Luth 1 - Chahta Holisso Holitopa 1886

¹ Atuk o̱ yakohmi tok, nan apesa ʋhleha hʋt pehlichit ma̱ya nitak ma, yakni yʋmma hohchʋfo chito tok. Mihma Belh‐lehem chutah hatak osh yʋmma, micha tekchi, micha ushi tuklo aiena kʋt iʋt, Moab yakni ya̱ ont aha̱shwa tok.

² Micha hatak yʋmma hohchifo kʋt Elimelech okma, micha tekchi hohchifo kʋt Naomi, micha ushi tuklo hohchifo kʋt Mahlon, micha Chilion, Eflahlait okla Belh‐lehem‐chutah asha; yʋmohmi mʋt Moab yakni yʋmmak o̱ ona cha, aha̱shwa tok.

³ Atuk o̱ Naomi i̱ hatak Elimelech ash osh illi tok; yohmi na Naomi, micha ushi tuklo aiena ak illa hosh aha̱shwa tok.

⁴ Atuk o̱ Moab ohoyo ha̱ ishit itauwayʋt okla tok; achʋfa hohchifo kʋt Opah yokma, anonti achʋfa hohchifo kʋt Lulh atok: micha yʋmma aha̱shwa na afʋmmi pokoli foka tok.

⁵ Atuk osh Mahlon, micha Chilion ita tuklot illi ak inli tok; mihma ohoyo hash osh ushi tuklo, micha i̱ hatak aiena kʋt illi na ilap bano hosh ahanta tok.

⁶ Yʋmohmi mʋt ipok tuklo ka awant Moab yakni ya̱ issʋt falamʋt ia chi̱ hosh wakaya tok: Moab yakni anta moma kʋt Chihowa yʋt im okla ha̱ i̱ nowa cha, pʋska ima tuk a̱ haklo hatok.

⁷ Yʋmohmi hosh ai ʋtta tuk ʋt ipok tuklo ka awant kocha tok; mihmʋt Chutah yakni falamʋt ona chi̱ hosh hina ya̱ okla itʋnoho̱wa tok.

⁸ Mihma Naomi ʋt ipok tuklo kash, Oh ia cha, falamʋt hʋch ishki bi̱ka in chuka ya̱ hʋsh onashke: illi chash, micha ʋno aiena ka hʋs sa̱ kana tuk a̱ chiyuhmit Chihowa yʋt hʋchi̱ kanashke.

⁹ Chihowa yʋt ʋlhpesa ahnit hʋch ima na afoha ahayuchit, hatak in chuka ya̱ im achukmʋt hʋsh chieya bi̱kashke, im achi tok. Mihmʋt i̱ su̱ksowa ma, chitolit yaiyʋt okla tok.

¹⁰ Mihmʋt, Falamʋt chim okla achʋfa i̱ yakni ish ia ka chi ta̱kla il ia pulla chi̱ hoke, achit okla tok.

¹¹ Mihma Naomi ʋt, Sʋso tek ʋhleha ma! hʋsh falamashke; nanta katiohmi ho̱ si awant hʋsh ia hinla ho̱? himakma ushi ʋt ʋm oshʋto ya̱ ʋlhto tuk osh hʋchi̱ hatak toba hinla cho?

¹² Falamʋt hʋsh iashke, sʋsotek ʋhleha ma! sa sipokni fehna hokʋt hatak ʋm a̱sha he keyu hoke. Yohma chi̱ ahni li, micha himak ninak ak kia hatak ʋm a̱sha cha, ushi ʋm asha chi̱ achi li kia;

¹³ Hʋsh im a̱shwa na hofantit taha hinla cho? hʋsh im a̱shwa na hatak hʋch ik auwayo ka hinla cho? Keyú, sʋsotek ʋhleha ma! hʋchishno pulla kak o̱ sa nukha̱klo fehnʋshke, Chihowa ibbak ʋt si asanalit si onʋtola hoka, im achi tok.

¹⁴ Mihma anonti chitolit yaiyʋt okla tok. Mihmʋt Opah hʋt ipokni ya̱ i̱ su̱ksowa tok; amba Lulh ʋto heh ahnit asitia tok.

¹⁵ Mihma Naomi ʋt Yakeh! ish ita tuklo tuk ʋt falamʋt im okla, micha i̱ na holbʋt toba puta ka im iʋshke: ish ita tuklo ka falamʋt iakaiyʋt ish iashke, achi tok.

¹⁶ Mihma Lulh ʋt, Chissa la he, micha chiakaiya li kʋt falama la he a̱ chik sʋm asihi̱hlo kashke: kanima ish a̱yakma, a̱ya la chi̱; kanima ish ai ʋttakma, ahanta la chi̱; chim okla hak osh ʋm okla cha, chin Chitokaka ak osh an Chitokaka ha chi̱ hoke.

¹⁷ Kanima a chillikma, a sʋlla chi̱, micha yʋmmak o̱ a sa hollopa chi̱ hoke: illi ak illa hosh chishno, micha ʋno pit i̱ filʋmmichi keyukma, Chihowa yʋt yakohmi, micha i̱ shahli kia si yʋmihchashke.

¹⁸ Mihma ia pulla kak o̱ kʋllot im anukfila na pisa mʋt, im anumpuli kʋt issa tok.

¹⁹ Yʋmohmi ma itatuklot itiachi tuk osh Belh‐lehem a̱ ona tok. Atuk o̱ yakohmi tok, Belh‐lehem a̱ itonachi ma, tʋmaha moma kʋt a kʋnʋllit, Ilʋppʋt Naomi o̱? okla achi tok.

²⁰ Mihma Naomi hʋs si achi ná, Mala hʋs si achashke: Nana moma i̱ shahli hʋt homi ho̱ si yʋmihchi tuk oka.

²¹ Si alota hosh kohchʋt ia li tok kia, iksho ho̱ anonti an chuka Chihowa yʋt sʋsht ʋlʋshke: yohmi ka nanta katiohmi ho̱ Naomi hʋs si achi ho̱? Chihowa yʋt si atokolit a̱ sanali, micha Nana moma i̱ shahli hʋt sʋlbʋshali tuk oka.

²² Yʋmohmit Naomi, micha ipok Lulh Moab ohoyo ita tuklot falamʋt Moab yakni ya̱ a kohchʋt ona tok: micha bali ya̱ bʋshlit isht ia ho̱ Belh‐lehem a̱ it onachi tok.