ʋBanumpa Luk Ʋt Holissochi Tok 17 - Chahta Holisso Holitopa 1886

Chisʋs ʋt nan im ai ithʋna ʋhleha hʋt ahah! ahni cha, inla ya̱ ik yoshublecho ka he, 1, 3 micha ilap bi̱ka yʋt nana ka it i̱ kashofa he aiena ka i̱ miha: 6 na yimmi aiahlika yokʋt na fehna ka anoli: micha Chihowa ha̱ holitobli kʋt nana ho̱ ik yʋmohmi kia im anu̱kfila mʋt akanlosi bieka hi a̱, i̱ miha; 11 leplosi ʋbi a̱ hatak pokoli ho̱ hlakofichi; 20 Chihowa apehlichika yʋt hatak chu̱kʋsh anukaka ak o̱ fohka: micha kʋna hosh yʋmmak oka nan isht ik ahno tuk okʋto momʋt ont ai okpulokʋt taha pulla hi a̱, anoli.

¹ Yohmi mʋt nan im ai ithʋna ʋhleha ha̱sh o̱ ik kaniohmi hoh kia nana isht ai ibetʋbli okʋt iksho ka chi̱ keyu pulla hoke; yohmi kia kʋna ho̱ yʋmmʋt isht a tobakma, mihi yosh nan i̱ palʋmmi mak oke.

² Chipunta ilʋppa achʋfona ka ibetʋblichi hokmʋt, ilap ak o̱ ikunla ya̱ tʋli chito na botoli ak osh a takanli ho̱, okhʋta ha̱ pit okʋchi kak o̱, ʋlhpesa kʋt im i̱ shahli hoke.

³ Ahah! hʋsh il aiahnashke. Ish itibapishi hʋt chi̱ yoshuba hokma, im alʋmmit nana ish i̱ mihashke: yohmi na yʋmmak ash ot nukha̱klot ile kostininchi hokma, kashofit ish i̱ kanchashke.

⁴ Micha nitak achʋfa ka untuklo ha chi̱ yoshuba cha, anonti nitak achʋfa ka untuklo ha yo̱ filemʋt, Sa nukha̱kloshke, achi hokma, ish i̱ kashofa he mak oke.

⁵ Mihma ʋbanumpeshi ʋhleha hash ot Chitokaka yash, Na pi yimmi ka i̱ shahlichit ish pi nukfohkashke, im achi tok.

⁶ Mihma Chitokaka̱ yash osh, Na hʋchi yimmi kʋt mʋstʋt nihi achʋfa ka chohmi hosh hʋchi anukfo̱ka hokmʋt, bihi ʋpi ilʋppa hakshish fehna ai isht alobafʋt okhʋta hak o̱ ont ish a holokchashke, hʋsh im achikma, hʋchim antia hinla hoke.

⁷ Yohmi ka hʋsh katima kak osh yuka hʋt im anta tuk ʋt yakni patʋffi hokmá, keyukmʋt wak ipeta hokmá, nana hosh anta tuk osh osapa mintit ʋla makinli ho̱, Iʋt ont binili cha, impá, im acha hinla̱?

⁸ Amba yʋmmak o̱ keyukmʋt; Nana ho̱ opiaka impa la chi̱ ka atahli cha, il ai‐ʋskofʋchit chin taha cha, nan isht is sʋm anta na impʋt nan ishko aienʋt issa li ha yo̱, himmak o̱ impʋt nan ish ishkashke, im acha hinla keyu̱?

⁹ Micha yuka yʋmmak ash ot nan ai im ʋlhpisa atuk ash ot yʋmihchi ma, yak oke! im ahni ho̱? keyu ka, ʋm ahobʋshke.

¹⁰ Yohmi hoka yʋmma chiyuhmit hʋchishno mʋt, nana kʋt a hʋchim ʋlhpisa tuk ʋt mominchit ont hʋsh ataiyahlikmʋt, Nana ho̱ isht ai yukpa hi o̱ keyu tishu pia: nana ka isht il ai ʋtta hi a̱ pim ʋlhpesa tuk mak osh e yʋmihchishke, hʋsh achi makinlashke, achi tok.

¹¹ Atuk o̱ yakohmi tok: yʋmmak ash ot Chelusalem ia hosh a̱ya mʋt, Samalia micha Kalili ai̱ena ka iklʋnna hlopullit ia tok.

¹² Micha tʋmahushi achʋfa ho̱ ont chukowak fehna, hatak pokoli kʋt leplosi ʋbi yosh ant afama cha, mishemanchit auet hieli tok.

¹³ Mihmʋt chitoli hosh okla anumpulit, Chisʋs pi̱ shahli ma! ish pi̱ nukha̱klashke, achi tok.

¹⁴ Mihma yʋmmak ash ot pit pisa mʋt, Oh ia cha, na‐holitompa isht a̱sha ʋhleha hak o̱ ont hʋsh im ile haiakʋchashke, im achi tok. Atuk o̱ yakohmi tok: ilhkoli hosh a̱sht a̱ya mʋt, okla hlakofi tok.

¹⁵ Mihma yʋmmak ash ot achʋfʋt hlakofi kʋt ile pisa mʋt, falama cha, chitoli hosh anumpulit, Chihowa ha̱ holitoblichi tok.

