ʋBanumpa Luk Ʋt Holissochi Tok 19 - Chahta Holisso Holitopa 1886

Sakeʋs ʋt ʋbanumpa anukfohka tok a̱ isht anumpa, 1, 11 Hatak holitompa hosh mi̱ko tobʋt ia hosh, in tishu ʋhleha ha̱ tʋli holisso ibbak fohki. 25 Chisʋs ʋt issuba haksobish falaia himita yo̱ o̱ minilit a̱ya hosh Chelusalem a̱ ont chukowa; 45 Chisʋs ʋt tempel a̱ ont chukowa cha, nan itatoba ʋhleha ma̱ya tuk a̱ kocha pit tihleli.

¹ Mihma Chisʋs ʋt Cheliko ont chukowʋt a hlopullit ia tok.

² Mihma hatak ʋt pʋblikan ʋhleha pehlichi yosh Sakeʋs hohchifo kʋt, nan in laua hosh anta tok.

³ Atuk osh yʋmmak ash ot, Kʋta hoh chishba? ahni mʋt, Chisʋs a̱ pisa bʋnna tok: atuk ak osh okla a fohopa fehna hatuk o̱, ik chaho hatuk osh na kanihma he keyu ki tok.

⁴ Mihmʋt yʋm‐imma ont ia chi̱ hatuk o̱, pisa chi̱ hosh tikba pit malelit, bihi iti o̱ ont oiya tok:

⁵ Atuk o̱ Chisʋs ash ot yʋmmak ash o̱ ʋla mʋt, pit ʋba chakalit yʋmmak ash o̱ pisa cha, Sakeʋs ma! tu̱shpʋt akowá; himak nitak a̱ chin chuka ya̱ anta la chi̱ hatuk oke, im achi tok.

⁶ Mihma yʋmmak ash ot tu̱shpʋt akowa cha, na yukpa fehna hosh yʋmmak ash o̱ ilauelit ilap in chuka isht chukowa tok.

⁷ Mihma okla hʋt pisa mʋt, momʋt lumasit na mihachit, Hatak nan ashʋchi yo kak o̱ ont ibai ʋtta chi̱ hosh ia tuk, achi tok.

⁸ Mihma Sakeʋs ash osh hikia cha, Chitokaka yash, Inta! Chitokaka ma! ʋm ilayak a̱ iklʋnnachit ilbʋsha ya̱ im issa lishke; yohmi kʋt hatak nana kia nanasi ka anumpa isht a holabi hosh im ishi li tuk okmʋt, yummak atuk a̱ ohmi ushta ho̱ i̱ falamichi lashke, im achi tok.

⁹ Mihma Chisʋs ash ot, Ilʋppak kia Eblaham ushi akinli hatuk oka, himak nitak a̱ ai‐okcha̱ya yʋt chuka ilʋppa ʋlʋshke.

¹⁰ Hatak Ushi ʋt okpulot taha tok mak o̱ hoyot okchalincha chi̱ hosh a̱ya tok oka, achi tok.

¹¹ Mihma ilʋppa puta ka okla haklo ma, achakalinchi mʋt, Chelusalem a̱ ona̱ he, micha Chihowa apehlichika yʋt chekosi otʋna hinla ka, okla im ahoba aiena hatuk oka, nan‐isht‐ʋlhpisa ho̱ isht anumpuli tok.

¹² Yohmi hatuk osh, Hatak holitompa achʋfa hosh mi̱ko ont ʋlhtoka cha, falamʋt a̱ya hi osh yakni hopaki ka ia tok.

¹³ Mihmʋt in tishu pokoli ka hoyo cha, tʋli holisso weki pokoli ka ibbak fohki mʋt, Nan isht hʋsh itatomba tuk o̱, ʋla lashke, achi tok.

¹⁴ Atuk ak o̱ i̱ yakni achʋfa okla hash ot i̱ nukkilli cha, Hatak yʋmmak okʋno ik pi pehlichí, il ahna he keyu, achit anumpa shali a̱ iakaiyachit pit chʋffichi tok.

¹⁵ Atuk o̱ yakohmi tok; yʋmmak ash ot mi̱ko ont ʋlhtokʋt im ʋlhtaha cha, falamʋt ʋla; yohmi mʋt nana isht itatoba kʋt hatak achʋfa aiyuka kʋt kaniohmi ho̱ ahayuchi tukma, akostinincha hinla kʋt, tishu ʋhleha ilʋppa tʋli holisso ima tok ash, yʋmmʋt im annoa cha, im ai ʋla chi̱ ka, apesa tok.

