ʋBanumpa Luk Ʋt Holissochi Tok 7 - Chahta Holisso Holitopa 1886

Chisʋs ʋt Kapenaʋm a̱ ona cha, Sintulion na‐yimmi ka ahninchi mʋt, 1; 10 in tishu ha̱ hlakofichi. 11 Nain a̱ ona cha, ohoyo i̱ hatak illi ushi illi tuk a̱ falaminchit tanichi. 18 Chan ʋt aboha kʋllo fo̱ka mʋt, yʋmmak osh Klaist mak okma, keyukma, nana hatuk ma Chisʋs a̱ pit i̱ ponaklo: 22 mihma ilap ʋt nana kʋt a fehna kia yʋmmichi tok puta kʋt Chisʋs ʋt im anoli: 24 mihmʋt Chisʋs ʋt Chan a̱ isht anumpulit atokowa ka anoli. 37 Ohoyo hʋt nanashʋchi yo̱ ik yohmi, im aiahni na iyi ya̱ nan‐ahama a hʋmmi; mihma ohoyo hash hopohlʋchit nan im ai ashʋchika ya̱ i̱ kashofi.

¹ Okla hʋt haponaklot aiasha na nana ka mihʋt ont in taiyaha mʋt, Kapenaʋm a̱ ont chukowa tok.

² Mihma Sintulion achʋfʋt in tishu, yʋmmʋt i̱ holitopa chatuk osh, abeka cha, illa̱ hosi tok.

³ Atuk osh Chisʋs a̱ pit haklo mʋt, ʋla cha, in tishu hash hlakoficha hinla ka, pit im aiahni hosh, Chu okla in tikba ʋhleha ha̱ pit in tihleli tok.

⁴ Atuk o̱ yʋmmak ash ot Chisʋs a̱ im ai ona mʋt, im asilhha kʋt achilita fehnʋt, Ilʋppa ai i̱ yʋmihcha he ʋlhpiesa fehna;

⁵ Yʋmmak okʋt pim okla talaia ha̱ pi holitoblit sinakak a̱ pim ikbi tok oka, achi tok.

⁶ Mihma Chisʋs ʋt awant ia tok. Atuk osh chuka atuk ash ona̱ hosit taha ma, Sintulion ash osh i̱ kana ʋhleha ha̱ pit in tihleli mʋt, Chitokaka ma! a̱yʋt ik chim ahchibo kashke: chishno ʋt ʋm aboha ya̱ ant ish chukowa he si ahoba keyu hoka.

⁷ Yohmi kʋt anonti ʋno akinli hosh a̱yʋt ont chi pisa la he si ahoba keyu kʋt ʋm anukfila atuk oke: amba anumpa bano ho̱ ish mihakma, an tishu hatuk mʋt hlakofa hinlʋshke.

⁸ Ʋno ak kia hatak tʋshka chipota ʋhleha pehlichit i̱ shahli nutaka ahanta chatuk sia hoka: yohmi kʋt achʋfa ka, Iá, im achi likma, ia hoke: mikmʋt inla ma, Mintí, im achi likma, minti hoke: mikmʋt an tishu ha̱, Ilʋppa yakohmichí, im achi likma, yʋmihchi chatuk oke, pit im achi tok.

⁹ Mihma Chisʋs ʋt ilʋppa puta ka haiyaklo mʋt, pit im aiokpanchi fehnʋt, filemʋt hikia cha, apehʋt a̱ya tuk okla hash, Islael okla ha̱ kanima kia na yimmi chinto yakohmi ka ak a pesoshke, hʋchim achi lishke, im achi tok.

¹⁰ Mihma yʋmmʋt yakohmit itʋnowa tuk ʋt chuka ash falamʋt, tishu abeka tuk ʋt hlakofi tuk o̱ ont pisa tok.

¹¹ Atuk o̱ ont onna ma yakohmi tok: tʋmaha Nain hohchifo ho̱ ia tok; mihma nan im ai ithʋna laua, micha okla laua aienʋt apehʋt ilhkoli tok.

