Mahlu 11 - Chahta Holisso Holitopa 1886

Chisʋs ʋt ʋba isht anumpohonli kʋt a moma; Chan a̱ pit ponaklo tuk a̱ Chisʋs ʋt afalaminchit im anoli, 1, 7 micha, Chan Baptist a̱ aia̱hlit isht anumpuli. 20 Chisʋs ʋt tʋmaha kanimi ka na palʋm mi kʋt onʋtula chi̱ ka anoli, yʋmmak oka na fehna laua ka ai yʋmihinchi tuk kia, okla ik ile kostinincho hoka. 25 Chisʋs ʋt Chiho wa pit aiokpʋchi mʋt, I̱ki ʋt nan oklu̱ha ka ibbak i̱foyuki tuk a̱ achi: 28 mikmʋt a foha chi̱ kʋt hoyʋbli puta kʋt im ai ona chi̱ ka i̱ miha.

¹ Atuk o̱ yakohmi tok; Chisʋs ʋt nan im ai ithʋna auah tuklo kash nan im apesʋt in taiyaha mʋt, in tʋmaha puta ka nan ai ithʋnanchi, micha ʋba isht anumpuli aiena chi̱ hosh yʋmma ʋttʋt ia tok.

² Atuk o̱ Klaist ʋt nan‐isht‐anta puta ka Chan ʋt aboha kʋllo anu̱kaka ya̱ a haklo mʋt, nan im ai ithʋna ʋhleha tuklo ho̱ pit tihleli tok.

³ Mihmʋt yʋmmak ash o̱, Chishno ak osh a̱ya he tok mak o̱ chia hokmá, ak chu̱? inla yo̱ e hoyokmá, nanta chi̱ cho? pit im achi tok.

⁴ Mihma Chisʋs ʋt a falaminchi mʋt, Anonti hʋsh ia cha nana ka hʋsh ha̱klo, micha hʋsh pi̱sa aiena tuk ʋt Chan a̱ ont hʋsh im anolashke.

⁵ Lʋpa yʋt hopo̱koyo ma, imomokpulo yʋt nowa; leplosi ʋbi okla hʋt i̱ kashofa; mikma ik haponaklo yʋt haponaklo; illi tuk ʋt tani; mihma ilbʋsha puta ka ʋbanumpa hʋt isht im anuhumpʋshke.

⁶ Yohmi ka kʋna hosh ʋno a̱ ik si ai ibetʋblokmʋt, na yukpa he mak oke.

⁷ Mihma itiachi ma, Chisʋs ʋt okla laua ya̱ im anumpulit ishtia mʋt, Chan ak o̱ miha hosh, Nanta ho̱ hʋsh pisa chi̱ hosh yakni haiaka ya̱ hʋsh ilhkoli tok o̱? Ku̱shak ʋt mahli na faiokʋchi kak atuk o̱?

⁸ Amba nanta ho̱ pisʋt hʋsh ilhkoli tok o̱? Hatak nafohka lapushki fohka kak atuk o̱? nafohka lapushki abehkʋ chi hokʋto mi̱ko in chuka puta kak o̱ aiasha hoke.

⁹ Amba nanta ho̱ pisʋt hʋsh ilhkoli tok o̱? Hopaii atuk o̱? a̱hli, yohmi ka hopaii ak kia imaiya hoke, hʋchim achi lishke.

¹⁰ Ʋm anumpeshi ya̱ chi tikba chʋffichi li hoka, mihi vosh chi̱ hina ya̱ tikbanli apoksiacha chi̱ hoke, achit isht holisso tok a̱ ilʋppak osh mih mak oke.

¹¹ A̱hli mak o̱ hʋchim achi lishke, Ohoyo ho̱ a tobʋt aiasha ka itintakla hikia kʋt Chan Baptist a̱ imaiya chatuk keyushke: yohmi nana kia moma ik lauwo hosh ʋba apehlichika ya̱ anta kʋt, yʋmma imaiya hoke.

¹² Yohmi ma Chan Baptist ʋt ahanta nitak atuk a̱ ai ʋhlit mihinti ka, ʋba apehlichika ya̱ ishi bʋnna kʋt achilita fehna, yohmikma achilita puta kʋt onʋtulʋt ihi̱shi na himakʋshke.

¹³ Hopaii ʋhleha moma micha ʋba nan ʋlhpisa aiena kʋt na tikbanli anoli kʋt, Chan ak o̱ ant im ai ʋhli hoka.

¹⁴ Micha hʋchi yimma hinla hokma, ilʋppak osh ʋla he tok Elias mak oke.

