Loman 9 - Chahta Holisso Holitopa 1886

¹ Klaist ak o̱ nan ai a̱hli ka isht ai anumpuli li kʋt holabi li keyu, Shilombish Holitopa ak osh anukfokihinchi ho̱, isht akostininchi li yak kia nan atokowa ka anohonli ak inlishke.

² Yohmi kʋt sa chu̱kʋsh anu̱kaka ya̱ isht a nukha̱klo bilia, micha isht a weki chinto kʋt a̱ foyuka kak osh miha lishke.

³ Yohmi ka itibapishi li ʋhleha, ʋm okla achʋfa yak atuk pulla mak o̱ Klaist a̱ i filʋmmit sa kʋnia hi a̱, ahni la hinla hokbano.

⁴ Yʋmmak osh Islael isht atiaka ʋhleha hoke: yʋmmak o̱ ushi isht a toba, micha Chihowa yʋt holitopa fehnʋt im otaiyani, micha nan it im ʋlhpisa puta, micha ʋba nan ʋlhpisa in tonla, micha Chihowa isht aiokpʋchi, micha ai okcha̱yʋt bilia puta im issa tok aiena kʋt immi hoke:

⁵ Mihmʋt i̱ki ʋhleha tikba chash ot immi, micha yʋmmak o̱ Klaist ʋt hatak haknip imma hokʋno a minti tok osh, moma i̱ shaiyahlit Chihowa holitopʋt biliʋshke. Amen.

⁶ Chihowa im anumpa hokʋt aka itulʋt kʋnia tok o̱ chiyuhmi keyu hoke. Yohmi ka Islael ʋhleha hak osh moyumʋt Islael okla keyu hoke.

⁷ Micha Eblaham isht atiaka ʋhleha hokak osh moyumʋt im ʋlla ʋhleha keyu ak inli: amba Aisaak ak o̱ isht chi ai unchululi hohchifa hi oke.

⁸ Yohmi kʋt haknip imma im ʋlla ʋhleha hokʋto, Chihowa im ʋlla ʋhleha keyu hoke: amba im issa tok ʋlla ʋhleha hak osh isht ai unchululi mak osh toba ho̱ mak a chi̱ hoke.

⁹ Yohmi ka nan im issa tok isht anumpa hʋt ilʋppak oke, Ʋlhpisa tok nitak ont ai ʋlhpiesakma ʋla la hi oke, mikma Sela yʋt ushi im ʋtta hi oke.

¹⁰ Micha yʋmmak illa keyu; amba Lebeka yak kia achʋfa pi̱ki Aisaak ak o̱ isht ai i̱ chakali hatuk o̱;

¹¹ Yohmi ka ʋlla yokʋt ik a̱shwo ki̱sha hokʋt, nana achukma, nana ik achukmo nana kia ik yʋmihcho ki̱sha ak inli kia, nana ho̱ yʋmihchi tok ak o̱ keyu, amba ilap ak osh hoyo hatuk o̱ ʋlhtoka kʋt Chihowa nana ai ahni tok ʋt ai ahla chi̱ kak o̱;

¹² Yʋmmak ash o̱, Akni ak osh nakfish a̱ i̱ nutaka hi oke, im achi tok.

¹³ Holihi̱so kʋt, Chekob ano i̱ hullo li tok: amba Esau yokʋno ak i̱ hullo ki tok, ahanchi hatok oka.

¹⁴ Yakohmi ka nanta hak o̱ il acha hinla ho̱? Chihowa hʋt nana yʋmihinchi kʋt ik ai ʋlhpeso ho̱? ik yʋmohmo pullashke.

¹⁵ Yohmi ka, Kʋna ho̱ i̱ nukhaklo la he ahni likmʋt, i̱ nukha̱klo la hi oke; micha kʋna ho̱ i̱ kana la he ahni likmʋt, i̱ kana la hi oke, Moses a̱ im achi tok.

¹⁶ Yakohmi hoka yʋmmak ash o̱, ilap nan aiahni hokmá, mʋlihinli kak okmá, nana kak osh ishi ho̱ keyu; amba Chihowa yak osh i̱ nukha̱klo kak o̱ yʋmohmi hoke.

¹⁷ Yohmi ka, Chishno yak o̱ nan isht ʋm ai a̱hli yoka ai otʋninchi la he, micha sa hohchifo hokʋt yakni moma ka hlopullit ai annoho̱wa he, ilʋppak fehna kak atuk mak o̱ ik ahantá chim ai ahni li tok, Feleo ya̱ Holisso Holitopa yʋt im achishke.

¹⁸ Yʋmohmi hoka kʋna ho̱ i̱ nukha̱kla he ahnikmʋt, i̱ nukha̱klo hoke: micha kʋna ho kʋllocha he ahnikmʋt, kʋllochi hoke.