¹² Atuk osh tʋmaha okhissa ya̱ i̱ bilika ʋla ma, hatak ʋt ohoyo i̱ hatak illi yo̱ ushi yosh, ishki a̱ yʋmmak osh i̱ bano chatuk osh illi na okla sholit kohcha tok; yohmi ma tʋmaha okla hʋt lauʋt yʋmma apehʋt a̱ya tok.

¹³ Mihma Chitokaka yʋt ishki atuk a̱ pisa mʋt, i̱ nukha̱klo cha, Ish yaiya ná, im achi tok.

¹⁴ Mihmʋt yʋmmak ash ot ai onʋtola kash ant potoli tok: mihma sholi tuk ʋt lumʋt hieli tok. Mihma, Hatak himita chia hʋt ish tanashke, chim achi lishke, achi tok.

¹⁵ Mihma illi yatuk yʋmmak ash ot tanit binili cha, anumpuli tok; mihma yʋmmak ash ishki a̱ pit ima tok.

¹⁶ Mihma okla moma ka nanukshopa kʋt ai anukfoyuka tok: mihmʋt Chihowa ya̱ holitoblichit aiokpahanchit, Hopaii chinto kʋt pitintakla ya̱ a tobʋt hikiʋshke; micha Chihowa yʋt im okla ha̱ i̱ nowʋt a̱yʋshke, okla achi tok.

¹⁷ Mihma yakohmit Chisʋs isht ai annoa kʋt Chutea yakni a̱ mominchit, anonti yakni inla auet a bili̱ka aiasha ma moma a hlopulli tok.

¹⁸ Mihma Chan nan im ai ithʋna ʋhleha hʋt nana kʋt a yakokmi tuk a̱ mominchit im anoli tok.

¹⁹ Mihma Chan ash ot ilap nan im ai ithʋna ya̱ tu̱klot hoyo cha, Chisʋs a̱ pit in tihleli mʋt, Chishno ak osh a̱ya he tuk mak o̱ chia hokmá, ak chu? himmak pilla hak o̱ inla yo̱ e hoya chi̱ cho? achi tok.

²⁰ Hatak ash ot a̱yʋt im it onachi mʋt, Chan Baptist ʋt, Chishno ak osh a̱ya he tuk mak o̱ chia hokmá, ak chu? himmak pilla hak o̱ inla yo̱ e hoya chi̱ cho? achi hosh auet pi tihleli tuk oke, achi tok.

²¹ Mihma hʋshi kanʋlli ʋlhpisa yʋmmak fehna ka haknip ik in chukmo, mikmʋt ililli isht ai ilbʋsha, micha shilombish okpulo ai i̱ fo̱ka puta aiena kʋt laua ho̱ hlakofichi tok: mihmʋt lʋpa ʋt laua atuk a̱ hoponayochi tok.

²² Mihmʋt Chisʋs ʋt afalaminchi mʋt, Oh ia cha, nana ka hʋsh pi̱sa tuk, mihmʋt hʋsh ha̱klo tuk aiena kʋt Chan a̱ ont oh im anolí; lʋpa yʋt hoponayo, imomokpulo yʋt nowa ma, leplosi ʋbi ʋt i̱ kashofa, ik haponaklo ʋt haponaklo ma, illi mʋt falamʋt tani, mihma ilbʋsha ya̱ ʋbanumpa hʋt isht im anuhumpʋshke.

²³ Yohmi ka kʋna hosh ʋno a̱ ik si ai ibetʋblokmʋt, mihi yosh na yukpa hoke, achi tok.

²⁴ Mihma Chan im anumpa isht a̱ya tuk ʋt a falamʋt, itiachi ma, okla ha̱ Chan ak o̱ isht im anumpulit, Nanta ho̱ hʋsh pisa chi̱ hosh yakni haiaka yʋno hʋsh ilhkoli tuk oh cho? Ku̱shak osh mahli na winakʋchi kak atuk o̱?

