Mahlu 10 - Chahta Holisso Holitopa 1886

Chisʋs ʋt nan im ai ithʋna auah tuklo kʋt ʋbanumpa ha̱ isht anumpohonla chi̱ ka, micha na fehna puta ka ai yʋmohma chi̱ aiena ka kanompit tihleli, 1, 5 Micha nana ka ithʋnanchi. 40 Micha Chisʋs a̱ holitobli kʋt nan isht il ai yukpa he miha.

¹ Yʋmohmi tuk osh nan im ai ithʋna auah tuklo kash o̱ itahobit tahli mʋt, nana im ai a̱hlit, nan‐isht ahullo okpulo puta imaiyʋt, yʋmmak atuk ma kocha welit abeka ilaiyuka puta, micha haknip ik in chukmo ilaiyuka moma hlakoficha hi a̱ im apesa tok.

² Yohmi ka ʋbanumpeshi auah tuklo hohchifo kʋt yakohmi kak oke: ʋmmona Saimon atuk osh Pita hohchifo tok; mihma itibapishi Antilu ak a tok; Sebete ushi, Chemis ak osh, nakfish Chan itatuklo tok:

³ Mihma Filip, micha Bahlolomu; Tamas, mikmʋt pʋblikan hatak Mahlu; Alfeʋs ushi Chemis, micha Lebeʋs osh hohchifo apunta kʋt Tateʋs a tok.

⁴ Mihma Kenan hatak Saimon, micha Chutas Iskaliot ak atuk osh yʋmma haksichi tok ak inli ka aiena tok.

⁵ Auah tuklo ilʋppak o̱ Chisʋs ʋt pit tihleli mʋt, nan im apesʋt, Chentail aiasha pilla hokʋno hʋch ik aiyo kashke, mikmʋt Samalia okla in tʋmaha ha̱ ont hʋch ik chukowo kashke.

⁶ Amba Islael in chuka‐chʋfa chukfʋlhpoba tʋmoa pulla kak o̱ hʋsh im ai onashke.

⁷ Micha ia hosh hʋsh itʋnowa kʋt, ʋba isht anumpohonlit, Ʋba apehlichika yʋt olanlosi ʋlʋshke, hʋsh ahanchashke.

⁸ Mikmʋt abeka ya̱ hlakofichit, leplosi ʋbi puta ka kashofit, illi puta ka tanichit, nan‐isht ahullo okpulo puta ma hʋsh kocha welashke: pilla ho̱ hʋsh habena hatuk okʋt, pilla ho̱ hʋsh imashke.

⁹ Hʋchi̱ shukcha atuk ma tʋli holisso lakna, micha tʋli hʋta, mikmʋt tʋli lakna nana kia fohkit hʋch ik ieshokmʋt;

¹⁰ Anonti nowʋt hʋsh a̱ya hokʋt bahta kia, ilefoka lumbo tuklochit, shulush aiena ma tuklochit, tʋbi nana kia hʋch ik iesho kashke; hatak toksʋli yʋt ilhpita he ak o̱ ʋlhpesa hoka.

¹¹ Micha tʋmaha, keyukmʋt tʋmaha chito yokmá nana ho̱ ont hʋsh chukowa chi̱ kʋt, kʋna hosh ʋlhpesa kʋt yʋmma anta ka, hʋsh ponaklashke; micha yʋmmak o̱ hʋsh a̱sha tuk osh a kohchʋt hʋsh iashke.

¹² Micha chuka yo̱ ont hʋsh chukowakmʋt, hʋsh ai okpʋchashke.

¹³ Yohmikma chuka yatuk mʋt ʋlhpesa hokma, na yukpa he hʋsh im ahni tuk a̱ onʋtulashke: amba ʋlhpesa keyu hokmʋno, na yukpa he hʋsh im ahni tuk a̱ hʋchi̱ falamashke.

¹⁴ Micha kʋna kia ik hʋchi aiokpacho, micha hʋchim anumpa ma haponakla he keyukma, chuka yokmá, tʋmaha hokmá, nana hatuk a̱ hʋsh a kohchakmʋt, hituk tohbi hʋch iyi a̱sha hatuk ma hʋsh tahtulashke.