¹⁹ Yakohmi ka chishno yokʋt, Nanta katiohmi ho̱ ik ahnincho imoma ho̱? Kʋta hak osh ilap nan ai ahni ka i̱ sanali hatuk o̱? is sʋm acha chi̱ hoke.

²⁰ Yohmi ak inli kia, amba hatak chia ma! kʋta chia hokak osh Chihowa ya̱ i̱ sanalit ish anumpuli cho? Nana toba tok ʋt ikbi tok ash o̱, Nanta katihmi ho̱ yakohmichit chishno yʋt is sakbi tok o̱? im acha hinla ho̱?

²¹ Lukfampo ikbi yʋt lukfi ya̱ kanimihcha hi ʋt im ai ʋlhpiesa keyu ho̱? lukfi yʋmmʋska miash inli ka achʋfa kʋto isht a holitopa, mikma achʋfa kʋto isht a kʋllakshi ampo yo̱ ikbi chatuk keyu ho̱?

²² Yohmi ka Chihowa hut ilap isht i̱ nukkilli, micha ilap nan isht ai a̱hli ya̱ otʋnincha he ai ahni kak osh, isht i̱ nukkilli onʋtuyula he nan ai ʋlhto okpulot kʋnia he im ʋlhtaiyaha puta ka ilbʋshala hi ʋt i̱ sʋlaha fehna hatuk mʋt:

^23-24 Micha ilap isht a holitopa la̱wa fehna ka i̱ nuk ha̱klo onʋtuyula he nan ai ʋlhto puta, yʋmmʋt isht a holitopa pisa hi o̱ tikbanli im ataiyahli hatok ʋt, pishno yak fehna ka pi hoho̱yo hatok; Chu okla hak bano keyu, amba Chentail okla hak kia ai isht otʋnincha he ai ahni hatok okma, nanta katihmi cho?

²⁵ Hosea yak o̱ isht ai anumpohonli mʋt, ʋm okla ʋhleha hatok keyu ka ʋm okla ʋhleha hochifa la he: micha a̱ holitopa tok keyu kʋt, a̱ holitopa hi oke, ahanchi ak inli hatok oka.

²⁶ Yohmi ka, Ʋm okla hʋchia keyu ai im ahanchi tok ash inli, yʋmmak o̱ Chihowa okcha̱ya im ʋlla ʋhleha a hohchihi̱fa he mak oke.

²⁷ Esaias ak kia, Islael imma ka chitolit isht anumpohonli mʋt, Islael im ʋlla ʋhleha holhtina kʋt okhʋta on talaka shinuk ai asha kak o̱ chiyuhmi ak inli kia, kashapa hosh okcha̱ya he mak oke.

²⁸ Yohmi kʋt ilap im anumpa ha̱ ai a̱hlicha chi̱ kʋt ai ʋlhpiesa hosh tu̱shpa fehnʋt yʋmihcha hi oke: yohmi hosh Chitokaka yʋt yakni paknaka ya̱ a yʋmohma he ʋlhpisa tok anumpa ha̱ ai a̱hlicha he mak oka.

²⁹ Mikma Esaias ʋt tikba kash, Sabaolh in Chitokaka yak osh kashapa ka pim ashahanchi hatuk keyukma, Sotom atok ash inli ho̱ e chiyuhmi, micha Komolah yak o̱ chiyuhmit e toba hi atok oke, ahanchi tok.

³⁰ Yakohmi ka nanta hak o̱ il acha hinla ho̱? Chentail okla hʋt nan isht ai ʋlhpiesa yak o̱ achunanchit hoho̱yo hatuk keyu kʋt, isht ai ʋlhpiesa na yimmi yak o̱ ai isht ai ʋlhpiesa yak fehna ka ihi̱shi hatok oke.

³¹ Amba Islael okla hokʋto nan ʋlhpisa isht ai ʋlhpiesa ya̱ achunanchit hoho̱yo kʋt, nan ʋlhpisa isht ai ʋlhpiesa ya̱ ik ai ono hatok oke.

³² Yohmi ka katiohmi hatok o̱? isht ai ʋlhpiesa yash o̱ isht ai yimmi kak o̱ keyu, amba nan ʋlhpisa yak o̱ a mihinta hi ash o̱ in chiyuhmit hoho̱yo hatok okʋt. Isht ai ibetʋbli tʋli yʋmma isht ibetʋbli hatuk okʋt.

³³ Holihi̱so kʋt, Yakeh! isht ai ibetʋbli, micha isht ai itula tʋli yo̱ Saion anu̱kaka ya̱ bohli lishke: yohmi ka kʋna hosh i̱ yimmikmʋt, hofahya he keyu mak oke, ahanchi tok oke.