Mahlu 14 - Chahta Holisso Holitopa 1886

Chan Baptist ʋt nan ai a̱hli fehna hatuk osh Helot a̱ nan i̱ miha hosh aboha kʋllo pit fohka, 1, 3 micha noshkobo tʋpa tok. 13 Chisʋs ʋt pʋska lumbo tahlapi, micha nʋni tuklo aiena ho̱ hatak tahlepa sipokni tahlapi ho̱ ipeta tok. 22 Chisʋs ʋt ʋba pit anumpula chi̱ hosh nʋnih chaha pit oiya; atuk osh ninak a̱ mahli fehna ma okhʋta paknaka a nowʋt nan im ai ithʋna ʋhleha ha̱ im ia; micha Pita yʋt oka kʋnia he tuk a̱ okchalinchi. 34 Chisʋs ʋt Kenesalet ona mʋt, abeka puta tuk a̱ hlakofichi.

¹ Yohmi ma nitak yʋmma foka ma, mi̱ko Helot ʋt Chisʋs ʋt annoho̱wa ka, haklo tok.

² Mihmʋt in tishu ʋhleha hash o̱, Ilʋppʋt Chan Baptist mak oke; illi tuk ʋt falamʋt tanishke: yohmi hatuk o̱ na fehna puta kʋt yʋmmak atuk ma ai isht il otʋnihinchishke, im achi tok.

³ Helot ʋt itibapishi Filip a̱ tekchi Helotias ak atuk pulla mak o̱, Chan a̱ hoklit, ishit takchi cha, aboha kʋllo ya̱ fohki tuk a tok.

⁴ Chan ʋt, Yʋmmak oka ish itauwaya he chim ʋlhpesa keyushke, im achi hatuk o̱.

⁵ Yohmi kak o̱ yʋmma ʋbi bʋnna kia, okla laua yak o̱ i̱ nukshopa tok: yʋmmak oka hopaii, okla ahni hatuk oka.

⁶ Yohmi tuk kia Helot ʋt ai ʋtta tok nitak a̱ holitoblit ma̱ya ma, Helotias ushetik ʋt itikba ya̱ a hihla ma, Helot ʋt yukpa tok.

⁷ Yohmi kak osh anumpa kʋllo isht ai il onochi hosh nana ho̱ asilhha hokma, ima hi ʋt miha tok.

⁸ Mihma ishki ʋt tikbanli i̱ miha hatuk oka, Chan Baptist noshkobo ʋt amphʋta chito fohka ho̱, ilʋppak fehna ant is si ai ʋmashke, achi tok.

⁹ Mihma mi̱ko ʋt nukha̱klo tok; yohmi nana kia anum pa kʋllo atuk pulla, micha okla ibai‐impʋt ma̱ya tuk aiena hatuk mak o̱, yʋmmak atuk ma ima hi a̱ apesa tok.

¹⁰ Micha pit atohno na aboha kʋllo anu̱kaka yak o̱ Chan noshkobo ya̱ a tʋbli tok.

¹¹ Mihma yʋmma noshkobo hʋt amphʋta chito fohka ho̱ isht ʋla cha, ohoyo himita yash ima tok; mihma yʋmmak ash osh ishki a̱ isht im ona tok.

¹² Yohmi ma nan im ai ithʋna ʋhleha hʋt haknip a̱ ont ishi cha, hohpi mʋt, iʋt Chisʋs a̱ ont im anoli tok.

¹³ Chisʋs ash osh haklo mʋt, nan im ai ithʋna ʋhleha bano ho̱ ai itapi̱hʋt yʋmma ʋttʋt ia kʋt, peni ʋlhtot yakni haiaka yo̱ ilhkoli tok; atuk o̱ okla hʋt yʋmmak ash haklo mʋt, aka itʋnowa hosh tʋmaha puta ka a̱shʋt okla pit iakaiya tok.

¹⁴ Atuk o̱ Chisʋs ʋt kohcha cha, okla laua ya̱ pisa mʋt, i̱ nukha̱klo fehna cha, abeka im a̱sha tuk a̱ hlakofichi tok.

¹⁵ Atuk o̱ opiʋt taha ma, nan im ai ithʋna ʋhleha hash osh im ai ʋla mʋt, Ilʋppak okʋt yakni haiaka yoke; mikma himak a̱ shoba̱ hosit tahʋshke; okla laua ya̱ pit ish tihleli na tʋmahushi taloha ka ilhpak ʋpa chi̱ kʋt okla a chumpashke, achi tok.

¹⁶ Yohmi kia Chisʋs ash osh, Okla ik aiyo mak kia, impa chi̱ ka hʋsh ipetashke.