¹⁶ Mihma ti̱kba ʋla kʋt, Chitokaka ma! chin tʋli holisso weki achʋfa tuk ash osh weki pokoli ho̱ isht il ahayuchi li tuk oke, achi tok.

¹⁷ Mihma yʋmmak ash o̱, Ʋlhpesa, tishu chi achukmʋshke; nana kʋt ik lauwo fehna kia aia̱hli chi achukma tuk okʋt, tʋmaha pokoli ho̱ ai i̱ shalhit ish pehlicha chi̱ kʋt a chim ʋlhpiesashke, im achi tok.

¹⁸ Mihma atu̱kla kʋt ʋla mʋt, Chitokaka ma! chin tʋli holisso weki achʋfa tuk ash ot weki tahlapi ho̱ isht il ahayuchi li tuk oke, achi tok.

¹⁹ Mihma yʋmmak ash kia, Chishno mʋt, tʋmaha tahlapi ho̱ ish pehlicha chi̱ kʋt a chim ʋlhpiesashke, im achi tok.

²⁰ Yohmi ma inla yosh ʋla mʋt, Yakeh! Chitokaka ma! chin tʋli holisso weki achʋfa kash nantapʋski yo̱ a bonullit bohli li tuk o̱, yak itonlʋshke.

²¹ Nana ka chishno ak osh ish bohli tuk keyu kia, ish ishi; yohmikmʋt ish hokchi tuk keyu kia ish mo chatuk; hatak palʋmmi chia hatuk oka chi̱ sa nukshopa tuk oke, im achi tok.

²² Mihma yʋmmak ash o̱, Tishu haksi chia ka chishno chitih a kohcha kak inli ho̱ nan isht chim apesa la chi̱ hoke. Hatak palʋmmi sia nana ka ʋno yak osh bohli li tuk keyu kia ishi li; mikmʋt hokchi li tuk keyu kia ʋmo li chatuk a̱, ish ithana;

²³ Yohmi ho kak osh na katihmi ho̱ an tʋli holisso weki achʋfa kash tʋli holisso a bohli a̱ chik bohlo ke tuk o̱, ʋla li kʋt ʋmmi hash a chelichi hosh ak hoyo cho? im achi tok.

²⁴ Mihmʋt bili̱ka hiohma̱ya kash o̱, Yʋmma tʋli holisso weki achʋfa kash oh im ishi cha, tʋli holisso weki pokoli ha̱ i̱shi kak o̱ oh imá, im achi tok.

²⁵ Mihma, Chitokaka ma! yʋmmak okʋto tʋli holisso weki pokoli ka i̱shishke, okla im achi tok.

²⁶ Kʋna hosh i̱shi hok mak o̱ ima he; amba ik im iksho hatuk okʋno i̱shi tuk ash kia, im ai isha hi oka, hʋch im achi lishke.

²⁷ Amba a̱ nukkilli ʋhleha hʋt i̱ mi̱ko la he tuk a̱, ʋlhpesa ik ahno ke tuk yʋmmak okʋno ilʋppa isht ʋla cha, sa tikba ya̱ oh ai ʋbí, achi tok oke, achi tok.

²⁸ Micha ilʋppa yakohmichit anumpuli mʋt, tikba hikʋt Chelusalem a̱ pit oiyʋt ia tok.

²⁹ Atuk o̱ yakohmi tok; Betfachi, micha Betani aiena ka auet bili̱ka nʋnih chaha Alif hohchifo ho̱ ʋla mʋt, nan im ai ithʋna ya̱ tuklochit pit tihleli mʋt,

³⁰ Iʋt tʋmahushi hʋchi chapaka talaia ka hʋsh onashke: yʋmma ont hʋsh chukowak fehna kʋt issuba himita hatak ʋt ik o̱ minilo ki̱sha yosh talakchit hikia na hʋsh pisa chi̱ hoke; yʋmma hʋsh i̱ hotofi cha, isht hʋsh lashke.

³¹ Mikma hatak nana hosh hʋchim ponaklot, Nanta katiohmi ho̱ hʋsh i̱ hotofi cho? achikma, Chitokaka yak osh bʋnna hatuk oke; hʋsh im achashke, im achi tok.

