Mahlu 13 - Chahta Holisso Holitopa 1886

Na hokchi nan isht ʋlhpisa; mikma nana a kaniohmi kak o̱ Chisʋs ʋt nan isht ʋlhpisa ho̱ isht ithʋnanchi, 1, 18 Na hokchi nan isht ʋlhpisa ho̱ otʋnichi; 24 onush micha haiyukpulo ita tuklo ka isht ʋlhpisa, 31 mʋstʋt nihi; 33 micha nan isht shatʋmmichi ita tuklo ka nan isht ʋlhpisa: micha na kaniohmi ho̱ Chisʋs ʋt nan isht ʋlhpisa bano ho̱ isht anumpohonli. 36 Onush micha haiyu̱kpulo ita tuklo nan‐isht ʋlhpisa ho̱ otʋnichi; 44 na holitopa luma kʋt ituyula, 45 micha nan chumpa, 47 mikmʋt nʋni isht hokli aiena ka nan isht ʋlhpisa; 53 Chisʋs ʋt falamʋt i̱ yakni ak inli ho̱ ona tuk o̱, okla hʋt kanimanchi.

¹ Mihmʋt Chisʋs ʋt nitak yʋmmak inli ka aboha ya̱ a kohchʋt ia mʋt, okhʋta lapalika yo̱ ont binili tok.

² Yohmi ma okla laua fehna kʋt ant im ai itahoba, yohmi ma peni yo̱ pit chukowa cha binili tok; mihma okla laua yash osh momʋt oka ʋhli ha̱ hiohma̱ya tok.

³ Mihma nana laua ka nan isht apesa hosh isht im anumpohonli mʋt, Inta! na hokchi ʋt na hokchit ia tok.

⁴ Atuk osh hokchi ma, na nihi kanimi kʋt hina lapalika yo̱ kaha tok; atuk o̱ hushi puta kʋt ant ʋpʋt tahli tok.

⁵ Kanimi kʋt tʋli foka yakni a̱sha fehna keyu ho̱ kaha tok; atuk osh yakni ʋt i̱ suko keyu hatuk okʋt, chekosi fehna offo tok;

⁶ Atuk o̱ hʋshi ʋt kohcha ma, anakshua tok; yohmi kʋt hakshish ʋt ik im iksho hatuk okʋt, bʋshit taha tok.

⁷ Yohmi ma kanimi kʋt kʋti foka yo̱ kaha tok; atuk o̱ kʋti ʋt offo mʋt, olʋbbit ishi tok.

⁸ Amba inla ka yʋt o yakni achukma ho̱ kaha: yohmi tuk mʋt achʋfa tuk kia kanimi kʋt tahlepa achʋfa; kanimi kʋt pokoli hanali; kanimi kʋt pokoli tuchina aiena ho̱ ʋnit waya tok oke.

⁹ Kʋna hosh isht haponakla he haksobish ʋt i̱ hinlikmʋt, haklashke, achi tok.

¹⁰ Mihma nan im ai ithʋna ʋhleha hʋt im ai ona mʋt, Nanta katiohmi ho̱ nan isht ʋlhpisa ho̱ isht ish im anumpuli cho? im achi tok.

¹¹ Mihma afalaminchi mʋt, Hʋchishno yokʋto nan ik otano ʋba apehlichika ahala̱ya puta ka hʋsh ithana hi okʋt hʋchim ʋlhpisa ha tok; amba yʋmmak okʋto im ʋlhpisa keyu hoka.

¹² Kʋna hosh i̱shikma, mihi yo̱ ima he; mikma in laua kʋt i̱ shahla hi oke: amba kʋna hosh i̱shi keyuk mʋno, i̱shi tuk ash kia im ai isha hi oka.

¹³ Okla pihi̱sa hokak osh, pisa keyu; mikmʋt haha̱klo hokak osh, haklo keyu; micha akostininchi keyu aiena hatuk; yohmi kak o̱ nan isht ʋlhpisa ho̱ isht im anumpuli li hoke.