¹⁷ Yohmi ma, Pʋska tahlapi, micha nʋni tuklo aiena illa hosh ilʋppa pim a̱shʋshke, okla im achi tok.

¹⁸ Mihma, Ilʋppak o̱ isht oh ʋm ʋlá, achi tok.

¹⁹ Mihmʋt okla laua yʋt aka hʋshuk ai om binohla chi̱ ka apesa tok; mihmʋt pʋska tahlapi cha nʋni tuklo aiena kash o̱ ishi cha, ʋba pit ʋba‐chakali mʋt, ai okpʋchi cha tushahlichit, pʋska yash o̱ nan im ai ithʋna ʋhleha ha̱ ima na nan im ai ithʋna ʋhleha hash osh okla laua ya̱ pit ipeta tok.

²⁰ Mihma okla momʋt impʋt kaiya tok; mihma boshulli atampʋt a̱sha ka kishi alota auah‐tuklo ho̱ okla ishi tok.

²¹ Yohmi ka okla impa tuk ʋt, ohoyo ʋlla aiena kʋto a̱sha ho̱, hatak tahlepa sipokni tahlapi foka tok.

²² Yohmi ma mih mak inli ho̱ Chisʋs ʋt ilapʋt okla laua ya̱ tishelichi ta̱klakma, nan im ai ithʋna ʋhleha hʋt peni pit abeha cha, ti̱kba misha tʋnnʋp a̱ ilhkola chi̱ ka i̱ miha tok.

²³ Micha okla laua yash tishelichit tahli mʋt, ʋba pit anumpula chi̱ hosh ilap illʋt nʋnih chaha yo̱ pit oiya tok: atuk osh opiʋt taha ma ilap bano hosh yʋmma anta tok.

²⁴ Amba peni ʋto okhʋta iklʋnna ya̱, mahli ak osh a sanali hatuk o̱, oka banʋtha ka takakanlit a̱ya tok.

²⁵ Atuk o̱ ninak isht ʋlhpisa ont isht ai ushtak fehna, Chisʋs ʋt okhʋta ha̱ a nowʋt a̱yʋt im ona tok.

²⁶ Mihma okhʋta a noho̱wʋt a̱ya na nan im ai ithʋna ʋhleha hʋt pit pisʋt, komunta mʋt, Shilup oke, achi tok; mihmʋt nukshopa cha, tahpʋla tok.

²⁷ Yohmi kia Chisʋs ash osh ashali̱nka pit im anumpulit, Hʋchi nuktanla achukmashke; ʋno ash sia hoke; ik hʋchi nukshopo kashke, achi tok.

²⁸ Mihma Pita yʋt afalaminchi mʋt, Chitokaka ma! chishno ash chia hokmʋt, oka ya̱ a nowʋt ma̱yʋt chim ona la hi a̱ is sa̱ mihashke, im achi tok.

²⁹ Mihma, Mintí, achi tok. Yohmi ma Pita yʋt peni ash pit akowa mʋt, oka ya̱ a nowʋt Chisʋs a̱ im ia tok.

³⁰ Yohmi tuk kia mahli hʋt kʋllo fehna ho̱ pisa mʋt, nukshopa tok; micha oka kʋniʋt ishtia mʋt, tahpʋlʋt, Chitokaka ma! si okchalinchí, achi tok.

³¹ Yohmi ma Chisʋs ʋt ashali̱ka ibbak a̱ pit welit halʋlli mʋt, Na yimmi fehna keyu chia ma! nanta katiohmi ho̱ chi anuktuklo tuk oh cho! im achi tok.

³² Atuk o̱ peni a̱ ant ʋlhto ma, mahli hʋt yokopa tok.

³³ Yohmi ma peni anu̱kaka ma̱ya tuk ash osh yʋmmak oka ant aiokpahanchi mʋt, Chishno ak osh Chihowa Ushi a̱ chia ho̱ mʋhlishke, achi tok.

³⁴ Atuk o̱ yʋmmak ash o̱ hlopulli mʋt, Kenesalet yakni o̱ okla ona tok.

³⁵ Yohmi ma hatak yʋmma a̱sha tuk ʋt yʋmmak ash o̱ akostininchi mʋt, inla tohnot yakni yʋmma fullota ka mominchit pit tihleli na abeka yatuk ʋt momʋt ai im ona tok.

³⁶ Mihma im anchi aposhokʋchi ak illa kia okla potola hinla ka im asilhha tok; yohmi ma laua kʋt kaniohmi hosh potoli tuk okʋt hlakofi aia̱hli tok.