²⁵ Amba nanta ho̱ hʋsh pisa chi̱ hosh hʋsh ilhkoli tuk o̱? Hatak na‐fohka lapushki fohka kak atuk o̱? Yakeh! na‐fohka holitopa ishit shemʋt, ilimpa hochukma in laua hokʋto, hatak mi̱ko ʋhleha in chuka ak o̱ aiasha cho kʋmo.

²⁶ Amba nanta ho̱ hʋsh pisa chi̱ hosh hʋsh ilhkoli tuk o̱? Hopaii ak atuk o̱? A̱hlishke, micha holitopa kʋt hopaii ya̱ i̱ shahli fehna hoke, hʋchim achi lishke.

²⁷ Ish ata̱ya he chi tikba ai apoksiahancha chi̱ mak o̱ ʋm anumpeshi a̱ chi nashuka itikba ma chuffichi lishke, achit holisso tok a̱, ilʋppak osh mih mak oke.

²⁸ Ohoyo ho̱ a tobʋt ai ʋtta tok puta ka hopaii chito kʋt Chan Baptist a̱ imaiya kʋt iikshoshke, hʋchim achi lishke; yohmi ik nana kia moma ik lauwo hosh Chihowa apehlichika yʋno anta kʋt, Chan a̱ imaiya hoke.

²⁹ Yohmi ma Chan a̱ okla im a haponaklo tuk ʋt moyuma, micha pʋblikan ʋhleha aiena kʋt Chan a̱ i̱ baptismo ya̱ isht a baptismot, Chihowa ya̱ im aia̱hlichi tok.

³⁰ Amba Falisi ʋhleha, micha nan‐ʋlhpisa ithʋnanchi ʋhleha aiena kʋto ilapo yokʋto yʋmmak ash o̱ ik im a baptismo, Chihowa nana im ai̱ahni tuk a̱ ik aiahlecho hokʋt.

³¹ Mihma Chitokaka yʋt, Yohmi kʋno hatak himaka aiasha ka nanta hak o̱ pit it apesa la chi̱ cho? yohmi ka nanta hak o̱ okla pit hoyulba cho?

³² Ʋlla yosh ilhpak a kanchi yo̱ binoma̱ya hosh ilap bi̱ka it i̱ howʋt, Oskula ha̱ e hʋchim olachi ka, hʋchik hehloshke; illi isht taloa isht e hʋchi̱ yaiya ka, hʋch ik yaiyoshke, ahanchi ho̱ chiyumishke.

³³ Chan Baptist ʋt pʋska yo̱ ik po, mihmʋt oka pa̱ki ma ik ishko yosh a̱ya; yohmi ma, Nan‐isht‐ahullo okpuli il ai ishishke, hʋsh achi.

³⁴ Hatak Ushi yokʋto impa, micha nan ishko aiena hosh a̱ya: yohmi ma, Yakeh! hatak isikopa, micha oka pa̱ki ishko shahli, pʋblikan ʋhleha mikmʋt nan ashʋchi puta ka i̱ kana yoke, hʋsh achishke.

³⁵ Yohmi kia Ahopoyuksaka yokʋto ilap im ʋlla ʋhleha ha̱ mominchit ai isht aia̱hli chatuk oke, achi tok.

³⁶ Mihma ibai impa hinla ka Falisi achʋfʋt im ahni tok: yohmi ma Falisi in chuka yash ont chukowʋt, impa chi̱ hosh binili tok.

³⁷ Yohmi ma ohoyo nan‐ashʋchi yosh tʋmaha yʋmma anta tuk osh, Falisi in chuka ya̱ Chisʋs ʋt a̱sht impa na akostininchí mʋt, alabasta kotoba nan‐ahama balama ʋlhto ho̱ isht ona mʋt,

³⁸ Im asha‐ka iyi pit a chiya ka ont hikiʋt yaha̱ya cha, iyi ash nishkin okchi yak o̱ isht achifʋt, anonti ilap noshkobo pa̱shi akinli ho̱ ishit kasholinchi mʋt, iyi a̱ i̱ su̱ksoho̱wʋt, nan ahama balama ash o̱ isht a hʋmmi tok.