¹⁵ Kʋna hosh isht haponakla he haksobish ʋt i̱ hinlikmʋt, haklashke.

¹⁶ Amba himak okla aiasha ilʋppak okʋno nantak o̱ itapesa la chi̱ cho? Ʋlla yosh ilhpak a kanchi yo̱ binohma̱ya hosh ilap bi̱ka iti̱ howʋt,

¹⁷ Oskula ha̱ e hʋchim olachi ka, hʋch ik hehloshke; e hʋchi̱ yaiya ka, hʋch ik yaiyoshke, achi ho̱ itilauishke.

¹⁸ Chan ʋt ik impo, micha nan ik ishko aiena hosh a̱ya ma, Yʋmma nan‐isht ahullo okpulo il ai eshi hoke, okla achishke.

¹⁹ Hatak Ushi yʋt ihimpa, mikmʋt nan ihi̱shko aienʋt a̱ya ma, Yakeh! hatak isikopa, oka‐pa̱ki ishko shahli, pʋblikan micha nan ashʋchi ʋhleha aiena ka i̱ kana yoke, achishke: yohmi kia Ahopoyuksa yokʋto im ʋlla ʋhleha ha̱ isht im a holitopa hoke, im achi tok.

²⁰ Yohmi mʋt tʋmaha na‐fehna ka a yʋmihinchi fehna tuk puta kash, okla ilekostininchi keyu hatuk o̱, nan isht a mihachit ishtia tok.

²¹ Kolasin ma! na chi̱ palʋmmi mak oke: Betsaita ma! na chi̱ palʋmmi mak oke; na‐fehna puta kʋt hʋchishno ya̱ hʋchim a yʋmohmi tuk ʋt Taia, micha Saiton aiena ka a yʋmohmi ha tok okma, hopaki kash inli ho̱ na pa̱shi tʋnna anchit hituk chubbi banot ma̱yʋt ilekostinincha he a tok oke.

²² Yohmi kia nan ʋlhpisa chinto nitak okʋno Taia micha Saiton aiena kʋt im ahleka hoh kia pit im ʋlhpi̱sa kʋt hʋchishno yokʋno i̱ shahla hi oke, hʋchim achi lishke.

²³ Yohmikma Kapenaʋm chia shutik ak o̱ ont ish talaia tuk ʋt, akiʋt ai okpuloka mak o̱ ish ona hi oke: na‐fehna puta kʋt chishno ya̱ chim a yʋmohmi tuk ʋt Sotom a̱ a yʋmohmi ha tok okma, himak nitak ak kia talaia hi a tok oka.

²⁴ Yohmi kia nan ʋlhpisa nitak okʋno Sotom yakni ʋt im ahleka hoh kia, pit im ʋlhpi̱sa kʋt, chishno yokʋno i̱ shahla hi oke, hʋchim achi lishke, achi tok.

²⁵ Nitak yʋmma fehna ma Chisʋs ʋt anumpuli mʋt, A̱ki, shutik micha yakni aiena in Chitokaka ma! na yakohmi puta ka na kostini, micha nan ithana aiena kʋno ish in luhmi tuk osh, ʋlo̱si puta ho̱ ish im otʋnichi hoka, yak oke, chim aiahni lishke.

²⁶ Ʋlhpesashke, A̱ki ma! yʋmmak osh chim ʋlhpiesa hatuk oka, achi tok.

²⁷ A̱ki ʋt nan oklu̱ha ka sʋbbak fohkishke: yohmi ka Ushi ya̱ hatak nana kia ik ithano ho̱, amba I̱ki ak banoshke; mikma I̱ki a̱ hatak nana kia ik ithano ho̱, Ushi ak illa, micha Ushi ak osh kʋna ho̱ im otʋnichi hok mak bano hoke.

²⁸ Toksʋlit ahantʋt hoyʋbli, micha shapoh i̱ weki puta hʋchia mʋt, momʋt hʋs sʋm ai ʋla na hʋchi fohʋchi lashke.

²⁹ Ʋm ikonla abana yak o̱ isht hʋsh il abanali cha, ʋno ak o̱ hʋs sʋm ai ithʋnashke: ʋno ak osh chu̱kʋsh yohbi, micha chu̱kʋsh akanlosi aiena sia hoka: yohmik mak osh hʋchi shilombish puta a foha hi a̱ hʋsh ahayucha he mak oke.

³⁰ Ʋm ikonla abana ya̱ il abanali ka im ʋlhpiesa, micha a̱ shapoh hʋt shohʋla hoke, im achi tok.