Luth 4 - Chahta Holisso Holitopa 1886

¹ Yohmi ma Boas ʋt iʋt holihta okhissa yʋmmak o̱ ont binili tok: mihma yakeh! i̱ kanomi Boas ʋt anoli tuk ash osh ant ia tok; yʋmmak ash o̱, Yakeh! chishno yá; fullotʋt ilʋppa ant binilí, im achi ma, fullotʋt binili tok.

² Yohmi ma tʋmaha holihta yash hatak im asʋnonchi pokoli ho̱ hoyo cha, Ilʋppa ho binohlí, achi ma, okla binohli tok.

³ Mihma i̱ kanomi yash, Naomi, yʋmmʋt Moab yakni kohchʋt falamʋt ʋla kash osh, yakni kashapa pitibapishi Elimelech immi atok a̱, kanchi mak oke.

⁴ Yʋmohmi ho̱ atokolit chim anolit, okla itikba, micha ʋm okla im asʋnonchi ʋhleha itikba a chumpá, achi la he ahni li tuk oke. Falaminchit chumpa lashke, ish ahnikmʋt, falaminchit ish chumpashke; amba falaminchit ish chumpa he keyukmʋt ʋm anolí, yohmi na haklo lashke: falaminchit chumpa inla kʋt iksho, chishno ak illa hoka; mikma ʋno ak osh chiakaiya li hoke, im achi tok. Mihma falaminchit chumpa lashke, achi tok.

⁵ Mihma Boas ʋt, Nitak kaniohmi ho̱ osapa yash Naomi ish in chumpakmʋt, Moab ohoyo Lulh illi tok tekchi ak kia ish in chumpa cha, illi tok hohchifo ha̱ im ikbit i̱ yakni ya̱ ish ai o̱ hilechi pullashke, achi tok.

⁶ Mihma i̱ kanomi yash osh yakni ieshi li ʋlhpesa kash okpʋni la hinla hatuk osh, ʋno yak inli hokʋto falaminchit chumpa la he keyu; ʋmmi ʋlhpesa tuk a̱ chishno yak osh falaminchit chumpʋt ish ishashke; falaminchit chumpa la he keyu hoka, achi tok.

⁷ Yohmi ka Islael a̱ nitak cha̱shpo ka na falaminchit chumpa, micha nan itatoba puta aiena ka ai a̱hlicha chi̱ kʋt yakohmi beka tok, hatak ʋt i̱ shulʋsh a̱ shu̱fi cha, in chuka a bili̱ka hatak a̱ ima beka tok: mihma ilʋppak o̱ Islael okla hʋt ai yʋmohmi beka tok.

⁸ Yʋmohmi ho̱ i̱ kanomi hash osh Boas a̱, Chimmi ha chi̱ hosh ish chumpashke, im achi tok. Yohmi mʋt i̱ shulush a̱ shu̱fi tok.

⁹ Mihma Boas ʋt hatak asʋnonchi puta, micha okla moma aiena ka, Himak nitak fehna ka hʋsh pi̱sa ho̱, nana Elimelech immi hatok moma, micha Chilion immi hatok moma, micha Mahlon immi hatok moma aiena ka Naomi ya̱ in chumpa lishke.

¹⁰ Micha illi tok hohchifo ha̱ im ikbit i̱ yakni ya̱ ai o̱ hilechi la chi̱ hosh Lulh Moab ohoyo, Mahlon tekchi atok a̱, sa tekchi ya chi̱ hosh chumpa lishke; yohmi ho̱ illi tok hohchifo hʋt itibapishi ʋhleha ai ititakla, micha ai ʋtta tok holihta okhissa ya̱ ik kʋnio kashke; himak nitak a̱ pi̱sa hʋchia hoke, im achi tok;

¹¹ Mihma okla moma holihta okhissa hieli tuk, micha asʋnonchi aiena kʋt, Pi̱sa pia hoke. Ohoyo chin chuka chukowa ka Chihowa yʋt Lechel, micha Leah, tuklo yʋmmak osh Islael chuka achʋfa ya̱ ikbi tok oka yʋmmak o̱ chohmichashke: mikma Eflatah ya̱ ish a holitopashke, micha Belh‐lehem a̱ chi hohchifo kʋt ai annoho̱washke:

¹² Micha chin chuka yʋt chim ishtatiaka Chihowa yʋt ohoyo himita ilʋppa ai isht chima chi̱ kʋt Tama yʋt Chutah ya̱ im eshi tok Fales in chuka yak o̱ chohmashke, okla achi tok.

¹³ Yʋmohmi ma Boas ʋt Lulh a̱ ishi na tekchi tok: atuk osh iba chukowa ma, Chihowa yʋt ʋlhpesa ahni na ʋlla shali tuk osh, ʋlla nakni yo̱ eshi tok.

¹⁴ Mihma ohoyo ʋhleha hʋt Naomi ya̱, Chihowa yʋt holitopashke; yʋmmʋt himak nitak fehna ka i̱ kanomi iksho ik chi kancho ho̱, Islael okla ha̱ hohchifo kʋt holitopʋt ai annohowa chi̱ hoke.

¹⁵ Micha falaminchit okchalinchi chin chiyuhma chi̱ hoke, micha chi sipoknit taiyaha ka chi shoyuli ya chi̱ hoke: heh chi ahni kʋt ushi untuklo chim i̱ shahli chipok ʋt chim eshi tuk okʋt, im achi tok.

¹⁶ Mihma Naomi ʋt ʋlla yash ishi cha, ikkishi ha̱ onochi cha, ʋlla ya̱ shoyulit hofantichi tok.

¹⁷ Micha chuka abili̱ka ohoyo ʋhleha hash osh, Naomi ʋt ushi a̱shʋshke, mihmʋt hochifot Obet achi tok: yʋmmak osh Chesse Lewi i̱ki ya̱ i̱ki yoke.

¹⁸ Yohmi ka Fales ishtatiaka yʋt ilʋppak oke: Fales ʋt Heslon a̱ tobachi tok,

¹⁹ Mihma Heslon ʋt Lam a̱ tobachi tok, mihma Lam ʋt Amminatab a̱ tobahchi tok,

²⁰ Mihma Amminatab ʋt Nahshon a̱ tobachi tok, mihma Nahshon ʋt Salmon a̱ tobachi tok,

²¹ Mihma Salmon ʋt Boas a̱ tobachi tok, mihma Boas ʋt Obet a̱ tobachi tok,

²² Mihma Obet ʋt Chesse ya̱ tobachi tok, mihma Chesse ʋt Lewi ya̱ tobachi tok oke.