¹⁴ Mihma Esaias ʋt nana tikbanli anoli kʋt, Haha̱klo hokʋno hʋsh haklo kia, hʋch ik akostinincho ka he: mikmʋt pihi̱sa hokʋno hʋsh pisa kia, hʋch ik ithano ka he

¹⁵ Okla ilʋppa chu̱kʋsh atuk mʋt niʋt taiyaha, mihma haksobish a̱ isht haponaha̱klo kʋt in takobi mʋt, nishkin atuk ma okla okhishtʋshke; yʋmmak keyukmʋt nitak kaniohmi kia nishkin atuk ma isht pisʋt, haksobish a̱ isht haklo cha, chu̱kʋsh ma isht akostininchit ilekostininchi na hlakofichi la hinla kak o̱, yohmi achi tok a̱ okla ilʋppak o̱ ont isht aia̱hli hoke.

¹⁶ Amba hʋchi nishkin okʋto pi̱sa; mikma hʋchi haksobish atuk mʋt ha̱klo aiena hokʋt na yukpʋshke.

¹⁷ A̱hli mak o̱ hʋchi̱ miha lishke, Hopaii yʋt la̱wa, micha hatak hochukma aiena kʋt nana hʋsh pi̱sa ka pisa bʋnna tok kia, okla ik peso tok; micha nana hʋsh ha̱klo ka haklo bʋnna tok kia, ik haklo tok oke, achi tok.

¹⁸ Yohmi hoka na hokchi isht ʋlhpisa hatuk ma hʋsh haklashke.

¹⁹ Kʋna kia apehlichika isht anumpa ha̱ haklo cha, ik akostinincho, yohmik ma nan okpulo yosh ʋlʋt, chu̱kʋsh anu̱kaka nana im a holokchi tuk ash yichiffit ishit kanchi chatuk. Ilʋppak osh hina lapalika yo̱ na nihi ai ishi tok mak oke.

²⁰ Amba tʋli foka yo̱ na nihi ai ishi tok okʋto ʋba anumpa ha̱ haklo mʋt, na yukpʋt ashali̱ka ishi kak oke.

²¹ Yohmi kia hakshish ʋt im a toba keyu hatuk osh, imoma na hopaki keyu chatuk; ʋba anumpa pulla hatuk mak o̱ isht issikkopali, micha isht hofahyali aienakma, chekosi mak inli ho̱ ibetʋbli chatuk.

²² Mikma kʋti foka yo̱ na nihi ai ishi kak kia ʋbanumpa ha̱ haklo kak oke; yohmi tuk o̱ yakni ilʋppak inli nana ai anushkunna, micha nan in laua bʋnna kʋt isht ashʋchi aiena kʋt ʋbanumpa hatuk ma ai olʋbbit ishi na ik ʋno toba kak oke.

²³ Amba yakni achukma yo̱ na nihi ai ishi ʋto ʋbanumpa ha̱ haklo mʋt, akostininchi kak oke: micha yʋmmak ash osh ʋnikmʋt, achʋfa tuk kia kanimi kʋt tahlepa achʋfa, kanimi kʋt pokoli hannali, kanimi kʋt pokoli tuchina, yohmi hosh isht waya hoke, achi tok.

²⁴ Mihmʋt nan‐isht ʋlhpisa inla yo̱ in takalichit yak ahanchi mʋt, Ʋba apehlichi ka yʋt hatak osh im osapa ya̱ na nihi achukma ho̱ hokchi tok a̱ holba hoke.

²⁵ Yohmi tuk kia hatak puta kʋt nusi hosh ma̱ya ta̱kla ma, in tʋnʋp ʋt ʋla cha, onush ash haiyu̱kpulo yo̱ ant a hokchichi cha, kʋnia tok.

²⁶ Yohmi tuk o̱ offot ʋpi toba cha, waya ma, haiyu̱kpulo ak kia otʋni tok.

²⁷ Yohmi ma chuka‐chʋfa pehlichi in tishu ʋhleha hash osh ona cha, Pi̱ shahli ma! na nihi achukma yo̱ chim osapa ya̱ ish a hokchi tok keyu ho̱? katiohmi ho̱ anonti haiyu̱kpulo ʋt a̱sha cho? im achi tok.

²⁸ Mihma, Tʋnʋp osh ilʋppa yʋmihchi tok, im achi ma; tishu ʋhleha hash osh, Yohmi ka iʋt yʋmmak atuk ma ont aioʋt il itahoba hi a̱, ish ahni cho? im achi tok.

