ʋBanumpa Luk Ʋt Holissochi Tok 3 - Chahta Holisso Holitopa 1886

Chan Baptist ʋt ʋbanumpa isht anumpohonli, 1: 15 Klaist a̱ ato kowa anoli; 20 anonti aboha kʋllo fohka. 21 Chisʋs ʋt baptismo, yohmi ma yʋmmak okʋt Chihowa ha̱ Ushi pulla hatuk ʋt annoa. 23 Alʋm ak o̱ isht ai unchululit mihi̱nti ho̱, Chisʋs ʋt hatak a toba tok a̱ ʋlhtokowa annoa.

¹ Tibeliʋs Sesa yʋt mi̱ko tobʋt ahanta tok afʋmmi ont isht auah tahlapik fehna, Pontiʋs Pailat ʋt Chutea yakni apehlichi ma, Helot ʋt Kalili ak o̱ apehlichi ma, anonti itibapishi Filip ʋt Itulea, micha Hlakonitis yakni aiena ka apehlichi ma, Lisanias mʋt Abilene ak o̱ apehlichi ho̱,

² Annas, micha Kaiafas ita tuklo kʋt na‐holitompa isht a̱sha i̱ shahli yosh a̱shwa ho̱, Chihowa im anumpa hʋt Chan Sakalias ushi a̱ yakni haiaka yo̱ im ai ona tok.

^3-6 Yʋmohmi ma hopaii Esias im anumpa holisso ha̱ a holihi̱so kʋt, Achʋfa hosh yakni haiaka yo̱ ai anumpohonlit, Chitokaka ata̱ya hi a̱ apoksiachit, i hina puta ka oh apissʋlechí: kolukbi puta mʋt momʋt ik alotá: mikma nʋnih, micha nʋnih hochito aiena momá kʋt akanlosit ik tahá: hina fullota atuk kia apissʋt ik tobá: yohmi ma ai itilaui iksho ke tuk ʋt itilauit tahashke: yohmikma hatak moma kʋt Chihowa i̱ nan okchalinchi a̱ pisa he mak oke, achishke; ahanchi tok mak o̱, vʋmmak okʋt ai ashʋchika puta ka isht a kashofa chi̱ ka, ile kostininchit baptisma hi a̱ isht anumpohonlit Chatan a bili̱ka yakni a mominchit a̱ya tok.

⁷ Mihmʋt im a baptisma chi̱ hosh okla laua yʋt ai ʋla ma, Sinti chilita isht‐atiaka hʋchia ma! na palʋmmi mihinti ka hʋsh i̱ hlakofa hi a̱, kʋta hosh hʋchim anoli tuk oh cho?

⁸ Yohmi hokʋt ile kostininchi ai it ʋlhpesa mak o̱ ʋnit hʋsh wayashke; micha, Himona Eblaham ak osh pi̱ki yoke, acha hi okʋno hʋch ik il anukfillo kashke; Chihowa hʋt tʋli yak aiasha ka, Eblaham im ʋlla ya chi̱ ka ai ikba hinla hoka, hʋchim achi lishke.

⁹ Yohmikma himak ak kia iskifa yʋt iti puta ak‐isht‐ʋla ya̱ ai itonla hoke; yohmi hatuk o̱ iti yʋt ʋni achukma ho̱ ʋnit waya keyu hokʋto, moyumʋt cha̱yʋt akakoha cha, luak a̱ pit itokaha hi oke, im achi tok.

¹⁰ Yohmi ma okla hash osh i̱ ponaklot, Yohmi kʋno nanta hak o̱ e katiohma chi̱ ho̱? achi tok.

¹¹ Mihma afalaminchi kʋt, Kʋna hosh na‐fohka yʋt in tuklokmʋt, kanima hosh ik im ikshokma ik in chʋfalí; mikma kanima hosh ilimpa hʋt im a̱sha kʋt, yohmi makinlashke, im achi tok.

¹² Yohmi ma pʋblikan ʋhleha hak kia baptisma chi̱ hosh ai ʋla mʋt, Nan‐ithʋnanchi ma! nanta hak o̱ e katiohma chi̱ cho? im achi tok.

¹³ Yohmi ma, Nana hʋchim ʋlhpisa tuk ʋt atamblit hʋch ik hoyo kashke, im achi tok.

