ʋBanumpa Luk Ʋt Holissochi Tok 4 - Chahta Holisso Holitopa 1886

Chisʋs ʋt, nan‐isht‐ahullo okpulo yosh imomaka pihi̱sa ma, ik impo ho̱ nitak pokoli ushta mʋt, nan‐isht ai imomaka pisa puta ka imaiyachi, 1, 14 Chisʋs ʋt falamʋt Kalili a̱ ona cha, ʋba isht anumpohonli; 16 atuk osh Nasalet a̱ ona cha, nitak hullo yo̱ sinakak a̱ nan ai ithʋnanchi: 28 mihma okla hʋt ik im ʋlhpeso mʋt, ʋbi bʋnna; 31 Chisʋs ʋt Kapenaʋm a̱ ona cha, nitak hullo ya̱ nan ithʋnanchit ahanta mʋt, 33 nan‐ishtahullo okpullo ma kohchichi; 38 Pita tekchi ishki a̱ hlakofichi; 40 mihmʋt nan abeka ilaiyuka laua ka isht ahullo fehna kia ai yʋmihchit ahanta mʋt, 43 Kalili fullota ka ʋbanumpa ya̱ isht ai anumpohonli.

¹ Chisʋs ʋt Shilombish Holitopa isht anukfohkʋt im alotowa hosh, Chatan ʋttʋt falamʋt ia ma, Shilombish ash ot im aiahni na a̱yʋt yakni haiaka ont chukowa na,

² Nitak pokoli ushta ka Setan ʋt imomaka pisa tok. Mihma nitak yʋmma fehna ka nanasi kia ʋpa tok keyu: atuk osh yʋmmʋt ont taha na misha pilla mʋno hohchʋfo tok.

³ Yohmi ma Setan ash ot, Chihowa Ushi chia hokmʋt, tʋli ilʋppʋt pʋska toba chi̱ ka i̱ mihá, im achi tok.

⁴ Yohmi ma Chisʋs ʋt afalaminchi mʋt, Hatak ʋt pʋska yak bieka ho̱ ai okcha̱ya he keyu; amba Chihowa im anumpa moma kak ashke; achi kʋt holisso hoke, im achi tok.

⁵ Mihma Setan ash ot yʋmmak ash ilauelit nʋnih chaha yo̱ isht oiya cha, yakosi itin takla fehna ho̱ mi̱ko apehlichi puta yakni aiasha ka mominchit i̱ haiakʋchi tok.

⁶ Mihmʋt Setan ash ot, Nan im aia̱hlika, micha im a holitopaka aiena ilʋppa mominchit chima lashke; yʋmmʋk okʋt ʋno ak o̱ ʋmmi toba tok: yohmi ka kʋna ho̱ ʋno ahni li hok mak osh ima li hoke.

⁷ Yohmi hoka chishno ʋt aka hlipiʋt is si aiokpʋchi hokma, moma kʋt chimmi hashke, im achi tok.

⁸ Mihma Chisʋs ash ot afalaminchit, Setan chia hʋt ʋm ashaka yak o̱ ish hikiashke; Chitokaka chin Chihowa yak o̱ i̱ hʋchukbihlepʋt ish aiokpahanchashke; micha yʋmmak illa ho̱ holitoblit ish im antiashke; achi kʋt holisso hoka, im achi tok.

⁹ Mihma yʋmmak ash ot Chisʋs ash o̱ ilauelit Chelusalem a̱ ont isht chukowa cha, tempel wishakchi yo̱ ont o̱ hilechi mʋt, Chihowa Ushi chia hokmʋt, aka pit ish ile pilashke:

^10-11 Chishno a̱ chi apesahancha chi̱ ka, im enchil ʋhleha ha̱ atohno na ibbak a̱ okla ʋba isht takalihinchit chisht a̱ya na nitak kanima kia chiyi ya̱ tʋli isht chik ai isso ka hi a̱, achi hosh holisso tok oka, im achi tok.

¹² Mihma Chisʋs ash ot afalaminchi mʋt, Chitokaka chin Chihowa ya̱ imomaka chik peso kashke; achi tok a̱ a̱shʋshke, im achi tok.

