Luth 2 - Chahta Holisso Holitopa 1886

¹ Mihma Naomi ʋt i̱ hatak i̱ kanomi yosh hatak holitompa i̱m il a̱ yak chito fehna Elimelech in chuka achʋfa yosh anta tok; micha hohchifo kʋt Boas atok.

² Mihma Lulh Moab ohoyo hash osh Naomi ya̱, Himak a̱ osapa ak ia chá, kʋna ho̱ i̱ holhponayo hanta ai ahayuchi likmʋt, onush noshkoba ya̱ ʋlbʋllit iakaiya lashke, im achi ma, Iá, sʋsotek ma! im achi tok.

³ Mihma ia tuk osh ona cha, onush bʋshli ʋhleha ha̱ iakaiyʋt osapa ya̱ ai ʋlbʋlli tok: micha Boas Elimelech i̱ kanomi im osapa kashapa yoba ho̱ ona tok.

⁴ Yohmi ma yakeh! Boas ʋt Belh‐lehem a̱ minti hosh ʋla cha, onush bʋshli ʋhleha ha̱, Chihowa yʋt hʋch ibafoyukashke, im achi ma, afalamichit, Chihowa yʋt chi yukpalashke, okla im achi tok.

⁵ Yʋmohmi ma Boas ʋt in tishu onush bʋshli ʋhleha pehlichi ya̱, Ilʋppʋt kʋta ushetik o̱? im achi tok.

⁶ Mihma tishu onush bʋshli ʋhleha pehlichi yash osh afalamichit, Moab ohoyo himita, Naomi ʋt Moab yakni kohchʋt falamʋt ʋla ma, ta̱kla ʋla tok mak oke.

⁷ Yohmi hosh, Onush bʋshli ʋhleha ha̱ iakaiyʋt onush talakchi ai asha ka ak ʋlbʋllí, achi tuk; atuk osh ʋla cha, ahanta na onnahinli yatuk ʋt himakʋshke, peh ik hopako ho̱ chuka ya̱ ont a̱shʋt foha tuk oke, achi tok.

⁸ Yʋmohmi ma Boas ʋt Lulh a̱, Chik haklo̱? sʋsotek ma! osapa inla ya̱ ʋlbʋllit chik aiyo, micha ilʋppa issʋt chik aiyo hosh amba ohoyo himita ʋhleha ilʋppa ʋm a̱sha ka apotoʋt ish ahantashke:

⁹ A bʋshli ka osapa ya̱ chi nishkin a̱ onochit ish pisa cha, ish iakaiyashke: hatak himita ʋhleha ha̱ chi potola he keyu ka i̱ miha li tuk keyu cho? micha chitukshilakmʋt, oka ai ʋlhto puta ka ishit hatak himita ʋhleha oka ochi tuk a̱ ont ish ai ishkashke, im achi tok.

¹⁰ Yʋmohmi ma akachunolit aka hlipiʋt, Nanta katiohmi ho̱ chi̱ holhponayo hanta a chi ahayuchi li̱, ithanʋt is sa pisa cho? ohoyo ik ithano sia hoka, im achi tok.

¹¹ Mihma Boas ʋt afalamichit, Chi̱ hatak ʋt illi tok ititakla haya̱ chipokni ya̱ ish kaniohmihinchi tuk a̱, moma kʋt atokowʋt ʋm annoa tuk oke: yohmi kʋt chi̱ki, micha chishki, micha yakni ish ai ʋtta yatok a̱ issʋt okla cha̱shpo ish ithana chatuk keyu kʋt ant ish ibafohkʋshke.

¹² Nana ish a kaniohmi tuk a̱ Chihowa yʋt chim atobbashke, micha Islael in Chitokaka Chihowa, yʋmma sanahchi a nutakʋt ish a nukchieta chi̱ hosh ish la tuk a̱ ʋlhtoba ai ona achukma ho̱ chimashke, im achi tok.

¹³ Yʋmohmi ma A̱ shahli ma! chi̱ holhponayo hanta ak chi ai ahayuchí, ohoyo himita ʋhleha chim aiasha ka achʋfa ka chohmi li keyu kia, is sa hopohlʋli hoka, micha chin tishu ohoyo ha̱ i̱ kanʋt ish im anumpuli hoka, achi tok.

¹⁴ Mihma Boas ʋt, Impa ai ona ish la cha, pinak a̱ ʋpʋt, chi̱ pʋska tushafa winaka ibai okʋchit ish pashke, im achi tok. Mihma onush bʋshli ʋhleha bili̱ka binili tok: mihma yʋmmak ash osh onush ʋlwʋsha pit ima na impʋt fihopa ma, a̱sha moma tok.

¹⁵ Mihma ʋlbʋlla chi̱ hosh wakaya ma, Boas ʋt hatak himita ʋhleha ha̱ i̱ mihʋt, Onush talakchi ai asha kak kia ik ʋlbʋllí, micha hʋsh hofahyali ná;

¹⁶ Micha ibbak alolua kanimi kia ik chilofá, ahnit ashachit isht hʋsh a̱ya na ʋlbʋlla chike; micha hʋsh im olʋbi ná, im achi tok.

¹⁷ Yohmi na osapa ya̱ ʋlbʋllit ahanta na opiʋt taha ma, ʋlbʋlli tuk ʋt bolit nihechit tahli ma, bali ʋt efah achʋfa foka tok.

¹⁸ Mihma ishi mʋt, tʋmaha holihta yash ont chukowa tok: mihma ipokni ʋt ʋlbʋlli tuk a̱ pisa tok; mihma fihopa mʋt ilatomba tuk ʋt isht ʋlʋt ima tok:

¹⁹ Mihma ipokni ʋt, Katima yak o̱ himak nitak a̱ ish ai ʋlbʋlli tuk oh cho? mikmʋt katima yak o̱ ish a toksʋli tuk o̱? kʋna hosh yohmi, chi ahni tuk ʋt holitopashke, im achi tok. Mihma kʋna ho̱ iba toksʋli tuk ʋt ipokni ya̱ im anolit, Himak nitak a̱ iba toksʋli li tuk hohchifo kʋt Boas oke, achi tok.

²⁰ Mihma Naomi ʋt ipok a̱, Hatak yʋmmʋt okcha̱ya, micha illi tok aiena kash i̱ kana kʋt Chihowa im aholitopashke, im achi tok. Micha Naomi ʋt, Hatak yʋmmʋt pi̱ kanomi fehna, pi̱ kanomi i̱ shahli moma hoke, im achi tok.

²¹ Mihma Lulh Moab ohoyo hʋt, Ohoyo himita ʋhleha ʋm a̱sha ka apotoʋt ish ahanta na onush a̱ bʋshlit tahla chi̱ hoke, ʋm achi tuk oke, achi tok.

²² Mihma Naomi ʋt ipok Lulh a̱, Ilʋppak osh achukma, sʋsotek ma! ohoyo himita ʋhleha im ai asha kak o̱ ta̱kla ish a̱ya na osapa inla kanima ik chi ai itafamo kashke.

²³ Yʋmohmi na Boas ohoyo himita ʋhleha im ai asha kak o̱ apotoʋt ʋlbʋllit ahanta na bali bʋshli; micha onush bʋshli aiena kʋt ont taha tok; mihma ipokni ta̱kla ahanta tok.