Luth 3 - Chahta Holisso Holitopa 1886

¹ Mihma ipokni Naomi ʋt, Sʋsotek ma! nana chim ai achukma hi a̱ afoha chi̱ hoyo la he keyu cho?

² Yohmi ka himak a̱ Boas yʋmma ohoyo himita ʋhleha im aiasha kak o̱ takla ish a̱ya tuk ʋt pi̱ kanomi keyu̱? yakeh! himak ninak a̱ a nihechi ya̱ bali mʋslichit isht anta hoke.

³ Yʋmohmi hoka yupit pa̱shi ahama il ai ahʋmmit nafohka ish fohka cha, a nihechi ya̱ ish onashke; yohmi kia hatak ʋt impʋt ishkot ik isso ki̱sha ka ish im ile haiakʋchi ná.

⁴ Yʋmohmi tuk o̱ tʋshkikma, ai itola ka achukmalit ish pisa tuk osh, ish chukowa cha, iyi ompoholmo ka ish wakʋmmi cha, ish tʋshka chike; yohmikma ish kaniohma chi̱ ka chim anola chi̱ hoke, im achi tok.

⁵ Mihma, Nana is sʋm achi tuk a̱ moma ka yʋmihchi la chi̱ hoke, im achi tok.

⁶ Mihmʋt a nihechi ya̱ ona cha, ipokni ʋt nana i̱ miha tuk moma ka yʋmihchi tok.

⁷ Yʋmohmi tuk o̱ Boas ʋt impʋt nan ishkot, chu̱kʋsh yukpʋt taha mʋt, iʋt onush nihi itʋnahachi ʋhli ont tʋshki tok: mihma lumʋt iʋt iyi ompoholmo ya̱ wakʋmmi cha, tʋshki tok.

⁸ Atuk o̱ yakohmi tok, ninak iklʋnna ma hatak ash osh nukshopa cha, filema tok: mihma yakeh! ohoyo hʋt iyi ya̱ itoyula tok.

⁹ Mihma, Kʋta chia hoh cho? achi ma, afalamichit, Chin tishu ohoyo Lulh sia hoke: yʋmohmi hoka chin tishu ohoyo ha̱ ish anchi ʋhli ka et si onochí; a̱ kanomi fehna chia hokʋt.

¹⁰ Mihma Chihowa i̱ holitopa chia hashke, sʋsotek ma! hatak himita ilbʋsha yokmá, nana in laua yokmá nana kia chik iakaiyo hosh, ʋmmona tuk ak kia i̱ shahlichit ishtaiyopi ka is sa̱ kana hokʋt.

¹¹ Yʋmohmi ka inta! sʋsotek ma! chi nukshopa ná; nana is sʋm ahni tuk a̱ moma chi̱ yʋmihchi lashke: ohoyo kostini chia ka ʋm okla moma tʋmaha holihta ai asha kʋt ithana hoka.

¹² Yohmi ka chi̱ kanomi fehna sia kʋt a̱hli: yohmi kia chi̱ kanomi a̱ shahli kʋt anta hoke.

¹³ Himak ninak a̱ ish anta tuk o̱ onnahinlikma, i̱ kanomi nana a kaniohmichi chatuk a̱ chi̱ yohmikma ʋlhpesa chi̱: i kanomi nana akaniohmichi chatuk a̱ yohmashke: amba i̱ kanomi nana akaniohmichi chatuk a̱ chi̱ yohma he keyukma, ʋno ak osh i̱ kanomi nana akaniohmichi chatuk a̱, Chihowa yʋt okcha̱ya pulla ka, chi̱ yohmi la chi̱ hoke; ish itonla na onnashke, achi tok.

¹⁴ Mihma iyi ya̱ itoyula na onna tok: mihmʋt achʋfa kʋt inla ya̱ ithana he keyu moma ho̱ wakaya tok. Mihma a nihechi ya̱ ohoyo hʋt ʋla tuk a̱, kʋna kia ik akostinincho kashke, achi tok.

¹⁵ Micha, Anchi ish anchi kʋt isht ʋla cha hahanlí, achi tok. Mihma halanli ma, bali ʋlhpisa hannali ho̱ apesa cha, shalichi tok: mihma tʋmaha holihta yash ont chukowa tok.

¹⁶ Mihma ipokni ya̱ im ona ma, Kʋta chia hoh cho? sʋsotek ma! achi tok. Mihma hatak ash osh nana akaniohmi tuk a̱ moma im anoli tok.

¹⁷ Micha Bali ʋlhpisa hannali ilʋppa ʋma tuk oke: nana iksho ho̱ chipokni ya̱ chik im ono kashke, ʋm achi hatuk okʋt.

¹⁸ Yohmi ma Sʋsotek ma! lumʋt a̱sha cha, nana kʋt kaniohmi na ish pisashke; hatak yʋmmʋt nana ka himak nitak a̱ ik tahlo kʋt achukmʋt binila chi̱ keyu hoka.