Mahlu 12 - Chahta Holisso Holitopa 1886

Nan im ai ithʋna ʋhleha hash osh nitak hullo yo̱ onush a̱ hlehlit ʋpa tuk a, ʋlhpesa, Chisʋs ʋt im ahni, 1, 9 Chisʋs ʋt ibbak bʋshi yatuk a̱ achukmali tuk o̱, Falisi̱ ʋhleha hʋt ʋbi bʋnna. 22 Shilombish okpulo ai i̱ fo̱ka tuk a̱ Chisʋs ʋt hlakofichi; 31 mihmʋt Shilombish Holitopa ya̱ ik ahobalot anumpuli kʋt i̱ kashofa he keyu miha. 38 Falasi ʋhleha hʋt Klaist a̱ nan‐isht‐atokowa im a hoyo. 46 Kʋna hosh Klaist a i̱ kanomi hoka isht annoa.

¹ Nitak yʋmma foka ma Chisʋs ʋt nitak hullo nitak o̱ osapa hlopullit a̱ya ma, nan im ai ithʋna ʋhleha hʋt hohchʋfo hatuk osh, onush a̱ hlehli cha, ʋpʋt ishtia tok.

² Yohmi kia Falisi ʋhleha hʋt pisa mʋt, Yakeh! nana ka nitak hullo nitak a̱ a yohma he ʋlhpesa keyu ka, na chim ai ithʋna ʋhleha hʋt yohmishke, im achi tok.

³ Yohmi kia yʋmmak ash osh, Lewi micha apehʋt a̱ya tok aiena kʋt hohchʋfo mʋt, kaniohmi tok,

⁴ Chihowa im aboha hatuk a̱ ont chukowa cha, pʋska otʋni yʋmmak oka ilap ʋt, micha apehʋt a̱ya tok aiena kʋt ʋpa he ai im ʋlhpesa keyu, amba naholitompa isht a̱sha ak illa hatuk a̱ ʋpa tok a̱, holisso ha̱ hʋch ik ai it im anumpulo chatuk oh cho?

⁵ Yʋmmak keyukmʋt na‐holitompa isht a̱sha ʋhleha hʋt nitak hullo nitak puta ma tempel anu̱kaka ya̱ nitak hullo a̱ kobaha̱fi kʋt ashʋchi ha tok keyu ka ʋba nan ʋlhpisa holisso ha̱ hʋch ik ai it im anumpulo chatuk oh cho?

⁶ Yohmi kia, Achʋfa hosh tempel a̱ imaiya kʋt ilʋppa anta hoke, hʋchim achi lishke.

⁷ Yohmi kia, Ʋba isht‐aiokpʋchi ya̱ ak ahnincho, amba nan i̱ nukha̱klo ak o̱ ai okpanchi li hoke, achi ilʋppak osh nana ho̱ miha hatuk a̱ hʋsh akostininchi hatuk okmʋt, ashʋchi keyu ka anumpa hʋsh onocha he tuk keyu chishke.

⁸ Hatak Ushi yʋt nitak hullo ak kia in Chitokaka ak inli hoka, im achi tok.

⁹ Micha yʋmmak ash ʋttʋt ia mʋt, yʋmma i̱ sinakak ak o̱ ont chukowa tok.

¹⁰ Yohmi ma hatak ʋt ibbak shulla yosh a̱sha tok. Yohmi ma ilʋppak ash o̱ nan ʋlhpisa onocha chi̱ hosh okla im ponaklot, Nitak hullo nitak a̱ na hlakoficha he ʋlhpesa cho? achi tok.

¹¹ Yohmi ma yʋmmak ash osh, Hatak hʋchi katima kak osh chukfʋlhpoba yʋt achʋfa hosh im anta tuk ʋt, nitak hullo nitak o̱ yakni kula pit itula ka, pit halʋllit ik kohcho ka hinla cho?

¹² Yohmi ka hatak ʋt holitopa kʋt chukfʋlhpoba ya̱ katiohmi ho̱ isht i̱ shahli ho̱? Yohmi hoka nitak hullo nitak a̱ nana achukma ka yohma he ʋlhpesa hoke, im achi tok.

¹³ Yohmi mʋt hatak ash o̱, Chibbak a̱ chisemochi, im achi tok. Mihma chisemochi tok: yohmi ma falamʋt achukmʋt taha mʋt, in tʋnnʋp akinli ho̱ chohmi tok.

¹⁴ Yohmi ma Falisi ʋhleha hʋt kocha wiha mʋt, kanimihchit ʋba he ʋt isht it im anumpulit ma̱ya tok.

¹⁵ Yohmi kia Chisʋs ʋt ilʋppa akostininchi mʋt, yʋmmak ash a kohchʋt kʋnia tok: mihma okla chito hʋt iakaiya ma, yʋmmak ash o̱ mominchit hlakofichi tok.

¹⁶ Yohmi mʋt ilap a̱ okla ik otʋnincho ka hi a̱ kʋllochit i̱ miha tok.

