ʋBanumpa Luk Ʋt Holissochi Tok 20 - Chahta Holisso Holitopa 1886

Kanimi kʋt, Klaist kaniohmit isht im ai ʋlhpesa hosh yʋmohmi hatuk ʋt atokowa anola chi̱ ka, im ahni hatuk o̱ nan anoli, 1, 9 Pa̱ kʋpi a hollokchi isht ʋlhpisa. 20 Iskʋli itʋnali ʋt Sesa ak o̱ im itahoba he ai ʋlhpesa hatuk a̱ Chisʋs ʋt otʋninchi. 27 Chisʋs ʋt hatak illi falamʋt tana he ilʋppa Satusi okla ha̱ isht it im anumpuli mʋt, anumpa ha̱ i̱ kobʋffi. 41 Klaist ʋt a katiohmi kak osh Lewi a̱ ushi okmʋt, anonti Lewi a̱ in Chitokaka ya hinla chishba? achit Chisʋs ʋt ponaklo tok.

¹ Atuk o̱ yakohmi tok: nitak yʋmma foka ma tempel anu̱kaka ya̱ okla nana im abʋchi, micha ʋbanumpa isht anumpuli aiena hosh ahanta ma, na‐holitompa isht a̱sha pehlichi ʋhleha, micha na‐holissochi ʋhleha, mikmʋt hochitoka ʋhleha aiena kʋt ai it api̱hʋt ant i̱ kohcha tok.

² Mihmʋt im anumpulit, Nan‐isht ai ʋlhpesa nana ho̱ ilʋppa puta ka isht ish yakohmichi, micha kʋna hosh nan isht ai ʋlhpesa ilʋppa chima tok a̱ ish pim anolashke, achi tok.

³ Mihma yʋmmak ash ot afalaminchi mʋt, Ʋno ak kia nana achʋfa ka hʋchi̱ ponaklo la chi̱ hoke, mikma is sʋm anolashke.

⁴ Chan baptismo ʋt ʋba yak o̱ a minti hokmá, keyukmʋt hatak ak o̱ a minti hokmá, nanta ha tok o̱? im achi tok.

⁵ Mihma ilap bi̱ka nan it im achit ma̱ya mʋt, Ʋba yak o̱ a minti tok; il achi hokma, Nanta katiohmi ho̱ yʋmma hʋch ik i̱ yimmo ke tuk oh cho? acha hinla.

⁶ Amba anonti, Hatak ak o̱ a minti tok; il achi hokma, Chan ʋt hopaii a tok a̱ okla yimmi hatuk okʋt, okla momʋt tʋli isht pi bola hinla hoke, achi tok.

⁷ Mihmʋt afalaminchit, Kanimampo kak a tok a̱ kil ithanoshke, okla im achi tok.

⁸ Mihma Chisʋs ash ot, ʋno ak kia nan isht ai ʋlhpesa nana ho̱ ilʋppa puta ka isht yakohmichi li hatuk ʋt ak hʋchim anoloshke, im achi tok.

⁹ Mihmʋt nan‐isht ʋlhpisa ilʋppa okla ha̱ isht anumpulit isht ia tok: Hatak achʋfa hosh pa̱kʋpi a̱ hokchit tahli cha, hatak toksʋli ʋhleha ho̱ i̱ pota cha, yakni hopaki ho̱ nowʋt a̱ya na ahchiba tok.

¹⁰ Atuk osh a waya ont ʋlhpesʋt taha ma, pa̱kʋpi a hollokchi a waya ka okla ipeta chi̱ ho̱, yʋmmak ash ot tishu ha̱ hatak toksʋli ʋhleha hash pit i̱ chʋffichi tok: yohmi tok kia hatak toksʋli ʋhleha hash ot yʋmmak ash o̱ boli cha, nana ik im iksho ho̱ kanima pit chʋffichi tok.

¹¹ Mihma anonti tishu inla ho̱ pit chʋffichi tok; atuk o̱ yʋmmak ash kia okla bolit hofahyalichi fehna cha, nana ik im iksho ho̱ kanima pit chʋffichi tok.

¹² Mihma anonti ont atuchina ma pit chʋffichi tok; yohmi ma yʋmmak ash kia okla bolit ai okpʋninchi cha, kocha pit pila tok.

¹³ Yohmi ma pa̱kʋpi a hollokchi ʋt immi hatuk ash ot, Nanta ho̱ katiohmi la chi̱ cho? sʋso a̱ holitopa yak o̱ pit chʋffichi lashke; yʋmmak okmʋno okla pisakmʋt, holitobla hinla yoba ká, achi tok.