¹⁵ A̱hli mak o̱ hʋchi̱ miha lishke, Nan‐ʋlhpisa chinto nitak okʋno Sotom, micha Komola aiena kʋt im ahleka hoh kia, pit im ʋlhpi̱sa kʋt tʋmaha yʋmmak a tok a̱ i̱ shahla hi oke.

¹⁶ Inta! chukfʋlhpoba yo̱ chohmichi hosh nashoba itintakla pit tihleli lishke; yohmi hoka kostini kʋt sinti ak o̱ hʋsh chiyuhmi cha, nuktaiyala mʋt pʋchi‐yoshuba ak o̱ hʋsh itilauashke.

¹⁷ Yohmi kia hatak puta ka ahah! hʋsh im ahnashke: yʋmmak okʋt ishit nan apesa ʋhleha ibbak a̱ hʋchi foho̱kikma, i̱ sinakak puta ka a hʋchi fahama he mak oke.

¹⁸ Micha na pehlichi ʋhleha, mikmʋt mi̱ko puta, Chentail okla aiena ka, na hʋsh im ai atokola chi̱ ka, ʋno pulla hatuk mak o̱ yʋmma puta ka itikba hʋch isht oho̱na hi oke.

¹⁹ Yohmi kia hʋch isht oho̱na ka, kanimihchit, micha nana ho̱ hʋsh anumpula he aiena kʋt hʋch ik anukfillo kashke: nana ho̱ hʋsh anumpula hi a̱ hʋshi kanʋlli ʋlhpisa yʋmmak inli ho̱ hʋchi anukfohka hi oka.

²⁰ Hʋchishno ak osh hʋsh anumpula hi o̱ keyu, amba hʋch I̱ki imi Shilombish yʋmmak osh a hʋchi anumpula hi oka.

²¹ Mikma itibapishi hatuk ʋt itibapishi ha̱ illi issakma, anonti i̱ki atuk ʋt ʋlla ya̱ illi issa he: yohmikma ʋlla puta kʋt i̱ki ishki aiena hatuk ma i̱ nukkilli cha, illi issa hi oke.

²² Mikma sa hohchifo pulla hatuk mak o̱ momʋt hʋchi̱ nukkilla he: yohmi kia kʋna hosh achunanchit ma̱ha̱yʋt ai ʋhli ka ona hok mak osh okcha̱ya hi oke.

²³ Yohmi kia tʋmaha chito ilʋppa a hʋch issikko palikma, yihlepʋt inla yo̱ hʋsh onashke. A̱hli mak o̱ hʋchi̱ miha lishke, Islael okla in tʋmaha puta ka hʋch ik hlopullo ki̱sha ho̱, Hatak Ushi yʋt ʋla hi oke.

²⁴ Nan‐ithʋna yʋt nan‐ithʋnanchi ya̱ imaiya keyukma, anonti tishu hʋt i̱ shahli ha̱ imaiya ho̱ keyu chatuk.

²⁵ Nan‐ithʋna yʋt nan‐ithʋnanchi ya̱ itila̱u̱ikma, anonti tishu hʋt i̱ shahli hatuk ma itila̱u̱ikmak osh im ʋlhpesa hoke. Chuka‐chʋfa pehlichika ya̱ Beelsebʋb okla hochifo tuk ʋt in chuka‐chʋfa ya̱ i̱ shahlichi kʋt katiohmichi hosh hochifa hinla cho?

²⁶ Yohmi hoka yʋmmak oka hʋch ik i̱ nukshopo kashke. Nana kʋt ompoholmo tuk osh ik otano ka hi ʋt iksho ma, anonti nana kʋt luma tuk osh ik annowo ka hi ʋt iksho hoka.

²⁷ Nana ka okhlili̱ka yo̱ a hʋchim anoli li ka a tohwikelika yo̱ hʋsh ai anolashke: micha nana ka haksobish tikelichi hosh hʋsh haklo kʋt, yʋmmak ash aboha pakna yo̱ hʋsh ai anolashke.

