ʋBanumpa Luk Ʋt Holissochi Tok 21 - Chahta Holisso Holitopa 1886

Ohoyo i̱ hatak illi yosh Chitokaka ya̱ na kʋtinosi pit isht aiokpʋchi ho̱, Chisʋs ʋt ahninchi fehna, 1, 5 Tempel ʋt ont aiokpulokʋt taha hi a̱, anonti Chelusalem ʋt ont aiokpulokʋt taha cha, chukillissʋt talaia hi a̱ isht anumpuli; 25 micha ilap ʋt ʋla chi̱kma, nan isht atokowa puta kʋt kaniohma hi a̱ anoli.

¹ Mihmʋt ʋba chakalit hopo̱koyo mʋt, hatak nan in laua ʋhleha hʋt tʋli holisso abohli holitopa yo̱ in tʋli holisso ya̱ pit apittʋt ma̱ya ho̱ pisa tok.

² Mihmʋt ohoyo i̱ hatak illi ilbʋsha yosh mait tuklo ho̱ yʋmma pit apitta ka, pisa akinli tok.

³ Mihmʋt yʋmmak ash ot, A̱hli mak o̱ hʋchim achi lishke, Ohoyo i̱ hatak illi ilʋppʋt moma i̱ shahlichit pit fohkishke.

⁴ Ilʋppak okʋto moma kʋt nan in laua hatuk osh ai im atampa kʋt Chihowa isht aiokpʋchi abohli ya̱ pit apittʋshke; amba yʋmmak okʋto ilbʋsha yosh isht ai okcha̱ya he ʋt in tonla tuk ʋt lushumit pit abehlishke, achi tok.

⁵ Yohmi ma kanimi kʋt tempel ʋt tʋli hochukma, micha na hʋlbena puta ishit shema fehna ka okla isht anumpulit ma̱ya ma, yʋmmak ash ot,

⁶ Ilʋppa puta hʋsh pi̱sa ka, tʋli achʋfona kia aka ik itolo ke tuk osh, it o̱ tʋlkanchit itonla kʋt ai iksho ka he nitak ʋt ʋla hi oke, achi tok.

⁷ Mihma okla i̱ ponaklot, Nan‐ithʋnanchi ma! katiohmi fokak mak o̱ ilʋppa puta kʋt ai yʋmohma hi oh cho? micha ilʋppa puta kʋt ont a yʋmohma chi̱k ma, nan‐isht atokowa nanta hosh otaiyana hi oh cho? achi tok.

⁸ Mihma yʋmmak ash ot, Ahah! hʋsh ahni cha, ik hʋchi yoshubo kashke; sa hohchifo ha̱ isht hochifo kʋt, Ʋno ak osh Klaist sia hoke, achit a̱ya kʋt laua hi oka; ai yohma he nitak ʋt ik hopakoshke: yohmi kia yʋmma hʋch ik iakaiyo kashke.

⁹ Tʋnʋp a̱sha, micha nana ik it im achukmo fehna ka hʋsh haklo kia, ik hʋchi nukshopo kashke: yʋmma puta kak osh tikbanli ai yʋmohma hi oka; amba ont ishtaiyopi kʋto chekosa chi̱ keyu hoke.

¹⁰ Yʋmma fokakma oklushi achʋfa kʋt oklushi inla ya̱ it in tanampa he; yohmikma mi̱ko apehlichi achʋfa kʋt mi̱ko apehlichi inla ya̱ it in tanampa hi oke.

¹¹ Yohmikma kanima ai ilaiyukachit yakni ʋt winakʋchi chinta he; mikma hohchʋfo chinto, micha abeka okpulo aiena kʋt a̱sha he; yohmikma nana pi̱sʋt ai i̱ nukshopa he fehna, micha nan isht atokowa chinto aiena kʋt ʋba ya̱ auet a haiaka hi oke.

¹² Yohmi kia ilʋppa puta kʋt ik a yʋmohmo ki̱sha ka, sa hohchifo pulla hatuk mak o̱ okla hʋt ibbak a̱ hʋchi onochi cha, hʋch issikkopala he; yohmi kʋt mi̱ko ʋhleha, micha hatak pehlichi a puta itikba ya̱ isht hʋchi ai onʋt, sinakak puta isht hʋchi ai ona, mikmʋt aboha kʋllo a̱ hʋchi fohka hi oke.

¹³ Mikma yʋmmak ash osh nan isht a hʋchim atokoli mak a hi oke.

¹⁴ Yohmi hoka afalaminchit nana ho̱ hʋsh miha hi ʋt tikbanli hʋch ik anukfillo ka chi̱ kʋt, hʋchi chu̱kʋsh ma hʋsh il anukfoyukashke.

¹⁵ Ʋno ak osh itih, mikmʋt im anukfila hopoyuksa aiena ka hʋch ima likma, yʋmmak o̱ hʋchi̱ nukkilli ʋhleha hʋt i̱ sanalit miha, mikmʋt a kanimancha he kia iksho ka hi oke.

¹⁶ Micha hʋch i̱ki, hʋch ishki, mikmʋt hʋsh itibapishi ʋhleha, hʋchi̱ kanomi ʋhleha, micha hʋch i̱ kana ʋhleha aiena kʋt hʋch ishit, okla ibbak a̱ a hʋchi fohka he: mikmʋt hʋsh kanima mʋt, yʋmmak osh ai ahni ho̱, hʋch illa hi oke.

¹⁷ Micha ʋno sa hohchifo pulla hatuk mak o̱ hatak moma kʋt isht a hʋchi̱ nukkilla hi oke.