¹⁴ Yohmi tuk kia hatak toksʋli ʋhleha hash ot yʋmmak ash o̱ pisa mʋt, Ilʋppak osh immi ha he mak oke; inta! kiloh ʋbí, atuk mʋt nan im ai ʋlhtoshowa he tuk ʋt hʋpimmi ha hinla hoke, ilap bi̱ka it im achit ma̱ya tok.

¹⁵ Mihma yʋmmak ash o̱ pa̱kʋpi a hollokchi a̱ ishit a kohchi cha, okla ʋbi tok: yohmi kʋno pa̱kʋpi a hollokchi ʋt immi hatuk ash ot yʋmmak ash o̱ nanta ho̱ katimihcha hinla cho?

¹⁶ Yʋmmak ash ot a̱yʋt ʋla cha, hatak toksʋli ʋhleha ilʋppak ash ʋbit tahlikmʋt, pa̱kʋpi a hollokchi ash inla yo̱ i̱ pota hi oke, achi tok. Mihma okla haklo mʋt, Yohma hi a̱ Chihowa yʋt ik ahno kashke, okla achi tok.

¹⁷ Mihma okla ha̱ atokolit pisa mʋt, Yohmi ka tʋli ya̱ chuk‐ikbi ʋhleha hʋt shitilema yash o̱ mihi ash inli hosh chukbika nutaka in tola holitopa i̱ shahli ho̱ tobʋshke, achi holisso ilʋppʋt katiohmi hoh cho?

¹⁸ Kʋna hosh tʋli yʋmma onʋtulakmʋt, kobahla he; amba yʋmmak ash ot kʋna ho̱ onʋtula hokmʋto, litolit kaiyancha hi oke, achi tok.

¹⁹ Yohmi ma hʋshi kanʋlli ʋlhpisa yʋmmak fehna ka na‐holitompa isht a̱sha pehlichi ʋhleha, micha na‐holissochi ʋhleha aiena kʋt, yʋmmʋt nan‐isht‐ʋlhpisa ilʋppa ilap ak o̱ isht anumpuli hatuk a̱ okla akostininchi hatuk osh, yʋmmak ash ishi bʋnna hokak osh okla hak o̱ i̱ nukshopa tok.

²⁰ Mihmʋt okla apesʋchi beka; yohmi mʋt hatak ʋlhpesa ilahobi cha, yʋmmak ash ilap im anumpa akinli ho̱ ai isht onochi: yohmi hokmak osh yʋmmak ash ishit hatak pehlichi ibbak a̱ ont fohki na nana im apesa hinla ka, na pi̱sa ʋhleha ha̱ tohno tok.

²¹ Mihmʋt yʋmmak ash ot okla i̱ ponaklot, Nan ithʋnanchi ma! nana kʋt ai‐ʋlhpiesa ho̱ ish miha, mikmʋt ish ithʋnanchi, yohmi kʋt hatak mʋt a chim it i̱ shahsholi keyu, amba Chihowa i̱ hina ai a̱hli mak o̱ ish ithʋnanchi chatuk a̱ il ithaiyanʋshke.

²² Noshkobo isht chumpa tʋli holisso a̱ Sesa yak o̱ ima he ai ʋlhpesa hokmá, keyukmá, nanta cho? pit achi tok.

²³ Yohmi kia yʋmmak ash ot okla nan‐ilahobi ka akostininchi hatuk osh, Nanta katiohmi ho̱ imomakachit hʋs sa pisa cho?

²⁴ Iskʋli a̱ oh a̱ haiakʋchí. Kʋta hak o̱ holbʋt toba ho̱, mikmʋt kʋta ho̱ a hohchifo ho̱? im achi tok. Mihma afalaminchi mʋt, Sesa yak oke, okla im achi tok.

²⁵ Mihma yʋmmak ash ot, Yohmi hoka nana kʋt Sesa yak o̱ ai immi hokma Sesa yak o̱ hʋsh imashke; mikma nana kʋt Chihowa yak o̱ ai immi hokmʋno Chihowa yak ashke, im achi tok.

²⁶ Yohmi ma okla itikba ya̱ im anumpa ha̱ ai isht onocha he keyu mʋt, yʋmmʋt nana miha ka anukhlakancha cha, nana ik acho ki tok.