¹⁴ Yohmi ma tʋshka chipota ʋhleha hak kia i̱ ponaklot, Mikma pishno ak osh nanta hak o̱ e yʋmohma chi̱ ho̱? achi tok: yohmi ma yʋmmak ash o̱, Hatak nana kia hʋch ik o̱ mahlantokmʋt, anonti kʋna kia a holʋbit hʋch ik wehpulo kashke; yohmikmʋt na hʋchim ai ʋlhtoba ma, Ʋlhpiesa akinli hʋsh aiahnashke, im achi tok.

¹⁵ Okla hʋt nana ka pit hoho̱yo hosh a̱sha hatuk, atul osh hatak moma kʋt, Chan a̱ yʋmmak osh Klaist mak okmá keyukmá, nanta ho̱ chishba? ahnit chu̱kʋsh a̱ isht anukfielit okla aiasha ma,

¹⁶ Chan ash ot mominchit im anumpullit, Ʋno yokʋto oka yo̱ isht hʋchi baptismochi li mʋhli; yohmi kia achʋfa kʋt a̱ shahli fehna hosh mihinti ka i̱ shulush isht‐talakchi a̱ ʋno ʋt hlitoli la hi o̱ si ahoba keyu hoke; yʋmmak osh Shilombish Holitopa, micha luak aiena ho̱ isht hʋchi baptismocha hi oke.

¹⁷ Yʋmmak osh i̱ nan‐isht mʋshahchi yʋt ibbak a foyuka: yohmi kʋt i̱ nan‐anihechi yatuk ma achukmali fehnʋt kashofa he; mikmʋt onush atuk ma kanchak a̱ pit ashachikmʋt, amba hakhlopish okʋno luak ʋt moshola he keyu a̱ isht hukma hi oke, ahanchi tok.

¹⁸ Micha okla ha̱ nana inla mʋt laua ho̱ isht ai i̱ mihi̱hʋt, ʋbanumpa ha̱ isht im anumpohonli tok.

¹⁹ Yohmi kia Helot mi̱ko yʋt ilap itibapishi Filip tekchi Helotias atuk, micha Helot ʋt nan ik ʋlhpeso puta ai yʋmohmi chatuk ash, pit a mominchit atokowʋt nan isht ai i̱ miha hatuk o̱.

²⁰ Nana ik ai ʋlhpesacho ke tuk moma kʋt ilʋppakma isht ai ibafohki hosh Chan a̱ aboha kʋllo fohkit im okhishta tok.

²¹ Okla moyuma kʋt baptismot taha ma, yakohmi tok: Chisʋs ak kia baptismo cha, ʋba pit asilhha ma, ʋba yʋt auet tiwa,

²² Yohmi ma Shilombish Holitopa yʋt nipi a̱sha hosh pʋchi‐yoshuba chiyuhmit ʋba mintit im ʋla ma, ʋba ya̱ anumpa hʋt auet takali kʋt, Chishno ak osh sʋso a̱ holitopa chia hoke; chishno ak o̱ nan isht chi a sai yukpa mak oke, achi tok.

²³ Mihma Chisʋs ʋt afʋmmi pokoli tuchina ka ona foka hosh, peh im ahoba kʋno, Chosef ak o̱ ushi a tok: mihma yʋmmʋt Heli ak o̱ ushi a tok.

²⁴ Mihma yʋmmʋt Mahlat ak o̱ ushi a tok: mihma yʋmmʋt Lefai ak o̱ ushi a tok: mihma yʋmmʋt Melchi ak o̱ ushi a tok: mihma yʋmmʋt Channa ak o̱ ushi a tok: mihma yʋmmʋt Chosef ak o̱ ushi a tok.

²⁵ Mihma yʋmmʋt Mattahlias ak o̱ ushi a tok: mihma yʋmmʋt Amos ak o̱ ushi a tok; mihma yʋmmʋt Naʋm ak o̱ ushi a tok; mihma sʋmmʋt Esli ak o̱ ushi a tok: mihma yʋmmʋt Nakke ak o̱ ushi a tok:

²⁶ Mihma yʋmmʋt Maath ak o̱ ushi a tok: mihma yʋmmʋt Mattahlias ak o̱ ushi a tok: mihma yʋmmʋt Semei ak o̱ ushi a tok: mihma yʋmmʋt Chosef ak o̱ ushi a tok: mihma yʋmmʋt Chuta ak o̱ ushi a tok:

²⁷ Mihma yʋmmʋt Choanna ak o̱ ushi a tok: mihma yʋmmʋt Lehesa ak o̱ ushi a tok: mihma yʋmmʋt Solobabei ak o̱ ushi a tok: mihma yʋmmʋt Salahliel ak o̱ ushi a tok: mihma yʋmmʋt Neli ah o̱ ushi a tok:

²⁸ Mihma yʋmmʋt Melchi ak o̱ ushi a tok: mihma yʋmmʋt Alli ak o̱ ushi a tok: mihma yʋmmʋt Kosam ak o̱ ushi a tok; mihma yʋmmʋt Elmolam ak o̱ ushi a tok: mihma yʋmmʋt El ak o̱ ushi a tok.

²⁹ Mihma yʋmmʋt Chose ak o̱ ushi a tok: mihma yʋmmʋt Eliesel ak o̱ ushi a tok: mihma yʋmmʋt Cholim ak o̱ ushi a tok; mihma yʋmmʋt Mathlat ak o̱ ushi a tok: mihma yʋmmʋt Lefai ak o̱ ushi a tok.

³⁰ Mihma yʋmmʋt Simeon ak o̱ ushi a tok: mihma yʋmmʋt Chuta ak o̱ ushi a tok: mihma yʋmmʋt Chosef ak o̱ ushi a tok: mihma yʋmmʋt Chonan ak o̱ ushi a tok: mihma yʋmmʋt Eliakim ak o̱ ushi a tok.

³¹ Mihma yʋmmʋt Melea ak o̱ ushi a tok: mihma yʋmmʋt Menan ak o̱ ushi a tok: mihma yʋmmʋt Mattahla ak o̱ ushi a tok: mihma yʋmmʋt Nahlan ak o̱ ushi a tok: mihma yʋmmʋt Lewi ak o̱ ushi a tok.

³² Mihma yʋmmʋt Chesse ak o̱ ushi a tok: mihma yʋmmʋt Obet ak o̱ ushi a tok: mihma yʋmmʋt Boos ak o̱ ushi a tok: mihma yʋmmʋt Salmon ak o̱ ushi a tok: mihma yʋmmʋt Naason ak o̱ ushi a tok.

³³ Mihma yʋmmʋt Aminatab ak o̱ ushi a tok: mihma yʋmmʋt Alam ak o̱ ushi a tok: mihma yʋmmʋt Eslom ak o̱ ushi a tok: mihma yʋmmʋt Fales ak o̱ ushi a tok: mihma yʋmmʋt Chuta ak o̱ ushi a tok.

³⁴ Mihma yʋmmʋt Chekob ak o̱ ushi a tok: mihma yʋmmʋt Aisaak ak o̱ ushi a tok: mihma yʋmmʋt Eblaham ak o̱ ushi a tok: mihma yʋmmʋt Hlala ak o̱ ushi a tok: mihma yʋmmʋt Nachol ak o̱ ushi a tok.

³⁵ Mihma yʋmmʋt Saluk ak o̱ ushi a tok: mihma yʋmmʋt Lakau ak o̱ ushi a tok: mihma yʋmmʋt Falek ak o̱ ushi a tok: mihma yʋmmʋt Hebeh ak o̱ ushi a tok: mihma yʋmmʋt Sala ak o̱ ushi a tok.

³⁶ Mihma yʋmmʋt Kainan ak o̱ ushi a tok: mihma yʋmmʋt Alfaksat ak o̱ ushi a tok: mihma yʋmmʋt Sem ak o̱ ushi a tok: mihma yʋmmʋt Noah ak o̱ ushi a tok: mihma yʋmmʋt Lamek ak o̱ ushi a tok.

³⁷ Mihma yʋmmʋt Mehlusala ak o̱ ushi a tok: mihma yʋmmʋt Enok ak o̱ ushi a tok: mihma yʋmmʋt Chalet ak o̱ ushi a tok: mihma yʋmmʋt Maleleel ak o̱ ushi a tok: mihma yʋmmʋt Kainan ak o̱ ushi a tok.

³⁸ Mihma yʋmmʋt Enos ak o̱ ushi a tok: mihma yʋmmʋt Seth ak o̱ ushi a tok: mihma yʋmmʋt Alam ak o̱ ushi a tok: mihma yʋmmʋt Chihowa ak o̱ ushi a tok.