¹³ Mihma Setan ash ot nan isht ai imomaka pisa puta kash o̱ isht im anukfillit ont tahli mʋt, yakosi takla kʋno i̱ filʋmmit ia tok.

¹⁴ Yohmi ma Chisʋs ash ot Shilombish nan‐isht im aia̱hli ka yʋt anukfoyuka hosh falamʋt Kalili a̱ ona tok: mihma yʋmma isht annoa kʋt yakni yʋmma a bili̱ka a mominchit hlopulli tok.

¹⁵ Mihma yʋmma i̱ sinakak a puta ka nan ai ithʋnanchit ahanta ma, momʋt ahninchi tok.

¹⁶ Yohmi ma ai ʋttʋt hofanti tok Nasalet mak o̱ ʋla tok; mihmʋt a yohmi atuk okʋt, nitak hullo nitak a̱ sinakak a̱ ont chukowa cha, holisso it im anumpula chi̱ hosh wakayʋt hikia tok.

^17-19 Mihma hopaii Esaias i̱ holisso ho̱ ant ima tok: yohmi ma holisso hash wakʋmmi mʋt, yʋmma a holisso kʋt, Ilbʋsha puta ka ʋbanumpa isht im anumpuli la hi a̱ yʋmmak osh nan isht si ahʋmmi tuk okʋt, Chitokaka im i shilombish ʋt si onʋtuyula hoke: chu̱kʋsh nukha̱klo puta hatuk kia hopohlʋchit, yuka ʋhleha hatuk ma isht a hlakofa he; mikma lʋpa puta yatuk mʋt isht a hoponaya he, micha issikkopa puta kʋt a̱sha tuk a̱ isht a mokofit, Chitokaka yʋt aiokpahanchi afʋmmi ma isht anumpohonli la hi o̱, si a tohno tuk oke, achi ho̱ ahayuchi tok.

²⁰ Micha holisso hash akamʋli mʋt, falaminchit sinakak nan‐isht aiʋtta yash ima cha, aka binili tok. Mihma sinakak aiasha tuk ash ot momʋt nishkin isht aiokchifeli tok.

²¹ Mihma yʋmmak ash ot, Holisso ilʋppʋt himak nitak a̱ hʋchi haksobish a̱ isht hʋsh haklo kʋt ont aia̱hli hoke, im achit isht ia tok.

²² Yohmi ma moma kʋt nan ia atokowa ma pi̱sʋt, anumpa hochukma kʋt itih ha̱ a kohoncha ka okokko! aiahni tok: mihmʋt, Ilʋppʋt Chosef ushi keyu ho̱? okla achi tok.

²³ Mihma, Alikchi a̱ chishno inlit ile hlakofichí: nana kʋt Kapenaʋm a̱ a yʋmohmi na e haklo tuk okma, chi̱ yakni ilʋppak inli ma a yʋmihchí, achi anumpa isht ʋlhpisa ilʋppak o̱ hʋs sʋm achi pulla chi̱ hoke, im achi tok.

²⁴ Mihmʋt, A̱hli pulla ho̱ hʋchim achi lishke, Hopaii nana ak osh ilap i̱ yakni ak inli hoka ai a holitopa chatuk keyushke, achi tok.

²⁵ Yohmi kia aia̱hli mak o̱ hʋchim anoli li: Elias ʋt ahanta nitak a̱ ʋba ʋt ai okshilitʋt kʋnia na afʋmmi tuchina hʋshi hannali; yohmi na hopoa chinta fehnʋt a hlopulli ka, Islael okla ha̱ ohoyo i̱ hatak illi ʋt lauʋt aiasha tok.

²⁶ Yohmi kia yʋmma achʋfona kia im a̱ya hi ʋt Elias ʋt ik ʋlhtoko: amba Saiton yakni Salepta tʋmaha, ohoyo i̱ hatak illi yʋmmak illa tok.

²⁷ Micha hopaii Eliseʋs ʋt ahanta nitak a̱ Islael okla ha̱ leplosi ʋbi kʋt lauʋt aiasha tok: yohmi kia yʋmmak ash ot achʋfona kia ik hlakofo ho̱, amba Naaman Silian hatak ak illa tok.

²⁸ Mihma sinakak aiasha tuk ʋt ilʋppa puta ka haklo mʋt, momʋt anukhobelʋt kʋnia tok.