²⁹ Yohmi kia yʋmmak ash osh, Keyu; yʋmmak keyukma haiyu̱kpulo a̱ aioʋt hʋsh itahobi takla kʋt, onush a̱ aieninchit hʋsh lobba hinla hoke.

³⁰ Itapi̱hʋt hiohma̱yʋt abʋsha onashke: atuk o̱ abʋsha onak mak o̱ na‐bʋshli ʋhleha ha̱, Haiyu̱kpulo ak o̱ ti̱kba aioʋt itahobit hʋsh sitohli cha, hʋsh hukmashke; yohmikmʋt onush ak okʋno a̱ kanchak ak o̱ pit hʋsh ai itahobashke, im achi lashke, achi tok.

³¹ Nan‐isht ʋlhpisa inla yo̱ in takalichi mʋt, Ʋba apehlichika yʋt mʋstʋt nihi achʋfa ho̱ hatak ʋt ishi cha, im osapa ya̱ hokchi tok a̱ holba;

³² Yʋmmak okʋt iskitini kʋt na nihi moma ka ik lauwo ho mʋhli; yohmi kia offot hofantikmʋt, haiyu̱kpulo puta ka moma imaiya cha, iti o̱ toba; yohmi na ʋba hushi puta kʋt naksish atuk ma ant a binohli chatuk oke, achi tok.

³³ Anonti nan isht ʋlhpisa inla yo̱ isht im anumpuli mʋt, Ʋba apehlichika yʋt pʋska shatʋmmichi yo̱ ohoyo hʋt ishi cha, tanchi pushi ʋlhpisa tuchina ho̱ ibafohki tuk o̱, momʋt shatʋmmi tuk a̱, holba hoke, achi tok.

³⁴ Ilʋppa puta ka nan isht ʋlhpisa bano ho̱ Chisʋs ʋt okla laua yatuk ma isht im anumpohonli tok.

³⁵ Hopaii ʋt anumpuli mʋt, Nan‐isht ʋlhpisa ho̱ sʋtih ha̱ isht anumpohonli lashke; yakni toba tok taiyakla ka na luma a̱sha chatuk puta ka anohonli lashke, achi tok a̱ ont aia̱hla̱ chi̱ ka, nan‐isht ʋlhpisa ho̱ keyukma im anumpuli tok keyushke.

³⁶ Yohmi mʋt Chisʋs ʋt okla laua ya̱ kanompit tihleli mʋt, aboha ont chukowa tok; mihma nan im ai ithʋna ʋhleha hʋt im ai ona mʋt, Haiyu̱kpulo osapa anu̱ka a̱sha tok nan‐isht ʋlhpisa ka achukmalit ish pim anolashke.

³⁷ Mihma afalaminchi mʋt, Na nihi achukma yo̱ hokchi kʋt Hatak Ushi ak oke.

³⁸ Osapa ʋt yakni moma kak oke: nihi achukma yʋt ʋba apehlichika im ʋlla ak oke; amba haiyu̱kpulo ʋto nan okpulo im ʋlla ak oke.

³⁹ Tʋnʋp ʋt yʋmma hokchi tok ʋt Setan ak oke: abʋsha ona kʋt yakni ont im ishtaiyopi kak a he; mikma na bʋshli ʋhleha hʋt enchil ʋhleha ak oke.

⁴⁰ Yohmi ka haiyu̱kpulo yʋt itahoba cha, luak isht hollokmi chatuk a̱, yakni ilʋppʋt ont im ishtaiyopikmʋt, yʋm mak inli ho̱ chiyuhma hi oke.

⁴¹ Hatak Ushi ʋt im enchil ʋhleha ha̱ atoho̱nokma, na yoshubi, micha nan ik ʋlhpeso yohmi ʋhleha aiena ka mominchit im apehlichika atuk ma ai ishit kocha wela he;

⁴² Mikmʋt yʋmmak atuk ma tʋli a bila luak chinto ho̱ pit ai ashacha he: yohmikma yaiya micha noti ahampa aiena hosh yʋmmak oka aiasha hi oke.