²⁷ Yohmi ma Satusi ʋhleha kanimi kʋt, Illi yʋt falamʋt tana he keyu, achi chatuk osh im ai ʋla cha, i̱ ponaklot,

²⁸ Nan‐ithʋnanchi ma! hatak nana kia itibapishi hʋt illi kʋt tekchi ʋt a̱sha hosh, ʋlla yʋt iksho ho̱ illi hokma, itibapishi hatuk ak osh tekchi atuk a̱ ilaueli cha, itibapishi hatuk a̱ ʋlla isht im ai ikba hi oka, Moses ʋt holissochit pi̱ bohli tok.

²⁹ Yohmi tok o̱ itibapishi hʋt untuklo hosh a̱sha tok: atuk o̱ akni ak osh ohoyo itauawa tuk osh, ʋlla yʋt iksho ho̱ illi tok.

³⁰ Mihma atu̱kla kash ot yʋmmak ash ilaueli tuk osh, anonti ʋlla yʋt iksho ho̱ illi tok.

³¹ Yohmi ma ont atuchina kash ot ilaueli; yohmi tok o̱ ont isht untuklo kash kia yʋmmak ash inli ho̱ chomit ilaueli; yohmi kʋt ʋlla kia iksho ho̱ illi tok.

³² Ont isht aiyopi fehna ma ohoyo hash kia illi tok.

³³ Yohmi ka untuklo kash ot yʋmma tekchi ikbit ilaueli tok okʋno, illi yʋt falamʋt tanikma, katima kak o̱ tekchi mak a hi oh cho? achi tok.

³⁴ Mihma Chisʋs ʋt afalaminchit, Yakni ilʋppa ʋlla yokʋto itauwaya, mikmʋt ʋlhpowʋchit itauwayʋchishke.

³⁵ Amba yakni yʋmma pisa he, micha illi tok ʋt falamʋt tana he aiena kʋt ai im ʋlhpesa tuk yʋmmak okʋto itauwaya he keyu, micha it im apobʋchit itauwacha he keyu hoke,

³⁶ Mikmʋt himmakma illa he keyu; yʋmmak okʋt enchil ʋhleha hak o̱ ai itilaui hokʋt, micha falamʋt tani tok okla hokʋt Chihowa im ʋlla mak oke.

³⁷ Illi yʋt tana he, Moses ak kia bʋfaha anu̱kaka ya̱ ai otʋninchi mak osh Chitokaka yʋt Eblaham in Chihowa, mikmʋt Aisaak in Chihowa, micha Chekob in Chihowa aiena ka hochihi̱fo tok.

³⁸ Yʋmmak okʋt illi ak o̱ in Chihowa yo̱ keyu, amba okcha̱ya yak oke; yʋmmak o̱ moma kʋt ai okcha̱ya hoka, im achi tok.

³⁹ Mihma na‐holissochi ʋhleha kanimi kʋt afalaminchit, Nan ithʋnanchi ma! ʋlhpesa fehna ho̱ ish mihʋshke, achi tok.

⁴⁰ Mihmʋt yʋmmak atuk o̱ i̱ himmakma okla nan i̱ ponaklo kʋt nukwia tok.

⁴¹ Mihma yʋmmak ash ot okla hash, Katiohmi ho̱ Klaist ʋt Lewi a̱ Ushi okla achi cho?

⁴² Mihma Lewi ʋt ilap inli kʋt ataloa holisso ha̱, Chitokaka yʋt an Chitokaka ya̱, Sʋbbak isht‐impakimma ya̱ ish binili na,

⁴³ Chin tʋnʋp ʋhleha ha̱ chiyi yʋt ai‐o̱‐hikia yo̱ ikbi lashke, im achi tok, achishke.

⁴⁴ Lewi ʋt yʋmma Chitokaka achi, yohmi ka katiohmi hosh ilap ushi oh cho? im achi tok.

⁴⁵ Yohmi mʋt okla momʋt ha̱klo na nan im ai ithʋna ʋhleha yash,

⁴⁶ Na‐holissochi ʋhleha nafohka holitopa hofʋloha ho̱ abehkʋchit itʋnowa bʋnna, micha ilhpak a kanchi ai it‐aiokpʋchi yak o̱, micha sinakak puta anu̱kaka ma ai‐o̱‐minili holitopa i̱ shahli puta kak o̱, mikmʋt impa chito a̱sha ka aiasha holitopa i̱ shahli puta kak o̱ ai im achukma ʋhleha;

⁴⁷ Ohoyo i̱ hatak illi ʋhleha in chuka puta ka a wehpuli, micha peh ilahobi kʋt ʋba pit anumpuli aiena kʋt falaiachi ʋhleha ha̱ ahah! hʋsh im aiahnashke; yʋmmak okʋto na palʋmmi chito i̱ shahli ho̱ pisa he mak oke, im achi tok.