¹⁸ Yohmi kia hʋchi noshkobo pa̱shi ʋt achʋfa kia ai okpuloka he keyu hoke.

¹⁹ Nuklanlʋt achunanchit hʋsh ahanta pulla hosh hʋchim ilhfiopak atuk ma hʋsh il ai eshashke.

²⁰ Micha Chelusalem a̱ tʋshka chipota puta ka isht apakfoyupa na hʋsh pisakmʋt, yʋmmʋt aiokpulokʋt taha chi̱ ka, atukonofa ka hʋsh ithaiyanashke.

²¹ Yʋmma fokakma Chutea ya̱ aiasha tuk ʋt nʋnih chaha foka pit yihlepakma; anonti yʋmma ai iklʋnna aiasha tuk ʋt a kocha wíhashke; mikma kocha foka tʋmahushi ma̱ya tuk okʋto yʋmma pit ik ʋlbeho kashke.

²² Nana puta holihi̱so tok ʋt ont ai a̱hla chi̱ mak o̱, ilʋppʋt na palʋmmi chinto kʋt isht ai im ʋlhpisa he nitak a hi oke.

²³ Amba nitak yʋmma foka ho̱ ʋlla shanli, micha pishinchi aiena hokʋto i̱ palʋmma he; na komunta chinto kʋt yakni a̱ ai onʋtuyulakma, ʋba auet i̱ nukkilli mʋt okla ilʋppa onʋtula hi oke.

²⁴ Yohmikma bʋshpo falaia yo̱ isht akakoha he; micha yuka tobʋt oklushi moma ai im oho̱na he; mikma Chelusalem a̱ Chentail okla hosh aka a hʋhlihinchi na Chentail okla nana im ai ʋlhpisa atuk ʋt ont ai a̱hlik mak a hi oke.

²⁵ Yohmikma hʋshi, micha hʋshi‐ninak‐a̱ya, mikmʋt fochik puta aiena ka nan isht atokowa kʋt aiasha he; mikma oklushi puta a kaniohmi ik ithanot isht a komunta yʋt yakni paknaka ya̱ ai onʋtuyulakma, okhʋta oka bʋnʋtha kʋt fohompa he;

²⁶ Ilʋppa puta kʋt yakni a̱ ai onʋtuyula chi̱ ka hoho̱yo tuk ʋt hatak chu̱kʋsh puta kash ot nukshopʋt illa hi oke: ʋba nan isht aia̱hli ka puta a̱sha kash ot winakahancha hi oke.

²⁷ Yʋmma fokakma Hatak Ushi ʋt nan‐isht‐aia̱hlika, micha isht a holitopa chinto aiena ka il ai eshit a hoshonti anu̱ka̱ka minti na okla pisa hi oke.

²⁸ Mikma nana ilʋppa puta kʋt ont aia̱hlit isht ia, yohmikma a hʋchi hlakofa chi̱ kʋt atukonofʋt taha hoka, ʋba pit hopo̱koyot hʋchi noshkobo ha̱ hʋsh ʋba chakalichashke, im achi tok.

²⁹ Mihmʋt nan‐isht ʋlhpisa ho̱ okla hash isht im anumpulit, Fik ʋpi, micha iti puta ka ho pesá.

³⁰ Yʋmmʋt bokoplit kohcha na hʋsh pisakmʋt, hʋchishno akinli kia toffa ʋt olanlosi ant takanli ka hʋsh ithana chatuk oke.

³¹ Yohmi kʋt yʋmmak inli ho̱ chiyuhmit nana ilʋppa puta kʋt ont aia̱hli na hʋsh pisakmʋt, Chihowa apehlichika yʋt auet olanlosi ʋla ka hʋsh ithaiyanashke.

³² A̱hli mak o̱ hʋchim achi lishke; Himak a̱ hatak a̱sha ilʋppʋt ont ik ai ikshot ik kʋnio ki̱sha ho̱, momʋt ont aia̱hli ha chi̱ hoke.

³³ Ʋba shutik, micha yakni aiena hokʋto ont ik ai iksho ka he; amba ʋno ʋm anumpa puta hatuk ʋto ont ik ai iksho ka he keyu hoke.

³⁴ Micha ahah! hʋsh il aiahnashke; yʋmmak keyukmʋt kanima kash inli ho̱ isikopa, micha na homi ishkot haksi, mikmʋt yakni ilʋppa antʋt nana ai okcha̱ya he anukfoyuka fehna aiena kak osh hʋchi chu̱kʋsh ma isht alotʋt atʋpa, yohmi na hʋch ik akostinincho ho̱, nitak yʋmmʋt a̱yʋt ant hʋchi̱ kohcha hinla hoke.

³⁵ Yʋmmak okʋt nan‐isht hokli o̱ chiyuhmit a̱yʋt, yakni pataiya ai aha̱shwa tuk a̱ mominchit i̱ kohcha hi oke.

³⁶ Yʋmohmi hoka il a nukta̱hlʋt ʋba pit anumpohonlit hʋsh biliashke: yohmi tuk osh nana kʋt a yakohma chi̱ puta ka mominchit ai i̱ hlakofit, Hatak Ushi itikba ya̱ hiohma̱ya hi ʋt a hʋchi ʋlhpesashke, im achi tok.

³⁷ Mihmʋt nitak okʋno tempel anu̱kaka yak o̱ nana ithʋnanchit anta tuk osh, ninak ano kohchʋt ia mʋt, nʋnih chaha Alif hohchifo ho̱ ont antʋt on onna tok.

³⁸ Atuk o̱ onnahinli fehna i̱ haponakla chi̱ kʋt, okla hʋt momʋt tempel a̱ im ai ona tok.