²⁸ Mikmʋt haknip a̱ ʋbi kia, shilombish a̱ illicha he keyu yʋmmak okʋno hʋch ik i̱ nukshopo kashke: amba shilombish micha haknip it aieninchit aiokpuloka ai ilbʋshala hinla kak pulla ho̱ hʋsh i̱ nukshopashke.

²⁹ Hushi chipunta yʋt tuklokmʋt sint achʋfa iklʋnna itatuklo ʋlhtoba chatuk keyu̱? mikma yʋmmʋt, hʋch I̱ki ʋt ahni keyukma, achʋfona kia aka itula hi o̱ keyu hoke.

³⁰ Amba pa̱shi hʋchi noshkobo o̱ hikia kak kia momʋt holhtinʋt taha yoke.

³¹ Yohmi hoka ik hʋchi nukshopo kashke; holitopa kʋt hushi chipunta laua kia hʋsh i̱ shahli hoke.

³² Yohmi hoka kʋna hosh hatak puta itikba ya̱ si ai ahninchi tuk ma, ʋno ak kia ilapa A̱ki ʋba binili ka itikba ya̱ ai ahninchi la hi oke.

³³ Amba kʋna hosh hatak puta itikba ya̱ ik si ai ahnincho tuk ma, ʋno ak kia ilapa A̱ki ʋba binili ka itikba ya̱ ak ai ahnincho ka hi oke.

³⁴ Yakni pakna ya̱ nanaiya yo̱ bohlit a̱ya li tok ik hʋchim ahobo kashke: nanaiya yo̱ a bohlit a̱ya li tok keyu, amba bʋshpo falaia ak a tok.

³⁵ Hatak a̱ i̱ki ik it im ʋlhpesachot, ushetik a ishki ik it im a ʋlhpesachot, ipok atuk ma ipokni a̱ ik it im ʋlhpesachot a̱ya li ha tok.

³⁶ Mikma hatak in tʋnʋp puta kʋt ilap in chukachʋfa ash inla hi oke.

³⁷ Kʋna hosh i̱ki yokmá, keyukmʋt ishki yokmá, nana ho̱ i̱ hullo kʋt ʋno a̱ im i̱ shahli hokʋt, ʋmmi ha he ʋlhpesa keyu hoke: mikmʋt ushi yokmá, keyukmʋt ushetik okmá, nana ho̱ holitobli kʋt ʋno a̱ im i̱ shahli hokʋt, ʋmmi ha he ʋlhpesa keyu mak inli hoke.

³⁸ Yohmikma kʋna hosh im iti‐taiyukhʋna ya̱ sholi cha, siakaiya keyu hokʋt, ʋmmi ha he ʋlhpesa keyu mak oke.

³⁹ Kʋna hosh im ilhfiopak a̱ ahayuchi tuk mʋt i̱ kʋnia he: mikma kʋna hosh ʋno pulla hatuk mak o̱ im ilhfiopak ʋt i̱ kʋnia hokmʋt, ahayucha he mak oke.

⁴⁰ Kʋna hosh hʋchi aiokpʋchi hokʋt, ʋno a̱ si aiokpʋchikma; anonti kʋna hosh ʋno a̱ si aiokpʋchi kʋt, auet sa kanchi tok ma aiokpʋchi hoke.

⁴¹ Kʋna hosh hopaii ya̱ hopaii atuk mak o̱ aiokpʋchi hokʋt, hopaii im ai ʋlhtoba mak o̱ isha he: yohmikma kʋna hosh hatak a̱hli achukma ka, a̱hli achukma atuk mak o̱, aiokpʋchi hokʋt, hatak a̱hli achukma im ai ʋlhtoba mak o̱ isha hi oke.

⁴² Mihma kʋna hosh chipota ʋhleha ilʋppa achʋfo̱na kia, nan ithʋna yatuk mak o̱ ishka chi̱ ka oka kapʋssa isht‐ishko achʋfa illa ho̱ ipeta kia, yʋmmʋt kaniohmit nan‐ʋlhtoba hʋt i̱ hlakofa he keyu, a̱hli mak o̱ hʋchim achi lishke, achi tok.