⁴³ Yohmikma hopoyuksa ʋhleha hokʋt shohpakali kʋt, hʋshi ak o̱ chiyuhmi hosh I̱ki im apehlichika atuk ma aiasha hi oke. Kʋna hosh isht haponakla he haksobish ʋt i̱ hinlikmʋt, haklashke.

⁴⁴ Anonti, Ʋba apehlichika yʋt na holitompa luma hosh osapa anu̱ka itonla tuk o̱, hatak ʋt yʋmmak ash o̱ ahayuchi cha, luhmi mʋt, na yukpa fehna hatuk osh ia mʋt, nana im a̱sha tuk ʋt mominchit kanchi cha, osapa yʋmmak ash o̱ chumpa kak o̱ chohmi hoke.

^45-46 Anonti, Ʋba apehlichika yʋt hatak nan chumpa yosh tʋli holitompa hochukma hoyot ahanta; yohmi tuk osh tʋli holitompa achʋfa kʋt ʋlhtoba chinto ahayuchi mʋt, iʋt nana im a̱sha tuk ʋt mominchit ont kanchi cha, chumpa kak o̱ chohmi hoke.

⁴⁷ Anonti, Ʋba apehlichika yʋt nʋni‐isht hokli yo̱ okhʋta okʋchi na ilaiyuka puta pehli;

⁴⁸ Atuk o̱ alota ma, okla halʋllit oka ʋhli isht ona mʋt, aka binohli cha, hochu̱kma ka aioʋt nan aiʋlbeha pit apitta mʋt, amba okpulo yʋno kampila kak o̱ chohmi hoke.

⁴⁹ Yakni ʋt ont im ishtaiyopikma yʋmmak inli ho̱ chiyuhma he; enchil ʋhleha hʋt kohchʋt a̱yakmʋt, hatak haksi ʋhleha hʋt hopoyuksa ʋhleha ha̱ ibʋlhto tuk a̱ filamohlicha he:

⁵⁰ Mikmʋt yʋmmak ash o̱ tʋli a bila luak chito ka pit ito‐ashacha he; yohmikma yaha̱ya, micha noti ahampa aiena hosh yʋmmak oka aiasha hi oke, im achi tok.

⁵¹ Mihmʋt Chisʋs ash osh, Ilʋppa puta ka mominchit hʋsh akostininchi cho? im achi ma, Yau, Chitokaka ma! okla im achi tok.

⁵² Yohmi ma, Na holissochi aiyuka ʋba apehlichika isht im ʋlbʋchi kʋt, hatak chuka‐chʋfa pehlichi yosh nan im aiasha ya̱ nana kʋt himona, micha hopaki aiena ho̱ ai ishit kohchi ka chomi hoke, im achi tok.

⁵³ Atuk o̱ yakohmi tok; Chisʋs ʋt nan isht ʋlhpisa ilʋppa puta ka ont taiyali mʋt, kohchʋt ia tok.

⁵⁴ Atuk osh ilap i̱ yakni ak inli ka ʋla mʋt, i̱ sinakak a̱ nan ai im abahanchi; yohmi ma okla nukhlakancha mʋt, Hatak ilʋppʋt nan ithana, micha na fehna aiena ka yʋmihchi kʋt, katimak o̱ ai im ʋlhtaha tok oh cho?

⁵⁵ Ilʋppʋt chuka ikbi ya̱ ushi keyu̱? ishki ʋt Meli hohchifo keyu̱? mikma itibapishi ʋhleha mʋt Chemis, micha Choses, mikmʋt Saimon micha Chutas aiena kak keyu̱?

⁵⁶ Mihma in tek ʋhleha hʋt momʋt hʋpi ta̱kla ma̱ya keyu̱? Yohmi ka hatak ilʋppʋt katimak o̱ nan ilʋppa moma ka ai im ʋlhtaha tok oh cho? achi tok.

⁵⁷ Mihmʋt yʋmmak ash o̱ okla isht ai ibetʋbli tok. Yohmi kia Chisʋs ʋt, Hopaii ʋt ik holitopo keyu hosh ahanta kia, ilap i̱ yakni ak inli, micha ilap in chuka kak illa hoh chatuk oke, im achi tok.

⁵⁸ Yohmi mʋt okla nan ik i̱ yimmo hatuk mak o̱ yʋmmak atuk ma na fehna ka lauachit a yʋmihchi tok keyushke.