³⁹ Mihma Falisi ʋt yʋmmak ash o̱ hoyo tuk ash ot, yʋmma pisa mʋt, Hatak ilʋppʋt hopaii atuk ok mʋt, kʋna hosh, micha ohoyo kaniohmi chatuk osh potoli ka, ik akostinincho ka heto; ohoyo ilʋppʋt nanashʋchi yoka, ahnit ilapo inli il im achi tok.

⁴⁰ Mihma Chisʋs ash ot afalaminchit, Saimon a̱ nana chi̱ miha la hinla kʋt ʋm a̱shʋshke, im achi tok. Mihma yʋmmak ash ot, Nan ithʋnanchi ma! ish mihashke, achi tok.

⁴¹ Mihma, Hatak nan‐ahekʋchi achʋfa yʋmma aheka im in takohnli kʋt tuklo tok: achʋfa kʋto aheka yʋt iskʋli tahlepa in tahlapikma, anonti achʋfa kʋto pokoli tahlapi ha tok.

⁴² Atuk osh isht atobba hi ʋt nana kia ik im iksho kit okla ma, it aieninchit pilla ho̱ yʋmmak ash ot i̱ kashofi tok. Yohmi ka, Ʋm anolí; katimampo kak osh yʋmma i̱ hullo kʋt i̱ shahlicha hinla cho? achi tok.

⁴³ Saimon ash ot afalaminchi mʋt, Laua i̱ shahli tuk o̱ i̱ kashofi kak a hinla, ahni li, achi tok. Mihma, Pit ʋlhpesʋchit ish anukfilli mʋhlishke, im achi tok.

⁴⁴ Mihmʋt ohoyo a hikia ka pit filema mʋt, Ohoyo ilʋppa ish pisa cho? chim aboha ant chukowa li ma, chishno ʋto saiyi isht achifa he oka kapʋssa kia chik samo ke tuk: amba ilʋppak okʋto nishkin okchi yo̱ saiyi ya̱ isht achifa mʋt, ilap noshkobo pa̱shi ak o̱ isht kasholihinchishke.

⁴⁵ Chishno ʋto chik sa su̱ksowo ke tuk: amba ohoyo ilʋppak okʋto, ilʋppa ant chukowa li tuk takla ka, saiyi ya̱ i̱ su̱ksoho̱wa kʋt ik iesoshke.

⁴⁶ Chishno ʋto sa noshkobo ha̱ nan‐ahama isht chik sʋm a hʋmmo ke tuk; amba ohoyo ilʋppak okʋto saiyi ya̱ nan‐ahama isht ahʋmmishke.

⁴⁷ Yohmi hokʋt, Nan im ai ashʋchika yʋt laua tuk ʋt kashofa hoke: mihi yosh nan i̱ hullo fehna hatuk okʋt, chim achi lishke: amba ik lauo hosh i̱ kashofa hok mak osh mihi yosh nan i̱ hullo kʋt a fehna keyu chatuk oke, im achi tok.

⁴⁸ Mihmʋt ohoyo hash o̱, Chim ai ashʋchika puta kʋt chi̱ kashofa mak oke, im achi tok.

⁴⁹ Mihma it apehʋt a̱sht impa tuk yʋmmak ash ot, Ilʋppʋt kʋta hokak osh nan‐ai ashʋchika puta kak kia kashofi hoh cho? ahnit ilapo inli okla im anukfila tok.

⁵⁰ Mihma ohoyo hash o̱, Na chi yimmika yʋt chi okchalinchishke: na‐yukpʋt ish a̱yashke, im achi tok.