³² Mihma ʋlhtoka tuk ash ot itiachi mʋt, yʋmma nana ai i miha tuk ash yohmi fehna mʋhli ho̱ ont pisʋt okla tok.

³³ Micha issuba himita yash i̱ hotofi hosh aha̱shwa ma, yʋmmʋt immi atuk ash ot, Nanta katiohmi ho̱ issuba himita ya̱ hʋsh i̱ hotofi cho? im achi tok.

³⁴ Mihma, Chitokaka yak osh bʋnna hatuk oke, achi tok.

³⁵ Mihmʋt yʋmmak ash o̱ Chisʋs a̱ isht im ona; yohmi ma issuba himita yash anchi puta ka om pʋlli cha, Chisʋs a̱ okla o̱ minilichi tok.

³⁶ Micha ia hosh a̱ya ma, hina ya̱ im anchi puta ka okla pʋlli tok.

³⁷ Atuk osh yʋmmak ash ot ona̱ he Alif nʋnih ha̱ pit okʋtanowʋt ma̱ha̱ya ma, nan im ai ithʋna ʋhleha okla chito ash ot moyumʋt na fehna puta kʋt yʋmohmi na okla pihi̱sa tuk ʋt, na yukpʋt chitolit tahpʋlʋt, Chihowa ya̱ pit aiokpahanchi tok.

³⁸ Chitokaka i̱ hohchifo ho̱ a̱ya kʋt mi̱ko yʋmmʋt holitopʋshke; ʋba ya̱ nanaiya achukmakma, achaha moma i̱ shahli ma Chihowa ʋt ik a holitopá, achi tok.

³⁹ Mihma Falisi ʋt okla laua takla a̱sht a̱ya tuk ʋt kani mi kʋt, Nan ithʋnanchi ma! na chim ai ithʋna ʋhleha ha̱ im alʋmmí, im achi tok.

⁴⁰ Mihma yʋmmak ash ot afalaminchi mʋt, Yakohmi kʋt ont yokopa hokma, tʋli puta kʋt chekosi fehna tahpʋlʋt anumpula hinla hoka, hʋch im anoli lishke, im achi tok.

⁴¹ Atuk osh bili̱ka ona cha, tʋmaha hash pit pisa cha, isht yaiya mʋt,

⁴² Chishno akinli fehna kʋt a chi̱ nitak ilʋppa fehna kak kia nana isht chi ai yukpa he ai ʋlhpesa ka ish ithaiyana tok okbato; amba himak okʋno chi̱ holhponayo ha̱ ai in lumʋt kʋnia hoke.

⁴³ Chin tʋnʋp ʋhleha hʋt yakni kullit on talaka holihta kʋllo ai ikbichit isht chi a folʋblit a chim oktʋbli bieka na anu̱kaka ya̱ ish foyuka hi a̱ nitak ʋt chim a̱ya hi oke.

⁴⁴ Yohmikma a chi̱ nowʋt a̱ya he nitak a̱ chik ithaiyano ke tuk oka, chishno, mikmʋt chim ʋlla chi anu̱kaka a̱sha aiena ka yakni ak o̱ ai itilauechit aka chi bohla he; mikmʋt tʋli achʋfona kia it ʋlantʋt kaha hi a̱, ik chim ahno ka hi oke, achi tok.

⁴⁵ Mihma tempel a̱ ont chukowa cha, anu̱kaka yʋmma nana a kanchi, micha nana a chumpa aiena ma̱ya tuk ash kocha pit yuhli mʋt,

⁴⁶ An chuka yʋt ʋba pit ai anumpuli chuka yoke: achi hosh holisso tok okak o̱, hʋchishno yokʋto na hu̱kopa ʋhleha in chuka yo̱ hʋsh ikbishke, im achi tok.

⁴⁷ Yohmi mʋt nitak moma tempel anu̱kaka ya̱ nana im ai abahanchi tok. Yohmi kia na holitompa isht a̱sha pehlichi ʋhleha, mikmʋt na‐holissochi puta, micha hatak hochitoka ʋhleha aiena kʋt ʋbi bʋnnʋt aiasha tok.

⁴⁸ Yohmi kia okla momʋt im a haponaklo kʋt im achukma fehnʋt aiasha hatuk o̱, nana a kaniohma hinla kʋt ik ithaiyano ki tok.