¹⁶ Mihmʋt yʋmmak ash iyi ituma yak o̱ hlipia cha, yak oke! ahnit aiokpʋchi tok: yohmi kʋt yʋmmʋt Samalatan hatak a tok.

¹⁷ Yohmi ma Chisʋs ash ot anumpuli mʋt, Pokoli hosh hlakofi tuk keyu? amba chakkali mʋto?

¹⁸ Falamʋt Chihowa ha̱ holitoblichit a̱ya kut iiksho ho̱, amba oklushi inla hatak ilʋppak illʋshke, achi tok.

¹⁹ Mihmʋt yʋmmak ash o̱, Ish wakaya cha, ish iashke; a chi yimmika yak osh chi hlakofichi hoke, im achi tok.

²⁰ Yʋmohmi ma Falisi ʋhleha hʋt Chihowa apehlichika yʋt, Katiohmi kak o̱ a̱ya hi o̱? ahnit i̱ ponaklo ma, afalaminchi mʋt, Chihowa apehlichika yʋt ai im akostininchi ho̱ a̱ya he keyu.

²¹ Micha Yakeh! ilʋppak oke: keyukmʋt, Yakeh! yʋmmak oke; achi kak okmá, kanimampa he keyu hoke. Chihowa apehlichika yʋt hʋchi chu̱kʋsh anu̱kaka foyuka hoka, achi tok.

²² Yohmi mʋt nan im ai ithʋna ʋhleha hash o̱, Hatak Ushi i̱ nitak o̱ achʋfalichit pisa ka hʋchi bʋnna fehna kia, hʋch ik peso ka hi a̱ nitak ʋt ai ona pulla hi oke.

²³ Yohmi ka Yakeh! ilʋppak oke; keyukmʋt, Yakeh! yʋmmak oke; hʋchim achikmá, nana hi oke. Yohmikma iʋt hʋch ik im onokmʋt, hʋch ik iakaiyo kashke.

²⁴ Malʋtha kʋt shutik nutaka kanima ho̱ a malʋthakachit kohchakmʋt, shutik nutaka bakapa tʋnnʋp ma pit on tommi chatuk a̱, Hatak Ushi i̱ nitak ʋt ont ai ʋlhpiesakma, yʋmmak inli ho̱ chiyuhma hi oke.

²⁵ Yohmi kia ik a yʋmohmo ki̱sha ka, isht ai issikkopa mʋt in laua he; mikma hatak himonasi a̱sha ilʋppʋt ik i̱ yimmot ik ahnincho ka hi mak oke.

²⁶ Mikma Hatak Ushi i̱ nitak mʋt, Noah ʋt ahanta nitak a̱ a kaniohmi tok mak o̱, a chiyuhmi makinla hi oke.

²⁷ Okla impʋt, okla nan ishkot, ohoyo okla itauwayʋt, okla itauwaya hi ʋt im ʋlhpowʋchit aiasha tuk o̱, Noah ʋt peni chito a̱ pit chukowa nitak fehna ma, oka falama ʋt a̱ya cha, mominchit ʋbit taiyahli tok.

²⁸ Lat ahanta nitak a̱ a kaniohmi tok mʋt, okla impʋt, okla nan ishkot, okla na chumpʋt, okla na kanchit, okla na hokchit, chuka okla ikbi aienʋt aiasha tok.

²⁹ Yohmi tuk kia Lat ʋt Sotom a̱ a kohchʋt ia nitak fehna ma, mak, micha hituk lakna aiena kʋt ʋba ya̱ auet ai umba cha, mominchit ʋbit taiyahli tok.

³⁰ Yakohmi tok a̱ chiyuhmit Hatak Ushi ʋt ont haiaka nitak fehnakma, yʋmohma he akinli hoke.

³¹ Nitak yʋmma fehnakma kʋna hosh aboha paknaka anta na im ʋlhpoyak ʋt aboha anu̱ka a̱sha tuk ma, akowʋt apoyuʋt isht ik aiyo kashke; yohmikma anonti kʋna hosh osapa anta tukmʋt, falamʋt ik aiyo akinlashke.

³² Lat tekchi a tok a̱ hʋsh ithaiyanashke.

³³ Kʋna hosh ilap im ilhfiopak okchalinchi bʋnna hokʋto, kaiyancha he; mikma kʋna hosh im ilhfiopak a̱ ik i̱ hullo hokmʋt, okchalincha hi oke.

³⁴ Ninak yʋmma fehnakma topa achʋfa ka hatak tuklot ka̱ha tuk ma, achʋfa ka ai eshi na achʋfa hosh itonla he.

³⁵ Ohoyo tuklo hosh nan it iba botoli hosh a̱shwa tuk ma, achʋfa kash o̱ ai eshi na achʋfa hosh anta he.

³⁶ Hatak tuklo hosh osapa ya̱ a̱shwa tuk ma, achʋfa kash o̱ ai eshi na achʋfa hosh anta hi oka, hʋch im anoli lishke, im achi tok.

³⁷ Mihma okla afalaminchi mʋt, Chitokaka ma! katima yak o̱? im achi tok. Mihma yʋmmak ash ot, Kanima yo̱ illi haknip ʋt ituyulakma mihi yo̱ o̱ssi puta mʋt ont ai itahoba hi mak oke, im achi tok.