²⁹ Mihmʋt okla wakaya cha, yʋmmak ash o̱ tʋmaha ha̱ kohcha pit chʋffichi mʋt, itehpelʋt aka pit kancha chi̱ hosh ilauelit, in tʋmaha ai on talaia sakti ont on talaka fehna isht ona tok.

³⁰ Yohmi tuk kia yʋmmak ash ot okla hash itin takla a hlopullit kanima ia tok.

³¹ Mihmʋt Kapenaʋm tʋmaha Kalili yakni a̱ ona cha, nitak hullo nitak puta ka okla nana ithʋnanchi tok.

³² Yohmi ma im anumpa hʋt a na‐fehna hatuk o̱, nana ithʋnanchi ka okokko! okla aiahnit im anukfila tok.

³³ Yohmi ma sinakak a̱ hatak ʋt shilombish okpulo yʋt isht ai i̱ fo̱ka hosh anta tok: atuk osh yʋmmak ash ot chitolit tahpʋlʋt,

³⁴ Ikikke! Chisʋs Nasalet minti chia ha̱ nanta ho̱ isht e chi ahalaia cho? ish pissikkopala chi̱ hosh ish la hoh cho? kʋna ho̱ chia hoka chithana li, Chihowa i̱ holitopa yak oke, achi tok.

³⁵ Mihma Chisʋs ash ot yʋmmak ash im olʋbbit, Nukchintot yʋmma ish a kohchashke, achi tok. Yohmi ma shilombish okpulo ash ot okla ai itintaklʋchit ai akʋchi mʋt, nan ik kanehiho hosh a kohcha tok.

³⁶ Yohmi ma okla moyuma mʋt nukhlakanchʋt, ilap bi̱ka it im anumpulit, Ilʋppʋt anumpa nanta hokak osh yakohmi cho? nan im ʋlhpisa, nan aia̱hlika aiena ho̱ shilombish okpulo puta ka nan isht im ai apihi̱sa hoka, okla kocha wihʋshke, achi tok.

³⁷ Yohmi ma yʋmma ai isht annoachi ka yakni auet a bili̱ka aiasha ka moyuma a hlopulli tok.

³⁸ Mihma sinakak a̱ ʋttʋt kohchʋt ia mʋt, Saimon in chuka ont chukowa tok: mihma Saimon tekchi ishki ʋt yʋnha fehna tuk o̱, pisa hinla ka okla im aiahni tok.

³⁹ Mihma yʋmmak ash o̱ wakayʋt hikia mʋt, yʋnha hash im olʋbbi: yohmi ma yʋmmak ash o̱ yʋnha hʋt ai issʋchi tok; mihma ashali̱ka tani cha, okla hash nan isht im ʋtta tok.

⁴⁰ Yohmi hatuk o̱ hʋshi ʋt okʋtula ma, ililli ilaiyuka isht abeka im a̱sha tuk puta kʋt momʋt yʋmmak ash o̱ im ai ona tok; yohmi ma ibbak ʋt aieninchit mominchit isht umbitepʋt hlakofihinchi tok.

⁴¹ Mihma nan‐isht‐ahullo okpulo puta kʋt laua ka a kocha wiha mʋt, chitoli hosh mihʋt, Chishno ak osh Chihowa Ushi Klaist chia hoke, ahanchi tok. Mihma yʋmmak ash im olʋbbi mʋt, ilap ak osh Klaist atuk a̱ ithʋna ka, yʋmma ik mihá, ik im ahno ki tok.

⁴² Atuk osh ont onnʋt taha ma, kohchʋt iʋt yahni haiaka yo̱ ona tok: mihma okla hʋt hoyot itʋnowʋt im ai ona mʋt, ai i̱ filʋmmit kanima ik aiyo ka chi̱ ho̱, im olʋbbi tok.

⁴³ Mihma tʋmaha inla ak kia Chihowa apehlichika ya̱ isht im anumpohonli la chi̱ hoka, yʋmmak a he mak osh a̱ya li ha tok okʋt, im achi tok.

⁴⁴ Mihmʋt sinakak pʋta Kalili aiasha ka ʋbanumpa isht ai anumpohonli tok.