^17-18 Yohmi ma, hopaii Esaias ʋt anumpohonli mʋt, An tishu hano ai atokoli li tuk o̱ holitopa, sa shilombish ʋt isht ai yukpa fehna ka ho pesá: ilʋppak o̱ ʋmi Shilombish o̱ onochi likma, yʋmmak osh Chentail okla ha̱ ʋba nan ʋlhpisa ya̱ im otʋnicha hi oke.

¹⁹ Yʋmmak okʋt ik it im, paknokmʋt, anonti ik tahpʋlo ka he; mikma tʋmaha ai itahoba puta ka im anumpa ha̱ hatak nana kia a haiyakla he a̱ keyu ka he.

²⁰ Ku̱shak kushkoa kia ik tilohlecho ka he, mikmʋt pʋla i̱ honnula lua shobulli ka ik mosholicho hosh, ʋba nan ʋlhpisa ya̱ fihi̱mit isht imaiyacha he.

²¹ Yohmikma Chentail ʋhleha hʋt yʋmma hohchifo ho̱ anukchieta he, achi tok a̱ ont ai aia̱hli tok mak oke.

²² Yʋmma foka ma achʋfa hosh nan‐isht ahullo okpulo ai i̱ fo̱ka hosh lʋpa, micha ik anumpolo aiena ho̱ isht im ʋla tok: yohmi ma yʋmmak ash o̱ hlakofichi na lʋpa micha ik anumpolo aiena tuk ʋt anumpuli, micha pi̱sa aiena tok.

²³ Mihma okla hʋt momʋt nukhlakancha mʋt, Ilʋppʋt Lewi ushi ash keyu ho̱? achi tok.

²⁴ Yohmi kia Falisi ʋhleha hʋt haklo mʋt, Hatak ilʋppʋt nan‐isht‐ahullo okpulo a kocha weli ho̱ keyu, amba nan‐ishtahullo okpulo i̱ mi̱ko Beelsebʋb ak o̱ ishit kohchi hoke, achi tok.

²⁵ Mihma okla im anukfila ha̱ Chisʋs ʋt akostininchi hatuk osh, Apehlichika puta kʋt it a kashapʋt ilap bi̱ka it i̱ sanali hokʋt, ont ai okpulo kʋt taha chatuk: anonti tʋmaha chito, keyukmʋt chuka puta kʋt it a kashapʋt ilap bi̱ka it i̱ sanali hokʋt, talaia he keyu hoke.

²⁶ Yohmi hoka Setan osh Setan a̱ kohchi hokmʋt, ilap o inli il i̱ sanali hoke; yohmi ka katiohmi hosh im apehlichika yʋt talaia hinla cho?

²⁷ Micha ʋno ʋt Beelsebʋb ak o̱ nan‐isht‐ahullo okpulo a̱ ishit kocha weli li hokma, kʋta hak o̱ hʋchim ʋlla ʋt yʋmma ishit kocha weli chatuk oh cho? yohmi hoka yʋmmak osh na hʋchim apesa yashke.

²⁸ Amba ʋno yʋt nan‐isht‐ahullo okpulo a̱ Chihowa imi Shilombish o̱ ishit kocha weli li hokma, yohmi hokmʋno Chihowa apehlichika yʋt hʋchim ʋla mak oke.

²⁹ Keyukmʋt katiohmi hosh achʋfa kʋt hatak hlampko in chuka ya̱ ont chukowa cha, im ilayak a̱ wehpula hinla? hatak hlampko ak o̱ ti̱kba takchi ha yo̱ keyukmʋt; amba yʋmmak okmʋto in chuka ya̱ wehpula hinla hoke.

³⁰ Kʋna hosh ʋno a̱ sʋbafohka keyu kʋt, a̱ sanali hoke; mikma kʋna hosh sʋba hoyo keyukmʋt, na fimmi yoke.

³¹ Yohmi hoka, Hatak ʋt nan im ai ashʋchika il aiyuka moma, micha Chihowa ik ahobalot anumpuli moma kʋt i̱ kashofa he; amba Shilombish Holitopa yo̱ ik ahobalot anumpuli tuk okʋto hatak ʋt ik i̱ kashofo ka hi oke.

³² Micha kʋna hosh Hatak Ushi ak o̱ na mihachit anumpuli tuk okʋto i̱ kashofa he: amba Shilombish Holitopa ak o̱ na mihachit anumpuli tuk okʋto yakni ilʋppak inli, micha yakni inla mihinti aiena ka ai i̱ kashofa he keyu hoke.

³³ Iti ʋt achukma ho̱ hʋsh ikbi hokma, ʋni ak kia achukma he: keyukmʋt iti ʋt okpulo yo̱ hʋsh ikbi hokma, ʋni ak kia okpula he: iti ʋt ilap ʋni ak inli ho̱ isht otʋni chatuk oka.

³⁴ Sinti chilita isht‐ai‐unchululi hʋchia ma! ai ʋlhpiesa keyu hʋchia kʋt, katiohmi hosh nana achukma puta ka hʋsh anumpula hinla cho? chu̱kʋsh a̱ alotowak mak o̱, itih hʋt kohchit miha chatuk oka.

