ Yohmi mʋt okla laua yash o̱ itahobi cha, Haklot, hʋsh ithaiyanashke;

¹¹ Nana kʋt itih ha̱ pit chukowa kak osh hatak a̱ okpʋni ho̱ keyu: amba nana hʋt itih ha̱ a kohcha, ilʋppak osh hatak a̱ okpʋni hoke, im achi tok.

¹² Yohmi ma nan im ai ithʋna ʋhleha hash osh im ai ona cha, Falisi ʋhleha hʋt anumpa ilʋppa haklot issa mʋt, ik im ʋlhpieso tuk a̱ ish akostininchi cho? achi tok.

¹³ Yohmi kia yʋmmak ash osh afalaminchi mʋt, Na holokchi moma kʋt A̱ki ʋba binili hosh hokchi tok keyu hokʋno, tehʋt taha hi oke.

¹⁴ Ant ik ma̱ya, lʋpa yosh lʋpa pehlichi okla hoke: yohmi ka lʋpa yosh lʋpa ya̱ ilaueli kʋt tu̱klot yakni kula ya̱ pit kaha hi bano hoke, achi tok.

¹⁵ Yohmi ma Pita yʋt afalaminchi mʋt, Nan isht ʋlhpisa ilʋppa achukmalit pim anolí, achi tok.

¹⁶ Mihma Chisʋs ash osh, Hʋchishno ak kia nana ik akostinincho kʋt hʋchi moma hato?

¹⁷ Nana kʋt itih ha̱ fohka cha ia kʋt takoba ya̱ ont fohka tuk osh, anonti ont kohcha chatuk a̱, hʋch ik akostinincho moma cho?

¹⁸ Amba nana puta kʋt itih ha̱ akohcha hokʋto chu̱kʋsh ak o̱ a minti; micha yʋmmak osh hatak a̱ okpʋni chatuk oke.

¹⁹ Chu̱kʋsh ak o̱ im anukfila okpulo puta, hatak bi̱ka ʋbi, haui toba, ohoyo ik im iksho micha hatak ik im iksho it i̱ luma̱ka puta, hu̱kopa, anumpa ik a̱hlo isht atokoli, Chihowa ik ahobalot anumpuli puta kʋt a toba hoka.

²⁰ Ilʋppa puta kak osh hatak a̱ okpʋni hoke; amba ibbak ik ahchifo yo̱ isht impa hokʋno hatak a̱ okpʋni keyu hoke, achi tok.

²¹ Yohmi ma Chisʋs ʋt yʋmmak ash ʋttʋt ia mʋt, Taia micha Saiton aiena yakni i̱ kaniohmi ho̱ ona tok.

²² Mihma Kenan ohoyo hosh yʋmmak inli ho̱ ʋttʋt a̱ya tuk ʋt ʋla cha in tahpʋla mʋt, Chitokaka Lewi ushi chia ma! is sa̱ nukha̱klashke; sʋso‐tek ʋt nan‐isht‐ahullo okpulo ai i fo̱ka isht issikkopa fehna hoke, achi tok.

²³ Yohmi kia ilap ʋt anumpa achʋfa kia isht ik im afalamincho ki tok. Yohmi ma nan im ai ithʋna ʋhleha hash osh ona cha, Tahpʋlʋt hʋp iakaiya ka, kanompit ish chʋffichashke, achit im asilhha tok.

²⁴ Yohmi kia yʋmmak ash osh afalaminchi mʋt, Inla yokʋno im a̱ya li ha tok keyu; amba chukfʋlhpoba tʋmoa Islael in chuka‐chʋfa ak a tok oke, achi tok.

²⁵ Yohmi ma ohoyo hash osh mintit ant aiokpʋchi mʋt, Chitokaka ma! si apelʋchí, achi tok.

²⁶ Yohmi kia afalaminchi mʋt, Ʋlla im pʋska ya̱ ishi cha, ofi puta ka pit ipeta he ʋlhpesa keyu hoke, achi tok.

²⁷ Mihma yʋmmak ash osh, A̱hlishke, Chitokaka ma! yohmi kia ofi puta kʋt boshulli osh im pushnayo im ai‐impa a chilofa kʋno ʋpa hoke, achi tok.

²⁸ Yohmi ma Chisʋs ʋt afalaminchi mʋt, Ohoyo ma! na chi yimmi kʋt chintoshke; chishno ish ai ahni tuk fehna mak o̱ chim ai yʋmohmashke, im achi tok. Mihma hʋshi kanʋlli ʋlhpisa yʋmmak fehna ho̱ ushetik atuk ʋt hlakofi tok.

²⁹ Yohmi ma Chisʋs ʋt yʋmmak ash ʋttʋt ia mʋt, Kalili okhʋta bili̱ka yo̱ ona tok; mihmʋt nʋnih chaha yo̱ pit oiya cha, yʋmmak o̱ binili tok.

³⁰ Mihma okla chinto fehna kʋt hanali okpulo, ik hoponayo, ik anumpolo, imomokpulo puta, mikmʋt inla mʋt laua ho̱ il ai i̱shit im ai ona mʋt, Chisʋs iyi ituma ya̱ ont ashachi tok; mihma yʋmmak ash o̱ hlakofichi tok.

³¹ Yohmi na okla laua kʋt, ik anumpolo atuk ʋt anumpuli, imomokpulo atuk ʋt hlakofi, hanali okpulo atuk ʋt nowa, ik hoponayo atuk ʋt pisa aiena ho̱ okla pisa mʋt, nukhlakancha tok; micha Islael in Chihowa ak o̱ okla aiokpahanchi tok.

³² Yohmi ma Chisʋs ʋt nan im ai ithʋna ʋhleha hash o̱ hoyo cha, Okla laua si apehʋt ma̱ya na himak nitak tuchina ka nana ʋpa hi ʋt ik im iksho hatuk o̱, i̱ sa nukha̱kloshke; vohmi hatuk osh nan ik po moma hokʋno tishelichi la he keyu, yʋmmak keyukma takla ya̱ okla tikamba hinla hoka, im achi tok.

³³ Mihma nan im ai ithʋna ʋhleha hash osh, Yakni haiaka ya̱ katimak o̱ pʋska laua ka il ahayuchi na okla chinto yohmi fehna kʋt kaiya hinla cho? im achi tok.

³⁴ Mihma Chisʋs ash osh, Pʋska yʋt katohmi ho̱ hʋsh i̱shi ho̱? im achi tok. Mihma, Untuklo, micha nʋni chipunta kanomosi hosh aiena, im achi tok.

³⁵ Yohmi ma okla laua yʋt aka binohla hi a̱ apesa tok.

³⁶ Mihmʋt pʋska untuklo, micha nʋni aiena kash o̱ ishi cha, ʋba isht aiokpʋchi mʋt, tushtoli cha, nan im ai ithʋna ʋhleha ha̱ ima na nan im ai ithʋna ʋhleha hash osh okla laua ya̱ ipeta tok.

³⁷ Mihma momʋt okla impʋt, kaiya tok: mihma boshulli atampʋt a̱sha ka kishi alota untuklo ho̱ okla ishi tok.

³⁸ Mihma okla impa tuk ʋt, ohoyo ʋlla aiena hokʋto a̱sha ho̱, hatak tahlepa sipokni ushta tok.

³⁹ Mihma okla laua yash o̱ tishelichi mʋt, peni fohka cha, iʋt Maktala yakni a̱ ona tok.