³⁵ Chu̱kʋsh anu̱kaka ya̱ na holitopa kʋt a̱sha kak o̱, hatak achukma kʋt nana achukma puta ka a yʋmohmi chatuk: mikma chu̱kʋsh anu̱kaka ya̱ nana ik achukmo kʋt a̱sha kak o̱, hatak ik ʋlhpeso kʋt nana ik achukmo puta ka a yʋmohmi chatuk oke.

³⁶ Yohmi kia anumpa ik ʋlhpeso puta hatak ʋt anumpuli tuk okmʋt, nan ʋlhpisa nitak okʋno yʋmmak atuk a̱ nan isht il anola hi oke, hʋchim achi lishke.

³⁷ Chishno chim anumpa atuk ak o̱ isht chi ai ʋlhpiesa he: mikmʋt chishno chim anumpa atuk ak o̱ nan isht chim ʋlhpisa hi oke,

³⁸ Yʋmma foka ma na holissochi ʋhleha kaniohmi, micha Falisi ʋhleha aiena kʋt anumpuli mʋt, Nan ithʋnanchi ma! nan‐isht‐atokowa e chi̱ pisa hinlʋshke, achi tok.

³⁹ Yohmi kia afalaminchi mʋt, Nan ik ʋlhpieso, micha haui aiena okla hash osh nan‐isht atokowa ya̱ okla hoyo: yohmi kia nan‐isht‐atokowa nana hosh in takala he keyu, amba hopaii Chonas nan‐isht‐im atokowa ak illa hi oke.

⁴⁰ Chonas ʋt nitak tuchina micha ninak tuchina aiena ho̱ nʋni chito ikfoka anu̱kaka ya̱ fo̱ka tok a̱; yʋmmak inli ho̱ chohmit Hatak Ushi ʋt nitak tuchina micha ninak tuchina aiena ho̱ yakni chu̱kʋsh anu̱kaka yatuk ma foyuka hi oke.

⁴¹ Nana ʋlhpisa chinto nitak okʋno Ninefeh hatak ʋt okla ilʋppa ai api̱hʋt hieli cha, anumpa onocha hi oke; yʋmmak okʋt Chonas ʋt ʋbanumpa isht anumpohonli ma, okla ilekostininchi tok okʋt; atuk o̱ Chonas a̱ imaiya mak osh ilʋppa ahantʋshke.

⁴² Nana ʋlhpisa chinto nitak okʋno oka mahli ohoyo mi̱ko ʋt okla ilʋppa awant hikia cha, anumpa onocha hi oke: yʋmmak okʋt yakni ont ai ʋhli pilla minti kʋt Solomon isht im a hopoyuksaka ya̱ haklot a̱ya tok okʋt: yohmi tok o̱ himak a̱ Solomon a̱ imaiya mak osh ilʋppa ahantʋshke.

⁴³ Shilombish okpulo yʋt hatak a̱ akohchakmʋt, afoha he hoyo kʋt oka ik ai iksho puta ka hlopullit a̱ya kia, ik ahayucho chatuk;

⁴⁴ Yohmikmʋt, An chuka ai ʋtta kohchʋt a minti li kash osh falamʋt ia lashke; achi tuk osh onakmʋt, yʋmmak ash kʋna iksho ho̱, pa̱shpoʋt, shemʋt taiyaha cha hikia ho̱, ont pisa hoke.

⁴⁵ Yohmikmʋt shilombish okpulo untuklo inla yʋt ilap a i̱ shahli ho̱ iʋt ont pehlichit ʋla ma, yʋmmak ash okla pit abeha cha ai asha chatuk; yohmikma hatak yʋmmʋt ont ishtaiyopi kak o̱ okpulo kʋt ʋmmona tuk a̱ i̱ shahli chatuk oke. Yohmi ka yʋmmak inli ho̱ okla nan ik ʋlhpeso ilʋppʋt chiyuhma chi̱ hoke.

⁴⁶ Okla ha̱ im anumpuli kʋt moma ho̱, ishki micha itibapishi ʋhleha aiena kʋt it im anumpuli bʋnna hosh kocha ya̱ hinli tok.

⁴⁷ Yohmi ma achʋfʋt, Yakeh! chishki micha ish itibapishi ʋlheha aiena kʋt chit im anumpuli bʋnna hosh kocha ya̱ hiohma̱yʋshke, im achi tok.

⁴⁸ Yohmi kia afalaminchi mʋt, nan im anoli yash o̱, Hʋshki ak osh kʋta ho̱? mikma itibapishi li ʋhleha ak osh kʋta hoh cho? im achi tok.

⁴⁹ Mihmʋt nan im aiithʋna ʋhleha aiasha ka imma yo̱ ibbak a̱ pit weli mʋt, Hʋshki, micha itibapishi li ʋhleha ha̱ pisá;

⁵⁰ Kʋna hosh A̱ki ʋba binili nan aiahni ka yʋmohmikmʋt, yʋmmak osh itibapishi li, micha an tek, mikmʋt hʋshki aiena mak oke, achi tok.